ကဏှဇာတ်

ကဏှဇာတ်

ထွားသွဉ်ဟော်ꩻကျပ် ကဏှဇာတ်ယိုတဲင် ကလꩻအီသတိꩻ၊ ကလꩻအီပညာႏ၊ ကလꩻဒါႏ ထာꩻသေတရာꩻဖုံႏနဝ်ꩻ-

၁။ ဘွုံႏသွံခမ်းအကို အီႏဗွန်ဘုရာꩻယို အဲဉ်ထဝ်းအကျောင်ꩻ၊

၂။ ထာꩻမာꩻကဆဲင်ႏဒျာႏ ဗွေႏဘုရာꩻလွုမ်ꩻနဝ်ꩻ ပါꩻမုဲင်ꩻတဲ့ တုꩻနုဲင်းမာꩻနုဲင်း တဒါႏတဝ်းအကျောင်ꩻ၊

၃။ တသေတဒါႏတဝ်းတဲ့ ရိုꩻ'အသေအဒါႏ'မဉ်ႏအံႏလဲဉ်ဝင်ꩻနဝ်ꩻ မော့ꩻဒါႏ ထာꩻယပ်ꩻသေႏသေႏ၊ မဲ့ငါပေႏ တရေႏကုဲင်ဗာႏအကျောင်ꩻ၊

၄။ မဉ်ႏအာႏကွိုꩻအာႏရဲင်ꩻ၊ မဉ်ႏအာႏကွိုꩻပညာႏနဝ်ꩻ တခြိုꩻဥစ္စာႏ လꩻနွောင်ꩻဒျာႏအကျောင်ꩻ၊

၅။ သေဗာႏကေꩻဇူꩻ၊ ဖြော်ဗာႏကေꩻဇူꩻအကျောင်ꩻ-စတဲင်နုဲင်းနဝ်ꩻဖုံႏသွူ။

မုနိကဇာတ်

ထွားသွဉ်ဟော်ꩻကျပ် မုနိကဇာတ်ယိုတဲင် ကလꩻအီသတိꩻ၊ ကလꩻအီပညာႏ၊ ကလꩻဒါႏ ထာꩻသေတရာꩻဖုံႏနဝ်ꩻ-

၁။ မူႏနံꩻတန်ယင်ဟန်ႏနဝ်ꩻ ချောက်ကဝ်ꩻဒါႏ ရဟန်ꩻအကျောင်ꩻ၊

၂။ သျင်ႏရဟန်ꩻသီးယို ပေါႏတထိန်ꩻတဝ်း ဣန္ဒြေႏ၊ ပေါႏခြွိုင်းနမ်း၊ ပေါႏစူꩻသꩻကျွားနဝ်ꩻ မဉ်ထွက်ဒါႏထာꩻအကျောင်ꩻ၊

၃။ အွီႏကီတဲ့ အီႏသီလွဉ်ꩻဗာႏ ထာꩻအံႏမျိုꩻနဝ်ꩻ ဟဝ်အံႏတဝ်း၊ ဟဝ်အံႏဒျာႏ ထာꩻအံႏအပဲစ်ကင်ꩻကင်ꩻမျိုꩻနဝ်ꩻအကျောင်ꩻ၊

၄။ တွိုႏဝင်ꩻနဝ်ꩻ (ထော့ꩻနဝ်ꩻ) ခံႏအသီ တွိုႏနီနဝ်ꩻ ရိုꩻ'အအွီႏ'ဟဝ်ထီႏသညင်ꩻဗဲင်းဝင်ꩻအကျောင်ꩻ၊

၅။ ထော့ꩻကသီဖေႏဗာႏ မူႏနံꩻပွယ်ꩻမင်္ဂလာႏနဝ်ꩻ မဉ်ႏယူႏယွယွ သံႏဝွေႏဂဟဝ်လꩻငါႏအကျောင်ꩻ-စတဲင်နုဲင်းနဝ်ꩻဖုံႏသွူ။