ကထောင်ꩻဆာရောႏဂါႏ

‍‍‍‍‍‍‍‍‍‍ကထောင်ꩻဆာရောႏဂါႏနဝ်ꩻ ရာႏသီႏအခိန်ႏခါႏတရွေꩻတဝ်း ကုဲင်းထွာဒါႏဒျာႏ၊ တဆင်ႏနဝ်ꩻခွꩻ တဆင်ႏနဝ်ꩻလျား အခိန်ႏခါႏနုဲင်းယိုခါနဝ်ꩻ ယိန်းထွာအာသွူ။ ဥတုပြောင်ꩻတဲင် အခွꩻအလျာႏတငီႏတဝ်းအခိန်ႏနဝ်ꩻ ရောႏဂါႏသေ့ꩻပွါꩻမွိုင်ငါႏတဲင်တွော့ꩻ တဟေထာꩻခိန်ႏ မီႏပေ့ꩻတဝ်းဖြောင်းနဝ်ꩻ ရောႏဂါႏသေ့ꩻပါလွေꩻလွဉ်ꩻတလီꩻကိုတဲင် တဖြာꩻတွမ်ႏတဖြာꩻ ကူꩻရမွိုင်မွေးငါႏဝင်ꩻသွူ။ ကထောင်ꩻဆာရောႏဂါႏနဝ်ꩻ မာꩻသျုက်တရေင်အီစွဉ်ႏ အသောင်အရင်ꩻအရန်းတမွေးတဝ်းကီလဲ့ ကခံႏစာꩻသားနဝ်ꩻ အအံႏတဲ့ အံႏဗာႏဟဝ်တဝ်း၊ အွꩻထီတဲ့ယပ်ꩻ၊ မျောႏလင်ꩻယုဲင်ꩻထီငါတဲ့ဆာ၊ အုံအုံတဲ့အဝ်ႏပသꩻဆာစွဉ်ႏသေႏသေႏတဲင်တွော့ꩻ မာꩻရာꩻလဲင်ꩻတဒါႏတဝ်း ဒုက္ခမွေးငါႏသွူ။

ကထောင်ꩻဆာအီဗာႏအကျောင်ꩻ

ကထောင်ꩻကဆာဗာႏ အကျောင်ꩻခရာႏကဲဉ်းအာအာနဝ်ꩻ ကွပ်ပွိုးဗိုင်းရဲတ်သေ့ꩻတွော့ꩻ ထွာလွဉ်အီဗာႏဒျာႏသွူ။ ကထောင်ꩻကဆာအီဗာႏအကျောင်ꩻနဝ်ꩻ အဝ်ႏအာမျိုꩻအာစားတန်သွူ။ ကဲဉ်းအာအာနဝ်ꩻ -

1. သေ့ꩻဗိုင်းရဲတ်သ် - အခွꩻရိုပ်အီ ထာꩻသာꩻဖူꩻကိုရောႏဂါႏသေ့ꩻနွို့လွဉ်အီဒါႏ သေ့ꩻဗိုင်းရဲတ်အဝ်ႏအာမျိုꩻတန်သွူ။ သေ့ꩻတုတ်ကွေးဗိုင်းရဲတ်နဝ်ꩻ ကထောင်ꩻကုဲင်းဆာအီဒါႏသွူ။
2. သေ့ꩻဗဲတ်တီးရီးယား - သေ့ꩻဗဲတ်တီးရီးယားဖုံႏ မီႏရကူꩻလွဉ် နီꩻနာꩻနမ်းလောင်းနဝ်ꩻ တဒက်ꩻပြွꩻ၊ တဟေမောင်ꩻဆာ၊ အငဝ်းဖွိုင်ꩻယော့ꩻ၊ တဒက်ꩻယော့ꩻ၊ ကထောင်ꩻဆာအီဒါႏသွူ။
3. အစွူႏဓာတ် / အပွိုးအပါႏအထန်ႏဖဲ့ꩻ - ယာလိတ်လူး၊ တလီꩻစင်ႏကြယ်ႏတဝ်း၊ ကွပ်ပွိုးတလီꩻကို ဓာတုတခြိုဖုံႏပါလွဉ်ꩻတဲင် ကထောင်ꩻဆာအီဒါႏသွူ။ ဓာတ်တဲ့ꩻတဝ်း၊ တဟေထာꩻ၊ အထီဒွိုႏဆွုမ်ႏအီအဆာႏထန်ႏကီချာ(GERD)၊ ဒွေဒီႏ စတဲင် ရောႏဂါႏနုဲင်းယိုမီႏအဝ်ႏတဲ့ ကထောင်ꩻဆာအီဒါႏသွူ။
4. ဗာႏခွေါင်းမုꩻ - ထာꩻတစွိုးစွိုး မီႏခွေါင်းဆာဗာႏ ကထောင်ꩻတွမ်ႏ ငွဉ်ꩻတဲ့ ကထောင်ꩻဆာအီဒါႏနေနေသွူ။ ဥပမာႏ အဆွတ်ꩻဆော့ꩻ၊ တနေက်ꩻအဟာႏရ၊ ခြီခြဝ်သန်ငဝ်းတဲင်တွော့ꩻ ကထောင်ꩻဆာအီ။

ကထောင်ꩻဆာတဲင် ထွာအီဒါႏ ရောႏဂါႏလက္ခဏာႏဖုံႏ

1. အခွꩻရိုပ် (တဝ်းလဲ့) တုတ်ကွေး - နေ့ဖူပိစ်ꩻ၊ တဟေထာꩻ၊ နမ်းလျား၊ ကတူႏဆာ၊ စူခင်ႏနမ်းအင်္ဂါႏဆာအဲင်ႏ။
2. အငဝ်းဖွိုင်ꩻယော့ꩻ - ငဝ်းငုတ်၊ တဟေသဲင်ထာꩻ၊ တဆင်ႏဆင်ႏကထောင်ꩻစောင်းခြဲ့ꩻတဲင် ဆင်ႏဆင်ႏဖျင်ဗာႏကထောင်ꩻ။
3. တဒက်ꩻယော့ꩻ - အဒီႏတနျာႏပေါႏတဒက်လောင်း၊ မီႏမျောႏသော့ꩻအဟာႏရတဲ့ဆာ၊ ထာꩻဆော့ꩻထွိုင်ႏဒါႏ။
4. ထာꩻဆော့ဂလဉ်စျူ (glandular fever ) - အုံထာꩻနုဲင်းစွဉ်ႏဒျာႏ တရွော့ꩻပင်ႏပန်ꩻမွေးမုဲင်းထာꩻ ငွဉ်ꩻထောင်ꩻအကိုဖဲ့ꩻယော့ꩻလွဉ်ဒါႏသွူ။

ကုꩻလွမ်ꩻလာꩻနယ်ꩻ

ကထောင်ꩻဆာရိုꩻရိုꩻနဝ်ꩻ ပီနုဲင်းအခွꩻရိုပ်၊ တုပ်ကွေးရောႏဂါႏဖုံႏနေနေ နီနမ်းအာႏတွိုက်ꩻသီချာနွောင်ꩻဒျာႏ ရောႏဂါႏသေ့ꩻတဲင် အံႏပဋိဇီဝတသီႏမာꩻသီသေ့ꩻခရာႏလိုႏတဝ်းသွူ။

ကထောင်ꩻဆာညလွဉ်ꩻငါႏတွော့ꩻ ဗုဲင်းရဲတ်သေ့ꩻဖုံႏ ဗဲတ်တီးရီးယားဖုံႏမီးနွို့လꩻသွူနဝ်ꩻ လွေꩻအွဉ်ႏပျꩻနယ်ဗာႏဆရာႏဝွန်ႏ၊ ဆရာႏဝွန်ႏကထွဉ်ႏအတွိုင်ꩻ လွောက်ꩻနာႏလွဉ်ꩻတဲင် ခံႏထူႏမဲဉ်ႏမဲဉ်ႏဗာႏ ကုꩻလွမ်ꩻလာꩻမုꩻဆရာႏဝွန်ႏထျꩻသွူ။ ဆရာႏဝွန်ႏကုလွမ်ꩻလာႏဖေႏတဲင် ဟဝ်သက်သာႏချာလဲဉ်းတယဝ်း အနီꩻပဲင်ꩻအတွင်ꩻကိုနဝ်ꩻ ဆရာႏဝွန်ႏကထွဉ်ႏအတွိုင်ꩻ အဝ်ႏလိုႏအံႏဖေႏမဲဉ်ႏမဲဉ်ႏငါႏတသီႏသွူ။

1. ဖျော်ႏတသာႏထီတွော့ꩻ တဖြူခွိုꩻခွိုꩻသွော့ဖြောင်း တဖြူသွော့တနီꩻလစ်ꩻငတ်ꩻလဲင်ႏ တဖြူတလဲင်ႏလဲင်ႏနဝ်ꩻ တသာႏထီယံတွိုႏလင်ꩻကထောင်ꩻကိုတဲင် တဖြူဟံးပေါင်းညညဗာႏ တသာႏတဲ့ ဆွံလွဉ်ꩻငါႏခရာႏလိုႏတဝ်း မဲဉ်ႏမဲဉ်ႏငါ မီႏတဖြူဖေႏအာအာတသာႏထီနဝ်ꩻ အသားသီ၊ အဆာသက်သာႏတဲင်တွော့ꩻ ကထောင်ꩻဆာသက်သာႏအီသွူ။
2. အွꩻအာအာသွော့ꩻထီ အထီတမျိုꩻမျိုꩻဖုံႏ၊ ထီမီႏလျားငါႏတဲ့ အွꩻမွုန်း၊ ထီႏခွꩻ(ထီရိုꩻရိုꩻ)တဲ့ အဝ်ႏလိုႏအွꩻအာအာ၊ ထီꩻလွံꩻခွꩻ ထီႏလွံꩻပအူႏအူႏတဲ့ အဝ်ႏလိုႏအွꩻဖေႏအာအာ၊ အဝ်ႏလိုႏအွꩻသော့ꩻငါႏထီ တနီꩻအဆေ့ꩻသွတ်ꩻ (၃)လီတာသွူ။ မီႏအွꩻအာထီနဝ်ꩻ ထီဓာတ်အဝ်ႏသော့ꩻအာနမ်းကိုတဲင် ကထောင်ꩻပေါꩻသဲင်ꩻတဝ်း၊ နုတ်ခက်ꩻထန်ႏအာ၊ ကထောင်ꩻစိုႏသေႏသေႏတဲင် ကထောင်ꩻပေါꩻပသꩻတဝ်း ထာꩻဟေပေါင်းသက်သာႏ၊ ကထောင်ꩻကိုအဒီႏအပြွꩻဖုံႏတိုꩻထဲင်းတဝ်းတဲင် ကထောင်ꩻဆာတဝ်ထဲင်းတဝ်း သက်သာႏလွဉ်အီသွူ။
3. အံႏဒျာႏသွော့ꩻ အဟာႏရပနဲဉ်ႏနဲဉ်ႏခွꩻခွꩻစား။
4. ဆွဉ်ႏမွုန်းတဝ်းယာလိတ်။
5. လွေꩻမွုန်းတဝ်း မေႏလူး အလူးကအာဒါႏအရပ်။
6. အွံဖေႏသွော့ တသီႏအွံဖုံႏ။
7. အဆာကသက်သာႏအီဒါႏ တသီႏဆဲတ်ꩻဖြောင်း (Sore throat sprays ) ယိုတဲ့ မီႏဆဲတ်ꩻဖေႏနဝ်ꩻ သက်သာႏဒျာႏသွူ။
8. နေ့ဖူထီလင်ꩻတွော့ꩻ ကထောင်ꩻမီႏဆာနဝ်ꩻ ဆဲတ်ꩻဖေႏတသီႏ ဆဲတ်ꩻအီနေ့ဖူ(nasal sprays)တဲ့သက်သာႏဒျာႏသွူ။