ကရီဗာႏမဉ်ꩻနဝ်ꩻ
"နာꩻမဉ်ꩻထမုဲင်ꩻ၊ နာꩻဥပဇ္ဈာယ်ႏဆရာႏ မဉ်ꩻထမုဲင်ꩻ"ကရီဗာႏနုဲင်းနဝ်ꩻအကျောင်ꩻ(အအဲဉ်ႏ)
အွိုးခꩻတလဲင်ႏ ဥပဇ္ဈာယ်ႏ (ကောသွဉ်သင်ဆွုံꩻမꩻသား)အဲဉ်ထဝ်းတဲင် ဗုဲင်စင်ꩻ၊ ကွဉ်သင်္ကန်ꩻပွိုင်ႏတဲ့ တဖွော့တဖ၊ စောင်းဝီးစောင်းဝဲင်း၊ ဗုဲင်သင်္ကန်ꩻတဲ့ တလဲ့တလ၊ တယုဲင်းတယီး၊ လွေꩻတွုံꩻသွမ်ꩻတဲ့ အွဉ်ႏတဝ်းဣန္ဒြေႏ၊ တယေန်ႏကေႏတဝ်း၊ ရွိုင်ꩻရွိုင်ꩻရင်ꩻရင်ꩻ၊ လမ်ႏထိုမ်ႏကွီလွင်ꩻပါဒျာႏ ဝင်ꩻထာꩻအံႏထာꩻအွꩻ၊ သွုံꩻသွမ်ꩻတွင်ꩻ ရောင်ရင်ဒျာႏထာꩻ၊ မာꩻခွို့ဒဲဉ်စျꩻ၊ တဗော့ꩻတဗꩻ-စတဲင်တဖုဲင်ႏမဲ့တဝ်းနုဲင်းနဝ်ꩻဖုံႏမꩻ တကာႏလိုꩻလမ်းဖုံႏရိုꩻ- "သာႏကီႏဝင်ႏမျိုꩻ ဘုရာꩻခွိုꩻရဟန်ꩻဖုံႏနဝ်ꩻ ကွပ်ပွိုးထမုဲင်ꩻ ကွဉ်ဟောဝ်ဟောဝ်တဝ်း သင်္ကန်ꩻပွိုင်ႏ၊ မဗုဲင်တရေꩻရေꩻတဝ်း သင်္ကန်ꩻဟောင်း၊ လွေꩻတွုံꩻသွမ်ꩻတဲ့ မအွဉ်ႏဗဲင်းတဝ်းဣန္ဒြေႏ၊ မယေန်ႏကေႏတဝ်းငါႏနုဲင်းမုဲင်ꩻ၊ မလယ်ႏကွီလွင်ꩻတွိုး တင်ꩻထာꩻအံႏထာꩻအွꩻ၊ သွုံꩻသွမ်ꩻတဲ့ သွုံꩻတေ့ꩻတေ့ꩻဗဲင်းမွိုင်၊ မာꩻခွို့မွုန်းဒဲဉ်စျꩻမွိုင်"စတဲင်နုဲင်းနဝ်ꩻ ဝင်ꩻထီႏဖွီသွမ်ꩻသဲ့ꩻ တကာႏဖုံႏကဲ့ꩻရဲ့ꩻလွတဲင် လောဝ်းဗွေႏဘုရာꩻ၊ ဗွေႏဘုရာꩻရိုꩻ- "ရဟန်ꩻသီးဖုံႏဟွေး- ပေါႏဥပဇ္ဈာယ်ႏ တအဲဉ်ထဝ်းနဝ်ꩻ အွဉ်ႏဗုဲင်စင်ꩻလꩻတဝ်း၊ ပေါႏအွဉ်ႏဗုဲင်နဝ်ꩻ 'ဒုက္ကဋ်အာပတ်ဗာႏ"မိန်းစွဉ်ႏဒျာႏနုဲင်းနဝ်ꩻသွူ။ ကွပ်နဝ်ꩻမꩻ ပေါႏဗုဲင်စင်ꩻနဝ်ꩻ "ပဌမံ ဥပဇ္ဈံ ဂါဟာပေတဗ္ဗော-ထွဉ်ႏထူႏရီးရီး ဥပဇ္ဈာယ်ႏဆရာႏ"ဗွေႏဘုရာꩻ မိန်းသေꩻခါꩻနုဲင်းနောဝ်ꩻသွူ။ မဉ်ႏဒေါ့ꩻနုဲင်းငေါဝ်း ခေတ်ယိုခါနဝ်ꩻ "ထူႏဥပဇ္ဈာယ်ႏ-နဝ်ꩻ တွမ်ႏကဒင်ႏသဘာပတိ"ဗွန်ပီဝင်ꩻ၊ "ဆွုံꩻမꩻရဟန်ꩻလောင်ꩻသား-နဝ်ꩻ တွမ်ႏအခြပ်အရဲဉ်ႏသား(အခမ်းအနားမှူး)"နဝ်ꩻ ဗွန်ပီဝင်ꩻ၊ "ဖတ်ကမ္မဝါႏ-နဝ်ꩻ တွမ်ႏကဒင်ႏသွင်ꩻသား (အဆိုတင်သွင်းသူ)"နောဝ်ꩻ ဗွန်ပီဝင်ꩻ၊ ကဖြွမ်းဒါႏ "ကာရကသံႏဃာႏ-နောဝ်ꩻ တွမ်ႏကထောက်ခံႏသား"နဝ်ꩻ ဗွန်ပီဝင်ꩻနောဝ်ꩻသွူ။ "ဥပသမ္ပဒ ကမ္မဝါစာ-လိတ်ဒင်ႏသွင်ꩻ လိတ်ကွီထွာစင်ꩻ"အဓိပ္ပါယ်ႏ အချွုတ်နောဝ်ꩻ - "နာႏသွော့ ခွေသွဉ်းငေါဝ်းယို ဗွေႏဩ- ရဟန်ꩻလောင်ꩻ (သျင်ႏနာဂ)ယိုနဝ်ꩻ အာႏကွိုꩻဥပဇ္ဈာယ်ႏဆရာႏတဲင် အမဉ်ထွာစင်ꩻ၊ စဲစ်ဆေꩻရီထွူလဲဉ်း အပဲစ်အဲဉ်ထဝ်း၊ အသပိတ်သင်္ကန်ꩻ အဝ်ႏစွုမ်ႏဒျာႏ၊ နေးဥပဇ္ဈာယ်ႏဆရာႏဗွန်တဲင် အကွီထွာစင်ꩻ၊ သံဃာႏနဝ်ꩻ အွဉ်ႏထွာဖေႏဝွေꩻစင်ꩻ၊ သဘော်ꩻတလꩻတဝ်း အပါꩻနဝ်ꩻ ဒေါ့ꩻချာလုဲင်း၊ သဘော်ꩻမဉ်ႏလꩻဒျာႏတဲ့ အုံတေ့ꩻတေ့ꩻဟုဲင်း" ဖတ်ကမ္မဝါႏ (ဒုတိယမ္ပိ၊ တတိယမ္ပိ) သွံလဲင်ႏ၊ ရီသံဃာႏသွံလဲင်ႏ၊ အုံတေ့ꩻတေ့ꩻထောက်ခံႏလို့ဒျာႏ၊ ကွပ်နဝ်ꩻမꩻ ကကွီထွာစင်ꩻသား (သျင်ႏနာဂ)နဝ်ꩻ သံႏဃာႏသဘော်ꩻတူႏ အွဉ်ႏထွာစင်ꩻ (ဒင်ႏဖေႏစင်ꩻအရာႏ) ထွာခန်းဒျာႏစင်ꩻနုဲင်းနဝ်ꩻသွူ။ "ပါꩻမုဲင်ꩻကွီထွာစင်ꩻ၊ ပါꩻမုဲင်ꩻထူႏတာႏဝွန်ႏဖေႏ"နဝ်ꩻနီပါꩻ "အမဉ်ꩻ"နောဝ်ꩻ ပါတောဝ်းလꩻတောဝ်းတဲင် "နာꩻမဉ်ꩻထမုဲင်ꩻ၊ နာꩻဥပဇ္ဈာယ်ႏဆရာႏ မဉ်ꩻထမုဲင်ꩻ"ရီဗာႏနုဲင်းနောဝ်ꩻသွူ။ (ဝိနယ၊ မဟာဝဂ္ဂပါဠိ၊ မဟာခန္ဓက)[၁][၂]