ကရီဗာႏလိုꩻခိုစဲစ်နဝ်ꩻ
"ပုရိသောသိ-လိုꩻခိုစဲစ်စဲစ်မွေးနေဟောင်း"ကရီဗာႏနုဲင်းနဝ်ꩻအကျောင်ꩻ(အအဲဉ်ႏ)"
အွိုးခꩻတလဲင်ႏ "ပဏ္ဍုက်-ပါꩻငဉ်ꩻစုဲင်ꩻ"တဖြာꩻနဝ်ꩻ ကွီဗုဲင်စင်ꩻ ဗွေႏရဟန်ꩻသီးထျꩻ၊ ဝွေꩻဗွေႏသီးထင်းဒျာႏ လိုꩻခိုစဲစ်စဲစ်တဲင် အွဉ်ႏဗုဲင်ဖေႏစင်ꩻ၊ ပါꩻစင်ꩻငဉ်ꩻစုဲင်ꩻနဝ်ꩻ အသꩻလိုꩻမူႏ ကထွိုင်ႏပေါႏသန် (ကိလေႏသာႏရာႏဂ ရူꩻရာꩻပြန်)တဲင် လွေꩻထေ့စင်ꩻပေႏဖုံႏထျꩻတွော့ꩻ- "ယိုဗွေႏစင်ꩻ - လွဉ်ယိုဟုဲင်း၊ ပဲစ်မာႏခွေသွဉ်းယိုဟုဲင်း" ဟဲ့ꩻတသဉ်ဆော့-ထွဉ်ႏနွုမ်ꩻသေင်အော့စွဉ်ႏ ဗွေႏစင်ꩻသီးနုဲင်းနောဝ်ꩻ။ "အွို-ထမုဲင်ꩻခရာႏတန်နဝ်ꩻ၊ နီဗွေႏနဝ်ꩻ ထွာသွူစင်ꩻမွေးတဝ်းနဲ့၊ ပေါႏထိုမ်ႏဟဲ့ꩻလွင်ꩻဝင်ꩻနုဲင်းနဝ်ꩻနဝ်ꩻ နီဗွေႏနဝ်ꩻ လိုꩻယွုတ်-လိုꩻပဏ္ဍုက်တန်ဒျာႏကွေး၊ လိုꩻငဉ်ꩻစုဲင်ꩻ-ပွိုးထမုဲင်ꩻ မဗုဲင်တွိုးစင်ꩻနဝ်ꩻ၊ ပြေ့ꩻထိုꩻခန်းလုဲင်း၊ ပျောက်ထိုꩻခန်းဟုဲင်း၊ အုံညီꩻတွမ်ႏ လိုꩻငဉ်ꩻစုဲင်ꩻနဝ်ꩻ အကျိုꩻအဝ်ႏကဲထမုဲင်ꩻဟောင်း" စင်ꩻပေႏဖုံႏ ခွန်းရောင် ဝါးထိုꩻနုဲင်းနဝ်ꩻ။ ချောက်ကောဝ်ꩻစင်ꩻပေႏဖုံႏ လꩻတဝ်းတပါꩻပါꩻတဲင် သေဝင်ꩻသꩻဒွုမ်ဝင်ꩻ လွေꩻထေ့တောစွဉ်ႏ သျင်ႏတန်ပြွောင်ႏပြွောင်ႏဖုံႏထျꩻ၊ ဗွေႏသျင်ႏတန်ဖုံႏတဲ့ ခွန်းရောင် ဝါးထန်ႏထိုꩻစွဉ်ႏ တလဲင်ႏချင်ႏနောဝ်ꩻသွူ။ ပါꩻစင်ꩻငဉ်ꩻစုဲင်ꩻနဝ်ꩻနဝ်ꩻ လွေꩻထေ့တော ထိန်ꩻဆင်သား၊ တီသေသားထျꩻ၊ တောႏတနꩻပါꩻလိုꩻမွိုက်ဖုံႏတဲင် ပါꩻပဲစ်မာႏဆွုမ်ႏစွဉ်ႏဒျာႏ၊ ဆင်သား သေသားနဝ်ꩻ ပဲစ်မာႏထွူတွော့ꩻ ဒေါ့ꩻလွင်ꩻတမွိုꩻတမာꩻတောစွဉ်ႏထာꩻနုဲင်းယို- "သာႏကီႏဝင်ႏမျိုꩻ ဘုရာꩻခွိုꩻရဟန်ꩻဖုံႏနဝ်ꩻ လိုꩻငဉ်ꩻစုဲင်ꩻဖုံႏတဲ့ပါ၊ ငဉ်ꩻစုဲင်ꩻတမွေးတဝ်း ရဟန်ꩻဖုံႏနောဝ်ꩻ အပဲစ်မာႏ စင်ꩻငဉ်ꩻစုဲင်ꩻဖုံႏ၊ ရဟန်ꩻကားကအဝ်ႏဖုံႏနဝ်ꩻ "အွို့ꩻထမုဲင်ꩻ-အပဲစ်မာႏ စင်ꩻငဉ်ꩻစုဲင်ꩻလွဉ်းလွဉ်းကွေး"စွတ်စွယ်ꩻထံထိမ်စွဉ်ႏဒျာႏ ရဟန်ꩻသံဃာႏဖုံႏနုဲင်းနဝ်ꩻ၊ တွိုႏဗွေႏစင်ꩻသီႏလသား-ဗွေႏသျင်ႏတဲဝါးဖုံႏ ကခွန်းရောင် ကဝါးထိုꩻနဝ်ꩻ လိုꩻဖုံႏတသေတဝ်း၊ လိုꩻတသူႏသေတဝ်းထာꩻသားဖုံႏနဝ်ꩻ ထွုံꩻစံႏအတွိုင်ꩻ ထီႏဖွီသွမ်ꩻသဲ့ꩻ ကဲ့ꩻရဲ့ꩻနုဲင်းနုဲင်းခန်းဒျာႏ ရဟန်ꩻသံဃာႏ။ "တပါꩻနွုမ်ꩻသူႏ-တဗူႏနွုမ်ꩻသေင်"ပါတောတဲင် ဗွေႏရဟန်ꩻသံဃာႏသီး ဟွုန်ဗာႏ ငေါဝ်းကဲ့ꩻရဲ့ꩻ သဲ့ꩻသွမ်ꩻနဝ်ꩻ မဲ့ငါပေႏ တရေႏလင်ꩻ ဝင်ꩻသꩻမွေးစွဉ်ႏဝင်ꩻ၊ သꩻချမ်ꩻသာႏတဝ်း၊ လွေꩻလောဝ်းလွဗွေႏဘုရာꩻ၊ ဗွေႏဘုရာꩻရိုꩻ- "ရဟန်ꩻသီးဖုံႏဟွေး - အွဉ်ႏဗုဲင်ရဟန်ꩻငဉ်ꩻစုဲင်ꩻနဝ်ꩻ တထွာတောဝ်းစင်ꩻ၊ လိုꩻငဉ်ꩻစုဲင်ꩻနဝ်ꩻ ဗုဲင်စင်ꩻအပ်တဝ်း၊ မဉ်ႏအွဉ်ႏဗုဲင်မာႏတဲ့ ဗွောင်ႏချာထိုꩻဗာႏသင်္ကန်ꩻ၊ ယားကုဲင်ထိုꩻဗာႏ ပွုံႏပတ်ရဟန်ꩻနဝ်ꩻနော" မိန်းခြေင်းခြဲ့စွဉ်ႏဒျာႏနုဲင်းနောဝ်ꩻသွူ။ (ဝိနယ၊ မဟာဝဂ္ဂပါဠိတောႏ၊ မဟာခန္ဓက)[၁][၂]