ကရီဗာႏသပိတ်သင်္ကန်ꩻ
"ပရိပုဏ္ဏံ တေ ပတ္တစီဝရံ-နာꩻသပိတ်သင်္ကန်ꩻ အဝ်ႏစွုမ်ႏလဲဉ်းနဲ့"ကရီဗာႏနုဲင်းနဝ်ꩻအကျောင်ꩻ
အွိုးခꩻတလဲင်ႏ ပါꩻတဖြာꩻနဝ်ꩻ သမ်းမဉ်ဗုဲင်စင်ꩻ၊ "သပိတ်အဲဉ်ထဝ်း-ဗုဲင်စင်ꩻလꩻတဝ်း"တဲင် ကွီလနေးဝင်ꩻသပိတ်ဗုဲင်စင်ꩻ၊ ဗုဲင်စင်ꩻထွူ ဝင်ꩻထူႏချာခန်းဒျာႏ ဝင်ꩻသပိတ်၊ ဝွေꩻဗွေႏနဝ်ꩻ လွေꩻတွုံꩻသွမ်ꩻတဲ့ သပိတ်ပါတဝ်း၊ တွိုႏတကာႏ လောင်ꩻသွမ်ꩻသားငါ၊ အွဉ်ႏတအာအစူယာꩻ၊ မာꩻဗွန်နုဲင်း တိတ္ထိတက္ကတွဉ်ꩻသီး၊ "ဝင်ꩻလောင်ꩻတစောတာႏ၊ ဝင်ꩻလောင်ꩻငွါ"အံႏစွဉ်ႏဒျာႏ တကာႏငါနုဲင်းနဝ်ꩻ။ "နီဗွေႏနဝ်ꩻ မဉ်ႏရိုꩻတိတ္ထိတက္ကတွဉ်ꩻတဲ့ သမ်းရွုံႏဒျာႏတွမ်ႏသင်္ကန်ꩻ၊ မဉ်ႏရိုꩻဘုရာꩻတပဲ့ꩻတဲ့ သပိတ်သမ်းတပါတဝ်း၊ ထမုဲင်ꩻခရာႏအီဗွေႏ"တကာႏဖုံႏ ရီနုဲင်းနဝ်ꩻတဲင် ဝွေꩻဗွေႏရိုꩻ- "ခွေနဝ်ꩻ ဘုရာꩻတပဲ့ꩻစဲစ်စဲစ်ဒျာႏ၊ ကွီလဝင်ꩻသပိတ် ဗုဲင်စင်ꩻတဲင် ဗုဲင်စင်ꩻထွူ ဝင်ꩻသပိတ်နောဝ်ꩻ ဝင်ꩻဗွေႏထူႏထိုꩻချာဒျာႏ၊ ကွပ်နဝ်ꩻမꩻ မာꩻဗာႏနုဲင်းယိုသနယ်" ဝွေꩻဗွေႏခြုဲင်းနယ်နုဲင်းနဝ်ꩻ။ တကာႏဖုံႏ သွမ်ꩻသဲ့ꩻကဲ့ꩻရဲ့ꩻ လိုꩻအာထင်ႏလောဝ်းဗွေႏဘုရာꩻ၊ ဗွေႏဘုရာꩻရိုꩻ- "လိုꩻသပိတ်တအဲဉ်ထဝ်းနဝ်ꩻ အွဉ်ႏဗုဲင်စင်ꩻ အပ်တဝ်း၊ ပေါႏအွဉ်ႏဗုဲင်နဝ်ꩻ 'ဒုက္ကဋ်အာပတ်ဗာႏ"မိန်းစွဉ်ႏဒျာႏနုဲင်းနဝ်ꩻသွူ။ အွိုးခꩻတလဲင်ႏ ပါꩻတဖြာꩻနဝ်ꩻ သမ်းမဉ်ဗုဲင်စင်ꩻ "သင်္ကန်ꩻအဲဉ်ထဝ်း-ဗုဲင်စင်ꩻလꩻတဝ်း"တဲင် ကွီလနေးဝင်ꩻသင်္ကန်ꩻဗုဲင်စင်ꩻ၊ ဗုဲင်စင်ꩻထွူ ဝင်ꩻထူႏချာခန်းဒျာႏ ဝင်ꩻသ င်္ကန်ꩻ၊ ဝွေꩻဗွေႏနဝ်ꩻ လွေꩻတွုံꩻသွမ်ꩻတဲ့ လွေꩻတလီꩻလီꩻစွဉ်ႏနုဲင်းနဝ်ꩻ။ တကာႏဖုံႏရိုꩻ- "နီဗွေႏနဝ်ꩻ မဉ်ႏရိုꩻတိတ္ထိတက္ကတွဉ်ႏတဲ့ သမ်းဖင်ꩻတွမ်ႏသပိတ်၊ မဉ်ႏရိုꩻဘုရာꩻတပဲ့ꩻတဲ့ သင်္ကန်ꩻသမ်းတပါတဝ်း၊ မဉ်ႏထွာဘုရာꩻတပဲ့ꩻတဲ့ သပိတ်ပါ၊ သင်္ကန်ꩻပါဒျာႏ၊ မဉ်ႏထွာတိတ္ထိတက္ကတွဉ်ꩻတဲ့ သပိတ်ပါတဝ်း၊ သင်္ကန်ꩻပါတဝ်း၊ တွိုႏနီဗွေႏနဝ်ꩻ မဆန်ꩻငါႏအီ၊ ပါဒျာႏသပိတ်လွုမ်ꩻ၊ သင်္ကန်ꩻသမ်းတပါတဝ်း နုဲင်းမုဲင်ꩻအီ" "တကာႏခွန်နင်ꩻသီးဖုံႏဟွေး- ခွေနဝ်ꩻ တိတ္ထိတက္ကတွဉ်ꩻမွေးတဝ်း၊ ဘုရာꩻတပဲ့ꩻစဲစ်စဲစ်ဒျာႏ၊ ခွေမဉ်ဗုဲင်ငါႏစင်ꩻတဲင် ကွီလနေးဝင်ꩻသင်္ကန်ꩻ ဗုဲင်စင်ꩻ၊ ဗုဲင်စင်ꩻထွူ ဝင်ꩻသမ်းထူႏချာထိုꩻခန်းဒျာႏ ဝင်ꩻသင်္ကန်ꩻဖုံႏတွော့ꩻ အုံမသမ်းတဒါႏတဝ်း၊ ဝင်ꩻသꩻတဲ့ မာꩻရာꩻဒါႏဒွုမ်၊ လွေꩻတလီꩻလီꩻဗာႏစွဉ်ႏဒျာႏ နုဲင်းယိုတန်သနယ်တကာႏ"။ ဒေါ့ꩻနယ်ဖေႏ တကာႏနုဲင်းနဝ်ꩻတဲ့ တကာႏခွန်နင်ꩻနဝ်ꩻရိုꩻ "ယားကုဲင်ပါ နီဗွေႏသျင်ႏ နီဗွေႏစင်ꩻသီးဂုဏ်ႏသိက္ခာႏ၊ ကေႏညိုႏခရာႏအဲဉ်ထဝ်း" ထီႏဖွီသွမ်ꩻသဲ့ꩻ ကဲ့ꩻရဲ့ꩻလိုꩻအာ၊ ထင်းလောဝ်းပါဗွေႏဘုရာꩻ၊ ဗွေႏဘုရာꩻရိုꩻ- "ရဟန်ꩻသီးဖုံႏဟွေး- လိုꩻသင်္ကန်ꩻ တအဲဉ်ထဝ်းသားနဝ်ꩻ အွဉ်ႏဗုဲင်ဖေႏစင်ꩻအပ်တဝ်း၊ ပေါႏအွဉ်ႏဗုဲင်နဝ်ꩻ 'ဒုက္ကဋ်အာပတ်ဗာႏ"မိန်းစွဉ်ႏဒျာႏနုဲင်းနောဝ်ꩻသွူ။ (ဝိနယ၊ မဟာဝဂ္ဂပါဠိ၊ မဟာခန္ဓက)[၁][၂]