ကရီးတွမ်ႏယိုခါ

"ကရီးတွမ်ႏယိုခါ" တောႏလန်ႏရေꩻကာႏလ နီပအိုဝ်ႏဘဝနောဝ်ꩻ ဗွိုန်နုဲင်းလာခေ့ꩻ ဝင်ꩻပေ့ꩻခါꩻနီနာꩻမဲ့နား၊ ထွားစွဉ်ႏစီꩻပွာꩻရေꩻတဖူꩻလဲ့ လွစ်ဖြောင်၊ ထောင်စွဉ်ႏနဲင်ႏငံႏရေꩻတဖူꩻလဲ့ ခံႏဗာႏပါꩻကျံႏ၊ ဖေႏကလွစ်ထန်ႏလꩻ ဝင်ꩻစူခြဲမ်ဆꩻလနောဝ်ꩻ ညစွဉ်ႏနေင်ႏပေါင်ꩻ ပဉ်ရျာꩻပဉ်ရေင် အောဝ်ႏထာꩻယပ်ꩻခုဲင်ႏ၊ ထာꩻဒုက္ခဘဝအခါႏ ဖႏကလွစ်ထန်ႏအီအတာႏနောဝ်ꩻ သွုမ်ꩻခြေင်လဲဉ်း သွီႏသက်အခီႏခီႏ၊ နီမဉ်ႏသေထီႏဒါႏနောဝ်ꩻ ယိုခါ မုဲင်ꩻခရာႏ နီမွော့လွောက်ꩻနာႏတောဝ်း နီခေါင်းဆောင်ငေါဝ်းဖုံႏဟွေး။ နေင်ႏပေါင်ꩻညဆွာꩻ အဆူႏအနာႏခါႏ နီပအိုဝ်ႏကံႏကျံမ္မာႏယို လိုထာꩻထီႏထိုသားစွိုꩻ အွဉ်ဝင်ꩻကျိုꩻစာꩻဖေႏအခြွိုက်ခြွိုက်၊ တွိုက်ထံဗꩻတွိုႏစွဉ်ႏ နေင်ႏ ၁၉၉၁-ဗာႏ နီပအိုဝ်ႏတခွိုꩻလွုမ်းတာႏ ဖေႏကသာႏခန်း တွမ်ႏပညာႏရေꩻ၊ တဖူꩻလွေꩻသဲင်ꩻရေꩻ၊ ဖြေꩻစာကူꩻကားရေꩻ၊ လွိုင်ႏကွိုန်ꩻထင်ႏထိုရေꩻနောဝ်ꩻ လꩻခန်းအခွင်ꩻဝင်ꩻဟဲ့ꩻစွီႏ၊ ဝင်ꩻတဲ့ꩻသွီႏလွဉ်စ ငိမ်ꩻချံꩻရေꩻကာႏလနောဝ်ꩻ ငိမ်ꩻချံꩻရေꩻ အဒီႏ၊ အရာႏ၊ အကောဝ်ႏ၊ အလာႏအပင် နီခံႏစာꩻဗာႏ၊ နီစံႏစာꩻဗာႏလဲဉ်းကရိုꩻနောဝ်ꩻ နီနာꩻအောဝ်ႏလိုႏဖြောင်သꩻနောဝ်ꩻသွူ။ ခမ်းထန်ႏခမ်းကို ပအိုဝ်ႏပိုဝင်ꩻယံသေငါꩻ နွောင်ꩻရာꩻဒင်ႏပျꩻ အဗွေတဗာႏ ဖေႏကလꩻ နီအခွင်ꩻအရေꩻ အွဉ်ႏအရေꩻတန်တန် ခွုမ်မာꩻဒေါ့ꩻသွဉ် အွဉ်ဖေႏနီနာꩻ ငမ်းပါꩻသွေꩻကုဲင်ယားဘꩻ ငမ်းသꩻအတွိုႏထိုꩻချာ မော့ꩻနောဝ်ꩻခါꩻကာႏလ အုံခိုႏတခြာဘဝနောဝ်ꩻ တဒုံနွို့တဒုံထန်ႏ လယ်ႏဟော်ꩻဖေႏတရာꩻသွူတကာႏတောဝ်း နီအမျာꩻမဲ့နား ဖေႏကမွန်ဗွန်တွမ်ႏ ဒီမိုကရေစီ၊ ဖေႏကသေခမ်းထီ အပြောင်ꩻအလုဲင်ႏနောဝ်ꩻ ခေါင်းဆောင်ပေႏတန် လင်ꩻကွင်ꩻဟော်ꩻဖေႏ ခမ်းထီယားသား အခေႏနေႏ ခွိုင်းမုဲင်ꩻလဲင်ႏလဲင်ႏလဲဉ်းမွော့ ယိုခါ တမုဲင်ꩻခရာႏ နီသေနာႏတောဝ်ꩻကေꩻဇူꩻ၊ မွော့ထောင်ချာတွိုး တဖူꩻလီꩻစခါဖုံႏဟွေး။ လိုꩻတွိုင်ꩻစွုမ်ႏဖြာꩻ တကင်ꩻတောဝ်းတွမ်ႏအမာႏလဲ့ ဖေႏကတွိုႏချာဗာႏမွိုန်း ဘဝပွိုင်းလဲင်ႏခါနောဝ်ꩻ လိုႏသေနာႏငါႏလဲဉ်းဝင်ꩻ၊ နီလိုꩻချင်ꩻအခါႏ ယာႏတွမ်ႏယာႏ ဖေႏကထွာဗာႏမွိုန်းလုံႏနောဝ်ꩻ လိုႏကျိုꩻစာꩻ၊ နီထာꩻမာꩻနီထာꩻဒေါ့ꩻ မဉ်ႏတရော့ꩻတောဝ်းတွမ်ႏ လိုꩻမျိုꩻတမျိုꩻစီꩻပွာꩻနောဝ်ꩻ ချင်းမာꩻချင်းဒေါ့ꩻ၊ ဖေႏကရော့ꩻတွမ်ႏနီအခွင်ꩻအရေꩻ နီအောဝ်ႏလိုႏထောင်လွေꩻမဲဉ်ႏမဲဉ်ႏငါႏနောဝ်ꩻသွူ။ စွိုးခွိုꩻလိုꩻမျိုꩻတာႏ ကထွာဒါႏ နီခေါင်းဆောင်အရန်းရန်းဖုံႏ အွဉ်ငါကျိုꩻစာꩻ ခွုမ်မာꩻဖေႏတဲင် ယိုခါ နီရပ်ရာႏ၊ နီဒေႏသ လွိုင်ႏကွိုန်ꩻရေꩻနောဝ်ꩻ ထွာအီသက်သေႏ၊ ထွာနီနာꩻသီး လွောက်ꩻလွဉ်ꩻခရာႏ၊ ထောင်လွဉ်ꩻခရာႏ ထာꩻမာꩻလွဉ်းလွဉ်းနောဝ်ꩻသွူ။ တယ်ႏစအခိန်ႏယိုမာꩻငါ ပအိုဝ်ႏခြာကအောဝ်ႏဒါႏ အစွိုꩻပေါင်ꩻစွုမ်ႏဖုံႏ မဲဉ်မာꩻတမုဲင်ꩻမာꩻ ဖေႏကထွာဒျာႏ နီခေါင်းဆောင်အာႏ၊ ဖေႏကထွာဒျာႏ နီခမ်းသားအကျိုꩻတရာꩻနောဝ်ꩻ အောဝ်ႏလိုႏကျိုꩻစာꩻငါႏနောဝ်ꩻသွူ။ လိုꩻမျိုꩻတမျိုꩻ ဖေႏကထိုꩻမားနောဝ်ꩻ ဝင်ꩻလင်နွို့ယားတလꩻတောဝ်း၊ နီလိုꩻချင်ꩻ မဉ်ႏယားဝင်ꩻနောဝ်ꩻ ကယ်ႏချာတယိုꩻတောဝ်းတဲင် ဟံႏမဉ်ႏအောဝ်ႏနေက နီပအိုဝ်ႏလိုꩻမျိုꩻ ဖေႏကအောဝ်ႏစွူစွူနောဝ်ꩻ နီအွဉ်ဝင်ꩻကျိုꩻစာꩻဗာႏသွူ။ အဟောဝ်တွမ်ႏအကုဲင်ခါႏ အောဝ်ႏတွူႏဖါႏ နီပအိုဝ်ႏဘဝ ဖေႏကတွိုႏဗꩻထိုကီ နီအွဉ်ဝင်ꩻ လိုႏလွောက်ꩻနာႏကျိုꩻစာꩻဗာႏ တွမ်ႏခေတ်ပြောင်ꩻလုဲင်ႏမုꩻ အနယ်ꩻပညာႏဖုံႏနောဝ်ꩻသွူ။ လိုꩻမျိုꩻတမျိုꩻ မွန်ဗန်ရေꩻတာႏ အရေꩻကတန်ငါႏ လိတ်လုဲင်ꩻယေန်ႏငဲးမုꩻ အကွဉ်အကꩻခွမ်ꩻလာꩻတွမ်ႏ ပညာႏရေꩻဖုံႏယို နီနွောင်ꩻရာꩻအွဉ်ဝင်ꩻ ကျိုꩻစာꩻခန်းသွော့ဝင်ꩻအကျောင်ꩻ တဲမ်းနယ်ဗာႏ ခွိုꩻရက်သꩻဓာတ်ကအောဝ်ႏဒါႏ ခမ်းသားမွိုးဖါသီးဖုံႏသွူ။