ကျိုꩻစာꩻသွဉ်ထူႏမွေးသွော့ ပညာႏ

ကျိုꩻစာꩻသွဉ်ထူႏမွေးသွော့ ပညာႏ

လိုꩻလောကခမ်းတန်ကို အရေꩻတန်လွိုသွတ်ꩻသွတ်ꩻ အောဝ်ႏပညာႏ မဉ်ႏဒေါ့ꩻဗာႏစားနောဝ်ꩻလဲ့ အလွိုးတသစ်မာႏတောဝ်းသွူ သနယ်နောႏ ။

”ပညာႏခံꩻဖွိုင်ꩻ လိုꩻတခွန်ꩻထူႏလꩻတောဝ်း” ကရိုꩻဒါႏငေါဝ်း ပွုံႏခွိုင်ꩻအတွိုင်ꩻ လိုꩻလောကခမ်းတန် စက်ဝွိုင်ꩻကို လိုꩻပိုခို/လိုꩻပိုမူႏ ပငါပရာꩻ မာꩻထာꩻမာꩻယို အကျိုꩻဟောဝ်နဲ့,အကျိုꩻကုဲင်နဲ့ ကချင်းခေႏဝွေႏဖန်ႏဒါႏနောဝ်ꩻ အောဝ်ႏပညာႏလွုမ်ꩻသွူ ။

မဉ်ႏမဉ်ထင်ႏထိုကယ်ꩻဝင်ꩻ နီ,သွံပွန်းလဲ့ ပေႏခါတွင်ꩻယို သွဉ်ထူႏမွေး ကျိုꩻစာꩻမွေးသွော့ ကအီႏဗွိုန်ပီဒါႏ ပညာႏအရောင်ႏနောဝ်ꩻ လိုꩻလောကခမ်းတန်ကိုယို တအဲဉ်ထောဝ်း ။

ပညာႏ,ပညာႏ နီမဉ်ႏတသွဉ်ဒါႏတောဝ်းနောဝ်ꩻ တွိုႏဆုဲင်ꩻယို ကွဲးထွာယွဲးဗာႏ ပါꩻသွဉ်းသယ်ႏ ဒါႏပညာႏမꩻ ကွဲးထွာဗာႏဝင်ꩻဗွေႏ နောဝ်ꩻမꩻတဲင် ခေတ်လိုꩻပေႏသီး ပငါပရာꩻ မွိုက်ခွိုက်အရွယ်ႏ အောဝ်ႏဝီးဝါးနေဒွိုန်းကတွင်ꩻ အွဉ်ဝင်ꩻကျိုꩻစာꩻသွဉ်ထူႏမွေးသွော့ ပညာႏဖုံႏနေား ။

ထွားမွိုင် ဝင်ꩻခမ်းထီ ကထင်ႏထိုကီ တိုꩻတက်ထဲင်းထဲင်းနောဝ်ꩻ အစယိုကွပ်ပွိုး ဖေႏအာႏမွေးပညာႏရေꩻ ကထွာမူႏခို/နီနာꩻ ပအိုဝ်ႏပိုလီꩻဖုံႏလဲ့ အောဝ်ႏလိုႏထွားနုဲင်းနုဲင်း အောဝ်ႏလိုႏအွဉ်ႏသꩻရုဲင်းရုဲင်းဟန်တဲင်တွော့ꩻ ကျိုꩻစာꩻတွူႏတရန် မွေးမွေးဒျာႏသွော့ ပညာႏစွန်ꩻထီသွီႏ ပညာႏဖုံႏနေား ။

ပညာႏမဉ်ႏအဲဉ်ထောဝ်း နွို့ပါꩻခြာနောဝ်ꩻ ပေႏဗာႏမဲ့ငါ ပညာႏမဉ်ႏအောဝ်ႏမꩻ နွို့မျာꩻငါ မဲ့ငါယို လေဗွာစဲင်းစဲ့တင်ႏတယ်ႏဗာႏသွူ ။

ယံကထွာဗာႏမွိုန်း လိုꩻကင်ꩻပညာႏသား ယံကထွာဒျာႏသွော့ လိုꩻပညာႏဒါႏသားနောဝ်ꩻ ဝေးတန်/ဝေးမူႏ/ဖူးခို/ဖူးမူႏသီး စွုမ်ႏဖြာꩻဖြာꩻ ကျိုꩻစာꩻသွဉ်ထူႏမွေးမွေးခန်းသွော့ ပညာႏနေား ။