ကွပ်လောဘ ယူႏပက်ဒုက္ခ
"နိဒါနသုတ် (ကွပ်လောဘ ဒေါသ မောဟတဲင် ဘဝအဆက်ဆက် ယူႏပက်ဒုက္ခဗာႏ)"
နီဗွေႏဘုရာꩻဟော်ꩻဖေႏ ဗွေႏရဟန်ꩻသီး တရာꩻနုဲင်းယို- ရဟန်ꩻသီးဖုံႏဟွေး- ၁။ လောဘော နိဒါနံ ကမ္မာနံ သမုဒယာယ- လောဘအရင်ꩻခံႏတဲင် အကုသိုလ်ႏကံႏဖုံႏ ထွာလွဉ်၊ ၂။ ဒေါသော နိဒါနံ ကမ္မာနံ သမုဒယာယ- ဒေါသအရင်ꩻခံႏတဲင် အကုသိုလ်ႏကံႏဖုံႏ ထွာလွဉ်၊ ၃။ မောဟော နိဒါနံ ကမ္မာနံ သမုဒယာယ- မောဟအရင်ꩻခံႏတဲင် အကုသိုလ်ႏကံႏဖုံႏ ထွာလွဉ်၊ ကထွာအီကံႏ အရင်ꩻခံႏ အဝ်ႏသွံမျိုꩻနုဲင်းနဝ်ꩻသွူ။ ရဟန်ꩻသီးဖုံႏဟွေး- ကွပ်လောဘတဲင် 'ကာမေသုမိစ္ဆာစာရ-ပဲစ်မာႏဝင်ꩻပိုမာ၊ အဘိဇ္ဈာ-မဉ်လꩻဝင်ꩻတခြိုꩻ၊ မိစ္ဆာဒိဋ္ဌိ-ထာꩻယူႏမာႏ'၊ ထွာစွဉ်ႏဒျာႏ အကုသိုလ်ႏခြေင်ခြေင်၊ ကွပ်ပွိုးလောဘ အကုသိုလ်ႏ ဒုစရဲက်နဝ်ꩻသွံပါꩻတွော့ꩻ ဘဝယိုတရိုꩻတဝ်း၊ ဘဝငါတရိုꩻတဝ်း၊ ဘဝအဆက်ဆက်တရိုꩻတဝ်း ခံႏဗာႏထာꩻယူႏပက်၊ ခံႏဗာႏထာꩻဒုက္ခနဝ်ꩻသွူ။ ရဟန်ꩻသီးဖုံႏဟွေး- ပွိုးဒေါသတဲင် 'ပါဏာတိပါတ-မာꩻသီဝင်ꩻသက်၊ ဖရုသဝါစာ-ခွန်းလျားဝင်ꩻ၊ ဒိုႏဝင်ꩻ၊ ဗျာပါဒ-ကျံႏမာꩻသီဝင်ꩻ'၊ ထွာစွဉ်ႏဒျာႏ အကုသိုလ်ႏခြေင်ခြေင်၊ ကွပ်ပွိုးဒေါသ အကုသိုလ်ႏ ဒုစရဲက်နဝ်ꩻသွံပါꩻတွော့ꩻ ဘဝယိုတရိုꩻတဝ်း၊ ဘဝငါတရိုꩻတဝ်း၊ ဘဝအဆက်ဆက်တရိုꩻတဝ်း ခံႏဗာႏထာꩻယူႏပက်၊ ခံႏဗာႏထာꩻဒုက္ခနဝ်ꩻသွူ။ ရဟန်ꩻသီးဖုံႏဟွေး- ကွပ်ပွိုးလောဘ-ဒေါသ နဝ်ꩻနီမျိုꩻတဲင် 'အဒိန္နာဒါန-ထူႏတခွန်ꩻဝင်ꩻထာꩻ၊ မုသာဝါဒါ-အံႏလိန်ႏအံႏလဲဉ်ဝင်ꩻ၊ ပိသုဏဝါစာ-အော်ကုဲင်ဝင်ꩻ၊ သမ္ဖပ္ပလာပ-ဒေါ့ꩻပျင်ႏပိန်ႏထာꩻ'၊ ထွာစွဉ်ႏဒျာႏ အကုသိုလ်ႏခြေင်ခြေင်၊ ကွပ်ပွိုးလောဘ-ဒေါသ အကုသိုလ်ႏ ဒုစရဲက်နဝ်ꩻလစ်ꩻပါꩻတွော့ꩻ ဘဝယိုတရိုꩻတဝ်း၊ ဘဝငါတရိုꩻတဝ်း၊ ဘဝအဆက်ဆက်တရိုꩻတဝ်း ခံႏဗာႏထာꩻယူႏပက်၊ ခံႏဗာႏထာꩻဒုက္ခနောဝ်ꩻသွူ။ ရဟန်ꩻသီးဖုံႏဟွေး- ကွပ်ပွိုးမောဟ (အဝိဇ္ဇာႏ)တဲင် သူႏသေတဝ်းထာꩻတွော့ꩻ မာꩻကုသိုလ်ႏတဲ့ ကွီဒျာႏဆုꩻ လိုꩻလူꩻချမ်ꩻသာႏ၊ ကွီတဝ်းနိဗ္ဗာန်ႏချမ်ꩻသာႏ၊ မာꩻအကုသိုလ်ႏတဲင် ထဲ့ငါးရုဲင်ꩻ၊ ထွာတိရစ္ဆာန်ႏ၊ ထွာပိတ္တာႏ၊ ထွာအသူႏရကာယ်ႏ၊ လွေꩻဗာႏအပါယ်ႏလစ်ꩻခမ်း၊ ဘဝယိုတရိုꩻတဝ်း၊ ဘဝငါတရိုꩻတဝ်း၊ ဘဝအဆက်ဆက်တရိုꩻတဝ်း ခံႏဗာႏထာꩻယူႏပက်၊ ခံႏဗာႏထာꩻဒုက္ခနောဝ်ꩻသွူ။ ရဟန်ꩻသီးဖုံႏဟွေး- ဥပမာႏ- အခြွီဆꩻဆꩻနဝ်ꩻ ဆို့ꩻသော့ꩻဟံႏဟောဝ်ဟောဝ်ကို ခမ်းလော့ ဆူဖေႏထီနဝ်ꩻ အမွူးဒေါ့ꩻသေႏချာႏ၊ ဥပမာႏ-နုဲင်းနဝ်ꩻနေနေ၊ လောဘ ဒေါသ မောဟ အကုသိုလ်ႏကံႏနဝ်ꩻ အီႏခံႏဗာႏထာꩻဒုက္ခနဝ်ꩻ သေႏချာႏငါႏနောဝ်ꩻသွူ။ ကွပ်ပွိုးနဝ်ꩻမꩻ ထာꩻသူႏသေအဝ်ႏသားနဝ်ꩻ မာꩻတဝ်းအကုသိုလ်ႏ၊ လိုႏတဝ်း လောဘ ဒေါသ မောဟတွော့ꩻ တွိုႏသော့ꩻတဝ်း အပါယ်ႏလစ်ꩻခမ်း၊ ထွာခန်းဒျာႏ ရဟန္တာႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ နိဒါနသုတ်)[၁][၂]