ခမ်းကကုဲဗာႏအကျောင်ꩻ
သီကျာꩻတောင်ꩻပြန်ႏ ခမ်းကကုဲဗာႏအကျောင်ꩻ အောဝ်ႏ(၈)ပါꩻ- ၁။ တခွန်ꩻသားစိုန် မီႏဒွုန်အာငါႏလဲ့ ခမ်းကုဲဗာႏတမျိုꩻ။ ၂။ ခွန်စောဝ်း အုပ်ထိန်ꩻခမ်းထီ တနွောင်ꩻတဝ်းတဲင် လွောက်ꩻလွဉ်ꩻအဂတိလိစ်ꩻပါꩻ အံႏရွဉ်မွဉ် အံႏတံꩻဆိုꩻလဲ့ လမ်းကုဲဗာႏတမျိုꩻ။ ၃။ ခွန်စောဝ်း ကထိန်ꩻခမ်းထီယို တသေငါꩻတောဝ်း ဒါႏနသီႏလ၊ တသေငါꩻတဝ်း နမ်းကျင်ꩻတရာꩻလဲ့ ခမ်းကုဲဗာႏတမျိုꩻ။ ၄။ ရဟန်ꩻသင်္ဃာႏ တနေးနာႏတောဝ်းဝိနယ်ꩻ၊ တသွဉ်တောဝ်းလိက်ပရိယတ္တိ၊ အကျင်ꩻလဲ့ကုဲယိုလဲ့ ခမ်းကုဲဗာႏတပါꩻ။ ၅။ ရဟန်ꩻသင်္ဃာႏ ထိုမ်ႏဒွါႏစီꩻပွာꩻရေꩻ၊ တွမ်ႏဆရာႏတကာႏ လွောက်ꩻပေါင်ꩻဒွါႏ လောဘ၊ ကျံႏဒွါႏလောကဖဲ့ꩻ၊ ယိုလဲ့ ခမ်းကုဲတမျိုꩻ။ ၆။ စိုန်တခွန်ꩻ ထာꩻတောႏ ဒေါဝ် ယာလံ မုံꩻသွိုꩻ စံႏငါး လိုꩻခြာဒုံဆောင်ႏ လွိုင်ႏအာပြန်ꩻပြော်ꩻ ပေါင်ꩻလွဝင်ꩻထာꩻမွိုက်၊ ကျံႏဒွါႏအကုဲမျိုꩻယိုလဲ့ တပါꩻ။ ၇။ ဆင်ꩻရယ်ꩻသားတွမ်ႏခွန် တနေးနာႏတောဝ်းလွဝင်ꩻငေါဝ်း၊ လဲဉ်းဒွါႏတဖြာꩻတဒေါဝ်ႏဝ်ႏ၊ ခွန်လဲ့ ရက်တောဝ်းအရပ်သား၊ အရပ်သားလဲ့ ရက်တောဝ်းခွန်၊ အောဝ်ႏကျံႏဒျာႏလွဝင်ꩻ အချင်ꩻင်ꩻ၊ ယိုလဲ့ ခမ်းကုဲတမျိုꩻ။ ၈။ ရဟန်ꩻသင်္ဃာႏတွမ်ႏခွန်၊ တွမ်ႏလိုꩻဖြားလိုꩻတန်သီး တညီႏညွတ်တောဝ်းလွဝင်ꩻ၊ ရန်ႏစင်ꩻလွꩻထီႏ ဒေါ့ꩻလွဝင်ꩻမိဉ်ꩻ၊ လွောင်ႏဗူႏတဝ်း ယိုလဲ့ ခမ်းကုဲအကျောင်ꩻတပါꩻ။ ခွန်တွမ်ႏရဟန်ꩻသင်္ဃာႏ၊ တွမ်ႏလိုꩻဖြားလိုꩻတန်သီး မီႏတညီႏညွတ်တောဝ်းဝင်ꩻနောဝ်ꩻ ဒုက္ခသွံပါꩻ မော့ꩻဗာႏဆွူနော၊ ဗွေႏဘုရာꩻဟော်ꩻသေꩻ သီကျာꩻတောင်ꩻပြန်ႏ သမဲင်ꩻစာကိုကွိုနဲး။ မောဂ္ဂလာန်ႏတောင်ꩻပြန်ႏ၊ သီကျာꩻတောင်ꩻပြန်ႏ၊ ဗုဒ္ဓဝင်ႏရာႏဇဝင်ႏသမဲင်ꩻစာႏစားယို မီႏကောက်နုက်နဝ်ꩻ ခွန်စောဝ်းအကျင်ꩻတရာꩻဆီပါꩻကုဲ၊ ဆင်ꩻရယ်ꩻသား သုစရဲက်ဆီပါꩻကုဲ၊ ရဟန်ꩻသင်္ဃာႏဝိနယ်ꩻတရာꩻကုဲ၊ ယိုသွံပါꩻနဝ်ꩻကုဲတဲင် တပါꩻပါꩻတဲင် ကပ်တန်သွံပါꩻ မော့ꩻဗာႏအမန်ႏဆွူနော။ "အကံ"တွမ်ႏ"အကျင်ꩻ"ကရိုꩻနဝ်ꩻ သီႏလ ၅-ပါꩻယို တယားကုဲဖိုတောဝ်း၊ သျောင်ႏကံတသေႏသေႏနောဝ်ꩻ ဟဲ့ꩻ"အကံ"တဲ့၊ နှဲးနီနာꩻ ကစွယ်ꩻယာတထူ ဆေႏလိက်၊ စွယ်ꩻပြူးနဝ်ꩻ ဟဲ့ꩻ"အကျင်ꩻ"တဲ့၊ သီႏလလဲ့ ယံကကျင်ꩻသွော့နှဲးယာတထူ နှဲးပြူးနောဝ်ꩻ ဟဲ့ꩻဗာႏ"ကံကျင်ꩻ"နော။ ယဟန်ႏသားနဝ်ꩻ ကံလဲ့ တကျင်ꩻတောဝ်း၊ ကျင်ꩻလဲ့ တကံတောဝ်း၊ ဝင်ꩻဟဲ့ꩻ ဗုဒ္ဓဖါႏသောင်း ဗုဒ္ဓဖါႏသာႏရွုမ်ꩻ၊ ဗုဒ္ဓဘာႏသာႏမွေးတောဝ်း၊ ဗုဒ္ဓဘာႏသာႏအစဲစ်နဝ်ꩻ ကံကျင်ꩻလို့ဒျာႏနော။[၁][၂][၃]