ခွန်'ရဟန်ꩻသီးထာꩻချမ်ꩻသာႏ
"ဘဒ္ဒိယသုတ် (ခွန်ထာꩻချမ်ꩻသာႏတွမ်ႏ ရဟန်ꩻထာꩻချမ်ꩻသာႏ ကွာႏလို့ဝင်ꩻနုဲင်းမုဲင်ꩻ)"
အွိုးခꩻတလဲင်ႏ ဗွေႏဘုရာꩻအဝ်ႏအုံ ဝေင်ꩻအနုပိယ၊ တခေါ့ꩻမွူးခြာ၊ အတွင်ꩻနဝ်ꩻနဝ်ꩻ ဗွေႏဘဒ္ဒိယတဲ့ အဝ်ႏအုံတခြာကို သေင်ႏမွူးဆလနောဝ်ꩻသွူ။ ဗွေႏဘဒ္ဒိယနဝ်ꩻ အုံသေင်ႏမွူးခလတဲ့နဝ်ꩻ၊ အုံတခြာကိုတဲ့နဝ်ꩻ၊ အုံထာꩻယေန်ယေန်ကိုတဲ့နဝ်ꩻ တပါꩻတန်ဒျာႏ အဝ်ႏပစိုႏသေႏသေႏစွဉ်ႏ "အဟောသုခံ- အော ချမ်ꩻသာႏမွေးစွဉ်ႏထာꩻဟွေး၊ အဟောသုခံ- အော ချမ်ꩻသာႏမွေးစွဉ်ႏထာꩻဟွေး"နုဲင်းနောဝ်ꩻသွူ။ သာႏကီႏဝင်ႏနင်ꩻမူႏ ဗွာဆျူႏပိုခို ဗွေႏဘဒ္ဒိယယို သꩻကိုတဖြွတ်ꩻထန်ႏတဲင် ကအဝ်ႏပစိုႏသေႏသေႏဒါႏ "ချမ်ꩻသာႏမွေးစွဉ်ႏထာꩻဟွေး၊ ချမ်ꩻသာႏမွေးစွဉ်ႏထာꩻဟွေး"အကျောင်ꩻအခရာႏနောဝ်ꩻ ရဟန်ꩻဖုံႏ ယပါꩻပါꩻ သေတဝ်းတွော့ꩻ လွေꩻလောဝ်းဒေါ့ꩻ ဗွေႏဘုရာꩻနုဲင်းယို- "ဩဗွေႏ ဗွေဘုရာꩻဗွေႏဩ- ဗွေႏဘဒ္ဒိယနဝ်ꩻ အုံသေင်ႏမွူးခလတဲ့ယဝ်း၊ အုံတခြာကိုတဲ့ယဝ်း၊ အုံထာꩻယေန်ယေန်ကိုတဲ့နဝ်ꩻ အုံထာꩻအဝ်ႏပစိုႏသေႏသေႏစွဉ်ႏ 'အဟောသုခံ- အော ချမ်ꩻသာႏမွေးစွဉ်ႏထာꩻဟွေး၊ အဟောသုခံ- အော ချမ်ꩻသာႏမွေးစွဉ်ႏထာꩻဟွေး'နုဲင်းနဝ်ꩻဗွေႏဩ။ ဝွေꩻဗွေႏနဝ်ꩻ အဝ်ႏထွာခွန်တွင်ꩻ ထင်ႏဗုဲင်စင်ꩻဟ အလွိုးအယူႏလꩻသဲင်ꩻ ခွန်ချမ်ꩻသာႏ၊ အလွိုးအုံထာꩻပျောႏတဝ်း၊ အလွိုးအမဉ်ထွက်ထာꩻ ဗွေႏဩ" လောဝ်းနီဗွေႏဘုရာꩻနုဲင်းနောဝ်ꩻတဲင် နီဗွေႏဘုရာꩻ ထွဉ်ႏလွေꩻပင်ꩻလွဉ် ဗွေႏဘဒ္ဒိယ၊ နီဗွေႏဘုရာꩻရီနုဲင်းယို- "ရဟန်ꩻဘဒ္ဒိယ- နာꩻအုံထာꩻ အဝ်ႏပစိုႏသေႏသေႏ 'ချမ်ꩻသာႏငါႏဟွေး-ချမ်ꩻသာႏငါႏဟွေး'နဝ်ꩻ စောင်းမွေးနဲ့" "မွေး- ဗွေႏဩ" "ရဟန်ꩻဘဒ္ဒိယဟွေး- မဉ်ႏမွေးတဲ့ နာꩻကပစိုႏဗာႏ 'ချမ်ꩻသာႏငါႏ-ချမ်ꩻသာႏငါႏ'နဝ်ꩻ အကျောင်ꩻအခရာႏ အဝ်ႏနုဲင်းမုဲင်ꩻ" "ဘုရာꩻမျတ် ဗွေႏဩ- ခွေသွဉ်း ကအဝ်ႏလမ်းခါနဝ်ꩻ ထွာခွန်တန်တဖြာꩻ၊ အုံထာꩻအဝ်ႏငမ်းဗာႏရန်ႏသူႏ၊ ဟော်ထျꩻတဲ့ ထွဉ်ႏစဲ့ꩻပွေါစွုမ်ႏနီꩻစွုမ်ႏဟာ၊ တခါꩻငွါတဲ့ ထွဉ်ႏစဲ့ꩻသားပေႏ ပွေါဖေႏသေႏသေႏ၊ စဲ့ꩻပွေါဖေႏသွူနုဲင်းနောဝ်ꩻမဉ်ႏတဲ့ ထာꩻနန်းတလို့တဝ်း၊ ထာꩻငမ်းတလို့တဝ်း၊ ထွာကီခွန်တဲ့ အုံထာꩻ သꩻတချမ်ꩻသာႏတဝ်း ဗွေႏဩ။ ခွေသွဉ်း ထွိုင်ႏထင်ႏဗုဲင်ရဟန်ꩻယိုနဝ်ꩻ အုံသေင်ႏဆလ နန်းတဝ်း၊ အုံတခြာကို ငမ်းတဝ်း၊ အုံထာꩻယေန်ယေန်ကို ရျူႏသျူး၊ 'အဟောသုခံ- အော ချမ်ꩻသာႏမွေးစွဉ်ႏထာꩻ၊ အဟောသုခံ- အော ချမ်ꩻသာႏမွေးစွဉ်ႏထာꩻဟွေး' တဖြွတ်ꩻသꩻရာႏ၊ ပစိုႏသေႏသေႏစွဉ်ႏဒျာႏနုဲင်းနောဝ်ꩻ ဗွေႏဩ" လောဝ်းနီဗွေႏဘုရာꩻနုဲင်းနောဝ်ꩻသွူ။ (သုတ္တန်ႏပိဋကတ်၊ ဥဒါနပါဠိ၊ မုစလိန္ဒဝဂ်၊ ဘဒ္ဒိယသုတ်)[၁][၂]