ခွန်ပဇ္ဇောတဝတ္ထု
"လွမ်ꩻလာခွန် ယွောင်တနွောင်း၊ ဆရာႏလွင်းတခွန်ꩻဆောင်းထိုꩻဗာႏ"
ဥဇ္ဇေႏနီႏခမ်း ခွန်ပဇ္ဇောတနဝ်ꩻ ဆာယွောင်တနွောင်းထာꩻ၊ ဟဲ့ꩻဆရာႏတန် ဒိသာပါမောက္ခဆရာႏဖုံႏလွမ်ꩻလာꩻ ဟောဝ်တဝ်း၊ လို့အာခြေင်ရွဉ်၊ ဆရာႏဖုံႏ လꩻအာသဲင်ꩻရွဉ်ခံꩻဖုံႏလွုမ်ꩻ၊ ကွပ်နဝ်ꩻမꩻ ထွဉ်ႏအလိုꩻလွေꩻထေ့ ခွန်ဗိမ္ဗိသာရထျꩻ၊ ထွဉ်ႏခွန်ဗိမ္ဗိသာရ အွဉ်ႏစွꩻလွဉ် ဆရာႏဇီဝကနောဝ်ꩻသွူ။ ဆရာႏဇီဝကရိုꩻ- "ခွေသွဉ်းတသီႏယိုနဝ်ꩻ အီႏဖောႏဗာႏတွမ်ႏ ထောပတ်" "ဖေါႏတွမ်ႏထောပတ်နဝ်ꩻ ခွေကျွိုက်တဝ်း၊ ဖေါႏဒျာႏတွမ်ႏ ထာꩻလင်ဟုဲင်း" ခွန်ပဇ္ဇောတနဝ်ꩻ ဗေႏသို့ꩻမွေးစွဉ်ႏ ထောပတ်တဲင် အဲ့ꩻတင်ႏမဲ့ ဒေါ့ꩻဆွော့ꩻစွဉ်ႏထာꩻနုဲင်းနဝ်ꩻတဲင်- "ခွန်တန်ဗွေႏဩ- ခွေသွဉ်း လွေꩻထိုမ်ႏတသီႏတာႏတဲ့နဝ်ꩻ၊ လွေꩻချာလွေꩻငါတာႏတဲ့နဝ်ꩻ လွေꩻမုဲင်ꩻခါခါ ဖေႏကလꩻမွိုင်မွိုင်နဝ်ꩻ စီႏစဲဉ်ႏမꩻခါꩻဖေႏ ဆင်မွိုင်မွိုင် တဗာႏ လꩻနေဟောင်းဩ" ခွန်ရိုꩻ'လꩻဒျာႏ'တဲင် ထွဉ်ႏအလိုꩻ စီႏစဲဉ်ႏမꩻခါꩻဖေႏဆင် လွေꩻထာꩻမွိုင်၊ ဆင်မွူးဘဒ္ဒဝတိကာနဝ်ꩻသွူ။ ခွန်တန်ရောႏဂါႏနဝ်ꩻ ပေါႏတဖောႏတဝ်ႏတွမ်ႏ ထောပတ်နဝ်ꩻ လꩻတဝ်းတဲင် ထောပတ်လွီး ဖေႏကနွုမ်ꩻမွုန်းတဲင် ဆရာႏဇီဝက မာꩻတချꩻချꩻနေးတော အရသာႏ၊ ထောပတ်ပါကျောင်ꩻ ဖေႏကသေမွုန်းတွော့ꩻ သော့ꩻတသီႏလင် မာꩻထိုꩻမားပါ ထောပတ်အရောင်ႏနောဝ်ꩻသွူ။ ဖေါႏတသီးထွူ ဖေႏအွꩻခွန်၊ သဲစ်ဖေႏအွꩻထွူတဲင် ငမ်းခွန်မာꩻသီဝွေꩻတွော့ꩻ ဝွေꩻထိုမ်းဆင်မွူးမွိုင် လွင်းတခွန်ꩻသဲင်ꩻစွဉ်ႏ တလဲင်ႏချင်ꩻ၊ အုံတစိုးတွော့ꩻ ခွန်တန်နောဝ်ꩻ ခြွော့ထာꩻ၊ ထောပတ်လွီးဖုံးစွဉ်ႏဒျာႏ ခွန်ပဇ္ဇောတ သꩻလျားမွေးစွဉ်ႏထာꩻ။ "ယို - ကာက၊ လောႏလွဉ်ꩻမွိုင်မွိုင် ဆရာႏသူꩻ၊ ဟဲ့ꩻသဲင်ꩻချာယို၊ လောႏလွဉ်ꩻယိုခါခါဟုဲင်း" ခွန်သွဉ်းကာကနဝ်ꩻတဲ့ လွေꩻထာꩻမွိုင်မွေးမုဲင်းစွဉ်ႏထာꩻ၊ လွေꩻထွꩻလွဉ်ꩻ ဆရာႏဇီဝက၊ အဝ်ႏအံႏဒဲဉ်ရောဝ်ꩻ ကောသမ္ဗီႏခမ်းကို၊ ခွန်ပဇ္ဇောတရိုꩻ" ဆရာႏ ဖေႏအံႏထမုဲင်ꩻတဲ့ အံႏမွုန်းနေား" ခွန်ဖေႏသတိꩻဝွေꩻနုဲင်းနဝ်ꩻတဲင် ဆရာႏဖေႏအံႏ ထမုဲင်ꩻမုဲင်ꩻတဲ့ ဝွေꩻအံႏတဝ်း၊ ဆရာႏဇီဝက ရိတ်ခေႏလꩻတွော့ꩻ စူနုံနဝ်ꩻ- ဗို့ꩻတေ့ꩻတသီႏဟို့ꩻ၊ စံႏသေင်ႏရာႏတဖြုံႏ တသီႏဟို့ꩻထိုꩻဖွန်ႏနဝ်ꩻ ဗွို့ꩻသော့ꩻသေင်ႏရာႏတစိꩻပေႏ၊ ကာကထီႏတဝ်းတဲင် အွဉ်ႏတံꩻငါသေင်ႏရာႏနီဖြုံႏ၊ ဆရာႏထူႏအံႏ(တဖြုံႏခေါ်)၊ အွꩻလွဉ်ꩻထီ၊ ကာကနောဝ်ꩻ သံးဟို့ꩻခိုးဒဲဉ်၊ ဟို့ꩻခိုးထီတဲင် "သေင်ႏရာႏယိုနဝ်ꩻ ဆရာတဲ့အံႏဒျာႏ၊ ထီယိုနဝ်ꩻ ဆရာႏတဲ့ အွꩻဒျာႏဟ အလွိုး ထွာတဝ်းထမုဲင်ꩻမုဲင်ꩻ" ယူႏနုဲင်းနဝ်ꩻတွော့ꩻ ထူႏအံႏသေင်ႏရာႏတဖြုံႏ၊ အွꩻလွဉ်ꩻထီ၊ ဟို့ꩻထိုꩻစွဉ်ႏတလဲင်ႏချင်ꩻ၊ ဆရာႏထွဉ်ႏထိုမ်းဆင်မွူး၊ ထွဉ်ႏသဲင်ꩻချာ၊ ခွန်ပဇ္ဇောတတဲ့ ခြွော့ထာꩻတလဲင်ႏနဝ်ꩻလွုမ်ꩻ၊ အံႏအွီႏဗေင်ႏအွီႏခန်းဒျာႏတဲင် ဟဲ့ꩻလွဉ်ယင်းဆရာႏ အီႏဖေႏဆုꩻတဲ့၊ ဆရာႏဇီဝကရိုꩻ-"ဆုꩻနဝ်ꩻ မဉ်လꩻတဝ်း၊ မဉ်လꩻဒျာႏ ခွန်ကေꩻဇူꩻတင်ႏခွေနဝ်ꩻလွုမ်ꩻ"ဒေါ့ꩻချာခွန်လိုꩻနုဲင်းနဝ်ꩻသွူ။ (ဝိနယ၊ မဟာဝဂ္ဂပါဠိတောႏ၊ စီဝရက္ခန္ဓက)[၁][၂]