ခွိုင်းကားတဲင်
"ခွိုင်းကားတဲင် ပအိုဝ်ႏခမ်းသားအတာႏ ခမ်းသားငဝ်းဒျာႏ" နွောင်ꩻဟံႏတောႏတဗာႏကို ခမ်းသားအာႏယို ထွာအတလာသွတ်ꩻ၊ နွောင်ꩻဟံႏတောႏတဗာႏကို ခမ်းသားငဝ်းယို ထွာဩဇာႏအတန်သွတ်ꩻ၊ နွောင်ꩻဟံႏတောႏတဗာႏကို ခမ်းသားဆန္ဒယို ထွာအရေꩻတန်သွတ်ꩻသွူ။ နွောင်ꩻဟံႏတောႏတဗာႏ အနာႏဂတ်တာႏ သာႏယာႏထင်ႏထိုရေꩻဖုံႏယိုလဲ့ အဝ်ႏသော့ꩻဒျာႏ ခမ်းနဝ်ꩻတခမ်း ခမ်းသားစူကိုသွူ။ "ခမ်းသား"မဉ်ႏရိုꩻသွူနုဲင်းနဝ်ꩻနဝ်ꩻ ခမ်းထီတဖြုံႏအကို ကအုံသော့ꩻဒါႏ ခွိုင်းကားလိုꩻဖြာꩻပေါင်ꩻယို ထွာခမ်းသားသွူ။ အမူႏတဲ့နဝ်ꩻ၊ အခိုတဲ့နဝ်ꩻ၊ အပေႏလဲ့နဝ်ꩻ၊ အတန်လဲ့နဝ်ꩻ ဝွေꩻမဉ်ႏအဝ်ႏအုံသော့ꩻ ခမ်းထီတဖြုံႏဖြုံႏကိုလဲ့ ဝွေꩻထွာခမ်းထီနဝ်ꩻခမ်းသား၊ ဝွေꩻမဉ်ႏအဝ်ႏထွာ လိုꩻမျိုꩻတမျိုꩻလဲ့ ဝွေꩻထွာလိုꩻမျိုꩻနဝ်ꩻ ခမ်းသား၊ မဉ်ႏအဝ်ႏထွာ ပအိုဝ်ႏစွိုးခွိုꩻလဲ့ ထွာပအိုဝ်ႏခမ်းသားသွူ။ ပအိုဝ်ႏခမ်းသား မဉ်ႏရိုꩻဖျင်သွူနုဲင်းနဝ်ꩻလဲ့ အဝ်ႏသော့ꩻ ပအိုဝ်ႏနမ်းပဲင်ႏ အုပ်ချုတ်ခွင်ꩻလꩻဒေႏသကိုသားတဲ့နဝ်ꩻ၊ တအဝ်ႏသော့ꩻတဝ်း ပအိုဝ်ႏနမ်းပဲင်ႏ အုပ်ချုတ်ခွင်ꩻလꩻဒေႏသကိုသားတဲ့နဝ်ꩻ၊ ဖူးဝေးခမ်းကောင်၊ ခမ်းဒွမ် မွိုးဖါပိုလီꩻသားတဲ့နဝ်ꩻ၊ ကအဝ်ႏသော့ꩻဒါႏ မန်းနွောင်ꩻဟံႏကို ပအိုဝ်ႏစွိုးခွိုꩻသီးတဲ့နဝ်ꩻ၊ ကအဝ်ႏအုံဒါႏ ခမ်းပေါင်ꩻစွုမ်ႏကို ပအိုဝ်ႏစွိုးခွိုꩻသီးတဲ့နဝ်ꩻ ထွာပအိုဝ်ႏလိုꩻမျိုꩻ ခမ်းသားနဝ်ꩻသွူ။ မဉ်ႏထွားဒျာႏ နုဲင်းကအဝ်ႏခွုမ်မာꩻ ပအိုဝ်ႏအမျိုꩻသာꩻအရေꩻတရိုꩻတဝ်း၊ အုံအဝ်ႏခင်ႏလမ်းဒေႏသ တရိုꩻတဝ်း အခြောင်ꩻဗွိုန်တဝ်း၊ အစွိုꩻဗွိုန်တဝ်း၊ ရပ်ရာႏဒေႏသတဗွိုန်တဝ်းစွဉ်ႏလဲ့ ပအိုဝ်ႏလိုꩻမျိုꩻဒျာႏတဲင် ထွာဒျာႏပအိုဝ်ႏခမ်းသားသွူ။ နုဲင်းယိုခါ ကအဝ်ႏရုဲင်ꩻတသွိုးဒါႏ ပအိုဝ်ႏစွိုးခွိုꩻအစွိုꩻ(ပီအဲန်အို)၊ ခမ်းပေါင်ꩻဗူႏ ပအိုဝ်ႏအမျိုꩻသာꩻအစွိုꩻချုတ်(ပအမဖ)၊ ပအိုဝ်ႏအမျိုꩻသာꩻလွစ်ထန်ႏရေꩻအစွိုꩻ၊ ပအိုဝ်ႏလိုꩻယွဲးစွိုꩻတွမ်ႏ ပအိုဝ်ႏလိတ်ယေန်ႏစွိုꩻ-စစွဉ်ႏအစွိုꩻပေါင်ꩻစွုမ်ႏယို ပအိုဝ်ႏခမ်းသားဖုံႏဒျာႏလွဉ်းလွဉ်းနဝ်ꩻသွူ။ နဝ်ꩻမꩻ ခမ်းသားငဝ်း လိတ်သတင်ꩻစောင်ႏယိုနဝ်ꩻ ရေႏရွယ်ႏအွဉ်ႏထွာ၊ အွဉ်ႏထန်ႏလွေꩻဒျာႏ ခွိုင်းကားတဲင် ပအိုဝ်ႏခမ်းသားအမျာꩻတာႏ ငဝ်းထန်ႏသော့ꩻခွင်ꩻ ခမ်းသားငဝ်းဒျာႏသွူ၊ ခွိုင်းကားတဲင် ပအိုဝ်ႏခမ်းသားအမျာꩻတာႏ ရေႏရွယ်ႏရိုꩻလဲဉ်းသွူနုဲင်းနဝ်ꩻတဲင် ကအဝ်ႏဒါႏ ခမ်းလောင်ႏလင် ခမ်းပေါင်ꩻစွုမ်ႏကို ပအိုဝ်ႏခမ်းသားငဝ်းတရိုꩻတဝ်း၊ မြန်မာနွောင်ꩻဟံႏကို ကအဝ်ႏဒါႏ ပအိုဝ်ႏခမ်းသားငဝ်းတဲ့ တရိုꩻတဝ်း၊ ခမ်းကောင်ခမ်းဒွမ်ကို အခဝ်မုဲင်ꩻခမ်းသားငဝ်းတရိုꩻတဝ်း၊ ပအိုဝ်ႏနမ်းပဲင်ႏအုပ်ချုတ်ခွင်ꩻလꩻဒေႏသအကို၊ အထန်ႏ ခမ်းသားအငဝ်းတဲ့ တရိုꩻတဝ်း အဝ်ႏဒေါ့ꩻထန်ႏ၊ အဝ်ႏလွင်ႏဖေႏလို့လို့ထွူ ထွာဒျာႏ ပအိုဝ်ႏတစွိုးခွိုꩻလွုမ်း ခမ်းသားမီဒီယာဒျာႏနဝ်ꩻသွူ။ ပီအဲန်အိုတဲ့ ထွာဒျာႏပအိုဝ်ႏခမ်းသား၊ ပအမဖတဲ့ ပအိုဝ်ႏခမ်းသား၊ ပအိုဝ်ႏလိတ်လုဲင်ꩻတွမ်ႏ ယေန်ႏငဲးရေꩻအစွိုꩻတဲ့ ပအိုဝ်ႏခမ်းသား၊ ပအိုဝ်ႏစွိုးခွိုꩻလွစ်ထန်ႏထန်ႏရေꩻအစွိုꩻတဲ့ ပအိုဝ်ႏခမ်းသား၊ ပအိုဝ်ႏလိုꩻယွဲးစွိုꩻတဲ့ ပအိုဝ်ႏခမ်းသား၊ ကားတဲင်ယိုနဝ်ꩻ ပအိုဝ်ႏခမ်းသားဖုံႏဒျာႏလွဉ်းလွဉ်းတဲင် ခမ်းသားအဖြာꩻမုဲင်ꩻ ထာꩻခံႏစာꩻ၊ ထာꩻမဉ်ထွာ အငဝ်းထန်ႏတာႏ ခမ်းသားငဝ်းဒျာႏသွူ။ ပအိုဝ်ႏခမ်သားသီးအကို ပီအဲန်အိုအနေႏလဲ့ တဖူꩻရဲဉ်ႏယို တွမ်ႏခမ်းသားဆွန်ꩻစူတွော့ꩻ လိုႏထောင်လွေꩻသင်ꩻထဲင်းနုဲင်းမုဲင်ꩻ၊ ပအိုဝ်ႏခမ်းသားအခါႏ အဲဉ်ထဝ်းဒွုန်းထမုဲင်ꩻ၊ အဝ်ႏလိုႏမာꩻထဲင်းထမုဲင်ꩻ-စစွဉ်ႏ ထာꩻထီႏ ထာꩻမဲဉ်ထွာ ထာꩻမာꩻရဲဉ်ႏဖုံႏလဲ့ ပအိုဝ်ႏခမ်းသားငဝ်း မီဒီယာကို အဝ်ႏအွဉ်ႏသင်ႏဖေႏဒျာႏ၊ ပအမဖအနေႏလဲ့ ပအိုဝ်ႏခမ်းသား အနာႏဂတ်ယို မာꩻလွေꩻသင်ꩻထာꩻမာꩻရဲဉ်ႏနုဲင်းမုဲင်ꩻ၊ ခမ်းသားချင်ꩻချင်ꩻ မဉ်ႏဖြွမ်းဗူႏ မာꩻလွေꩻညီꩻနဝ်ꩻ လွောင်ႏဗူႏအာႏထွာလွဉ်နွောင်ꩻနုဲင်းမုဲင်ꩻ-စစွဉ်ႏထာꩻထီႏ ထာꩻခံႏစာꩻအငဝ်းယို အွဉ်ႏသင်ႏဖေႏဒျာႏသွူ။ ပအိုဝ်ႏလိတ်ယေန်ႏစွိုꩻအနေႏလဲ့ ပအိုဝ်ႏခမ်းသားသီးတာႏ အကျိုꩻအဝ်ႏဒါႏငဝ်းယိုလဲ့ အီႏအွဉ်ႏသင်ႏဖေႏဒျာႏ၊ ပအိုဝ်ႏလွစ်ထန်ႏရေꩻအစွိုꩻသား ထာꩻမာꩻရဲဉ်ႏတွမ်ႏ ခမ်းသားအလောင်း ထာꩻထီႏထာꩻမဉ်မာꩻဖုံႏယိုတဲ့နဝ်ꩻ အီႏအွဉ်ႏသင်ႏဖေႏဒျာႏ၊ ခွိုင်းအစွိုꩻ ကမာꩻဖေႏ ပအိုဝ်ႏခမ်းသားအတာႏ အကျိုꩻစီꩻပွာꩻယိုလို့လို့နဝ်ꩻ အီႏအွဉ်ႏသင်ႏဖေႏဒျာႏသွူ။ "ခမ်းသားငဝ်း"မီဒီယာရိုꩻလဲဉ်းသွူနုဲင်းနဝ်ꩻတဲင် ခွိုင်းကားပအိုဝ်ႏခမ်းသားသီးအငဝ်းယို တအွဉ်ႏကုဲင်တဝ်း၊ အွဉ်ႏထန်ႏအွဉ်ႏသင်ႏဖေႏလို့လို့ဒျာႏသွူ၊ နဝ်ꩻမ ဟဲ့ꩻဖန်လင်ꩻဗာႏ"ခမ်းသားငဝ်း"နဝ်ꩻသွူ။ ခမ်းတခမ်းအကို ခမ်းသားယို ထွာအထျꩻတဲင် ခမ်းသားအငဝ်းယို အွဉ်ႏထန်ႏတဝ်း၊ အွဉ်ႏသင်ႏတဝ်းနဝ်ꩻ တလꩻတဝ်းသွူ၊ ခမ်းတခမ်းအကို ခမ်းသားအာႏယို ထွာအတလာသွတ်ꩻတဲင် ခမ်းထီနဝ်ꩻတဖြုႏ ထင်ႏထိုတသွောင်းရေꩻယို ခမ်းသားဖြွမ်းပင်ႏမွေးတဲ့ ထင်ႏဗာႏအမန်ႏ၊ အောင်ႏမျင်ႏဗာႏဧကန်ႏသွူ။ ခမ်းတခမ်းအကို ခမ်းသားငဝ်းယို ထွာဩဇာႏအသန်သွတ်ꩻတဲင် ခမ်းထီအကို မာꩻသင်ꩻထမုဲင်ꩻ၊ မာꩻသင်ꩻတဝ်းတမုဲင်ꩻကရိုꩻယို ခမ်းသားမဉ်ႏလက်ခံႏတဝ်း၊ ခမ်းသားမဉ်ႏခြဝ် အွဉ်ႏသင်ႏမွေးငဝ်းနဝ်ꩻ ပါꩻမုဲင်ꩻမုဲင်ꩻလဲ့ ခွုမ်မာꩻထဲင်းတလꩻတဝ်းသွူ၊ ခမ်းသားမဉ်ႏမဲဉ်ထွာသွူတဲ့ မာꩻတဝ်းနဝ်ꩻ တလꩻတဝ်းသွူ။ ခမ်းတခမ်းအကို ခမ်းသားအုံအဝ်ႏအံႏအွꩻရေꩻတာႏ၊ ခြွိုင်ႏသန်ꩻရေꩻတာႏ၊ ပညာႏရေꩻတာႏ၊ စီꩻပွါꩻရေꩻတာႏ ဖေႏကခွိုင်းဆာဗာႏမွုန်းတဝ်ꩻ ခမ်းသားဆန္ဒယို အဝ်ႏမဲဉ်ထွာ၊ အဝ်ႏမဲဉ်ထီႏသေႏသေႏသွူ၊ ခမ်းကို မဉ်ႏအီႏခွိုင်းဆာနွောင်ꩻ ခမ်းသားအလောင်း ထာꩻမာꩻမျိုꩻနဝ်ꩻ ခမ်းသားဆန္ဒအလꩻ ခမ်းသားမဉ်ႏမဲဉ်ထွာတဝ်းတဲင် မာꩻတလꩻတဝ်းသွူ။ နဝ်ꩻမꩻ ပအိုဝ်ႏတစွိုးခွိုꩻလွုမ်း ခမ်းသားအတာႏ ခမ်းသားငဝ်းမီဒီယာယို အလွိုအယွမ်ꩻ တအွဉ်ႏတဝ်း၊ တွောင်းတွောင်းတသွုန်သွုန် ခွုမ်မာꩻလွေꩻထွူ၊ ခမ်းသားငဝ်း လိတ်သတင်ꩻစောင်ႏမွန်ဗန်ညဆွာꩻရေꩻတာႏ ယွုမ်းအံႏအာႏကွိုꩻတောႏဒျာႏ ပအိုဝ်ႏခမ်းသားစွုမ်ႏဖြာꩻဖြာꩻ ထာꩻဖေႏအာႏနဝ်ꩻသွူ။ ခမ်းသားငဝ်း လိတ်သတင်ꩻစောင်ႏယို အစွိုꩻမုဲင်ꩻမုဲင်ꩻ ပဲင်ႏတမွေးတဝ်းနဝ်ꩻမꩻ ခမ်းသားငဝ်းအသက်ယို အဝ်ႏဒျာႏပအိုဝ်ႏခမ်းသားစူကိုသွူ။[၁][၂]