ငေါဝ်းကပ်လူႏအမျိုꩻမျိုꩻ

အရဟံအစ၊ နဝဂုဏ်ႏတောႏ၊ ဗွေကျောႏစွုမ်ႏငါႏ၊ မဟာႏကျောႏကျာꩻ၊ ဗွေႏဘုရာꩻဩ။ ခိန်ႏခါႏကာႏလ၊ သမယယိုခါ၊ ကထွာခွေသွဉ်း၊ ဗိုဗောင်းမတ်ပီ၊ စူတဆီရွံးဗူႏ၊ ကတူႏကီအွဉ်ႏဒင်ႏ၊ ဝုဲင်ႏထင်ႏထွူဩ၊ ဝုဲင်ႏထွူတဲင်ခါ -

• (အွီႏနွိုးဟွမ်ငါႏ သွမ်ꩻဩဇာႏယို၊
• ခွꩻစုံဟောဝ်ငါႏ ထီသီႏတာႏယို၊
• လွီးနွုမ်ꩻဟွမ်ငါႏ တေန်ꩻနံႏသာႏယို၊
• သဉ်ထွူးစော့ꩻလာႏ ကောဝ်ႏပုပ္ဖာႏယို၊
• သွုံꩻဆောင်ႏထွိုက်ဒါႏ သေင်ႏရောင်ꩻရာႏယို)

ပုဗ္ဗ, မုဉ္စ, အပရ-စေႏတနာႏ၊ အင်္ဂါႏသွံပါꩻ ထူꩻချာꩻဗွေမန်ႏ၊ ကပ်လူႏထင်ႏဩ။

• (ကပ်လောင်ꩻလူႏဗာႏ သွမ်ꩻဩဇာႏယို၊
• ကပ်လောင်ꩻလူႏဗာႏ တေန်ꩻနံႏသာႏယို၊
• ကပ်လောင်ꩻလူႏဗာႏ ထီသီႏတာႏယို၊
• ကပ်လောင်ꩻလူႏဗာႏ ကဝ်ႏပုပ္ဖါႏယို၊
• ကပ်လောင်ꩻလူႏဗာႏ သေင်ႏရောင်ꩻရာႏယို) -

နောင်ႏလာႏပန်ငါ၊ ယံထွာ လိုꩻထူꩻ၊ ယံထွာလူꩻမျတ်၊ စွုမ်ႏဇာတ်စွုမ်ႏဘဝ၊ သုခညိမ်ꩻခွꩻ၊ ခွုင်းသꩻကကွီ၊ မွိုင်ဖွီ ယံဗွေ၊ ယံခြွေ ယံခြာႏ၊ ယံချမ်ꩻသာႏဩ။

တောင်ꩻသေꩻ။ ။ စူမီႏကွင်ꩻကို ကပါဒါႏ ထာꩻလူႏမဉ်ꩻနဝ်ꩻ မီႏလူႏတစွိုးလွုမ်ꩻတဲ့ ရွစ်ငါတစွိုးငါတဲ့ လꩻဒျာႏနဝ်ꩻသွူ။

ဥပမာႏ။ ။ မီႏလူႏသွမ်ꩻတမျိုꩻလွုမ်ꩻတဲ့ ရွစ်ဗော့ꩻ (အွီႏနွိုးဟွမ်ငါႏ သွမ်ꩻဩဇာႏယို တွမ်ႏ ကပ်လောင်ꩻလူႏဗာႏ သွမ်ꩻဩဇာႏယို) နဝ်ꩻငါတဲ့လꩻလဲဉ်းသွူ။)

ငေါဝ်းကပ်လူႏသွမ်ꩻတောႏ

၁။ ဘန္တေဩဗွေႏ ဘုရာꩻသျင်ႏ၊ ခွေသွဉ်းစီႏရင်ႏ ဒဲဉ်သွမ်ꩻဗွာ၊ ထေင်းထိုယောင်းငါ ကပ်နီဗွေႏ၊ ထူႏရပ်ဆွုမ်ႏဖေႏ ဘွုံꩻပေꩻဩ၊ သွမ်ꩻဗွာကျိုꩻနော ရေႏနိဗ္ဗာန်ႏ၊ ယံလꩻအမန်ႏ ဆုꩻကွီဩ။ ---သာႏဓု---သာႏဓု---သာႏဓု---

၂။ ဘန္တေဩသ စောဝ်းဘုရာꩻ၊ ဂုဏ်ႏတောႏကွတ်ပါꩻ ဗွေပတာ၊ ခွေသွဉ်းယိုခါ ကေႏညိုႏထင်ႏ၊ သွံပါꩻစွုံႏလင်ႏ စေႏတနာႏ၊ ပျꩻဌာန်ႏသေႏချာႏ ကပ်လူႏလောင်ꩻ၊  ပိဏ္ဍပါတ်ဒဲဉ်သွမ်ꩻ ရဲဉ်ꩻစွုံႏယာႏ၊ လွီးဟွမ်ရသာႏ ငိုးကျော်မျိုꩻ၊ နံႏသာႏကတိုꩻ သီႏတာႏထီ၊ ပလ္လင်ႏလောင်းကီ ဖျင်ဒင်ႏစူꩻ၊ ဝန်ႏခံꩻကိုဖူꩻ သွမ်ꩻပန်ꩻယို၊ ဇိနဗွန်ထို သမ္ဗုဒ္ဓ၊ မယံဒေမ သွဉ်းကပ်လူႏ၊ ရပ်ခံႏတောႏမူႏ သွုံꩻဆောင်ႏဩ။       

ကွီဆုꩻ ၁။ ဒဲဉ်သွမ်ꩻအကျိုꩻ ရေႏနိဗ္ဗာန်ႏ၊ ယံလꩻအမန်ႏဆုꩻကွီဩ။       

ကွီဆုꩻ ၂။ သွဉ်းကပ်လူႏဗာႏ ဒဲဉ်သွမ်ꩻကျိုꩻ၊ ကျိုꩻတန် ငတ်ꩻမျိုꩻ ယံလꩻထင်ႏ၊ ဥပဓိအင်ႏခွင်ႏ ယောင်ꩻဆင်ꩻယံ၊ ဗလအာႏသန် ယံအာႏရဲင်ꩻ၊ မွိုးရက်ဖါပဲင်ꩻ မျာꩻစွုမ်ꩻရောင်၊ ထွံႏကျံႏတွိုင်ꩻဖြောင် စီꩻပွါꩻလꩻ၊ နမ်းယိုတွမ်ႏသꩻ ယံချံꩻသာႏ၊ ယံကထွာဗာႏ စွုမ်ႏဘဝ၊ မျက်မောက်သုခ ခမ်းနိဗ္ဗာန်ႏ၊ မျက်မောက်ဧကန်ႏ ယံလꩻဗာႏ၊ ယိုꩻယိုꩻသာႏသာႏ ဗွေႏစောဝ်းဘုရာꩻဩ။

ကွီဆုꩻ ၃။ သွဉ်းကပ်လူႏဗာႏ ထီသီႏတာႏအကျိုꩻ၊ နောင်ႏလာႏပန်ငါ ယံထွာလိုꩻထူꩻ၊ ယံထွာလူꩻမျတ်၊ စွုမ်ႏဇာတ် စွုမ်ႏဘဝ၊ သုခညိမ်ꩻခွꩻ ခွုင်းသꩻကကွီ၊ မွိုင်ဖွီ ယံဗွေ၊ ယံခြွေ ယံခြာႏ၊ ယံချံꩻသာႏဩ။

ငေါဝ်းကပ်လူႏမေႏ

၁။ ဘန္တေဩဗွေႏ အဟံခွေသွဉ်း၊ နေးတွမ်ႏစေႏတနာႏ၊ သဒ္ဓါႏစိတ်စော်ꩻ၊ မနော်ꩻသꩻဗွာ၊ သဒ္ဓါႏဗလံ၊ ဣမံ အဂ္ဂိဒီပံ၊ တေန်ꩻတန်ဆီမီး၊ တသီးသွခံꩻရောင်ႏ ၊ ဖယောင်ꩻတဲင်ႏနံႏသာႏ၊ ထူႏဒွါႏတွမ်ႏမေႏခြဲစ်ꩻ၊ လဲ့ꩻတဲစ်ꩻထင်ႏထို၊ ဗွန်ထိုနီဗွေႏ၊ ခွေသွဉ်းရေႏမတ်၊ ဗွန်မျတ်နီဗွေႏ၊ ခွေသွဉ်းရေႏစူꩻ၊ ဘုန်ႏထူꩻနီဗွေႏ၊ ခွေသွဉ်းရေႏမတ်၊ လူႏကပ်ပူႏဇောႏ၊ သျင်ႏတောႏဗွေႏဘုရာꩻဩ။

၂။ ဩဗွေႏဗွန်ထို ဘုရာꩻသျင်ႏ၊ ခွေသွဉ်းကပ်ထင်ႏ မေႏတေန်ꩻလီး၊ ရောင်ႏတင်ႏတသီး လေခူခါ၊ ပူႏဇောႏကပ်ငါ နီဗွေႏဩ။

ငေါဝ်းကပ်လူႏထီ

၁။ ဘန္တေဩဗွေႏ စဝ်းဘုရာꩻ၊ ဂုဏ်ႏတောႏကွတ်ꩻပါꩻ ဗွေလွန်းလွို၊ သွံဘွုံႏအကို ကျောႏစွစ်ꩻတိုး၊ ဟံႏလဲင်ꩻတသွိုး ထီဗောက်ꩻဗဝ်ႏ၊ တုꩻပြဲင်ႏမအဝ်ႏ စဝ်းဗွန်တန်၊ ထီဥဒကံ ခွꩻစုံစီႏ၊ စဲစ်ထွူဖြီႏစီႏ သော့ꩻကောက်ꩻခံꩻ၊ ယောင်းငါအွဉ်ႏတံꩻ ကပ်နီဗွေႏ၊ ရပ်ခံႏထူႏဖေႏ သွုံꩻဆောင်ႏဩ။ (ခွန်ထွန်းလှိုင်)

ငေါဝ်းပြွတ်မော်နမ်း

၁။ ဩကာသ၊ ဩကာသ၊ ဩကာသ၊ သျင်ႏတောႏဗုဒ္ဓ ဘုရာꩻသျင်ႏ၊ သွံဆီတခွင်ႏ လိုꩻလူꩻနယ်ႏ၊ ဝေႏနေႏချွစ်လယ်ႏ ကေꩻဇူꩻတန်၊ ဗွေႏစဝ်းအရဟံ သဗ္ဗညု၊ ဗွေႏစဝ်းရုပ်ထု သွဉ်းကိုꩻကွယ်ႏ၊ ဥဒိဿရေႏရွယ်ႏ ရေႏမတ်စူꩻ၊ မော်နမ်းကိုဖူꩻ ပသေကြောင်း၊ အထန်ႏအလောင်း ပသေစင်၊ ကဝ်ႏစော့ꩻလာႏဗန် ခွေသွဉ်းပြွတ်၊ အလီꩻတစွုတ် သွဉ်းပြောင်ꩻလုဲင်ႏ၊ ခွေသွဉ်းခေါက်ဝုဲင်ႏ ပဲစ်ယံကင်ꩻ၊ ရူပယောင်ꩻဆင်ꩻ ယံတင်ႏတယ်ႏ၊ မဉ်ꩻဟွမ်လွီးလယ်ႏ သတင်ꩻနွိုး၊ ခွိုꩻယိုတွမ်ႏစွိုး မဉ်ꩻယံအွီႏ၊ ရော့ꩻမဲ့တဲ့ꩻသွီႏ လိုꩻတင်ꩻလုဲင်၊ ပီတိစွိုမ်းပြုဲင် သꩻသဒ္ဓါႏ၊ လူႏပြွတ်ထင်ႏဗာႏ ကဝ်ႏမော်နမ်း၊ တနံအခမ်း လူꩻသီးဒုံ၊ ယံဖေႏထင်ႏအုံ စံႏစာꩻဗာႏ၊ စေꩻစိန်ႏချံꩻသာႏစွိုးမျိုꩻအာကွိုနဲ၊ သျင်ႏတောႏဗုဒ္ဓ ဘုရာꩻဩ။‍