စိတ်ပတီꩻအားထုတ်တရာꩻ

စိတ်ပတီꩻနယ်ꩻ ထူႏသီႏလသွစ်ꩻပါꩻထွူတဲင် ကဲဉ်းအာအာ စိတ်ပတီꩻ၊ စိတ်ပတီꩻနဝ်ꩻ အဝ်ႏအမျိုꩻမျိုꩻအကို စိတ်ဘုရာꩻဂုဏ်ႏတောႏနဝ်ꩻ သေန်ႏလျောႏလဲဉ်းဝင်ꩻ၊ ဘုရာꩻဂုဏ်ႏတောႏကွတ်ꩻပါꩻအကို မူႏခိုကဟွုန်ခွိုꩻလဲဉ်းဝင်ꩻနဝ်ꩻ "အရဟံ"ဂုဏ်ႏ၊ စိတ်"အရဟံ"နဝ်ꩻ ယိုꩻလဲဉ်းဝင်ꩻ။ ကွဲႏတွော့ꩻ သေနာႏအဓိပ္ပါယ်ႏမꩻ ကုသိုလ်ႏယိန်းလꩻအာအာ၊ အကျိုꩻယိန်းထွာထွာ၊ "အရဟံ"နုဲင်းနဝ်ꩻနဝ်ꩻ နီဗွေႏဘုရာꩻသူꩻနဝ်ꩻ ပူႏဇောႏအထူꩻယို ခံႏထူႏထွိုက် အဓိပ္ပါယ်ႏလꩻနုဲင်းနဝ်ꩻ။ မဉ်ႏဟော်ꩻ "အ-ရဟံ"နုဲင်းနဝ်ꩻနဝ်ꩻ နီဗွေႏဘုရာꩻသူꩻနဝ်ꩻ ထာꩻဗဉ်ႏဗꩻကိုခန်းတဲ့ယဝ်း မာꩻတဝ်းအကုသိုလ်ႏ အဓိပ္ပါယ်ႏလꩻနုဲင်းနဝ်ꩻ။ မဉ်ႏဟော်ꩻ "အရ-ဟံ"နုဲင်းနဝ်ꩻနဝ်ꩻ နီဗွေႏဘုရာꩻသူꩻနဝ်ꩻ ရန်ႏသူႏကိလေႏသာႏဖုံႏယို မာꩻဖေ့ငိမ်ꩻနွောင်ꩻဒါႏ အဓိပ္ပါယ်ႏလꩻနုဲင်းနဝ်ꩻ။ ယူႏ"အရဟံ"အဓိပ္ပါယ်ႏ သွံမျိုꩻဖုံႏအကို တမျိုꩻမျိုꩻတဲင် "အရဟံ"ချꩻလင်ꩻပတီꩻတဖြုံႏ၊ အွဉ်ႏစွူစွူသꩻ ယူႏဗွေႏဘုရာꩻဂုဏ်ႏတောႏထွူမꩻ ချꩻလင်ꩻပတီꩻတဖြုံႏ၊ မာꩻသွော့နုဲင်းနဝ်ꩻ၊ အပတ်လꩻဆေ့ꩻတဲ့ယဝ်း သꩻနဝ်ꩻ တွိုႏမုဲင်ꩻကိုမုဲင်ꩻကာမကောင် သေတဝ်း၊ မဉ်လꩻအပတ်အာတဲင် နက်လင်ꩻတရျက်ရျက်နဝ်ꩻ အနယ်ꩻမွေးတဝ်း။ အားထုတ်တရာꩻနယ်ꩻ စိတ်တဝ်းပတီꩻတဲင် မဉ်အားထုတ်တရာꩻနဝ်ꩻ ယိန်းဟဝ်၊ ဘာႏဝနာႏ-နဝ်ꩻ သမထဘာႏတနာႏ၊ ဝိဿနာႏ အဝ်ႏနီမျိုꩻ။ အားထုတ်သမထနယ်ꩻအချုက်နဝ်ꩻ အာပါန-တရေ့ꩻသာ၊ တရေ့ꩻနွို့-သာထန်ႏ၊ အွဉ်ႏသတိꩻတိꩻ၊ တရေ့ꩻ-သတိꩻ၊ အွဉ်ႏသတိꩻတိꩻ သာထန်ႏ သာထန်ႏ-သေ၊ သꩻအွဉ်ႏအွိုးနေ့ꩻဖူနာ၊ မွေးတဝ်းတဲ့ ဖြောင်းဗီႏလောင်းထွူတဲင် အွဉ်ႏသတိꩻတိꩻ တရေ့ꩻ-ခွေါင်း-သေ၊ သာထန်ႏ ခွေါင်း-သေ၊ ထိန်ꩻခါꩻသꩻတွမ်ႏတရေ့ꩻသာ၊ မာစွူသꩻခြေင်ခြေင်၊ တယ်ႏထောင်ႏ သမာဓိခြေင်ခြေင်နဝ်ꩻ ဟဲ့ꩻ"သမထ"။ "ဝိပဿနာႏ"ကရိုꩻနဝ်ꩻ ဝိ-အစွိုးစွိုး အမျိုꩻမျိုꩻ၊ ပဿနာ-ထွား၊ ထွား-ခန္ဓာႏ အထွာအကုဲင် အစွိုးစွိုးအမျိုꩻမျိုꩻနဝ်ꩻ ဟဲ့ꩻ"ဝိပဿနာႏ"၊ ထွားထောင်ခန္ဓာႏအပဲစ်၊ စဲစ်ဆေꩻခန္ဓာႏအမာႏ ဝိဿနာႏရိုꩻဗာႏနုဲင်းနဝ်ꩻ။ အားထုတ် ဝိပဿနာႏနယ်ꩻအချုက်နဝ်ꩻ လွေꩻအုံတခြာကို သေင်ႏဆလ၊ ထာꩻယေန်ယေန်ကို တထွောင်းထွောင်း၊ အုံတပန်းနေးတဲ့လꩻ၊ အုံတပန်းနေးတဲ့လꩻ၊ အုံတပုဲင်နေးတဲ့လꩻ၊ ငင်းဒေင်မာꩻကီ အွဉ်ႏတနွောင်းနွောင်း၊ ကဲဉ်းအာအာနဝ်ꩻ စူယာꩻပင်စေႏ အွဉ်ႏဆလ၊ စူယာꩻပင်ထွေ အွဉ်ႏဆကီ၊ စူမွူးနာ အွဉ်ႏခွေါင်းပသာႏလို့ဝင်ꩻ၊ ဆိမ်ꩻမဲ့၊ သာထာꩻသာ ကသာအတွိုင်ꩻတွိုင်ꩻ တရေ့ꩻခွေါင်း-သေ၊ သာခွေါင်း-သေ၊ အဝ်ႏအာႏထုတ်လွꩻနုဲင်းနဝ်ꩻ၊ ပေါႏညသွတခွယ်ꩻရပ်နဝ်ꩻ နမ်းခန္ဓာႏကိုယို ဝွေႏဒနာႏပေါႏလွဉ်၊ မဉ်ႏဟွီတဲ့ မတ်သွော့ ဟွီ-ဟွီ၊ မတ်-ကရိုꩻနဝ်ꩻ မတ်-ကရိုꩻနဝ်ꩻ မတ်တောင်ꩻတောင်ꩻ သညာမတ်-မွေးတဝ်း၊ သတိꩻမတ်ဒျာႏ၊ အွဉ်ႏသတိꩻအဟွီလောင်း၊ သꩻအွဉ်ႏတွိုႏတွိုႏလွေꩻ အဟွီလောင်းနုဲင်းနဝ်ꩻဒျာႏ။ မဉ်ႏဒူတဲ့ မတ်သွော့ ဒူ-ဒူနုဲင်းနဝ်ꩻ၊ အချုက်နဝ်ꩻ နမ်းထွာနုဲင်းမုဲင်ꩻတဲ့ အွဉ်ႏသတိꩻတိꩻ မတ်ထွားလွဉ်ꩻနဝ်ꩻအတွိုင်ꩻ၊ မဉ်ႏအွဉ်ႏသတိꩻတိꩻ မတ်ထွားလွဉ်ꩻနဝ်ꩻ ထွာသတိပဋ္ဌာန်ꩻတရာꩻ၊ မာꩻထမုဲင်ꩻမုဲင်ꩻတယဝ်း မဉ်ႏဒင်ႏလွဉ်ꩻအွဉ်ႏဒင်ႏလွဉ်ꩻသတိꩻ၊ သꩻကထွာမဉ်ႏထွားမတ်လွဉ်ꩻနဝ်ꩻ ထွာသတိပဋ္ဌာန်ꩻ ကမ္မဋ္ဌာန်ꩻလွဉ်းလွဉ်း။ သꩻထွာနုဲင်းမုဲင်ꩻတဲ့ အွဉ်ႏသတိꩻတိꩻ မတ်ထွားလွဉ်ꩻ သꩻကထွာအတွိုင်ꩻ ထွား-ကရိုꩻနဝ်ꩻ ထွားတွမ်ႏမဲ့မွေးတဝ်း၊ ထွားတွမ်ႏဉာဏ်ႏ၊ ထွားတွမ်ႏထာꩻသေ နုဲင်းနဝ်ꩻဒျာႏ။ ဝီရိယ၊ သတိ၊ သမာဓိ အာႏမဉ်ႏတလာလွဉ်မဲ့ꩻ ဉာဏ်ႏသေအဟဝ်၊ ဉာဏ်ႏသေအကုဲင် ပေါႏလွဉ်တလဲင်ႏတစိꩻစိꩻ၊ ကွဲညကွဲညမဲ့ꩻ သေလွဉ် တသေႏတဝ်းအကျောင်ꩻ အနိစ္စဉာဏ်ႏ ပေါႏလွဉ်၊ သေလွဉ် ဆယ်ꩻရယ်ꩻအကျောင်ꩻ ဒုက္ခဉာဏ်ႏပေါႏလွဉ်၊ သေလွဉ် အမဉ်ထွာနုဲင်းမုဲင်ꩻတဲ့ ဝွေꩻထွာဒျာႏအကျောင်ꩻ အနတ္တဉာဏ်ႏပေါႏလွဉ်။ အနိစ္စဉာဏ်ႏ၊ ဒုက္ခဉာဏ်ႏ၊ အနတ္တဉာဏ်ႏ အာႏမဉ်ႏတလာနဝ်ꩻခါ မဉ်ႏထီႏသေ စဲင်းစဲင်းစဲ့စဲ့မွေး အနိစ္စ ဒုက္ခ အနတ္တနဝ်ꩻခါ ဗွိုႏအန်ꩻလွဉ် သင်္ခါႏရ၊ ပေါႏမဉ်လꩻဒွုမ်ခန္ဓာႏတဲ့ ကွုတ်ဒွုမ်၊ ခန္ဓာႏထွာဒွုမ်၊ ပေါႏခန္ဓာႏထွာဒွုမ်တဲ့ ဖြားခရာႏ၊ ဆာခရာႏ၊ သီခရာႏအဲဉ်ထဝ်းဒွုမ်၊ ဒုက္ခလို့တဲင် ငိမ်ꩻခွꩻကဒဲ့ꩻခန်းဒျာႏ၊ လꩻခန်းဒျာႏ နိဗ္ဗာန်ႏချမ်ꩻသာႏနဝ်ꩻသွူ။ ယိုနဝ်ꩻ ဟော်ꩻနယ်အချုက်လွုမ်ꩻ၊ သထမ ဝိပဿနာႏခရာႏ မီႏမဉ်သေစဲင်းစဲင်း နမ်း(ကိုႏတဲင်ႏ)မော့ꩻနဝ်ꩻ လွေꩻသွော့ ကမ္မဋ္ဌာန်ꩻ တွိုက်၊ အားထုတ်တဲးတဲးဝါးဝါးသွော့တရာꩻ၊ နီဗွေႏဘုရာꩻ တရာꩻယိုနဝ်ꩻ ဧဟိပဿိက-လွဉ်ယိုဟုဲင်း၊ အားထုတ်လုဲင်း၊ သေထီႏဗာႏအမန်ႏ၊ လꩻဗာႏအမန်ႏ နီဗွေႏဘုရာꩻ အာႏမခံႏတျက်တျက်နုဲင်းနဝ်ꩻသွူ။ နာႏတရာꩻအပေါင်ꩻ သူႏတောႏကောင်ꩻသီးဖုံႏဟွေး - မခွိုက်ကသဲင်ꩻထွာလိုꩻ မခွိုက်ကသဲင်ꩻခွဲး နီဗွေႏဘုရာꩻသာႏသနာႏ၊ မခွိုက်ဗွေႏသံႏဃာႏသီး ကဗွောင်ဖေႏမဲ့နားနုဲင်းယိုနဝ်ꩻ ဟွုန်သꩻရောင်းသꩻရေꩻတဲင် စူကမွန်၊ ခင်ႏကမွန်နေ၊ မဲ့ကထီႏနေ၊ နားကဟွုန်နေ၊ အခေႏအနေႏ ကဟဝ်နေအတွင်ꩻယိုခါနဝ်ꩻ ကျိုꩻစာꩻမာꩻမွေးမွေးသွော့ ဒါႏန၊ သီႏလ၊ ဘာႏဝနာႏ။ ကွပ်ကွိုꩻစာꩻမာꩻနွောင်ꩻတဲင် မဂ်တရာꩻ ဖိုလ်ႏဉာဏ်ႏ နိဗ္ဗာန်ႏချမ်ꩻသာႏ ယံကလꩻဗာႏဝင်ꩻကွိုနဲး နာႏတရာꩻအပေါင်ꩻ သူႏတောႏကောင်ꩻသီယာဟွေး။