ဆင်အကျောင်ꩻ

ဆင်နောဝ်ꩻ အနမ်းလဲ့ကတန်၊ အာႏလဲ့ကတလာ၊ ဝွေꩻသီးမီႏမိဉ်မာꩻသီလိုꩻနောဝ်ꩻ အောဝ်ႏပသာႏပေႏရွုမ်ꩻ၊ ကွဲႏတွော့ꩻ ဝွေꩻသီးမာꩻချာလိုꩻ တဗွုန်ႏတောဝ်း၊ ခံႏဗာႏလိုꩻသွဉ်း၊ ထွဉ်ႏလွေꩻမှဲꩻလဲ့လွေꩻဗာႏ၊ ထွဉ်ႏမာꩻထာꩻမှဲꩻလဲ့မာꩻဗာႏ၊ ပွိုးဝွေꩻဉာဏ်ႏပညာႏငထောဝ်း၊ ဝွေꩻတလွိုလꩻတောဝ်းလိုꩻ၊ ထာꩻမာꩻဝွန်ႏလဲ့ ထွူႏလဲဉ်းထာꩻသားလင်၊ ဆင်တဗာႏအာႏနောဝ်ꩻ တတွာလိုꩻအဖြာꩻသူဆီ၊ လိုꩻတဖြာꩻအံႏထွဉ်ႏလꩻဒွါႏဝွေꩻ၊ နီပအိုဝ်ႏယိုခါလဲ့ ပညာႏငထောဝ်းနှဲးဆင်နဝ်ꩻနေ၊ လိုꩻမျိုꩻချာꩻပညာႏသား မဲဉ်အံႏထွဉ်ႏနှဲးမှဲꩻလဲ့ မာꩻဖေႏဗာႏတေ့ꩻတေ့ꩻ နှဲးဆင်နောဝ်ꩻနေနေ၊ ရွဉ်လဲ့ဝင်ꩻကွီ၊ တခွေလဲ့ဝင်ꩻဒွါႏခါꩻ၊ ဖွတ်ꩻလဲ့ဝင်ꩻဒေါင်ခါꩻ၊ သေနာႏနေနမ်းကောင်း၊ တွမ်ႏယူႏတဖွောင်းမွုန်းထာꩻ၊ စိဉ်ꩻစာꩻသွော့ဆုံးဆုံး၊ ယံကထွာလုံးပတ္တမျာꩻနောဝ်ꩻ ကျိုꩻစာꩻသွော့ဉာဏ်ႏပိညာႏ၊ လောကုတ္တရာႏတွမ်ႏလောကီဓမ္မယိုနီပါꩻ၊ မီႏဒါႏသေꩻနောဝ်ꩻမꩻ အီႏလွစ်လꩻဝင်ꩻသွဉ်း၊ စိုးခေတ်လဲင်ႏခါယို၊ လိုꩻခိုပညာႏ မီႏဒါႏနဝ်ꩻမꩻ အီႏလꩻချံꩻသာႏ၊ ပေါႏတဒါႏတောဝ်း ငထောဝ်းပညာႏ၊ ထွာဗာႏဝင်ꩻသွဉ်းနှဲးဆင်၊ နီလိုꩻပအိုဝ်ႏ အာခွုင်းမှဲꩻသဲဉ်၊ ကနွို့လꩻလွတ်တောႏနဝ်ꩻ အောဝ်ႏခွုင်းမှဲꩻဖြာꩻ၊ နောဝ်ꩻရာꩻမီႏလဲ့ အစိုႏရခမ်းတန်၊ ယိုနဝ်ꩻ ပအိုဝ်ႏနယ်ႏ၊ စယ်ႏယ်ႏပင်ႏင်ႏ ဝင်ꩻတခုဲႏအွဉ်ႏတောဝ်း အထော့အသေ(အသိအမှတ်)၊ ကန်ႏသတ်ဖေႏငထောဝ်းဒွိုန်း၊ နီပအိုဝ်ႏကအောဝ်ႏထိန်ꩻနေႏရာႏ၊ အုပ်နက်အကွက်ခရဲင်ႏပေါင်ꩻ ၁၄-ယိုနောဝ်ꩻ ဝင်ꩻကဒွါႏခါꩻဖွတ်ꩻ အောဝ်ႏခွုင်းမှဲꩻထွောင်း၊ ဝင်ꩻကဒေါင်ခါꩻတခွေ အောဝ်ႏခွုင်းမှဲꩻထွောင်း၊ ယံကိဉ်ꩻစာꩻသွော့ဝင်ꩻ တင်ꩻလှဲပအိုဝ်ႏဟွေး၊ နီပအိုဝ်ႏသီးနောဝ်ꩻ အာႏဇာႏနီႏလိုꩻခို ရိုꩻလꩻလဲဉ်းဆွူ၊ ပွိုးကားပီမှဲꩻ၊ ရယ်ꩻရင်ꩻသတ္တိ၊ မိမိအောဝ်ႏထွူ၊ ကွဲးကားပညာႏ အောဝ်ႏလိုႏငါႏနေ၊ ယံကဗိုန်နှဲးဝင်ꩻခမ်းတန်သားနော၊ ဉာဏ်ႏတွမ်ႏပိညာႏ၊ မီႏဗိုန်လꩻဝင်ꩻနောဝ်ꩻ ဆင်းရန်းတွာသွုန်၊ တခြွုန်ချင်ႏညီႏတူႏ၊ အကျိုꩻထူႏမျ၊ ယံလꩻတွာဝင်ꩻ၊ ထိုမ်ႏဗဲင်းပိညာႏ၊ အုံပရာႏမွုန်းထာꩻ၊ ကျိုꩻစာꩻမꩻနော၊ သွꩻဖေါႏပအိုဝ်ႏပေါင်ꩻ၊ ခွန်လောင်ꩻသီးဟွေး၊ နီကထွာဗာႏဝင်ꩻဆင်၊ နီကတရန်ထွို့ꩻဗာႏ၊ ထေအာႏထေရဲင်ꩻ၊ ထွို့ꩻသဲင်ꩻသေင်ႏခြုံး၊ ထာꩻပြင်ႏလုံးခြာ၊ ကောင်နာကောင်ထျꩻ၊ ယူႏလꩻယံဗွိုဝင်ꩻ၊ အခန်ꩻယိုမာꩻငါ၊ ယံထွာဗာႏမွုန်းတဝ်းဝင်ꩻသွဉ်း နှဲးဆင်ကွိုနဲးတင်ꩻလှဲ၊ ဖုဲးဗဲင်းဝင်ꩻသꩻမိစ္ဆာႏ၊ ထာꩻယူႏမာႏဒိဋ္ဌိယုတ်၊ သꩻမွိုက်တွုမ်သꩻရွိုင်ꩻစွိုင်ꩻ၊ သꩻတအွိုင်သꩻတအာႏ၊ ဇော်ꩻမိစ္ဆာႏအွဉ်လော်နီ၊ ယားကုဲခေႏယားကုဲမိဉ်ꩻ၊ သိမ်ꩻလꩻလꩻလွောင်ႏဗူႏဗဲင်း၊ မေတ္တာႏထဲင်းသီႏတာႏဆူ၊ ဇော်ꩻထွားခူသꩻတဝွုန်ꩻ၊ နီစွိုးတွုန်ပအိုဝ်ႏဖုံႏ၊ အုံညီꩻပြုံႏပြယ်ႏထောင်ႏကို၊ လိုꩻခိုထီးယံသေငါꩻ၊ အမျာꩻထီႏယံစဲင်းစဲ့၊ အဲ့ꩻတဲင်မဲ့ယံထီႏဖြို၊ ပအိုဝ်ႏပိုနီယိုဟွေး၊ နီလိုꩻလဲ့ယံကညီႏညွတ်ဝင်ꩻနှဲးတမူ၊ ထာꩻသူႏသေလဲ့ ယံကပီနှဲး ခမ်းတန်သား၊ မီႏကျိုꩻစာꩻလဲ့ အီႏထွာဗာႏ၊ ပအိုဝ်ႏယာႏနီစွိုꩻဟွေး။