ဆို့ꩻနေးမဏ္ဍပ်လူႏကျပ်မွေး
"သေရီသုတ် (ဆို့ꩻနေးမဏ္ဍပ် လူႏကျပ်မွေးထာꩻ)"
"သေရီ"ကရိုꩻဒါႏ လူꩻပိုတဖြာꩻနဝ်ꩻ လောဝ်းဗွေႏဘုရာꩻနုဲင်းယို- "ဩဗွေႏ- ဘုရာꩻမျတ်ဗွေႏဩ- လူꩻတဲ့နဝ်ꩻ၊ လိုꩻတဲ့နဝ်ꩻ အုံမဒဲဉ်တလꩻတဝ်းတဲင် ကော့ꩻမောင်ꩻသေႏသေႏဗာႏဒဲဉ်၊ လူꩻတကော့ꩻမောင်ꩻတဝ်းဒဲဉ် အဲဉ်ထဝ်းတဖြာꩻဖြာꩻ ဗွေႏဩ"လောဝ်းနုဲင်းနဝ်ꩻ၊ ဗွေႏဘုရာꩻရိုꩻ- "တကာႏလူꩻပို သေရီဟွေး- လူꩻတဲ့နဝ်ꩻ၊ လိုꩻတဲ့နဝ်ꩻ အုံမဒဲဉ်တဒါႏတဝ်းတဲင် 'လူႏဒဲဉ်သွမ်ꩻ'နဝ်ꩻ အကျိုꩻတန်ငါႏ၊ ဒါႏနကုသိုလ်ႏနဝ်ꩻနဝ်ꩻ ဘဝယို ဘဝငါ ပါလွေꩻသေႏသေႏ၊ တွိုႏဘဝငါသူꩻ အာႏကွိုꩻဗာႏ ဒါႏနကုသိုလ်ႏနဝ်ꩻသနယ်" "ဩဗွေႏ ဘုရာꩻမျတ်ဗွေႏဩ- ဗွေႏဘုရာꩻကဟော်ꩻနဝ်ꩻ မဲဉ်ႏမွေးစွဉ်ႏထာꩻဗွေႏ၊ ဇာတ်ကရီးပန်အွဉ် ခွေသွဉ်းထွာဖို ခွန်တန်တပါꩻ၊ ခွေသွဉ်းနဝ်ꩻ မဉ်ꩻ'သေရီ'၊ ခွေသွဉ်းနေးတွမ်ႏ သွုန်ႏစွဉ်ႏသꩻဗွာ လူႏဗာႏအာမွေးစွဉ်ႏထာꩻ၊ နမ်းတဲ့လူႏ၊ နိုꩻဆောႏတမာပါဝင်ꩻ၊ ထာꩻလူႏအကျိုꩻတန်ငါႏအကျောင်ꩻ ကားကသေနာႏ ခြုဲင်းနယ်ဟော်ꩻနယ်ဝင်ꩻ။ ဝေင်ꩻငွါကွဉ်ႏနဝ်ꩻ ဆို့ꩻမင်္ဂလာႏမဏ္ဍပ်၊ ဗွေႏမျတ်သံဃာႏတဲ့နဝ်ꩻ၊ ခြောခြောခြားခြား ထာꩻကွီအံႏသားတဲ့နဝ်ꩻ လူႏလို့၊ အဝ်ႏလူႏနုဲင်းနဝ်ꩻတွင်ꩻ နင်ꩻမူႏတွမ်ႏ အသွဉ်းအသယ်ႏဖုံႏ ကွီလူႏသော့ꩻတဲင် ဖေႏလူႏသော့ꩻခန်းဒျာႏ ဝွေꩻသီး ဗွေႏဩ။ ခွေသွဉ်းလွေꩻဆို့ꩻတော မင်္ဂလာႏမဏ္ဍပ် ဝေင်ꩻငွါနဝ်၊ ဟောဝ်ဟောဝ်ဒါႏဒါႏ ထွူသေႏချာႏလဲဉ်းတဲင် အဝ်ႏလူႏသော့ꩻတွင်ꩻ ခွေသွဉ်းစူထောက် ခွန်ဖုံႏနဝ်ꩻ လွဉ်ကွီလူႏသော့ꩻတွော့ꩻ ဖေႏလူႏသော့ꩻတောဖျင်ဝွေꩻသီး၊ ဝွေꩻသီးလူႏသော့ꩻထိုꩻခန်းဒျာႏ။ ခွေသွဉ်းလွေꩻမာꩻတော မင်္ဂလာႏမဏ္ဍပ် ဝေင်ꩻငွါတွို့ꩻ၊ ထွူႏသေႏခေါင်းသေႏချာႏတဲင်ခါ ခွေသွဉ်းစအီႏလူႏသော့ꩻနဝ်ꩻ စဲ့ꩻပိုႏ စဲ့ꩻသားဖုံႏ သမ်းလွဉ်ကွီလူႏသော့ꩻထိုꩻခန်းဒျာႏ၊ နဝ်ꩻတဲ့ ဖေႏလူႏသော့ꩻဗာႏစွဉ်ႏဝွေꩻသီး။ ခွေသွဉ်းလွေꩻမာꩻတော မင်္ဂလာႏမဏ္ဍပ် ဝေင်ꩻငွါထင်ꩻ၊ တရောင်းတရေꩻ သေႏခေါင်းသေႏချာႏ ထွူလဲဉ်းဒျာႏတဲင် ခွေသွဉ်းစငါလူႏသော့ꩻလွုမ်ꩻနဝ်ꩻ သဌေꩻပုဏ္ဏာꩻ ထမ်ꩻသာꩻခမ်းသားဖုံႏ လွဉ်ကွီလူႏသော့ꩻထိုꩻခန်းဒျာႏ၊ နဝ်ꩻတဲ့ ဖေႏလူႏသော့ꩻဗာႏစွဉ်ႏ ဝွေꩻသီး။ တွို့ꩻကွဉ်ႏနဝ်ထင်ꩻ ခွန်နင်ꩻသီးထျꩻ ကလိုႏလꩻ အခွဉ်ႏဖုံႏနဝ်ꩻ ထွဉ်ႏခွေသွဉ်းလိုꩻလွေꩻကွီ၊ ဝွေꩻသီးရိုꩻ-'တွိုႏဝင်ꩻလင်နဝ်ꩻ ဝင်ꩻကလူႏဗာႏဟောဝ်ထာꩻ၊ တွိုႏနီယိုနဝ်ꩻ လူႏဗာႏနုဲင်းတဝ်းဝင်ꩻ'သမ်းခြင်ꩻထာꩻနုဲင်းနဝ်ꩻတဲင် ခွေသွဉ်းရိုꩻဖေႏ- 'သီကကေပ်ꩻလꩻ အခွဉ်ႏဖုံႏနဝ်ꩻ သီထူႏတထဝ၊ လူႏတထဝဟုဲင်း' ဖေႏကလူႏဗာႏနုဲင်းနုဲင်းဝင်ꩻ၊ ခွေသွဉ်းစိုး မော့ꩻနဝ်ꩻခါ ကလူႏဗာႏ ဒါႏနကုသိုလ်ႏနဝ်ꩻ တွိုႏလွေꩻဘဝမုဲင်ꩻတဲ့ ပါလွေꩻ၊ လွေꩻခြွေခြာႏ၊ လွေꩻချမ်ꩻသာႏ ဗွေႏဩ"လောဝ်းနီဗွေႏဘုရာꩻ နုဲင်းနောဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်၊ သေရီသုတ်)[၁][၂]