ဆို့ꩻဗာႏဝါႏအကျောင်ꩻ
"ရဟန်ꩻသံဃာႏသီး ကဆိုႏဗာႏဝါႏအကျောင်ꩻ"
နီဗွေႏဘုရာꩻ အဝ်ႏအုံသတင်ꩻသွုံꩻ ရာႏဇဂျိုဟ်ႏခမ်း ကျောင်ꩻဝေဠုဝွန်ႏကိုအတွင်ꩻ "ဝါႏဆိုႏ ဝါႏကပ်-တပညတ်တဝ်းဒွိုန်း"တဲင် ခမ်းလာလစ်ꩻလာ၊ ထာꩻခွꩻလာလစ်ꩻလာ၊ ထာꩻလျားလာလစ်ꩻလာ အလာမုဲင်ꩻတဲ့ယဝ်း ဗွေႏစောဝ်းသံဃာႏ လယ်ႏလာႏချာငါဒျာႏထာꩻနောဝ်ꩻသွူ။ လိုꩻလမ်းဖုံႏရိုꩻ- "သာႏကီႏဝင်ႏမျိုꩻ ဘုရာꩻခွိုꩻဖုံႏနဝ်ꩻ ခမ်းခါ ထာꩻခွꩻလာ ခမ်းသဲင် ဥတုသွံပါꩻ၊ တဆီနီလာလိုမ်းလိုမ်း အလွေꩻခိꩻမုဲင်ꩻဖုံႏနဝ်ꩻ၊ မလယ်ႏငါႏထာꩻဖုံႏနဝ်ꩻ၊ ကကျွꩻလယ်ႏထာꩻနုဲင်းနဝ်ꩻနဝ်ꩻ ကယမ်းသီဗာႏ သတ္တဝါႏ ထွိုင်း ဖီးအွာ စတဲင်နုဲင်းနဝ်ꩻဖုံႏတဲ့အဝ်ႏ၊ နဝ်ꩻဖုံႏနဝ်ꩻ ထွာတောဝ်း အကုသိုလ်ႏဟောင်း။ နွို့ကာႏ ဝင်ꩻသွို့ꩻဝင်ꩻခြံ ယမ်းထံထိမ်၊ ယမ်းသီသာထိုꩻဝင်ꩻဗွူမွူး၊ ဗေဟံႏမွူးစတဲင်နုဲင်းနဝ်ꩻတဲ့အဝ်ႏ၊ ကွပ်နဝ်ꩻမꩻ ကျွꩻလယ်ႏငါႏထာꩻနုဲင်းနဝ်ꩻနဝ်ꩻ ဟောဝ်တဝ်း၊ အဝ်ႏလိုႏအုံစွူခါႏခါႏဗဲင်းကျောင်ꩻကို။ ဟော်ꩻတမွိုꩻတမာꩻကွို့ꩻတရာꩻ၊ ပါꩻလိုꩻသာႏသနာႏထန်ႏသား (လိုꩻသာႏသနာႏကို ရဟန်ꩻသံဃာႏ တမွေးတဝ်းသား) တိတ္ထိတက္ကတွဉ်ꩻသီး လယ်ႏကွို့ꩻမဉ်ႏတဲ့ ပေါႏခမ်းခါနဝ်ꩻ ဝင်ꩻလယ်ႏတဝ်းထာꩻ၊ အုံဒျာႏဝင်ꩻကျောင်ꩻကို၊ တိရစ္ဆာန်ႏဝါးသီး လယ်ႏကွို့ꩻမဉ်ႏတဲ့ ပေါႏခမ်းခါနဝ်ꩻ ဝင်ꩻအုံဒျာႏသေင်ႏနာ၊ တင်ꩻမာꩻတွမ်ႏအပွီ ဝင်ꩻအုံချမ်ꩻချမ်ꩻသာႏသာႏဒျာႏ ဝင်ꩻပွီကို။ တွိုႏသာႏကီႏဝင်ႏမျိုꩻ ဘုရာꩻခွိုꩻယိုနဝ်ꩻ ခမ်းသဲင်ခမ်းခါ တသေသာဗဲင်းဒွုမ်၊ မလယ်ႏငါႏထာꩻနဝ်ꩻ၊ ငမ်းတဝ်းဝင်ꩻဆော့ꩻမဲ့ဟောင်း၊ ကယမ်းသီ ထွိုင်းဖွီးအွာနဝ်ꩻ ထွာတဝ်းအပဲစ်ဟောင်း၊ ကနွို့ဝင်ꩻသွို့ꩻခြံ ကယမ်းထံထိမ် ဝင်ꩻထာꩻမွူးပေႏနဝ်ꩻ ငမ်းတဝ်းဝင်ꩻဗွေႏ သꩻလျားထာꩻဟောင်း" ခွေတဖြောင်းနာꩻတဖြေꩻ ထီႏဖွီသွမ်ꩻသဲ့ꩻ ကဲ့ꩻရဲ့ꩻလွနုဲင်းနဝ်ꩻ၊ အပဲစ်နယ်ပျꩻ-ဒေါ့ꩻတေက်ꩻနျꩻလွနုဲင်းနဝ်ꩻဖုံႏသွူ။ ရဟန်ꩻသီးဖုံႏ ဟွုန်ဝင်ထီႏသွမ်ꩻသဲ့ꩻ ငေါဝ်းကဲ့ꩻရဲ့ꩻနုဲင်းနဝ်ꩻဖုံႏတဲင် လွေꩻလဝ်းဗွေႏဘုရာꩻ၊ ဗွေႏဘုရာꩻရိုꩻ- "ရဟန်ꩻသီးဖုံႏဟွေး- ဝါႏတွင်ꩻသွံလာ အုံစွူစွူဗော့ꩻကျောင်ꩻကို၊ ဆိုႏလွဝါႏဖုံႏလုဲင်း၊ တဲႏစ ဝါႏဆိုႏလောင်း တနီꩻ ဗꩻလွေꩻတင်ꩻကျွစ်လာဗွေနီꩻ (ပုရိမဝါႏ)၊ ဝါႏဆိုႏလောင်းတနီꩻ မဉ်ႏတထွꩻတဝ်းတဲ့ တဲႏဝါႏခေါင်ႏလောင်း တနီꩻ ဗꩻလွေꩻ တထိန်ႏလာဗွေနီꩻ (ပစ္ဆိမဝါႏ) ဆိုႏလွဝါႏနုဲင်းနဝ်ꩻဖုံႏဟုဲင်း။ - ရဟန်ꩻပေါႏတဆိုႏတဝ်းဝါႏနဝ်ꩻ 'ဒုက္ကဋ်အာပတ်ဗာႏ' - ဆိုႏဝါႏနီꩻ တမွေးတဝ်းအနီꩻ ပေါႏဆိုႏဝါႏနဝ်ꩻ 'ဒုက္ကဋ်အာပတ်ဗာႏ' - ဝါႏတွင်ꩻ လယ်ႏလွင်ꩻထာꩻ (ပေါႏထာꩻလေတောအလင်)နဝ်ꩻ 'ဒုက္ကဋ်အာပတ်ဗာႏ" မိန်းစွဉ်ႏဒျာႏနုဲင်းနောဝ်ꩻသွူ။ (ဝိနယ၊ မဟာဝဂ္ဂ၊ ဝဿူပနာယိကခန္ဓက)[၁][၂]