ဆွတ်ꩻချာနဲ့လွေꩻငါနဲ့

"ဆွတ်ꩻချာနဲ့? လွေꩻငါနဲ့?" စွုမ်ႏအွိုင်ႏအွိုင်ႏ၊ စွုမ်ႏဒုံဒုံ၊ စွုမ်ႏဆောင်ႏဆောင်ႏ၊ စွုမ်ႏနေင်ႏနေင်ႏ၊ စွုမ်ႏဖြာꩻဖြာꩻ ဖေႏကဟော်ꩻဒါႏ၊ ကအဝ်ႏသွဉ်၊ ကအဝ်ႏဗွောင်ꩻ အဝ်ႏအွဉ်ငါရုဲင်ꩻတသွိုးဒါႏ လိတ်လုဲင်ꩻယို ထွာအထင်ႏသျာꩻသွတ်ꩻ၊ ဝင်ꩻသငါꩻအအာသွတ်ꩻကိစ္စသွူ။ ထင်ႏသျာꩻလွဉ်၊ သေငါꩻအာလွဉ်ဗာႏနုဲင်းယိုနဝ်ꩻ ကွပ်စွဉ်ႏ ရက်ခွိုꩻဗွေႏသံႏဃာႏတောႏသီး၊ ရက်ခွိုꩻပုဂ္ဂိုလ်ႏလိုꩻတန်သီး လွောင်ႏဗူႏဖြွမ်းညီႏ သဲဉ်စွီႏဝင်ꩻစူ ကွပ်အွဉ်ငါနက်တရူမꩻ ထင်ႏသျာꩻလꩻတခွိုင်းယိုသွူ။ ကွပ်နဝ်ꩻမꩻ ကွပ်စွဉ်ႏလိတ်မွူးကိစ္စယို ငဝ်းအာအီ၊ သံႏသယအဝ်ႏဒင်ႏအီဝင်ꩻအလောင်း၊ တဖြာꩻဖြောင်း တဖြာꩻဖြေꩻ ဒေါ့ꩻလွေꩻတေားဝင်ꩻမဉ်ꩻ၊ ဖြဝ်ႏတေားဒျာႏဝင်ꩻပွုံႏဖုံႏယို လွောင်ႏဗူႏရေꩻကုဲင်ပြင်ꩻအီဒါႏတဲင် အဝ်ႏလိုႏချင်းလဲဉ်းဝင်ꩻ ပငါပရာꩻဖုံႏသွူ။ နုဲင်းတဲမ်းလိတ်သား ကဟော်ꩻဗာႏလိတ်နုဲင်ႏဝေါင်း (ပစ်စာ)၊ ကဟွိုန်ဗာႏ ပွယ်ꩻကျောက်တလွုံꩻကိုဖုံႏနဝ်ꩻ တေက်ꩻနျꩻပုဂ္ဂိုလ်ႏရေꩻ (ပုဂ္ဂိုလ်ရေးတိုက်ခိုက်)ထွာထိုꩻဒျာႏနုဲင်းနဝ်ꩻသွူ။ အတိတ်ဇာတ်ရဲဉ်ႏကို ကွပ်စွဉ်ႏနီစွိုးခွိုꩻချင်ꩻချင်ꩻ လွောင်ႏဗူႏတဝ်းဝင်ꩻမꩻ ခံႏဗာႏလဲဉ်း မဲ့ငါပေႏတရေႏလင်ꩻ၊ နီခမ်းထီနွောင်ꩻဟံႏလဲ့ ကုဲင်ပြင်ꩻ၊ နီစွိုးခွိုꩻ ဖူးဝေးပအိုဝ်ႏဖုံႏယို တဖြာꩻတထွောင်း ဖထန်ႏထိုꩻခေါ် အုံအဝ်ႏညာꩻဗာႏ၊ ဖြတ်ꩻဖြယ်လီလာ ကွင်ကယ်ဗာႏ၊ ကွပ်သံႏသယတရာꩻ၊ အတ္တတရာꩻ၊ လောဘ ဒေါသ မောဟ ဣဿာ မစ္ဆရိယဖုံႏတဲင် ဟော်ꩻနန်ꩻတဲ့ကုဲင်လီ၊ နီခမ်းထီလဲ့ ထိုꩻမားဗာႏနဝ်ꩻသွူ။ ကွပ်နဝ်ꩻမꩻ ထူႏသွူသွဉ်ခန်ꩻ သတိꩻတရာꩻဟဝ်ဟဝ်တဲင် လွောင်ႏဗူႏရေꩻကုဲင်အီဒါႏ အကျောင်ꩻတရာꩻဖုံႏယို အဝ်ႏလိုႏဒေါ့ꩻဖြဝ်ႏတဝ်း၊ အဝ်ႏလိုႏမာꩻတဝ်း၊ အဓိအထျꩻထျꩻ အဝ်ႏလိုႏအွဉ်ႏရေꩻငါႏ "လွောင်ႏဗူႏသွီႏထီꩻ ဖြွမ်းညီႏရေꩻ"နဝ်ꩻသွူ။ မဉ်ႏအွဉ်ႏရေꩻတဝ်း "လွောင်ႏဗူႏသွီႏထီꩻ ဖြွမ်းညီႏရေꩻ"နဝ်ꩻ ပအိုဝ်ႏယို ထွာထိုꩻဒါႏ နီ၊ သွံအိုဝ်ႏသွူ။ "လွောင်ႏဗူႏသွီႏထီꩻ ဖြွမ်းညီႏရေꩻ"ကရိုꩻယို ဒေါ့ꩻနဝ်ꩻ ယိုꩻကီလဲ့ နမ်းထွိုင်ႏရုဲင်ꩻတသွိုး မာꩻဗာႏမွေးနဝ်ꩻ တယိုꩻတဝ်း နုဲင်းအဒေါ့ꩻကရိုꩻနဝ်ꩻ နမ်းမဉ်ႏမာꩻဗာႏမꩻ နမ်းမဉ်ႏမော့ꩻဗာႏမꩻ သေစဲင်းအခရာႏသွူ။ ကွပ်နဝ်ꩻမꩻ လွောင်ႏဗူႏရေꩻတဲ့နဝ်ꩻ၊ ကိစ္စအလောင်ႏအလင်တဲ့နဝ်ꩻ "မာꩻဟဝ်နဝ်ꩻယပ်ꩻ- မာꩻကုဲင်နဝ်ꩻယိုꩻ"ကရိုꩻနဝ်ꩻ စွုမ်ႏဖြာꩻအဝ်ႏသေဒျာႏဝင်ꩻ ပငါပရာꩻဖုံႏ၊ စဉ္စာꩻချာနမ်းချင်းချာသꩻ အဝ်ႏလိုႏအွဉ်ႏလꩻလꩻ စာႏနာႏသꩻနဝ်ꩻသွူ။ ယပ်ꩻယပ်ꩻခုဲင်ႏခုဲင်ႏ လꩻလွဉ်လဲဉ်း၊ အီႏလꩻဗာႏထဲင်းယင်းနဝ်ꩻ ကွပ်တယိုꩻတဝ်းတဲင် အဝ်ႏလိုႏအွဉ်ႏရေꩻငါႏဝင်ꩻ၊ အဝ်ႏလိုႏထူႏလဲဉ်း အတိတ်ကိုသွဉ်ခန်ꩻ၊ အဝ်ႏလိုႏအွဉ်ႏရေꩻငါႏ "လွောင်ႏဗူႏသွီႏထီꩻ ဖြွမ်းညီႏရေꩻ"အကျောင်ꩻ ထွူႏထွူႏတွုမ်တွုမ် တမာလဝ်းဟွိုန်ဗာႏ ခွိုꩻပအိုဝ်ႏသီးနုဲင်းယိုသွူ။ ယဟန်ႏသားနဝ်ꩻ ထွားဒျာႏကွို့ꩻဗော့ꩻဗော့ꩻဗꩻဗꩻပေႏလွုမ်ꩻတဲင် ထီႏဒျာႏဗော့ꩻဗော့ꩻပေႏလွုမ်ꩻသွူ၊ မဉ်ႏထွားဗော့ꩻဗော့ꩻငါႏနဝ်ꩻ အွိုးအညာꩻကိုသူꩻ အထွာတမုဲင်ꩻ၊ အအဝ်ႏနုဲင်းမုဲင်ꩻကရိုꩻနဝ်ꩻ သေစဲင်းစဲ့ဒွုမ် အထွာအကုဲင် အကျောင်ꩻခရာႏသွူ။ ကွပ်နဝ်ꩻမꩻ မဉ်ႏထီႏမွေးအကျိုꩻတရာꩻနဝ်ꩻ အဗော့ꩻတဲ့ အဝ်ႏလိုႏထွား၊ အညာꩻတဲ့ အဝ်ႏလိုႏထွား၊ ဝီႏဝါးတဲ့ အဝ်ႏလိုႏထွား၊ ထွားစဲင်းစဲင်း၊ ယဲက်သေႏသေႏချာႏချာႏ၊ အဝ်ႏလိုႏထွားစွစ်ꩻစွစ်ꩻ၊ မဉ်ႏထွားလွေꩻစွုမ်ႏဖဲ့ꩻဖဲ့ꩻ၊ စွုမ်ႏထွောင်းထွောင်းမꩻ အထွာတမုဲင်ꩻ၊ အအဝ်ႏနုဲင်းမုဲင်ꩻ၊ အကျိုꩻအဝ်ႏနဲ့ အဝ်ႏတဝ်းနဲ့၊ အပဲစ်လွစ်နဲ့ လွစ်တဝ်းတဲ့၊ မွေးဒျာႏနဲ့ မွေးတဝ်းနဲ့၊ ယံနဲ့ ယံတဝ်းနဲ့စတဲင် ဟဝ်ကုဲင်ကျောင်ꩻကျိုꩻ အမာႏအမဲဉ်ႏ ဝွေႏဖန်ႏဆင်ႏချင်ႏဒါႏမꩻ နီစွိုးခွိုꩻတာႏယို သာႏယာႏခွꩻရျူႏ "လွောင်ႏဗူႏဖြွမ်းညီႏရေꩻ"ကုဲင်ပြင်ꩻနွောင်ꩻတဝ်းနဝ်ꩻသွူ။ ယဟန်ႏနဝ်ꩻ "ရှေးရိုးစွဲ၊ ဒေသစွဲ၊ ဝါဒစွဲ"နဝ်ꩻ သမ်းအာႏတလာလွဉ်ꩻငါႏ၊ အဝ်ႏလိုႏအွဉ်ႏတသွာႏပသာႏသွူ၊ မဉ်ႏချော့ꩻတသွာႏ ပသာႏတဝ်းမွေးတစိꩻစိꩻနဝ်ꩻ မုဲင်ꩻခါခါလဲ့ အဝ်ႏတွိုင်ꩻတွိုင်ꩻဗော့ꩻ နုဲင်းယာဖွိုင်ꩻ၊ အဝ်ႏလီꩻလီꩻဗော့ꩻ နုဲင်းလိတ်စီꩻတဲင် ထင်ႏထိုနွောင်ꩻတဝ်းသွူ။ လွောက်ꩻလွေꩻတွမ်ႏခေတ်တဲင် အဝ်ႏလိုႏခြေင်းကိုတဲ့ခြေင်း၊ အဝ်ႏလိုႏအွဉ်ႏယန်ꩻကိုတဲ့ အွဉ်ႏယန်ꩻပသာႏသာႏမꩻ နီဖုံႏယို အီႏထွꩻဗꩻတွိုႏနွောင်ꩻ ခမ်းဟဝ်သာႏယာႏကိုသွူ။ ကပြောင်ꩻလုဲင်ႏ တိုꩻတက်ထင်ႏထိုလွဉ် နုဲင်းခေတ်လဲင်ႏခါနဝ်ꩻ ခြေင်းထွꩻထွꩻလွဉ်ꩻခေတ်မꩻ (တဝ်းလဲ့) ခေတ်ထီတခြွဉ်းအတွိုင်ꩻ ကပြောင်ꩻလုဲင်ႏထွိုက်၊ ကပြောင်ꩻလုဲင်ႏသင်ꩻ ခင်ႏလမ်းကိုယို ပြောင်ꩻလုဲင်ႏလွဉ်ꩻနေနေမꩻ၊ ခေတ်အလွောက်ꩻ ခြေင်းထွꩻထွꩻလွဉ်ꩻမꩻ စွိုးခွိုꩻလိုꩻမျိုꩻလိတ်လုဲင်ꩻယို အောင်ႏမျင်ႏထင်ႏထိုနွောင်ꩻသွူ။ အဝ်ႏလိုႏလွေꩻငါႏငါႏလဲဉ်းသွူတဲ့ လွေꩻဆွတ်ꩻချာတေားဒျာႏက ခင်ႏလမ်းသာႏယာႏကို တွိုႏနွောင်ꩻတဝ်းဒွုမ်သွူ။ "လိုတိုး-ပိုလျှော့"ကရိုꩻဒါႏငဝ်းလင်္ကာႏနဝ်ꩻတွိုင်ꩻ ကအဝ်ႏလိုႏကိုလဲ့ ထဲမ်ဗွေယင်း တစူးတစိꩻ၊ ကအဝ်ႏလွို တလိုႏတဝ်းကိုလဲ့ လွတ်ꩻထိုꩻဖယင်း၊ မဉ်ႏခြေင်းလွဉ်ꩻငါႏ လိန်ႏတသွာႏပသာႏခန်းတစိꩻ၊ မဉ်ႏယန်ꩻလွဉ်ꩻငါႏ နာႏသမ်းတလေ့တဝ်းတဲင် လိန်ႏခြေင်းပသာႏယင်းတစိꩻ၊ အရေꩻတန်ဒျာႏ အဒုံႏဟဝ်၊ အရေꩻတန်ဒျာႏ နာႏတလေ့၊ အဓိကဒျာႏ တိန်ႏဖြွီꩻဖြတ်ꩻထိုꩻတဝ်း တဲမ်းလိတ်သားကထီႏ အဝ်ႏနုဲင်းနဝ်ꩻသွူ။ ကွပ်နဝ်ꩻမꩻ ပုဂ္ဂိုလ်ႏဗွေႏဗွန်တန်တပါꩻ ခြုဲင်းနယ်ဗာႏဖို တဲမ်းလိတ်သားနုဲင်းယို- "ကတွိုက်ꩻကခꩻဒါႏ စဲ့ꩻတွိုက်ꩻပွယ်ꩻကို နီစူခွုမ်လက်နက်ယို ပေါႏတယံကယ်ꩻတဝ်းဝင်ꩻနဝ်ꩻ အီႏနွောင်ꩻဗာႏဝင်ꩻယို တယိုꩻတဝ်း၊ ဖေႏကနွောင်ꩻဝင်ꩻ ဖေႏကအိုပ်ဝင်ꩻနဝ်ꩻ နီစူခွုမ်လက်နက်ယို ယံကယ်ꩻ၊ ဟဝ်ကယ်ꩻဝင်ꩻမꩻ" စဲ့ꩻအဆေ့ꩻအအာတဲ့ အကွာႏငါႏတဝ်း၊ စဲ့ꩻရေꩻ(နည်းဗျူဟာ)တဲ့ တကွာႏငါႏတဝ်းတဲင် အဝ်ႏလိုႏဒျာႏ နီစူခွုမ်လက်နက်ဟဝ်ဟဝ်လွုမ်ꩻသွူ။ စွိုးခွိုꩻလိတ်လုဲင်ꩻ ဖေႏကထင်ႏထို၊ ဖေႏကစွစ်ꩻတိုး၊ နီလိုꩻမျိုꩻဖေႏကတဉ်ႏခွေါင်၊ ဖေႏကထင်ႏသျာꩻလေလင်း အင်းရွယ်ႏချက်ယို ဗွိုန်ပီဒျာႏဝင်ꩻတဲင် "ထကြွ၊ နိုးကြား၊ သနား၊ သည်းခံ၊ ဝေဖန်၊ ထောက်ရှု"ကရိုꩻဒါႏ လင်္ကာႏနဝ်ꩻအတွိုင်ꩻ အုံအဝ်ႏ၊ လွောက်ꩻနာႏ၊ ဖေႏအာႏ၊ မာꩻကိုသွော့၊ ဖေႏကခံႏစာꩻညီꩻညီꩻဗာႏဝင်ꩻ အောင်ႏမျင်ႏရေꩻ အရာႏအကဝ်ႏဖုံႏနဝ်ꩻ နေးတွမ်ႏ "လွောင်ႏဗူႏသွီႏထီꩻ ဖြွမ်းညီႏရေꩻ"တဲင် နွောင်ꩻရာꩻ၊ ထွိုက်သင်ꩻရာꩻ၊ ဒါႏရꩻခင်ႏလမ်းကို မူႏခိုစွုမ်ႏဖြာꩻ/ပါꩻ အွဉ်ဝင်ꩻမာꩻ၊ အွဉ်ဝင်ꩻရုဲင်ꩻတသွိုး၊ အွဉ်ဝင်ꩻနက်တရူခန်းသွော့အကျောင်ꩻ တမာလဝ်းဟွုန်ဗာႏ ခွန်ခွိုꩻပအိုဝ်ႏသီးဖုံႏ နုဲင်းယိုသွူ။