ဆွတ်ꩻပွိုင်ပိတ္တာႏ
"အဋ္ဌိသုတ် (ဆွတ်ꩻပွိုင်ပိတ္တာႏ၊ ဇာတ်ကရီး ထွာဗာႏဖို့ꩻဖိုးသား)"
နီဗွေႏဘုရာꩻ အဝ်ႏအုံရာႏဇဂျိုဟ်ႏခမ်း ကျောင်ꩻဝေဠုဝွန်ႏကိုအတွင်ꩻ ဗွေႏလက္ခဏတွမ်ႏ ဗွေႏမောဂ္ဂလာန်ႏသီးဖုံႏနဝ်ꩻ အဝ်ႏအုံ 'ဂိဇ္ဈကုဋ်'ကောင်လောင်း၊ တွိုႏတရောဝ်ꩻ ဗွေႏမောဂ္ဂလာန်ႏ ရွုံႏသင်္ကန်ꩻထွူ လွေꩻဟဲ့ꩻဗွေႏလက္ခဏ အီႏကျွꩻတွုံꩻသွမ်ꩻ ဝေင်ꩻရာႏဇဂျိုလ်ႏကိုနောဝ်ꩻသွူ။ အဝ်ႏဂိဇ္ဈကုဋ်ကောင်လောင်းလင်ꩻ တွိုႏတထွောင်းတွော့ꩻ ဗွေႏမောဂ္ဂလာန်ႏ 'ပယွုမ်း'စွော့ꩻထာꩻ၊ တွိုႏနဝ်ꩻခါ ဗွေႏလက္ခဏရီ- "ဩဗွေႏ- နီဗွေႏပယွုမ်းထာꩻနဝ်ꩻ အကျောင်ꩻအခရာႏ အဝ်ႏဒါႏနုဲင်းမုဲင်ꩻ ဗွေႏဩ" "ဗွေႏလက္ခဏ- အကျောင်ꩻအခရာႏယိုနဝ်ꩻ ခိန်ႏခါႏဒေါ့ꩻနယ်ꩻနီဗွေႏ မွေးတဝ်းဒွိုန်း၊ လွေꩻတွုံꩻကသွမ်ꩻ၊ သွုံꩻသွမ်ꩻယာထွူမꩻ နီသွဉ်းသီးကျွꩻလွေꩻ ဗွေႏဘုရာꩻထျꩻ၊ တွိုႏဗွေႏဘုရာꩻထျꩻမꩻ နီဗွေႏရီယင်း ခွေသွဉ်းနော"ဗွေႏမောဂ္ဂလာန်ႏ လောဝ်းတောင်ꩻပြန်ႏချာ နုဲင်းနောဝ်ꩻသွူ။ သွုံꩻသွမ်ꩻယာထွူ အခိန်ႏတခိန်ႏတွင်ꩻ- ဝွေꩻဗွေႏသီးနီပါꩻ ကျွꩻလွေꩻဗွေႏဘုရာꩻထျꩻ၊ ကန်းတော့ꩻရိုႏသေႏ ဝုဲင်ႏဗွေႏဘုရာꩻထွူခါ ဗွေႏဘုရာꩻငါနဝ်ꩻ ဗွေႏလက္ခဏရီ ဗွေႏမောဂ္ဂလာန်ႏနုဲင်းယို- "ဩဗွေႏ- မောဂ္ဂလာန်ႏဗွေႏဩ- ဟန်ႏရဝ်ꩻ ခွေသွဉ်းတွမ်ႏနီဗွေႏ ရေႏလွေꩻတွုံꩻသွမ်ꩻ၊ အဝ်ႏဂိဇ္ဈကုဋ်ကောင်လောင်းလင်ꩻ၊ တွိုႏတထွောင်းတွော့ꩻ နီဗွေႏပယွုမ်းစွော့ꩻစွဉ်ႏထာꩻ၊ နီဗွေႏကပယွုမ်းဗာႏ အကျောင်ꩻအခရာႏနဝ်ꩻ အဝ်ႏဒါႏနုဲင်းမုဲင်ꩻ ဗွေႏဩ" "ဩဗွေႏလက္ခဏ- ခွေသွဉ်း အဝ်ႏဂိဇ္ဈကုဋ်ကောင်လောင်းလင်ꩻ ထီႏမောဝ်ꩻစွဉ်ႏဒျာႏ 'ဆွတ်ꩻပွိုင်ပိတ္တာႏ'ကျောင်ႏထာꩻမို့ꩻလောင်း၊ ပိတ္တာႏနဝ်ꩻနဝ်ꩻ လင်းတဖုံႏ၊ စောက်အာႏဖုံႏ၊ လေ့ဖုံႏ လောႏလွဉ်ꩻလောႏလွဉ်၊ အံႏပေါက်အရွို့ꩻဆွတ်ꩻခါႏ ပိတ္တာႏနဝ်ꩻဆာငါႏတဲင် အဝ်ႏတဝျာႏတဝီႏစွဉ်ႏထာꩻ၊ ခြောဝ်နေးစွဉ်ႏအငေါဝ်း၊ ခွေသွဉ်းသꩻကို ယူႏတေ့ꩻနုဲင်းယို- 'ဆန်ꩻမွေးစွဉ်ႏထာꩻဟွေး၊ အဝ်ႏတွိုးတွမ်ႏ ဆွတ်ꩻပွိုင်ပိတ္တာႏ နုဲင်းနဝ်ꩻတန်နဲ၊ အမာꩻမာႏ အကုသိုလ်ႏအမျိုꩻမုဲင်ꩻဒါႏ၊ မထွာဗာႏတွိုး ပိတ္တာႏနုဲင်းနဝ်ꩻတန်နဲ'ခွေသွဉ်းယူႏနုဲင်းနဝ်ꩻတဲင် ပယွုမ်းစံꩻဗာႏဒျာႏဗွေႏအော်" တွိုႏနဝ်ꩻခါ နီဗွေႏဘုရာꩻရိုꩻ- ခွေတပဲ့ꩻသာႏဝကဖုံႏနဝ်ꩻ 'စက္ခုဘူတာဝတ- အထီႏဒါႏလဲဉ်း နုဲင်းနဝ်ꩻဖုံႏဟွေး'၊ ခွေတပဲ့ꩻသာႏဝကဖုံႏနဝ်ꩻ 'ဉာဏဘူတာဝတ-ဉာဏ်ႏနုဲင်းနဝ်ꩻ အဝ်ႏလဲဉ်းဖုံႏဟွေး'၊ 'သာဝကော-ခွေတပဲ့ꩻသာဝကနဝ်ꩻ၊ သက္ခိံဝါ ကရိဿတိ-အွဉ်ႏနယ်နွောင်ꩻလဲဉ်းသွူ အသက်သေႏ'တန်ဟွေး" ခွေထီႏပိတ္တာႏနဝ်ꩻ အွိုးကရီးခါကာႏ၊ ကွဲႏတွော့ꩻ ခွေတဒေါ့ꩻနယ်တဝ်းဝင်ꩻ၊ အတွင်ꩻနဝ်ꩻနဝ်ꩻ ထီႏဒျာႏခွေလွုမ်ꩻတဲင် မဉ်ႏအွဉ်ႏဒေါ့ꩻဝင်ꩻတဲ့ ဝင်ꩻအမျိုꩻယွုမ်းမွေးတဝ်း၊ ပေါႏတယွုမ်းတဝ်း ခွေငေါဝ်းတဲ့ ထွာခြေင်အပဲ့စ်လွုမ်ꩻ၊ ကွပ်နဝ်ꩻမꩻ ခွေတဒေါ့ꩻနယ်တောဝ်းဝင်ꩻနောဝ်ꩻသွူ။ ပိတ္တာႏနဝ်ꩻဖုံႏနဝ်ꩻ ပွိုင်းလဲင်ႏစခါ 'ထွာလိုꩻရာႏဇဂျိုဟ်ႏ၊ ဂေါဃာတကော-ဖို့ꩻဖိုးသား'ဖုံႏသွူ၊ ကွပ်ပွိုး 'ပါဏာတိပါတ-အကုသိုလ်ႏကံႏနဝ်ꩻတဲင် လင်ꩻထဲ့ဗာႏငါးရုဲင်ꩻ အနေင်ႏပေါင်ꩻ-အရျာꩻအရေင် အသောင်ꩻအသိန်ꩻ'နေးလဲဉ်းသွူ၊ အဝ်ႏငါးရုဲင်ꩻလွစ်ချာသွူတဲ့ အဝ်ႏခံႏဗာႏနေက ပါဏာတိပါတ-ဝွဋ်စော့ꩻဝွဋ်လာႏ၊ အဝ်ႏထွာဗာႏနေက 'အဋ္ဌိကသင်္ခလိက-ဆွတ်ꩻပွိုင်ပိတ္တာႏ၊ လင်းတ လေ့ စောက်အာႏဖုံႏ ယုဲင်ပြုံႏပေါက်ꩻဟိုမ် ဆာပဒိုမ် ခြောဝ်ငေါဝ်း၊ လꩻကေႏတဝ်းဝွဋ်ကံႏ အဝ်ႏခံႏဗာႏနေက'နုဲင်းနောဝ်ꩻသွူ။ (သုတ္တန်ႏပိဋကတ်၊ နိဒါနဝဂ္ဂသံယုတ်၊ အဋ္ဌိကသုတ်)[၁][၂]