တ
ငေါဝ်းတွိုင်ꩻ(တ) ၁။ တကျောင်ꩻ တဂါႏထာႏ၊ တဆရာႏ တပွုတ်ဆန်ꩻ။(တရပ်တွမ်ႏတရပ် အခေႏအနေႏ ထွုံꩻစံႏဖုံႏလဲ့သင်၊ ဆရာႏတဖြာꩻတွမ်ႏတဖြာꩻ ထာꩻဒါႏဉာဏ်ႏပညာႏလဲ့သင် တဗွိုန်ပီတောဝ်းလွဝင်ꩻတဲင် ဒီဟဝ်ကျိုꩻစာꩻ ဆဲꩻဖူꩻသွဉ်သင်ငါႏသွူ။) ၂။ တကွုံꩻပေႏရွုမ်ꩻ နုဲင်းသေင်ႏဟေ့ꩻ၊ တစိꩻပေႏရွုမ်ꩻ နုဲင်းခမ်းအွုမ်ႏ။ ၃။ တခြုဲင်းတောဝ်း တဒုံ၊ တထွာတောဝ်း လိုꩻဟုံ။ ၄။ တခွုမ်တောဝ်းနꩻဝင် ခွုမ်တောဒျာႏ ဆဲးထီတဲင်ႏ၊ တခွုမ်တောဝ်းနꩻကဲင်ႏ ခွုမ်တောဒျာႏ ကုက်ကိက်ဖုဲင်း။ ၅။ တစိုးကုံ တယုံသာႏ မော့ꩻခွဲးဗာႏ။ ၆။ တစိက်ꩻ မာꩻတစောက်ꩻ၊ တကြောက်ꩻ မာꩻ တဖျ။(အမျိုꩻမုဲင်ꩻတရိုꩻတောဝ်း တတန်ႏရာႏတောဝ်းလဲ့ မာꩻလုဲင်း ဒေါ့ꩻတန်ထာꩻ။) ၇။ တစစ်တူႏတူႏ ခံႏအုံတန်၊ တခန်တူႏတူႏ ခံႏအုံဖြား။ ၈။ တစွို့ꩻတောဝ်းမာꩻ၊ တကြာꩻတောဝ်းကံ၊ အပဲစ် ကယိန်းတန်။ ၉။ တဆီ တဖြာꩻ၊ တရျာꩻ တဒူ။ ၁၀။ တဆင်ႏနောဝ်ꩻ ပေႏ တဆင်ႏတန်၊ တဆင်ႏ(ကဝ်ႏလက်ꩻ)နောဝ်ꩻဖြန်-တဆင်ႏခြွေ၊ တဆင်ႏနောဝ်ꩻ ေဗွ-တဆင်ႏသေ့ꩻ၊ တဆင်ႏနောဝ်ꩻခေ့ꩻ-တဆင်ႏလေ၊ ကေန်ꩻကေန်ꩻခြွေခြွေ မွန်မွန်သီ၊ ဗူႏဗူႏတဲင်လီ-ခွေါင်ခွေါင်ဖြင်း၊ တင်ႏတင်ႏဖေ့ယင်း-ငွိုးငွိုးင၊ ကီကီလလ-ထွာထွာကုဲင်၊ ခူꩻလိမ်ꩻပေါက်ပုဲင်-နွို့နွို့ထန်ႏ၊ သဘာဝစက်ပန်ႏ-နိယာမ။ ၁၁။ တဆွိုင်ꩻချင်ႏ နုဲင်းမောင်း၊ တပြောင်းချင်ႏ နုဲင်းဝါႏ၊ တယာႏချင်ႏ နုဲင်းင၊ တလချင်ႏ နုဲင်းအေင်၊ တတေင်ချင်ႏ နုဲင်းဟွမ်၊ တလွမ်ချင်ႏ နုဲင်းမေႏတဲင်ႏ။ ၁၂။ တတွိုႏဖိုတဝ်း ကန်ႏ၊ တထင်ႏဖိုတဝ်း ကျောင်ꩻ၊ ထီႏဘုရာꩻကိုႏတောႏလျောင်ꩻ ထင်းမာႏအဖူ။ ၁၃။ တတွိုင်ႏတောဝ်း ရွဉ်ခံꩻ၊ တလွိုက်တောဝ်း ယောင်ꩻဆင်ꩻ။ ၁၄။ တထာပြောင်ꩻ၊ တသောင်ꩻပြွတ်။ ၁၅။ တထိန်ႏလာ ဝထီတေင်၊ ဒဲဉ်စေင်လာ ဝထီကြိုႏ၊ အာႏကွိုꩻဗော့ꩻသိုႏတူႏ တလုမ်ꩻတဝ်း။ ၁၆။ တထုမ်ႏတောဝ်း မော့ꩻ၊ တကော့ꩻတောဝ်း ဖျော်။ ၁၇။ တထွာနွောင်ꩻတောဝ်းနောဝ်ꩻ အဲဉ်ထောဝ်း၊ အောဝ်ႏဒျာႏ ခဲ့ꩻလꩻထွာတောဝ်းဒွိုန်းလွုမ်ꩻ။ ၁၈။ တဒါႏတဝ်းသွဉ်၊ တဖြွဉ်တဝ်းထူး၊ တဖူးတဝ်းစဲး၊ တငဲးတဝ်းပွိုက်။ ၁၉။ တနီꩻတချာꩻ၊ တနာꩻတစွိုး။ ၂၀။ တနီꩻတထာ၊ တလာတသောင်ꩻ၊ ကွဲးယွမ်ꩻယွမ်ꩻ။ ၂၁။ တနီꩻတသောင်ꩻ၊ မုဲင်းတောင်ꩻ အီႏလွေꩻမုဲင်ꩻကို။(တလွꩻတဗုဲင်တဝ်းတဲင် နေးတွမ်ႏထာꩻဝီရိယ ထာꩻသောင်ႏသာဟဝ်ေဟာဝ် မဉ်ႏကျိုꩻစာꩻ ခွုမ်မာꩻလွေꩻ တနီꩻတစိꩻစိꩻနောဝ်ꩻ အောင်ႏမျင်ႏလွေꩻထေ့ဗာႏ၊ နီအလိုႏဆန္ဒတ ကဝ်ႏထွန်ႏ(ကဝ်ႏလက်ꩻ)ထျꩻသွူ။) ၂၂။ တနီꩻမီႏလို့ တနီꩻနွို့လွဉ်၊ တငွို့ဝေ့ꩻပန်ႏ ရာႏသီႏခွင်ႏ၊ ဗူႏဗန်ႏဆာရွိုး ယေန်သူႏလွိုး။ ၂၃။ တနီꩻ မီႏအံႏဗာႏ၊ တဆေꩻခါႏ အုံမ၊ လိုꩻ ဒုက္ခ။ ၂၄။ တနင်ꩻနွေႏ အံႏအရာႏ၊ တနင်ꩻလာႏ အံႏအဒီႏ။ ၂၅။ တနွမ်ႏတောဝ်း မျောဝ်ႏ၊ တလျောဝ်ႏတောဝ်း ကျင်ꩻ၊ လိုꩻမွိုက်ဖျင်ꩻ။ ၂၆။ တနွောင်ꩻတောဝ်း ပိဋကတ်၊ တွမ်ႏရပ်မွော့ကျောင်ꩻ။(ပေါႏတသေတဝ်း ဝိနယ်ꩻနဝ်ꩻ အာပတ်သင်ꩻအာဒါႏ၊ မဉ်ႏပွေါးမဉ်ႏနင်းကျောင်ꩻလဲ့ ကျိုꩻစာꩻထွားကုဲင်းကုဲင်း၊ နေးနာႏကံကျင်ꩻလွဉ်ꩻအာအာသွော့ဝိနယ်ꩻ ဘုရာꩻဥပဒေႏစီꩻကန်ꩻနဝ်ꩻ ဟဝ်ငါႏ။) ၂၇။ တနွောင်ꩻတောဝ်းယူး လဲ့ꩻတေား ဗွူတꩻရွောင်။ ၂၈။ တဖတောဝ်းလွဝင်ꩻ ထုဲင်ႏဟင်္သာႏ၊ တခွါႏတဝ်းလွဝင်ꩻ နုဲင်းဖွီကြွဉ်။ ၂၉။ တဖြာꩻကေꩻဇူꩻ၊ တဦꩻမေတ္တာႏ၊ ဖေႏကကုဲင်ဗာႏမွိုန်း။ ၃၀။ တဖြာꩻကေားမာꩻ တဖြာꩻအံႏ၊ တဖြာꩻကေားခံႏ တဖြာꩻစံႏ။ ၃၁။ တဖြာꩻသီ၊ ဝင်ꩻနီမွန်၊ ဝင်ꩻသွံလုံႏ။ (လွေꩻတဖူꩻတွင်ꩻ မော့ꩻကျုံႏအွိုဆာရောႏဂါႏ ဘေꩻအန္တရာယ်ႏ။) ၃၂။ တဖြာꩻအံႏထာꩻဆျာႏ တဖြာꩻဗုဲင်းဖဲင်း၊ တဖြာꩻထင်ႏလဲင်း တဖြာꩻခင်ႏအော့ꩻရျူ။ ၃၃။ တဖြားဒါႏတောဝ်းနောဝ်ꩻ သꩻ၊ တဝꩻဒါႏတောဝ်းနောဝ်ꩻ ကောင်။ ၃၄။ တဖွိုင်ꩻချင်ႏ နုဲင်းခြောင်းဝက်၊ တဖက်ချင်ႏ နုဲင်းခြောင်းပြဲႏ။ ၃၅။ တမွူးလိုမ်းခါႏ တမာႏခွိုꩻ၊ ရသာႏလုဲင်မျိုꩻ ပအိုဝ်ႏခွိုꩻ။ ၃၆။ တယွောင်းတောဝ်းပွုံႏသေႏ အဝ်ႏပြွူႏ၊ တနွူႏတဝ်းပွုံႏသေႏ အဝ်ႏဗန်။ ၃၇။ တရတပါꩻ တရျာꩻတစွိုး၊ အာမွိုးအာဖါ ဝါႏဒအာ။ ၃၈။ တရောဝ်ꩻရောဝ်ꩻလဲ့ ဗေသေင်ထောင်း၊ နီေရာဝ်ꩻရောဝ်ꩻလဲ့ ဗေသေင်ထောင်း၊ အွီႏခိꩻနေဟောင်း။ ၃၉။ တရွိုꩻချင်ႏ နုဲင်းထထီႏ၊ တသီႏချင်ႏ နုဲင်းကွေးလုံ၊ မဉ်ႏအုံလဲ့ အုံပီပီ၊ မဉ်ႏသီလဲ့ သီနုဲင်းနုဲင်း။ ၄၀။ တလဲင်ႏတစိꩻစိꩻ တအိꩻတောင်းပွိုေဗွ။(ပေါ်ꩻကျိုꩻစာꩻ ဝီရိယသောင်ႏသာ ခွုမ်မာꩻလွေꩻနဝ်ꩻ ကုသိုလ်ႏ ပညာႏ ဥစ္စာႏ ခြွိုင်ႏသန်ꩻရေꩻကစ ပြဲ့ꩻဝဗွေစွုမ်ႏဗာႏရင်ꩻ အဖဲ့ꩻဖဲ့ꩻ အခေါဝ်ခေါဝ်သွူ။) ၄၁။ တသန်တောဝ်း နုဲင်းထီထဲ့လဲင်း၊ တစဲင်းတောဝ်း နုဲင်းထီထဲ့တတ်ꩻ။(ထီထဲ့ဖင်ꩻ-နုဲင်းနောဝ်ꩻလဲ့ ဒေါ့ꩻလွနေား။) ၄၂။ တသောင်တဝ်းထာꩻလဲ့ ခြင်ꩻနေးဒျာႏ။ ၄၃။ တဟောဝ်တဝ်းကျံႏ၊ တမန်ႏတောဝ်း ဒေါ့ꩻ၊ တရော့ꩻတဝ်းမာꩻ၊ လိုꩻမွိုက်အင်္ဂါႏလက္ခဏာႏ။ ၄၄။ တဟောဝ်တောဝ်းနောဝ်ꩻ ပယ်ႏ၊ ကဟောဝ်နောဝ်ꩻ ကယ်ႏ။ ၄၅။ တဟောဝ်တောဝ်း ဗွူႏထွီႏ၊ တအွီႏတောဝ်း လူႏကျောင်ꩻ။(တဟောဝ်တောဝ်းမꩻ ဖေႏဝင်ꩻ၊ ပိုလီꩻတနာႏငေါဝ်းတောဝ်းမꩻ ကွဲးထင်ႏပသာကျောင်ꩻ၊ အွဉ်ႏဗွေႏဗွန်ထျꩻ၊ အွဉ်ႏဗွေႏဗွန်သွဉ်။) ၄၆။ တဟွမ်တောဝ်းမꩻ တစွမ်တောဝ်း။ (တယံတကျတောဝ်းမꩻ ဝင်ꩻတနေးအုဲင်ႏတဝ်း၊ ဝင်ꩻတထူႏသွံုꩻတဝ်း၊ တလိမ္မာႏလက်ꩻလဲဉ်စျူတောဝ်းမꩻ ဝင်ꩻတထွဉ်ႏအံႏတောဝ်း။) ၄၇။ တအံႏဗာႏတောဝ်းလဲ့ ညောဝ်ႏ၊ တမျောဝ်ႏဗာႏတဝ်းလဲ့ တွုင်ꩻအလူး၊ တတꩻဗူးတောဝ်းလဲ့ မတ်ဗာႏအတဗူး။ ၄၈။ တအုံဗာႏတဝ်း သက်တရျာꩻလဲ့ မော့ꩻကျုံႏဗာႏ အမုꩻတရျာꩻ တကာႏတဝ်း။ ၄၉။ တကာႏမီႏကေႏညိုႏ နမ်းမန်ꩻစိုႏ။ ၅၀။ တꩻကုဲငါႏထာꩻ ဗွူႏထွီႏဒဲဉ် ထွီႏမထွား၊ တကြွားငါႏထာꩻ ဗွူႏထွီႏဆာႏ ထွီႏမအံႏ။ ၅၁။ တꩻကုဲင်ငါႏထာꩻ အုံသဲင်ꩻသေင်ႏဆꩻလ ေသင်ႏပလဲင်ꩻသီ၊ အုံသဲင်ꩻထီဆꩻကီ ထီပလဲင်ꩻသေ့ꩻ။ ၅၂။ တꩻကုဲထုဲင်ႏဗွဉ်ဒီႏ၊ တꩻကီႏထုဲႏဗွဉ်ရင်း၊ လိုꩻကျောင်ꩻထီႏ လိုꩻကျောင်ꩻငမ်း၊ လိုꩻလမ်းထီႏ လိုꩻလမ်းတွိုန်ႏ။ ၅၃။ တꩻကုဲင် နုဲင်းယူး၊ တꩻဗူး နုဲင်းညောဝ်ႏ။ ၅၄။ တꩻကုဲင် ဝါးရွို့ဒီႏ၊ တကီႏ ဝါးရွို့ꩻလုဲင်ꩻ။ ၅၅။ တꩻကုဲင်သွတ်ꩻအတွူး၊ ကꩻရွူးသွတ်ꩻ အမေႏ။ (ကီယို သူပွုတ်နဝ်ꩻ သဲ့ꩻသွမ်ꩻချာနီနမ်း တရေꩻတဝ်း၊ ထွားတလꩻတောဝ်း၊ ကရွူႏငါႏ၊ တꩻကုဲင်ငါႏ ခရာႏသွူ။) ၅၆။ တခြိုꩻမဉ်ႏသွုမ်ꩻနောဝ်ꩻ သွုမ်ꩻတောဝ်းဒွိုန်း တမုဲင်ꩻမုဲင်ꩻ၊ ခြွိုင်ႏသန်ꩻရေꩻမဉ်ႏသွုမ်ꩻနောဝ်ꩻ သွုမ်ꩻလဲဉ်း တခီးတခေါဝ်၊ နမ်းကျင်ꩻဟောဝ် မဉ်ႏသွုမ်ꩻနောဝ်ꩻ သွုမ်ꩻထံလို့စွဉ်း။ ၅၇။ တꩻခွန်ꩻခြောဝ်အငေါဝ်း 'တခွန်ꩻ တခွန်ꩻ'။ (လိုꩻမာꩻထာꩻတကုဲင်သားနဝ်ꩻ ဒေါ့ꩻယွူးချာ လိုꩻဟောဝ်။) ၅၈။ တꩻခွန်ꩻဒါႏလဲ့ ယွူးမွော်ဒါႏ။ ၅၉။ တꩻခွန်ꩻဗဉ်ႏသွံလာ၊ တနာဗဉ်ႏသွံနေင်ႏ။ ၆၀။ တꩻငွူငွဉ်ႏ အွို့ꩻအꩻငါႏမွိုန်းတောဝ်း နုဲင်းဖိုးပနား။ ၆၁။ တꩻဆွူလဲ့ တထဲ့တောဝ်း၊ လိုꩻလဲ့ တလွစ်တောဝ်း။ ၆၂။ တꩻငါအဲဉ်ထဝ်း တဗီႏချိုးလုဲင်ꩻစီႏ၊ ကျံႏစွဉ်ႏ နမ်းဖြား သꩻဖယောင်ꩻဆား။ ၆၃။ တꩻဆွူႏကေကုဲင်၊ တဆုဲင်ချင်ႏသေ့ꩻ။ ၆၄။ တꩻဆွူႏတောဝ်း မွိုးအွဉ်ႏကုဲင်၊ တꩻဆုဲင်တောဝ်း ဖါအွဉ်ႏပြာႏ၊ တꩻဆွူႏဒျာႏ တွမ်ႏဝင်ꩻမူႏအွဉ်ႏကုဲ၊ တꩻဆုဲင်ဒျာႏ တွမ်ႏဝင်ꩻမူႏအွဉ်ႏပြာႏ။ ၆၅။ တꩻတဲမ်ႏ တဒွီ အခြွီတွမ်ႏဟံႏ မဉ်ႏငံႏလွဝင်ꩻနောဝ်ꩻ အရာႏပွစ်ꩻ။ ၆၆။ ထꩻထာဖြင်း ကာႏယပ်ꩻ၊ တꩻဖူꩻခြုတ်ြခက် လွေꩻသဲင်ꩻခုဲင်ႏ။ ၆၇။ တꩻဒူတွမ်ႏစွူ-ခွꩻတွမ်ႏလျား၊ တပါꩻထိုꩻမား-တပါꩻပေါႏ။ ၆၈။ တꩻဒွိုတ်ꩻရာႏ မဉ်ကောင်းကို၊ တလာꩻရာႏ မိုကောင်းထန်ႏ။ ၆၉။ တꩻပဲ့ꩻလိမ္မာႏ၊ ဆရာႏအာပတ်လွစ်။ (အပဲစ်လွစ်) ၇၀။ တꩻပဲ့ꩻအဲဉ်ထဝ်း အွဉ်ႏဝါးကီႏ၊ တပီႏအဲဉ်ထဝ်း အွဉ်ႏဝါးတောင်ꩻ။ ၇၁။ တꩻဖူꩻကလုံꩻ ပွိုးမီꩻရဲ့၊ ငေါဝ်းခဉ်ꩻကထဲ့ မူႏနံꩻတွမ်ႏခိုဗင်ႏ။ ၇၂။ တꩻဖူꩻတမွေးတဝ်း တွမ်ႏထောင်မွော့-မဲ့ꩻထာꩻဆူႏဆော့ꩻသွီႏ၊ ေငါဝ်းတမွေးေတာဝ်း တွမ်ႏဒေါ့ꩻမွော့- မဲ့ꩻအမျာꩻလွꩻထီႏ။ ၇၃။ တꩻဖူꩻယိန်းတန် ဝင်ꩻယိန်းထောင်ကုဲင်း၊ တꩻဖူꩻယိန်းလုဲး ဝင်ꩻယိန်းထောင်ခွိုꩻ၊ လိုꩻထာꩻသေယိန်းတန် ယိန်းထွာဝင်ꩻထာꩻအာႏကွိုꩻ။ ၇၄။ တꩻဖွေါင်ꩻခြံပါႏ-အဲဉ်ထဝ်းငါႏ၊ ဖိုးပနား အံႏနီဗွူ လို့လဲဉ်းသွူ။ ၇၅။ တꩻဖြွီꩻသွံကျူ ဝေ့စိန်ႏစိန်ႏ၊ ခင်ႏဖါႏကလာꩻသွံနေင်ႏ ထုမ်းတဲပ်တဲပ်။ ၇၆။ တꩻဗင်နဝ်ꩻ ငမ်းဗာႏအမေး၊ ရူးနောဝ်ꩻ ငမ်းဗာႏအတမဲစ်ꩻ၊ ဖိုးနဝ်ꩻ ငမ်းဗာႏအနုံꩻ၊ လိုꩻနောဝ်ꩻ ငမ်းဗာႏလို့လို့။ ၇၇။ တꩻဗွန်ထာꩻမꩻ ယူႏလꩻမွိုး။ ၇၈။ တꩻမွုန်ႏနောဝ်ꩻ အွဉ်ႏဆꩻငါတဲင် ထွားသွော့ယောင်ꩻ၊ မန်ႏကာꩻအွဉ်ႏထောင်ꩻ ထွားသွော့လွိုး၊ မဉ်ႏအွဉ်ႏငွိုးတဲ့ ငွိုး၊ မဉ်ႏအွဉ်ႏငတဲ့ င၊ မဉ်ႏအွဉ်ႏတဗျလဲ့ တဗျနုဲင်း၊ ကေင်တငါလုဲင်း အဲင်ႏစံꩻကာႏ၊ ဆိမ်ꩻမဲ့ထွားမွာႏ တားတꩻရုဲင်၊ တꩻရေꩻတꩻကုဲင် ကဖန်ႏဆင်ꩻ၊ ဟဝ်လင်ꩻကုဲင်လင်ꩻ အကျိုꩻဖေႏ။ ၇၉။ တꩻရာꩻနဝ်ꩻ ဒါႏနေ သမ်းစွဉ်ႏတဝ်း၊ ငဝ်းနဝ်ꩻဒါႏနေ သမ်းဒေါ့ꩻကွင်။ ၈၀။ တꩻရာꩻမဗွို့ꩻ လိုꩻမောင်းဒေါင်၊ အဝ်ႏစဲးသော့ꩻစွဉ်ႏ ဟင်ꩻလေꩻနောင်လဲ့ မအံႏဗာႏ၊ သေတောဝ်းအရသာႏ ကွိုနဲးဟွေး။ ၈၁။ တꩻရေ့ကေ ကေဖွမ်း၊ တꩻရေ့ဖိုး ဖိုးထောင်း။ (ရဲꩻရင်ꩻရုဲင်းဟန်စွဉ်ႏလဲ့ တသေတဝ်း အဖဲ့ꩻအဖုဲင်ꩻ အကတူႏအခင်ႏတဲင် ေပါႏရဲꩻရင်ꩻရုဲင်းဟန် တမွိုꩻတမာꩻ တငီႏတငါထာꩻနောဝ်ꩻ စင်းမော့ꩻဒါႏ ထာꩻယူႏပက်ဆင်ꩻရယ်ꩻဒုက္ခ။ ၈၂။ တꩻရေꩻတွမ်ႏနီး၊ တသီးတွမ်ႏခန်။(နီးခန် တလွစ်ကင်ꩻတောဝ်း လူႏတွမ်ႏနီး၊ အံႏတွမ်ႏနီး။) ၈၃။ တꩻရေꩻထွီႏမုတ်၊ တꩻဖုတ်ထွီႏခယ်ႏ။ ၈၄။ တꩻရေꩻဒျာႏအထန်ႏ နုဲင်းစောက်အာႏတဒွီ၊ အကုိသွီ အဖျꩻခါႏ။(ယောင်ꩻရေꩻငေါဝ်းအွီႏလဲ့ အသွိုန်ႏအသꩻ တစွဉ်ႏတောဝ်း၊ တဟဝ်တောဝ်း၊ တꩻခွေႏတꩻကဲင်ႏတန်၊ ဉာဏ်ႏပညာႏလဲ့ တအဲဉ်ထဝ်း။) ၈၅။ (က) တꩻရေꩻမꩻ ဝင်ꩻသုဲင်၊ တꩻကုဲင်မꩻ ဝင်ꩻနုဲင်ႏခန်း။ (ခ) တꩻရေꩻမꩻ ဝင်ꩻသုဲင်သော့ꩻနား၊ တကြွားမꩻ ဝင်ꩻဝန်ꩻနုဲင်ႏထိုꩻ။ (လိုꩻကျလိုꩻယံမꩻ ဝင်ꩻဒင်ႏအရာႏ၊ ဝင်ꩻမျောက်ထို၊ ဝင်ꩻရိုႏေသႏ။) ၈၆။ တꩻရေꩻတစွဲးသုမ်ꩻ၊ တရေꩻတကွံꩻ ကုဲင်။ ၈၇။ တꩻရွူႏငါႏထာꩻ ကဲꩻစွဉ်ႏထုဲင်၊ တꩻကုဲင်ငါႏထာꩻ ကဲꩻစွဉ်ႏနံႏ။ ၈၈။ တꩻလီꩻမာꩻမꩻ သေင်ႏလာႏကျောင်ႏ၊ ဟွိုန်ရီးတꩻပေါင်ႏမꩻ အနမ်းလွဉ်။ ၈၉။ တꩻလုတ်ꩻသုတ်ꩻဗုတ် သေန်ႏလဲဉ်းထံ၊ မူႏနံꩻထီႏ မူႏနံꩻဖင်း၊ မဲးရင်းထီႏ မဲးရင်းဖင်း၊ မဲးမုဲင်းထီႏ မဲးမုဲင်းအုံတကုတ်ꩻ၊ မဲးမုတ်ꩻထီႏ မဲးမုတ်ꩻခွယ်ႏတရွို့ꩻ။ ၉၀။ တꩻသာႏခြုံးတူႏ ထဲ့ဟူႏသော့ꩻထီ စွုမ်းခြီထိုꩻမား။ ၉၁။ တꩻသီးတွိုင်ꩻလဲ့ ခံꩻတမွေးကြွို့ꩻတောဝ်း။ ၉၂။ တꩻသီးအမျိုꩻ သွုံꩻစွယ်ꩻမီႏဒါႏနောဝ်ꩻ ရောႏဂါႏရေꩻ၊ သွုံꩻစွယ်ꩻမီႏဒါႏတောဝ်းနောဝ်ꩻ ထွာဒါႏေဘꩻ။ ၉၃။ တꩻအီတမွေးတဝ်း အွဉ်ႏစီꩻကန်ꩻ၊ စေ့ꩻနဲ့ꩻတမွေးတဝ်း ဝီရိနမ်းရင်ꩻ။ ၉၄။ တꩻအီမꩻ ထွာသဌေꩻ၊ တꩻစေꩻမꩻ ထွာသူႏကျွယ်ႏ။ ၉၅။ တီနွောင်ꩻဖိုးတရျာꩻလဲ့ တထိန်ꩻနွောင်ꩻကြွို့ꩻတောဝ်း ပိုမူႏတဖြာꩻ။ ၉၆။ တီဖိုးယိုꩻ တီလိုꩻယပ်ꩻ။ ၉၇။ တဲႏဒုံဆောင်ႏကရိုꩻနဝ်ꩻ မဉ်ႏဒုံႏမောင်းနွောင်ꩻဗဲင်း မောင်းတဆွိုင်ꩻ၊ မဉ်ႏထံႏင နွောင်ꩻဗဲင်း ငတခြုံး။(င-နဝ်ꩻ လိုꩻသီ၊ ဒုံပေႏလိုꩻဆေ့ꩻနောဝ်ꩻ လိုꩻမဉ်ႏသီခါ ယပ်ꩻငါႏသွူ။) ၉၈။ တောႏလောင်ꩻ အွꩻဒဝ်၊ ဆွဉ်းယာနဝ်ꩻ တွိုႏဖျောဝ်ထာꩻကေန်ꩻဖြန်။ ၉၉။ တန်တွမ်ႏတအို၊ ထိုတွမ်ႏတလီꩻ။ ၁၀၀။ တန်လဲဉ်းနီ ရိုႏသေႏ၊ ပေႏထဲင်းနီ သညင်ꩻ၊ မဉ်ႏသွိုန်ဝင်ꩻ ထီꩻသင်ꩻ။ ၁၀၁။ တန်ႏအွီႏနေ သမ်းခါႏ၊ တန်ႏမွေးနေ သမ်းမာႏ၊ တန်ႏဒါႏနေ သမ်းလွꩻ။ ၁၀၂။ တံႏမာႏလာႏ သူႏတꩻတဝတ်ꩻထီ၊ အထန်ႏနွိုးကီလဲ့ အကိုခါႏ။ ၁၀၃။ တိန်ႏဖြွီꩻ လို့အာခြေင်၊ တဟေင် တဒါႏတောဝ်းတိန်ႏ။ ၁၀၄။ တဲင်ႏထွိုင်ႏအာ မဲ့ꩻဖြားထံ၊ အခန်ထွိုင်ႏအာ မဲ့ꩻကော့ꩻဗာႏဆုဲင်ꩻ။ ၁၀၅။ တဲမ်းတွမ်ႏစူ၊ ယားတွမ်ႏခင်ႏ။ ၁၀၆။ တဲမ်းနေးတွမ်ႏစူ၊ ခြူဒျာႏတွမ်ႏခင်ႏ။ ၁၀၇။ တောင်းပွိုလားဗွာ လွိုထီထူး၊ မဲးရင်းတဗူး လွိုမူႏနံꩻ။ ၁၀၈။ တောင်းလုဲင်ဆို့ꩻဒဲဉ်သီႏ၊ ထထီႏဆို့ꩻဒဲဉ်ဟား။ ၁၀၉။ တွိုႏတဲင်ကတွတ်ꩻ ဟွေႏသမ်းဗွို့ꩻ၊ တွိုႏစင်ကတꩻခြွို့ꩻ စွန်သမ်းထောင်း။ ၁၁၀။ တွိုႏထီတေင်ꩻ တꩻဖေင်ꩻထီပွဉ်။(မော့ꩻလိုꩻတꩻသာ လိုꩻတꩻသဉ်တွော့ꩻ အွဉ်ႏတꩻဖေင်ꩻထိုꩻ လိုꩻလီꩻ လိုꩻသေငါꩻ။) ၁၁၁။ တွိုႏနမ်းအပဲစ် နမ်းမစဲစ်၊ တွိုႏဝင်ꩻအပဲစ် ဒေါ့ꩻဖြောဝ်ႏရိုꩻ၊ လိုꩻယံတမွေးတောဝ်း လိုꩻမိစ္ဆာႏ။ ၁၁၂။ တွိုႏနမ်းအပဲစ်နဝ်ꩻ မတ်နုဲင်းတခြီ၊ တွိုႏဝင်ꩻအပဲစ်နဝ်ꩻ မတ်နုဲင်းဆင်။(ထီႏဝင်ꩻအပဲစ် ဝင်ꩻချို့ꩻယွင်ꩻမုꩻ ပေႏပေႏဖြီဖြီငါလဲ့ ဒါႏဒေါ့ꩻဝင်ꩻမဉ်ꩻရွုမ်ꩻ၊ တွိုႏနမ်းအပဲစ် ချို့ꩻယွင်ꩻမုꩻ တန်တန်အာအာနဝ်ꩻ တထီႏတဝ်း၊ တထွားချာတောဝ်း၊ တဖျင်ချာ၊ ဆုမ္မꩻချာတောဝ်း။) ၁၁၃။ တွိုႏဝင်ꩻနောဝ်ꩻစောဝ်ႏ-နီနောဝ်ꩻသဲင်၊ တွိုႏဝင်ꩻတဲင်ငွိုး-နီတဲင်င၊ ဝင်ꩻနောဝ်ꩻဒုက္ခ-နီချမ်ꩻသာႏ၊ မာꩻမွိုန်းမာႏမာႏ မျိုꩻစားယို။ ၁၁၄။ တွမ်ႏထွာမွော့ "လိုꩻဖီးထူꩻ"၊ ထွာဒျာႏသွော့ "လိုꩻတꩻမူတꩻဝတ်ꩻ"။ ၁၁၅။ တွိုက်နမ်းတွိုက်ကြို၊ တွိုက်ယာႏတွိုက်ဆွတ်ꩻ။[၁][၂][၃]