တင်ꩻကျွစ်လာဗွေ

နေင်ႏတရေင်သွံရျာꩻ သူဆီကွတ်ꩻဗာႏ၊ တင်ꩻကျွစ်လာလောင်း (၈)ဟာ၊ ဟန်ႏသဟာယိုနဝ်ꩻ ဗွေႏဗွန်သီႏသဲင်ႏ၊ တလဲင်ႏ တခြွိုက် ယံဖေႏနေး ကလွဉ်ကျွꩻခီႏမျောက်ဖေႏတရာꩻ ပင်ꩻလဝ်းသေꩻခါꩻနုဲင်းနဝ်ꩻတဲင် ဟန်ႏသဟာယိုနဝ်ꩻ ပလင်ႏတသွောင်း လောင်းတဲ့ အုံဒင်ႏဗာႏဖို၊ ပလင်ႏထိုထိုတဲ့ အုံဒင်ႏဗာႏစံꩻ၊ နဝ်ꩻမꩻ ကကျွꩻလွဉ်ဟန်ႏဟာယိုနဝ်ꩻ ရေႏရွယ်ႏချက်တဲ့အဝ်ႏပါပါ၊ ရေႏရွယ်ႏ ချက်နုဲင်းမုဲင်ꩻနဲးတဲင်- တကာႏမူႏတကာႏခိုသီး ထာꩻအာႏကွိုꩻ ဗွေႏဗွန် ခေမာစာရယိုနဝ်ꩻ အုံဗာႏဖိုဗွေႏစင်ꩻသီးထျꩻ (၆)နေင်ႏ၊ ယိုခါ အောင်ႏစွဉ်ႏဓမ္မာစရိယ၊ ထွာလꩻစွဉ်ႏ ဆရာႏတောႏတပါꩻ။ ကွပ်ပွိုးနဝ်ꩻမꩻတဲင် အဝ်ႏလိုႏထူႏဂုဏ်ႏ၊ ခီႏမျောက်ဝွေꩻဗွေႏတဲ့ပါပါ၊ နဝ်ꩻသွူတကာႏတဝ်းတဲ့ ဗွေႏဗွန်သီးယိုခါနဝ်ꩻ အဝ်ႏမာꩻ ကျောင်ꩻတွိုက်တန်၊ နီတကာႏနောင်ခုဲင်းသီးယိုတဲ့ အီႏမာꩻကျောင်ꩻတွိုက်တန်၊ ကွပ်ပွိုးနဝ်ꩻမꩻ ကအီႏမာꩻကျောင်ꩻယိုတဲ့ ဖေႏက အောင်ႏယိုꩻယိုꩻ-နေးတွမ်ႏမေတ္တာႏ ရေႏရွယ်ႏချက်အဟဝ်အဒါႏနုဲင်းနဝ်ꩻစားတဲင် ဟန်ႏဟာယိုနဝ်ꩻ တန်ꩻတဝ်းတဲ့ မာꩻစွဉ်ႏအတန်ꩻ တွော့ꩻ ကျွꩻလွဉ်ခီႏမျောက်ဖေႏ နီတကာႏသီးနုဲင်းယို၊ ခီႏမျောက်ဖေႏ တပဲ့ꩻသီးနုဲင်းယို - တကျွꩻဗာႏကြွို့ꩻတဝ်း၊ နီတကာႏသီးတဲ့ တနာႏဗာႏကြွို့ꩻတဝ်းတဲင် ဟန်ႏဟာယို ခွဲးလို့ဝင်ꩻတဲ့ ဖေႏနေးကထွာဒျာႏအရော့ꩻ၊ မော့ꩻလို့ဝင်ꩻတဲ့ ဖေႏကထွာဒျာႏအဟဝ်၊ ကုသိုလ်ႏတဲ့ ဖေႏကလꩻအာအာ၊ ဗဟုသုတတဲ့ ဖေႏကထွာထဲင်းထဲင်းတဲင် ကနာႏတရာꩻ အယံတွင်ꩻ ခွန်နင်ꩻနီတကာႏမူႏခိုသီး အွဉ်ႏသꩻခွꩻခွꩻ အွဉ်ႏသꩻရောင်းရောင်း၊ အွဉ်သꩻကြောင်းကြောင်းစင်စင်၊ နီပင်သောတာႏ နာႏလွသွော့ တရာꩻ။

ဟန်ႏဟာ ဗွေႏဗွန်ကအီႏဟော်ꩻဖေႏတရာꩻယိုနဝ်ꩻ သမ်းတနꩻတင်ꩻကျွစ်လာ၊ တကာႏမူႏတကာႏခိုသီးတဲ့ ဗဟုသုတဖေႏ နေးကထွာ၊ ကားယိုမာꩻငါ အကျိုꩻဖေႏနေးကယိန်းအာအာ-ယူႏလꩻနုဲင်းနဝ်ꩻတဲင်တွော့ꩻ ကအီႏဟော်ꩻဖေႏတရာꩻဟန်ႏဟာယိုနဝ်ꩻ “တင်ꩻကျွစ်လာဗွေ-ကဟဝ်သေ”တဲ့၊ တရာꩻမဉ်ꩻနဝ်ꩻ ဖေႏခါꩻ “တင်ꩻကျွစ်လာဗွေ-ကဟဝ်သေ”။ တင်ꩻကျွစ်လာဗွေယိုနဝ်ꩻ ဗုဒ္ဓဘာႏသာႏနဲင်ႏငံႏ အွဉ်ႏထွော့ဖန်ဖေႏအမဉ်ꩻနီမျိုꩻ၊ ပထမအမဉ်ꩻ “အဘိဓမ္မာႏနီꩻ”၊ မန်းနဝ်ꩻရိုꩻ “အဘိဓမ္မာခါတော်နေ့”အရိုꩻနုဲင်းနဝ်ꩻ၊ နဝ်ꩻမꩻ ဒုတိယတမဉ်ꩻနဝ်ꩻ “ပဝါရဏာႏနီꩻ”၊ မန်းနဝ်ꩻရိုꩻ “ပဝါရဏာနေ့”အရိုꩻနုဲင်းနဝ်ꩻ၊ အဘိ ဓမ္မာႏနီꩻ-ပဝါရဏာႏနီꩻ ဖန်ဖေႏအမဉ်ꩻ နီမဉ်ꩻနုဲင်းနဝ်ꩻ။ တင်ꩻကျွစ်လာဗွေ ကဖန်ဖေႏဗာႏ “အဘိဓမ္မာႏနီꩻ”အကျောင်ꩻအခရာႏနဝ်ꩻ အဝ်ႏနုဲင်းမုဲင်ꩻနဲးတဲင်- နီဗွေႏဘုရာꩻအလောင်ꩻ တောႏ ခွန်ပေႏသီႏဓတ်၊ လွူးကထင်ႏထွူ လꩻနွုတ်ꩻနီꩻနဝ်ꩻ အမွိုးဗွေႏသီငါ၊ ထင်ႏထွာတော ခွန်လူꩻ၊ အဝ်ႏဒျာႏ အွိုးတုသီႏတာႏခမ်း၊ ထင်ႏထွာလူꩻခို၊ နဝ်ꩻမꩻ ခွန်သီႏဓတ် သက်တောႏကထင်ႏလꩻ ၂၉-နဝ်ꩻ တောႏထွက်ထန်ႏတခြာ။ တွိုႏလွေꩻတခြာကိုတဲင် ဒုက္ကရစရိယာႏ၊ ဒု-ယပ်ꩻယပ်ꩻခုဲင်ႏခုဲင်ႏ၊ ကရ-မာꩻဗာႏ၊ စရိယာ-အကျင်ꩻ၊ ကံကျင်ꩻယပ်ꩻခုဲင်ႏဗာႏ ၆-နေင်ႏ၊ ၆-နေင်ႏတွမ်ႏ ၂၉-မဉ်ႏပေါင်ꩻလို့ဝင်ꩻနဝ်ꩻ ထွာ(၃၅)၊ ကွပ်ပွိုးနဝ်ꩻမꩻတဲင် သက်တောႏ(၃၅)နဝ်ꩻ ထွာဘုရာꩻ၊ ထွာဘုရာꩻထွူ လꩻနွုတ်ꩻဝါႏကို၊ သက်တောႏအနေႏနဝ်ꩻ (၄၂)ကို၊ အနေင်ႏနဝ်ꩻ ဝါႏနဝ်ꩻနဝ်ꩻ နီဗွေႏဘုရာꩻထင်ႏဆိုႏဝါႏ အွိုးတာဝတိံသာႏလူꩻသီးအ ခမ်း။

ကထင်ႏဆိုႏဗာႏဝါႏ တာဝတိံသာႏသူꩻနဝ်ꩻ ရေႏမိုးချက်အထျꩻထျꩻတဲးတဲ့ အီႏထင်ႏဆပ်မွိုးကေꩻဇူꩻ၊ အီႏထင်ႏဟော်ꩻအဘိ ဓမ္မာႏ၊ နဝ်ꩻမꩻတဲင် မွေးသွူ၊ အဘိဓမ္မာႏတရာꩻယာႏယိုနဝ်ꩻ ဟော်ꩻဗော့ꩻလိုꩻအဒုံ၊ အုံဗော့ꩻလိုꩻအခမ်းတဲင် မွိုးနမ်းဖေႏနေးကလင်ꩻ နာႏနွောင်ꩻနဝ်ꩻ ဖစ်လင်ꩻနေးနဝ်ꩻ လꩻတဝ်းနဲ့ဗွေႏ?-ရီခရာႏအဝ်ႏ၊ လꩻတဲးတဲ့ အဝ်ႏလꩻဒျာႏ၊ ကွဲႏတွော့ꩻ- ကွဲႏတွော့ꩻထမုဲင်ꩻနဲတဲင်- အဘိဓမ္မာႏနွုတ်ꩻကျမ်ꩻယိုနဝ်ꩻ မဉ်ႏဟော်ꩻလိုꩻဒုံ မဉ်ႏအုံလိုꩻခမ်းနဝ်ꩻ အီႏဟော်ꩻဗာႏပဉ်(၃)လာ၊ (၃)လာကရိုꩻယိုနဝ်ꩻ ခွန်သီး တအုံလင်ꩻ-နင်ꩻသီးတအုံတဲင် နာႏနွောင်ꩻတဝ်း၊ နဝ်ꩻဟ လူꩻအခမ်းသူꩻနဝ်ꩻ နာႏနွောင်ꩻနဲ့? နာႏနွောင်ꩻ၊ ပွိုးထမုဲင်ꩻနဲးတဲင် နီလိုꩻသီးအ နေင်ႏတရျာꩻနဝ်ꩻ တတျာလဲႏကွို့ꩻ တာဝတိံသာႏလူꩻအခမ်းသူꩻ တနီꩻတွမ်ႏတနာꩻလွုမ်ꩻ-တဲ့။ ကွပ်ပွိုးနဝ်ꩻမꩻတဲင် ဝါႏတွင်ꩻ(၃)လာပေႏနဝ်ꩻ ထွာလဲႏကွို့ꩻဝွေꩻသီး တဆင်ႏဆော့ပေႏဒျာႏ၊ ထွာလဲႏကွို့ꩻ ခွန်လူꩻတအုံလင်ꩻ၊ နင်ꩻတအုံတဲင်လွုမ်ꩻ၊ နဝ်ꩻမꩻ ထမ်ꩻသဲင်အဘိဓမ္မာႏနွုတ်ꩻကျမ်ꩻနဝ်ꩻ အီႏလို့နွောင်ꩻ တအာႏချင်ꩻ၊ ကွပ်ပွိုးနဝ်ꩻမꩻ ဆပ်မွိုးကေꩻဇူꩻတဲ့ ဖေႏနေးကထွာ၊ အဘိဓမ္မာႏနွုတ်ꩻကျမ်ꩻတဲ့ တအာႏချင်ꩻ ဖေႏနေးကသွတ်ꩻယဝ်း၊ ပဉ္စဝ်းနီဗွေႏဘုရာꩻ ရေႏရွယ်ႏချက် အွဉ်ႏနုဲင်းနဝ်ꩻ တဲင် ထင်ႏဟော်ꩻတရာꩻ အွိုးလူꩻဒုံ၊ ထင်ႏဆိုႏအုံဝါႏ အွိုးလူꩻခမ်း။

နီဗွေႏဘုရာꩻ ကတိန်ႏထင်ႏသူꩻတဲင်တွော့ꩻ ကအဝ်ႏဒါႏလူꩻဒုံ ကအုံဒါႏလူꩻခမ်းနဝ်ꩻ သꩻရောင်းသꩻရေꩻ ခွေတဖြောင်းနာꩻတ ဖြေꩻ ‘နီဗွေႏဘုရာꩻကျွꩻထင်ႏ တာဝတိံသာႏခမ်း’တဲ့၊ ခွေတဲ့ ‘တဲ့’၊ နာꩻတဲ့ ‘တဲ့’၊ ခွေဒေါ့ꩻနာꩻဒေါ့ꩻ အောႏအောႏအာႏအာႏတွော့ꩻ စာတု မဟာရာဇ်၊ တာဝတိံသာႏ၊ ယာမာ၊ တုသိတာ၊ နိမ္မာနရတိ၊ ပရနိမ္မိတဝသဝတ္တီႏ ဟွုန်ကြောင်းကြင်းလို့စွဉ်ႏ၊ ဗျဟ္မာႏဖုံႏတဲ့ ဟွုန်ဟန်၊ တိန်ႏဟွုန်နုဲင်းနဝ်ꩻ ပငါပရာꩻတွော့ꩻ ခွေတဲ့ မဉ်လင်ꩻနာႏတရာꩻ၊ နာꩻတဲ့ မဉ်လင်ꩻနာႏတရာꩻ။ နုဲင်းနီတကာႏမ တကာႏလုံလဲင်ႏခါ ကျောင်ꩻနောင်ခုဲင်းကလုဲင်း ကျောင်ꩻနောင်ခုဲင်းကတန်မဉ်ႏတဲ့ ဗွေဗိတ်စွဉ်ႏဒျာႏ၊ နဝ်ꩻ မꩻတဲင် လူꩻသီးဗျဟ္မာႏသီးတဲ့နုဲင်းနဝ်ꩻနေနေ အဝ်ႏခြပ်အဝ်ႏခြိပ်စွဉ်ႏထာꩻ-တဲ့။ နဝ်ꩻတွော့ꩻ နီဗွေႏဘုရာꩻစူထွေဖဲ့ꩻနဝ်ꩻ ထမုဲင်ꩻအုံနဲးတွော့ꩻ နီဗွေႏဘုရာꩻသီး တကာႏမမွိုး ကထင်ႏထွာဒါႏလူꩻခို အမဉ်ꩻ သန္တုသိတ-နဝ်ꩻ နဝ်ꩻတဖြာꩻအုံ၊ နဝ်ꩻမꩻ နီဗွေႏဘုရာꩻသီးမွိုးထျꩻနဝ်ꩻ ဣန္ဒက-ကရိုꩻဒါႏ ခွန်လူꩻနဝ်ꩻအုံ၊ နဝ်ꩻနဝ်ꩻ ပလ္လင်ႏစူထွေဖဲ့ꩻ၊ ပလင်ႏစူစေႏဖဲ့ꩻ ကလဲဉ်းခငါငါ စစနဝ်ꩻ အင်္ကုရ-ကရိုꩻဒါႏ ခွန်လူꩻနဝ်ꩻအုံ။

ကွဲႏတွော့ꩻ- အင်္ကုရကရိုꩻဒါႏ လူꩻတဖြာꩻနဝ်ꩻ လူꩻသီးတံခိုꩻတန်တန်၊ ဗျဟ္မာႏသီး တံꩻခိုꩻယံယံသား ဗော့ꩻဖျော်လွဉ်ဖျော် လွဉ်တဲ့ ဝွေꩻနဝ်ꩻ ဆွတ်ꩻချာဆွတ်ꩻချာဗာႏ ဆွတ်ꩻချာဖေႏဗာႏ၊ တွိုႏလူꩻဣန္ဒကနဝ်ꩻ အွဉ်ႏပီပဲ့ဒျာႏအနမ်း၊ ဆွတ်ꩻချာဖေႏဗာႏတဝ်း၊ ပဉ္စဝ်းနီဗွေႏဘုရာꩻ ကထင်ႏထီႏ လူꩻသီးနီဖြာꩻ အခေႏအနေႏကွာႏနုဲင်းနဝ်ꩻတဲင် လူꩻပရိသတ် ဗျဟ္မာႏပရိသတ်သီးဖုံႏ ဖေႏကသေဗာႏ ရိုꩻပနဝ်ꩻတဲင်တွော့ꩻ နီဗွေႏဘုရာꩻ အဝ်ႏအွိုးပလ္လင်ႏလောင်း ရီလင်ꩻခန်းအင်္ကုရလူꩻ- “တကာႏအင်္ကုရ- မော့ꩻနဝ်ꩻခါ နာꩻကထွာခွန်တွင်ꩻ နာꩻလူႏထာꩻ နေင်ႏပေါင်ꩻပဉ်တသိန်ꩻမွေးတဝ်းနဲ့?၊ နေင်ႏပေါင်ꩻကအာ လာပေါင်ꩻကည နာꩻဒါႏနပဉ်တကားနဝ်ꩻနဝ်ꩻ ကထင်ႏနာႏတရာꩻ လူꩻသီး ဗျဟ္မာႏသီးအမျာꩻကထင်ႏလွဉ်တွော့ꩻ နာꩻမအဝ်ႏဆွတ်ꩻ ချာဆွတ်ꩻချာဖေႏဗာႏတွိုးဟောင်း?”ရီနုဲင်းနဝ်ꩻ။ တိန်ႏတွိုႏနဝ်ꩻမꩻ အင်္ကုရလူꩻနဝ်ꩻ လဝ်းချာ “ဩဗွေႏ- ခွေသွဉ်းကလူႏထာꩻ မော့ꩻနဝ်ꩻခါ တောႏတနꩻဒျာႏ သာႏသနာႏဖေ့ခိန်ႏ တန်ဗွေႏ၊ အလူႏခံႏပုဂ္ဂိုလ်ႏကိုနဝ်ꩻ ဆယ်ꩻကပ်ဘုရာꩻ တရာꩻ သံႏဃာႏ ရတနာႏသွံပါꩻ လိုꩻနုဲင်းနဝ်ꩻ တဖြာꩻဖြာꩻ ပါတဝ်းဗွေႏဩ၊ နဝ်ꩻမꩻ လိုꩻသီႏလငတ်ꩻပါꩻမယ်ꩻ၊ အတဉ်ႏနုဲင်းနဝ်ꩻ တဖြာꩻဖြာꩻ၊ သီႏလသားတဖြာꩻဖြာꩻတဲ့ ပါတဝ်းဗွေႏဩ၊ ထွာဒျာႏဒုဿီလ-သီႏလိ သီႏလတအဲဉ်ထဝ်းထီးသားဖုံႏ၊ နဝ်ꩻမꩻ အလူႏခံႏပုဂ္ဂိုလ်ႏကိုနဝ်ꩻ ညမ်းညမ်းညိမ်းညိမ်းတန်ဖုံႏ၊ ကွပ်အလူႏခံႏပုဂ္ဂိုလ်ႏညမ်း နုဲင်းနဝ်ꩻ မꩻတဲင်တွော့ꩻ ခွေသွဉ်းထာꩻလူႏနဝ်ꩻ အွို-ကအာတဲ့ အာခြေင်ဒျာႏထာꩻလွုမ်ꩻ၊ အကျိုꩻတသန် တတန်တဝ်းသွူ ဗွေႏဩ”လဝ်းနုဲင်း နဝ်ꩻ။

အဝ်ႏနဝ်ꩻမꩻတဲင် နီဗွေႏဘုရာꩻ ရီတောခန်း ဣန္ဒက၊ “တကာႏခွန်လူꩻ ဣန္ဒကဟွေး- နာꩻနဝ်ꩻ လူႏဗာႏလဲႏကွို့ꩻ သွမ်ꩻပေႏတ ဝန်ႏပေႏဒျာႏမွော့ ယိုခါမွော့ တထန်ႏထိုꩻဗာႏတဝ်းဝင်ꩻခြာ၊ အွဉ်ႏပီပဲ့ဗာႏတွိုးနမ်းနဝ်ꩻ ပွိုးထမုဲင်ꩻဟောင်း?” နဝ်ꩻမꩻ ခွန်လူꩻဣန္ဒကလဝ်းချာ “ဩဗွေႏ- ခွေသွဉ်းကလူႏထာꩻနဝ်ꩻ လူႏဗာႏလဲႏကွို့ꩻ သျင်ႏအနုရုဒ္ဓါႏ၊ ရဟန္တာႏဗွေႏနဝ်ꩻ သွမ်ꩻ ပေႏတဝန်ႏဒျာႏဗွေႏဩ၊ ကွိုင်ႏတန်ႏမွေးစွဉ်ႏထာꩻ၊ ခွေသွဉ်းလူႏဗာႏထာꩻ သာႏသနာႏကိုယို၊ နဝ်ꩻမꩻတဲင် ဟန်ႏဟာယိုနဝ်ꩻ လူꩻမဉ်ယံ ယံ ဗျဟ္မာႏအာႏဏာႏမဉ်သန်သန် အတတွူႏနွောင်ꩻတဝ်းခွေသွဉ်း၊ အတလွိုနွောင်ꩻတဝ်းခွေသွဉ်း၊ အတပိုန်းနွောင်ꩻတဝ်းခွေသွဉ်း၊ နဝ်ꩻမꩻ ခွေသွဉ်းအုံပီပဲ့ဗာႏထာꩻနုဲင်းယိုသနယ် ဗွေႏ”အလဝ်းချာနုဲင်းနဝ်ꩻ-တဲ့။ နဝ်ꩻမꩻတဲင် ယိုကိုနဝ်ꩻ သာႏသနာႏခေ့ꩻတွင်ꩻ လူႏထာꩻနဝ်ꩻ အကျိုꩻဆေ့ꩻ၊ “သာႏသနာႏခေ့ꩻ-လူႏကျိုꩻဆေ့ꩻ”၊ နဝ်ꩻမꩻတဲင် သာႏသနာႏကအဝ်ႏလေတွင်ꩻ လူႏထာꩻနဝ်ꩻ အကျိုꩻတန်-တဲ့၊ နဝ်ꩻတွော့ꩻ နီစိုးယိုခါခါနဝ်ꩻ သာႏသနာႏလေနဲ့? သာႏသနာႏခေ့ꩻနဲ့? သာႏသနာႏလေ၊ ပွိုးထမုဲင်ꩻနဲးတဲင် ရိုꩻဗာႏစွဉ်ႏ နီတထီႏတဝ်း ဘုရာꩻနမ်းနမ်းလွုမ်ꩻ၊ နီဘုရာꩻ ကဟော်ꩻသေꩻခါꩻဒါႏ အဆုံꩻအမꩻ ငဝ်း သွဉ်ငဝ်းသင်နဝ်ꩻ အဝ်ႏတွိုႏဒွို့ယိုခါ။ သာႏသနာႏ-သာႏသနာႏကရိုꩻနဝ်ꩻ အလင်မွေးတဝ်း၊ နီဗွေႏဘုရာꩻအဆုံꩻအမꩻ၊ သာႏသနာႏကရိုꩻနဝ်ꩻ အဆုံꩻအမꩻ၊ ဗုဒ္ဓသာႏ သနာႏကရိုꩻနဝ်ꩻ ဘုရာꩻအဆုံꩻအမꩻ၊ ဘုရာꩻငဝ်းငွါ၊ ဘုရာꩻငဝ်းသွဉ်သင်၊ ကွပ်ပွိုးနဝ်ꩻမꩻတဲင် တဲႏစွဉ်ႏအွိုးသျင်ႏမဟာကဿပသီးစိုး သူꩻ ဗꩻလွဉ်စွဉ်ႏယိုခါ တသွုပ်ထွူတသွုပ်၊ တစွုပ်ထွူတစုပ် ကဒါႏလိတ်သားနဝ်ꩻတဲ့ချꩻ၊ ကတဒါႏတဝ်းလိတ်သား စင်ꩻပေႏသျင်ႏ ပေႏတဲ့သွဉ်၊ ကလိုႏအပ်ဒါႏ ပစ္စေꩻလစ်ꩻပါꩻတဲ့ ထောက်ပံ့၊ ဆရာႏတွမ်ႏတကာႏ စွီႏဝင်ꩻစူ၊ စွီႏဝင်ꩻစူပျုလွဉ် သာႏသနာႏနဝ်ꩻမꩻ သာႏသနာႏနဝ်ꩻ တွိုႏလွဉ်ဟန်ႏနီꩻ။

နီဗွေႏဘုရာꩻနမ်းနမ်း တအဲဉ်ထဝ်းတဲ့ တရာꩻနဝ်ꩻ တဲႏအထျꩻဗꩻအနာ အဝ်ႏလို့လို့၊ ကွပ်ပွိုးနဝ်ꩻမꩻ နီဗွေႏဘုရာꩻအဆုံꩻအမꩻ ကရိုꩻဒါႏသာႏသနာႏနဝ်ꩻ အဝ်ႏတွိုႏယိုခါတဲင် နီနဝ်ꩻ နာႏဗာႏနီဗွေႏဘုရာꩻ၊ မာꩻလွဉ်ꩻဗာႏ နီဗွေႏဘုရာꩻ အဆုံꩻအမꩻအတွိုင်ꩻ၊ နေးနာႏ လွဉ်ꩻဗာႏ နီဗွေႏဘုရာꩻအဆုံꩻအမꩻအတွိုင်ꩻ၊ ကွပ်ပွိုးနဝ်ꩻမꩻ နီကသဲင်ꩻအဝ်ႏလိုꩻခမ်းတကုံ၊ နီကသဲင်ꩻအုံလိုꩻဒုံယိုတဆင်ႏနဝ်ꩻ တောႏ တနꩻဒျာႏ သာႏသနာႏလေတွင်ꩻ၊ ခွန်နင်ꩻသီး ဖေႏကသေသွော့နုဲင်းနဝ်ꩻ။ နဝ်ꩻတွော့ꩻ ယိုကိုနဝ်ꩻ တကာႏခိုသီးအဝ်ႏလိုႏယူႏ၊ တကာႏမူႏသီး အဝ်ႏလိုႏစဉ်ꩻစာꩻ၊ နီဗွေႏဘုရာꩻတန်သွူမဉ်ႏတဲ့ အဝ်ႏဆပ် ချာမွိုးကေꩻဇူꩻအာအာ၊ ဖါကေꩻဇူꩻအဝ်ႏအဝ်ႏ၊ နဝ်ꩻမꩻတဲင် မွိုးကအဝ်ႏယိုခါ ဖါကအဝ်ႏယိုတွင်ꩻ ခွန်နင်ꩻသီး အဝ်ႏလိုႏသေချာ မွိုး ကေꩻဇူꩻအာအာ-ဖါကေꩻဇူꩻအဝ်ႏအဝ်ႏ၊ ဖါခွန်ကခြင်ꩻ-မွိုးနင်ꩻကသောင်အီဒါႏ ထာꩻအမျိုꩻနဝ်ꩻ အဝ်ႏလိုႏမာꩻတဝ်း။ နဝ်ꩻမꩻ မွိုးဗွေႏသꩻကဆာ-ဖါဗွေႏသꩻကလျားအီဒါႏအမျိုꩻနဝ်ꩻ အဝ်ႏလိုႏဒေါ့ꩻတဝ်း၊ ဖါဗွေႏမဲ့ထီကဟူႏ-မွိုးမူႏမဲ့ထီကလင်ꩻအီ ဒါႏအမျိုꩻနဝ်ꩻ အဝ်ႏလိုႏကျမ်ႏတဝ်း၊ အာႏရဲင်ꩻအလွိုက် ထွိုက်ရာꩻပငါပရာꩻ အဝ်ႏလိုႏလွူးခွုန်ꩻဖါ-အဝ်ႏလိုႏလွူးချာမွိုး၊ အဆေ့ꩻဆေ့ꩻ တဲ့ အဆေ့ꩻဆေ့ꩻအလွိုက်၊ အတောႏတောႏတန်ႏတန်ႏတဲ့ အတောႏတောႏတန်ႏတန်ႏသားအလွိုက်၊ ကခြွေကခြာႏ ကချမ်ꩻသာႏ သားတဲ့ ခြွေခြာႏချမ်ꩻသာႏအလွိုက် ထွိုက်ရာꩻထွိုက်ရာꩻ လွူးခွုန်ꩻသွော့ဖါ-လွူးချာသွော့မွိုး။ ပွိုးထမုဲင်ꩻနဲးတဲင် မွိုးယာႏယာႏနဝ်ꩻ အဝ်ႏတမွိုးလွုမ်ꩻ၊ ဖါယာႏယာႏနဝ်ꩻ အဝ်ႏတဖါလွုမ်ꩻ၊ ကဟဲ့ꩻအွီႏအွီႏနဝ်ꩻ ဟဲ့ꩻတမွိုး လွုမ်ꩻ၊ ကဟဲ့ꩻနွိုးနွိုးနဝ်ꩻ အဝ်ႏတဖါလွုမ်ꩻ၊ မွိုးကအဝ်ႏယိုခါ ဖါကအဝ်ႏယိုတွင်ꩻ ခွန်နင်ꩻသီး မဉ်ႏနာႏတဝ်းမွိုး(ငဝ်း)တငွါငွါ၊ မဉ်ႏနာႏ တဝ်းဖါငဝ်းတစိꩻစိꩻ၊ မွိုးမဉ်ႏလွေꩻငါ ဖါမဉ်ႏလွေꩻသူꩻနဝ်ꩻ နောင်ႏတတရာꩻလꩻဆုဲင်ꩻထာꩻ၊ မဲ့ထီလျားရီႏဆုဲင်ꩻထာꩻ ဗဲက်ဗဲက်တဲ့ ထူꩻ တဝ်း တကာႏလုံတကာႏမသီးဖုံႏ။ ကွပ်ပွိုးနဝ်ꩻမꩻ မွိုးကအဝ်ႏယိုခါ ဖါကအဝ်ႏယိုတွင်ꩻ ခွန်နင်ꩻသီး ရက်သွော့မွိုးစွုမ်ႏဟာဟာ၊ ရက်သွော့ဖါ စွုမ်ႏနီꩻနီꩻ-ကရိုꩻ နဝ်ꩻ ဗွေႏဗွန်မဉ်ဟော်ꩻဖေႏ၊ မဉ်အွဉ်ႏဒေါ့ꩻဖေႏ နီတကာႏသီးနုဲင်းနဝ်ꩻ၊ နဝ်ꩻထွူတွော့ꩻ “နီသွဉ်းသီးနဝ်ꩻဗွေႏ မွိုးသမ်းလဲဉ်းငါ၊ ဖါသမ်း လဲဉ်းထိုꩻ အီႏဆပ်မွိုးကေꩻဇူꩻအာအာ၊ ဖါကေꩻဇူꩻအဝ်ႏအဝ်ႏနဝ်ꩻ မာꩻနုဲင်းမုဲင်ꩻဗွေႏ?” လꩻဒျာႏ၊ လꩻဒျာႏနုဲင်းမုဲင်ꩻနဲတဲင်တွော့ꩻ အခိုတဲ့ လူႏ-အမူႏတဲ့တန်ꩻ မဉ်ႏထွာရဟန်ꩻတဲ့ မာꩻဖေႏသွော့ကုသိုလ်ႏ၊ ရေႏတွိုႏတွိုႏဖေႏသွော့ အွိုးမွိုးကလွေꩻငါ၊ ရေႏတွိုႏတွိုႏဖေႏသွော့ အွိုးဖါကလွေꩻသူꩻ၊ မဉ်ႏဝွေႏဖေႏကုသိုလ်ႏ မဉ်ႏဖန်းဖေႏကုသိုလ်ႏနဝ်ꩻတဲ့ တွမ်ႏကဆပ်မွိုးကေꩻဇူꩻအာ-တွမ်ႏကဆပ်ဖါကေꩻဇူꩻအဝ်ႏ နဝ်ꩻပီဝင်ꩻ၊ နဝ်ꩻတချက်တဲ့ တရာꩻနာႏခွန်နင်ꩻ နီတကာႏသီး တောင်ꩻခါꩻသွော့။ အဝ်ႏနဝ်ꩻထွူတွော့ꩻ သွုပ်ငါလွေꩻ အဘိဓမ္မာႏခန်ꩻ၊ နီဗွေႏဘုရာꩻ ကထင်ႏဟော်ꩻအဘိဓမ္မာႏ လူꩻသီးဒုံနဝ်ꩻ တဲႏဝါႏဆိုႏ လောင်း(၁)နီꩻ၊ အဝ်ႏနဝ်ꩻတဲင်တွော့ꩻ ဟော်ꩻပုံႏဟော်ꩻနယ်ꩻနဝ်ꩻ ဟော်ꩻနုဲင်းမုဲင်ꩻနဲတဲင် ဟော်ꩻဖေႏလူꩻသီး ဗျဟ္မာႏသီး အခိန်ႏလꩻအာ တန်၊ ကွပ်ပွိုးနဝ်ꩻမꩻ ဟော်ꩻဖေႏဝိတ္ထာရနယ၊ အနယ်ꩻလုဲင်း၊ ဝိတ္ထာရ-ကရိုꩻနဝ်ꩻ အလုဲင်း၊ နယ-ကရိုꩻနဝ်ꩻ အနယ်ꩻ၊ ဝိတ္ထာရနယ-ဟော်ꩻဖေႏအနယ်ꩻလုဲင်း၊ ခြုဲင်းဖေႏအနယ်ꩻစွုမ်ႏ။

နဝ်ꩻမꩻတဲင် နီဗွေႏဘုရာꩻယူႏလင်ꩻ အွိုးလိုꩻသီးအဒုံ ကအုံလိုꩻသီးအခမ်းတွင်ꩻ ‘ယိုနဝ်ꩻ အခိန်ႏတုံꩻသွမ်ꩻ တွိုႏသွူဟောင်း?’ ပေါႏရိုꩻနုဲင်းနဝ်ꩻတဲင်တွော့ꩻ နီဗွေႏဘုရာꩻနဝ်ꩻ ဖန်ဆင်ꩻသေꩻ “နိမ္မိတ”ဘုရာꩻတဆူႏခေါ်၊ အဝ်ႏနဝ်ꩻမꩻတဲင် နီဗွေႏဘုရာꩻနမ်းနမ်း အခြောင်ꩻတင် အွဉ်ႏဟော်ꩻဖေႏလုဲင်ႏတရာꩻ၊ နီဗွေႏဘုရာꩻ လုဲင်ႏအခြောင်ꩻ-ပြောင်ꩻအနမ်းတဲင် နီဗွေႏဘုရာꩻနမ်းနမ်းနဝ်ꩻ လင်ꩻတုံꩻ သွမ်ꩻ၊ တုံꩻသွမ်ꩻထွူတွော့ꩻသုံꩻ၊ သုံꩻသွမ်ꩻထွူတွော့ꩻ လွေꩻအုံသာႏယာႏထာꩻ မွူးယာခိုႏ နံႏသာႏမွူးခြာ။ သျင်ႏသာရိပုတ္တရာႏကျွꩻလွဉ်၊ မာꩻဖေႏဝွေꩻဗွေႏဝွတ်ပတ်၊ ဘုရာꩻဗွေႏမျတ်ရိုꩻ- “သာရိပုတ္တရာႏ- ဟန်ႏနီꩻ တာဝတိံသာႏလူꩻ သီးအခမ်းသူꩻနဝ်ꩻ ခွေဟော်ꩻဖေႏ အဘိဓမ္မာႏ၊ တဲႏယို ဗꩻယို၊ ရိုꩻနုဲင်းယို”ခြုဲင်းဖေႏကွို့ꩻအအဲဉ်ႏ-စီႏစဲဉ်ႏဖေႏကွို့ꩻအချုပ်လွုမ်ꩻ၊ နဝ်ꩻမꩻ နီဗွေႏဘုရာꩻကတိန်ႏဟော်ꩻဖေႏတော သျင်ႏသာရိပုတ္တရာႏနဝ်ꩻ သင်္ခေပနယ၊ သင်္ခေပ-ကရိုꩻနဝ်ꩻ အအဲဉ်ႏ၊ နယ-ကရိုꩻနဝ်ꩻ အနယ်ꩻ၊ ဟော်ꩻဖေႏကွို့ꩻအနယ်ꩻအဲဉ်ႏ၊ စီႏစဲဉ်ႏဖေႏကွို့ꩻအနယ်ꩻချုပ်လွုမ်ꩻ။

သျင်ႏသာရိပုတ္တရာႏနဝ်ꩻ ဉာဏ်ႏပညာႏတန်ငါႏတဲင်တွော့ꩻ နီဗွေႏဘုရာꩻဟော်ꩻနယ်တထာလဲ့ သေငါစွဉ်ႏတသောင်ꩻ၊ နဝ်ꩻ မꩻနီဗွေႏဘုရာꩻရိုꩻ- “သာရိပုတ္တရာႏ- အဘိဓမ္မာႏတရာꩻယို သဲင်ꩻသွဉ်ဖေႏတေား နာꩻတပဲ့ꩻငတ်ꩻရျာꩻနဝ်ꩻလုဲင်း”ထွဉ်ႏတောနုဲင်းနဝ်ꩻ၊ အဝ်ႏနဝ်ꩻမꩻတဲင် နီဗွေႏဘုရာꩻအခိန်ႏတိန်ႏတွိုႏတွော့ꩻ ကျွꩻချာထင်ႏယင်း လူꩻသီးအခမ်း၊ သာရိပုတ္တရာႏဗွေႏနမ်းလဲ့ ကျွꩻသဲင်ꩻချာ ကျောင်ꩻ၊ သဲင်ꩻဟဲ့ꩻတပဲ့ꩻတပန်ꩻ ရဟန်ꩻသံႏဃာႏ အပါꩻငတ်ꩻရျာꩻတဲင် ဝွေꩻဗွေႏသဲင်ꩻသွဉ်ဖေႏ။ ဝွေꩻဗွေႏကတိန်ႏသဲင်ꩻသွဉ်ဖေႏ အတပဲ့ꩻတပန်ꩻရဟန်ꩻငတ်ꩻရျာꩻနဝ်ꩻ နာတိဝိတ္ထာရ-နာတိသင်္ခေပ(နယ)-ဆွာꩻငါႏတဲ့မွေး တဝ်း၊ ဒွေါင်ႏငါႏတဲ့မွေးတဝ်း၊ မဲဉ်ႏရာႏ သဲင်ꩻသွဉ်ဖေႏနုဲင်းနဝ်ꩻ-တဲ့၊ နဝ်ꩻမꩻ ရဟန်ꩻငတ်ꩻရျာꩻဖုံႏနဝ်ꩻတဲ့ ကုသိုလ်ႏဇာတ်ကရီးပါလွဉ်၊ ကုသိုလ်ႏပန်အွဉ်ပါသဲင်ꩻတဲင် သဲစ်ကသွဉ်တဲ့ဒါႏ၊ သဲစ်ကနာႏတဲ့သေစွဉ်ႏဒျာႏ။ ဝွေꩻဗွေႏသီးအပါꩻငတ်ꩻရျာꩻယို ကုသိုလ်ႏဇာတ်ကရီးပါလွဉ်-ကုသိုလ်ႏပန်အွဉ် ပါသဲင်ꩻနုဲင်းမုဲင်ꩻနဲးတဲင်- မော့ꩻနဝ်ꩻတွင်ꩻ ဗွေႏ ဘုရာꩻကဿပစိုး အအဝ်ႏဒျာႏ၊ အထွာဒျာႏပြာ အဗာႏငတ်ꩻရျာꩻ၊ အဝ်ႏသော့ꩻဒျာႏထမ်းကို၊ ရဟန်ꩻနီပါꩻနဝ်ꩻ အဝ်ႏရွစ်အဘိဓမ္မာႏ၊ ပြာ ငတ်ꩻရျာꩻနဝ်ꩻ နာႏဗာႏအဘိဓမ္မာႏတရာꩻ၊ နာႏဗာႏတရာꩻ၊ ကွပ်ကုသိုလ်ႏပေႏနဝ်ꩻတဲင်တွော့ꩻ တဲႏစွဉ်ႏဘုရာꩻကဿပစိုး ဗꩻစွဉ်ႏ ဘုရာꩻဂေါတမစိုး အခါႏလယ်ႏကို ငါးရုဲင်ꩻ၊ တိရစ္ဆာန်ႏ၊ ပိတ္တာႏ၊ အသူရကာယ်ႏ အပါယ်ႏလစ်ꩻပါꩻ၊ လွေꩻဗာႏတဝ်း-တဲ့၊ တွိုႏသဲင်ꩻနီဗွေႏ ဘုရာꩻစိုးယိုနဝ်ꩻ ကားကအဝ်ႏ သဲင်ꩻထွာလို့စွဉ်ႏလိုꩻ။ ယိုကိုနဝ်ꩻ နီတကာႏခိုသီးအဝ်ႏလိုႏယူႏ- တကာႏမူႏသီးအဝ်ႏလိုႏစဉ်ꩻစာꩻ၊ ပြာအဗာႏငတ်ꩻရျာꩻမော့ꩻနဝ်ꩻခါနဝ်ꩻ ပရူးရူး အမွူး ပါ-အထီးပါ၊ အဖြားပါ-အဆားပါသနဲ့၊ မဉ်မွူးမွူး-မဉ်ထီးထီး၊ မဉ်ပေႏပေႏ-မဉ်တန်တန်၊ မဉ်ဆားဆား-မဉ်ဖြားဖြား ကားကအဝ်ႏ ကွပ်နာႏဗာႏတရာꩻ ကုသိုလ်ႏနဝ်ꩻအစွန်ꩻတဲင်တွော့ꩻ ကားကအဝ်ႏ သဲင်ꩻထွာလို့စွဉ်ႏ လိုꩻခို၊ ထွာလိုꩻခိုလွုမ်ꩻတကာႏတဝ်း နွို့ သော့ꩻသာႏသနာႏတွော့ꩻ ဗုဲင်ဗာႏစွဉ်ႏသျင်ႏ၊ ခံႏဗာႏစွဉ်ႏစင်ꩻ၊ ဗုဲင်ဗာႏသျင်ႏ၊ ခံႏဗာႏစင်ꩻလွုမ်ꩻ တကာႏတဝ်းတွော့ꩻ ရီးသွတ်ꩻ အစ ပထမအနေႏ သွဉ်ဗာႏစွဉ်ႏအဘိဓမ္မာႏ။

သွဉ်ဗာႏလွုမ်ꩻတကာႏတဝ်းတွော့ꩻ သဲစ်ကထင်ႏလွုမ်ꩻတဲ့ သေဖြွဉ်၊ သဲစ်ကသွဉ်လွုမ်ꩻတဲ့ သေကြောင်းစွဉ်ႏဒျာႏ၊ ကွပ်ပွိုး နဝ်ꩻမꩻ နာႏတရာꩻနုဲင်းယိုခါတဲ့ တကာႏလုံတကာႏမသီးဖုံႏ ကုသိုလ်ႏလꩻအာတန်-ကရိုꩻနဝ်ꩻ ယွုမ်းအံႏလွသွော့ ပငါပရာꩻ။ နဝ်ꩻမꩻတဲင် နီဗွေႏဘုရာꩻ ဟော်ꩻဖေႏလူꩻခမ်း၊ အဝ်ႏနဝ်ꩻ လင်ꩻဟော်ꩻဖေႏ သျင်ႏသာရိပုတ္တရာႏ၊ အဝ်ႏသျင်ႏသာရိပုတ္တရာႏတဲ့ သဲင်ꩻသွဉ်ဖေႏတော တပဲ့ꩻတပန်ꩻ ရဟန်ꩻသံႏဃာႏ၊ နုဲင်းမွူးရဝ်ꩻနီꩻတဲ့နဝ်ꩻ၊ နုဲင်းတရူꩻနီꩻတဲ့နဝ်ꩻ၊ တနီꩻထွူတနီꩻ၊ တနီꩻထွူတနီꩻ လွေꩻ နဝ်ꩻအတွိုင်ꩻတဲင် ဗꩻစွဉ်ႏတင်ꩻကျွစ်ဗွေ-တဲ့။ တိန်ႏတွိုႏတင်ꩻကျွစ်ဗွေနဝ်ꩻတဲင်တွော့ꩻ အဘိဓမ္မာႏတရာꩻနဝ်ꩻ နွုတ်ꩻကျမ်ꩻ၊ “ဓမ္မသင်္ဂဏီ၊ ဝိဘင်း၊ ဓာတုကထာ၊ ပုဂ္ဂလ ပညတ်၊ ကထာဝတ္ထု၊ ယမိုက်၊ ပဋ္ဌာန်ꩻ”နွုတ်ꩻကျမ်ꩻလို့၊ တိန်ႏလို့နုဲင်းနဝ်ꩻတဲင်တွော့ꩻ နီဗွေႏဘုရာꩻ အွဉ်ႏဒေါ့ꩻဟွုန်ခန်း “တကာႏလုံ သိကျာꩻ၊ နီတရာꩻတဲ့သွတ်ꩻသွူ၊ နီအီႏလင်ꩻချာသွူလိုꩻဒုံ၊ နီအီႏလင်ꩻအုံချာသွူလိုꩻခမ်း”။ အဝ်ႏနဝ်ꩻတွော့ꩻ သိကျာꩻဖြားတဲ့ ဟဲ့ꩻတွမ်ႏအလိုꩻဖုံႏ ထမုဲင်ꩻဖုံႏတွော့ꩻ ဖန်ဆင်ꩻလင်ꩻစွဉ်ႏဒျာႏ တဒေါင်သွံဗာႏတဲ့၊ စူထွေတ ဗာႏ၊ စူစေႏတဗာႏ၊ အထာႏဝတဗာႏ၊ နဝ်ꩻမꩻတဲင် စူထွေနဝ်ꩻ တဒေါင်ခံꩻ၊ စူစေႏနဝ်ꩻ တဒေါင်ရွဉ်၊ အထာႏဝတဗာႏနဝ်ꩻ တဒေါင်ပတ္တ မျာꩻ၊ တဒေါင်ခံꩻနဝ်ꩻ လူꩻသီးထောင်၊ တဒေါင်ရွဉ်နဝ်ꩻ ဗျဟ္မာႏသီးလင်ꩻ၊ တဒေါင်ပတ္တမျာꩻ အွိုးအထာႏဝတန်နဝ်ꩻ နီဗွေႏကျွꩻ။ နဝ်ꩻမꩻတဲင် နီဗွေႏဘုရာꩻဗွောင်စွဉ်ႏ လောကဝိဝရဏဉာဏ်ႏတဲင် လိုꩻသီးကအဝ်ႏအွိုးဒုံ-ကအုံလိုꩻခမ်း ထီႏစွဉ်ႏဒျာႏ လူꩻသီး ဖုံႏဗျဟ္မာႏသီးဖုံႏ၊ နဝ်ꩻမꩻ နီဗွေႏဘုရာꩻ ကျွꩻလင်ꩻဝေင်ꩻမုဲင်ꩻနဲးတဲင် အဝ်ႏအွိုးတာဝတိံသာႏနဝ်ꩻ ကျွꩻလင်ꩻသင်္ကဿဝေင်ꩻ၊ သင်္ကဿ နဝ်ꩻ အဝ်ႏကလာꩻခမ်းသူꩻ၊ ကွပ်ပွိုးနဝ်ꩻမꩻတဲင် သျင်ႏသာရိပုတ္တရာႏ ထင်ႏလဝ်းနယ် ခိုခိုမူႏမူႏ စုဗူႏလို့စွဉ်ႏဒျာႏ သင်္ကဿဝေင်ꩻ။ အဝ်ႏနဝ်ꩻမꩻတဲင် နီဗွေႏဘုရာꩻတိန်ႏကျွꩻလင်ꩻ သမ်းဗွောင်ပါစွဉ်ႏ လောကဝိဝရဏဉာဏ်ႏတဲင် လိုꩻသီးဖုံႏ ထီႏစွဉ်ႏလူꩻဖုံႏ၊ ဗျဟ္မာႏဖုံႏ-တဲ့၊ နီဗွေႏဘုရာꩻတဲ့ အွဉ်ႏစွꩻလင်ꩻပါစွဉ်ႏ ရောင်ႏတောႏသူပါꩻ၊ သပ္ပါယ်ႏမွေးစွဉ်ႏထာꩻ၊ နိစ်သက်မွေးစွဉ်ႏထာꩻ၊ ဟဝ်ရက် မွေးစွဉ်ႏထာꩻတဲ့။ အယံတွင်ꩻမော့ꩻနဝ်ꩻနဝ်ꩻ လိုꩻခိုခိုမူႏမူႏ ကတိန်ႏထီႏ နီဗွေႏဘုရာꩻကျွꩻလင်ꩻစားနဝ်ꩻနဝ်ꩻ နိစ်သက်ငါႏ၊ ကေႏညိုႏငါႏမရေႏမ ရာႏတဲင်တွော့ꩻ လိုꩻတွိုင်ꩻမဉ်ထွာတဝ်းဘုရာꩻ တဖြာꩻဖြာꩻအဲဉ်ထဝ်း၊ အရိုꩻနုဲင်းနဝ်ꩻ၊ ကွပ်ပွိုးနဝ်ꩻမꩻတဲင် ခွဲဗာႏဘုရာꩻ မော့ꩻဗာႏ ဘုရာꩻတဲ့နဝ်ꩻ ခွဲးဗာႏနီဗွေႏဘုရာꩻသာႏသနာႏ၊ မော့ꩻဗာႏနီဗွေႏဘုရာꩻသာႏသနာႏတဲ့နဝ်ꩻ ကံႏဟဝ်ငါႏမရေႏမရာႏ၊ ကံႏထူꩻငါႏ မရေႏ မရာႏ။

နဝ်ꩻမꩻတဲင် အဝ်ႏအွိုးတာဝတိံသာႏခမ်း ကတိန်ႏတွိုႏလင်ꩻ လိုꩻဒုံ၊ လိုꩻခမ်းကအုံ လိုꩻဒုံကအဝ်ႏဒါႏ တကာႏမူႏ တကာႏခိုသီး ဖုံႏနဝ်ꩻတဲ့ လွေꩻကျိုႏဆွုမ်ႏ နီဗွေႏဘုရာꩻ၊ ရေႏမတ်အွိုးနဝ်ꩻကို၊ ထူႏထုံꩻအလဲင်ႏနဝ်ꩻ အခြွိုက်နဝ်ꩻတဲင် တနေင်ႏထွူတနေင်ႏ တသွုပ် ထွူတသွုပ် တစွုပ်ထွူတစွုပ်တွော့ꩻ ဗꩻစွဉ်ႏယိုခါ။ ယိုခါတဲ့ ဗော့ꩻတွိုႏတင်ꩻကျွစ်လာ တင်ꩻကျွစ်လာနဝ်ꩻ တကာႏမူႏသီး အီတွမ်ႏမေႏဗို၊ တကာႏခိုသီးအီတွမ်ႏမေႏတေန်ꩻ ပူႏဇောႏနီဗွေႏဘုရာꩻ၊ “အထုံꩻဟဝ်-ကုသိုလ်ႏလꩻ၊ အထုံꩻဆꩻ-ကုသိုလ်ႏထွာ” တဲႏစွဉ်ႏအွိုးနဝ်ꩻကာႏ ဗꩻလွဉ်စွဉ်ႏယိုခါ၊ ကွပ်ပွိုးနဝ်ꩻမꩻ တဲင် တင်ꩻကျွစ်လာ ကပူႏဇောႏမေႏနဝ်ꩻ ပူႏဇောႏအွိုးလမ်းတဲ့နဝ်ꩻ၊ ပူႏဇောႏအွိုးကျောင်ꩻတဲ့နဝ်ꩻ၊ ပူႏဇောႏအွိုးစေႏတီႏဘုရာꩻတဲ့နဝ်ꩻ၊ ပူႏဇောႏမုဲင်ꩻကိုကိုတဲ့ယဝ်း အမူႏသꩻကို၊ အခိုသꩻဖူꩻသူꩻနဝ်ꩻ ရေႏမတ်လွေꩻဗာႏ၊ ရေႏမိုးလွေꩻဗာႏ သက်တောႏထင်ႏသျာꩻ နီဗွေႏဘုရာꩻ အဝ်ႏအွိုးလူꩻခမ်း ကျွꩻလင်ꩻလိုꩻဒုံ၊ ရေႏမတ်ဗာႏနဝ်ꩻ။ နဝ်ꩻမꩻ ကုသိုလ်ႏတဲ့လꩻ၊ အဓိပ္ပါယ်ႏတဲ့အဝ်ႏ၊ အထီတဲ့ထွူႏ၊ ကွပ်ပွိုးနဝ်ꩻမꩻ ကထွာမို့ဗုဒ္ဓဘာႏသာႏ တကာႏမူႏတကာႏခိုသီး ဖုံႏ ဘာႏသာႏလောင်ႏဘာႏသာႏလင် မဉ်ႏလွဉ်ရီစိန်ႏစွော့ꩻ၊ နဝ်ꩻမꩻ “လာလောင်ႏလာလင်နဝ်ꩻ သီတလေပ်တဝ်းမေႏဗို၊ အခိုတအီ တဝ်းမေႏတေန်ꩻ ပွိုးထမုဲင်ꩻ၊ တွိုႏတင်ꩻကျွစ်လာမꩻ သီကမာꩻဗာႏနဝ်ꩻ ပွိုးထမုဲင်ꩻ?”ဝင်ꩻမဉ်ႏရိုꩻစားနဝ်ꩻစားနဝ်ꩻ- အသက်သေႏနဝ်ꩻ ထူႏသွော့ယိုကို၊ အွဉ်ႏဒေါ့ꩻသွော့ယိုကို။ နဝ်ꩻတွော့ꩻ အဝ်ႏအွိုးတာဝတိံသာႏခမ်းကလင်ꩻနဝ်ꩻဟွဉ်ႏနဝ်ꩻ ဗျဟ္မာႏသီးဖုံႏ ကင်းလင်ꩻတွမ်ႏထီꩻခံꩻထီꩻဗွာ၊ လူꩻသီးဖုံႏတဲ့ အူလင်ꩻတွမ်ႏကွယ်ꩻဖုံႏ၊ ဒုံႏလင်ꩻတွမ်ႏတိန်ႏဖုံႏ၊ အွို-ခွုမ်တွမ်ႏဝီꩻဖုံႏတွော့ꩻ ဝင်းလင်ꩻဖေႏ နီဗွေႏဘုရာꩻ၊ နဝ်ꩻတွော့ꩻ ယိုကိုနဝ်ꩻ ဘာႏ သာႏလောင်ႏဘာႏသာႏလင်ဖုံႏ မဉ်ႏရီစိန်ႏစွော့ꩻ “သီကပင်ꩻရဟန်ꩻသံႏဃာႏ၊ သီကအီႏနာႏတရာꩻနဝ်ꩻ၊ သီကကင်းဒါႏ ထီꩻခံꩻထီဗွာ ၊ သီကဒုံႏပါတွမ်ႏယာကင်ႏ၊ သီကအွဉ်ႏသင်ႏပါတွမ်ႏမောင်းမွူးနဝ်ꩻ အပွိုးထမုဲင်ꩻ၊ အကျောင်ꩻအခရာႏ အဝ်ႏနုဲင်းမုဲင်ꩻ?”ဘာႏသာႏ လောင်ႏဘာႏသာႏလင် မဉ်ႏရီစိန်ႏစွော့ꩻ၊ မွေးတဝ်းတဲ့ ပိုပေႏဖုံႏလီꩻပေႏဖုံႏ တသေတဝ်းသား မဉ်ႏရီစိန်ႏစွော့ꩻနဝ်ꩻ ထူႏသွော့အထုံꩻနီ ဗွေႏဘုရာꩻ ကအဝ်ႏတာဝတိံသာႏလူꩻခမ်းလင်ꩻ ဗျဟ္မာႏသီးဖုံႏ ကကင်းလင်ꩻထီꩻဗွာ၊ ကထွာလူꩻသီးဖုံႏတဲ့ ကဒုံႏလင်ꩻကအူလင်ꩻ။ မဉ်ႏအွဉ်ႏနယ်အသက်သေႏ သာႏဓကယိုကို အဝ်ႏခွေါင်ခံႏဒျာႏအကျောင်ꩻ တကာႏမူႏသီးသꩻကို၊ တကာႏခိုသီး သꩻဖူꩻ၊ တောင်ꩻသေꩻခါꩻသွော့၊ မတ်သေꩻခါꩻသွော့နုဲင်းနဝ်ꩻ။

အဝ်ႏနဝ်ꩻမꩻတဲင် တွိုႏတင်ꩻကျွစ်လာ၊ တင်ꩻကျွစ်လာ အမူႏကလေပ်မေႏဗို၊ အခိုကလေပ်မေႏတေန်ꩻယိုနဝ်ꩻ ရေႏမိုးလွေꩻ ဒျာႏကုသိုလ်ႏ၊ “အထုံꩻဟဝ်ကုသိုလ်ႏလꩻ-အထုံꩻဆꩻကုသိုလ်ႏထွာ”နုဲင်းနဝ်ꩻတဲင် ဒေါ့ꩻခရာႏ၊ ဒေါ့ꩻခရာႏနယ်ꩻခရာႏ အဲဉ်ထဝ်း၊ ကွဲႏ တွော့ꩻ ယထွောင်းထွောင်း၊ ယရပ်ရပ်၊ ယဒုံဒုံ၊ ညာꩻညာꩻတဖြာꩻနဝ်ꩻ အကျောင်ꩻအခရာႏနုဲင်းယို သေတဝ်းတဲင်တွော့ꩻ မဉ်ႏတွိုႏ အမူႏလေပ်မေႏဗို၊ မဉ်ႏတွိုႏအခိုလေပ်မေႏတေန်ꩻ ဝွေꩻရိုꩻဒျာႏ “ထာꩻမွန်းခိန်ႏ-ထာꩻပျောႏခိန်ႏ”၊ စူꩻဒျာႏထာꩻပျောႏ-လောႏဒျာႏထာꩻ မွန်းတဲင် တဝန်ႏထင်ႏ-တဝန်ႏလင်ꩻ၊ အဝန်ႏလွဉ်ꩻ၊ တခူႏတခေင်ႏ၊ တလေ့ꩻတလꩻ၊ ပသိမ်းတွမ်ႏအကွဉ်ꩻခင်ႏတပင်၊ အွဉ်ႏလိုစွဉ်ႏ အကီႏ တဝဲဉ်ချာတဝဲဉ်ငါ၊ တဖြုန်းချာတဖြုန်းငါ၊ အမျိုꩻတခြဝ်တဝ်းတဲ့ခြဝ်၊ အမျိုꩻတဒေါ့ꩻတဝ်းတဲ့ဒေါ့ꩻ။ တိန်ႏထွာနုဲင်းနဝ်ꩻတဲင်တွော့ꩻ ကရိုꩻသေႏဒါႏ ဗုဒ္ဓဘာႏသာႏ တကာႏမူႏတကာႏခိုသီး အယေန်ႏကေႏသားစွိုꩻနဝ်ꩻ တိန်ႏထွား ဖုဲင်ႏမဲ့တဝ်း၊ ဖုဲင်ႏထွားတဝ်းဒွုမ်၊ နဝ်ꩻမꩻတဲင် ဝင်ꩻဘာႏသာႏလောင်ႏဘာႏသာႏလင် မဉ်ႏလွဉ်ထွားမဉ်ႏလွဉ်ထီႏတဲ့ တဖုဲင်ႏမဲ့တဖုဲင်ႏ ထွားတဝ်း၊ ခမ်းတန်သား မဉ်ႏလွဉ်ထီႏမဉ်ႏလွဉ်ထွားတဲ့ တဖုဲင်ႏမဲ့တဖုဲင်ႏထွားတဝ်း။ ကတိန်ႏထွာနုဲင်းနဝ်ꩻစားနဝ်ꩻ အဗွေႏနဝ်ꩻ ရိုꩻစွဉ်ႏအမွေးတဲ့ အနယ်ꩻမွေးတဝ်း၊ အုံသာႏသနာႏအစဲင်ႏထွား-အုံသာႏသနာႏအ နားယဲင်ꩻတဲ့ ထွာဒျာႏလိုꩻရွိုင်ꩻ၊ ထွာဒျာႏလိုꩻသူႏသေတဝ်းထာꩻ၊ ဝင်ꩻမဉ်ႏရိုꩻထဲင်းမွိုင် “ပါꩻတန်နဝ်ꩻ သူႏသေတဝ်းထာꩻတစိꩻစိꩻဟွေး၊ အခိုကမာꩻထာꩻလူႏ-အမူႏကမာꩻထာꩻတန်ꩻ နီဗွေႏဘုရာꩻထုံꩻယေန်ႏကေႏ ကဟဝ်ထာꩻ၊ တွိုႏဝွေꩻတဖြာꩻနဝ်ꩻ မွော့ထွာခေါ်ဒျာႏနုဲင်း နဝ်ꩻ၊ ပါꩻဒုံမုဲင်ꩻတန်နဲး၊ ဗွေႏဗွန်ကျောင်ꩻမုဲင်ꩻတကာႏတန်နဲး၊ ပါꩻမူႏအဖြာꩻမုဲင်ꩻလမ်းသားတန်နဲး၊ ပါꩻမုဲင်ꩻဖါတန်နဲး၊ ပါꩻမုဲင်ꩻဖါဖြားတန် နဲး”၊ ပါꩻမဉ်ႏနဲးထဲင်းစားနဝ်ꩻနဝ်ꩻ ကထွာဒါႏ ဒုံသားဆောင်ႏသားတဲ့ တရေႏတမောႏအဲဉ်ထဝ်း။

ကထွာဒါႏဗွေႏဗွန် အွိုးကျောင်ꩻတဲ့ တရေႏတမောႏအဲဉ်ထဝ်း၊ ကထွာဒါႏတကာႏမ နင်ꩻမူႏအွိုးလမ်းတဲ့ တရေႏတမောႏ အဲဉ်ထဝ်း၊ ကထွာဒါႏ အပိုအလီꩻတဲ့ တရေႏတမောႏအဲဉ်ထဝ်း၊ ကွပ်ပွိုးနဝ်ꩻမꩻတဲင် ဒုံမုဲင်ꩻတရိုꩻတဝ်း၊ ရပ်မုဲင်ꩻတရိုꩻတဝ်း လိုꩻနုဲင်းနဝ်ꩻ စား ညာꩻညာꩻတဖြာꩻ မဉ်ႏပေါႏပေါက်စိန်ႏစွော့ꩻနဝ်ꩻ ဗွေႏဗွန်တရိုꩻတဝ်း၊ ကထွာဒါႏ ဖြားဒုံတရိုꩻတဝ်း၊ ရပ်ရာႏလိုꩻတန်တရိုꩻတဝ်း၊ မော်ပညာႏသျိပညာႏသျင်ႏသီး တရိုꩻတဝ်း၊ ကထွာဒါႏ အဖူးအဝေးတရိုꩻတဝ်း အွဉ်ႏသွဉ်ဖေႏရော့ꩻရော့ꩻ၊ ဒေါ့ꩻဖေႏဟဝ်ဟဝ်တဲင်- မာꩻနုဲင်းနဝ်ꩻ တထွိုက်တဝ်းအကျောင်ꩻ၊ မာꩻနုဲင်းနဝ်ꩻ တသင်ꩻတဝ်းအကျောင်ꩻ၊ မာꩻနုဲင်းနဝ်ꩻနဝ်ꩻ ကုသိုလ်ႏတထွာတဝ်း၊ ဘာႏသာႏယေန်ႏကေႏမုꩻတမွေးတဝ်းအကျောင်ꩻ-ဒေါ့ꩻဖေႏသွော့၊ သွဉ်ဖေႏသွော့ကရိုꩻနဝ်ꩻလဲ့ ဟန်ႏဟာ ဗွေႏဗွန်မဉ်ဖေႏသတိꩻနီတ ကာႏသီးနုဲင်းနဝ်ꩻသွူ။¬¬ အဝ်ႏနဝ်ꩻထွူတွော့ꩻ ပွိုင်းဝွို့တွမ်ႏအဘိဓမ္မာႏကိစ္စ အွဉ်ႏထွူကတဲင် လွေꩻတော အမုဲင်(၂)ပဝါရဏာႏအကျောင်ꩻ။