တပြက်ꩻသာꩻခမ်းလင်သီး
အွိုးပအိုဝ်ႏအမျိုꩻသာꩻဖုံႏဟွေး- သီကထွာပအိုဝ်ႏ သီရိုႏတောဝ်းလွဝင်ꩻနောဝ်ꩻ လိုꩻမျိုꩻလင်သီး စောင်းအီလွဉ်ရိုႏသေႏဖေႏသီကောင်း ကိဉ်ꩻစာꩻစံꩻဟောဝ်ဝ်လှဲး၊ ခင်ခမ်းနောဝ်ꩻ လိုꩻအောဝ်ႏ ၃၀၀၀၀ လွိုဒျာႏ၊ စောက်ꩻတနျာႏခမ်း လိုꩻအောဝ်ႏ ၃၀၀၀၀ လွိုဒျာႏ၊ ဝိန်ꩻလွယ်ကောႏ ကန္တာရဝတီႏ၊ စောက်ꩻဗွာလဲ့ အောဝ်ႏလဲဉ်းသွူ တွမ်ႏဝင်ꩻခမ်း ကော်သူးလေးခမ်းနယ်ႏ ဝေင်ꩻဖါပွန်၊ ချင်ꩻလဲ့ ချင်ꩻခမ်းဝိသေသတွိုင်ႏ၊ မန်းလဲ့ မန်းခမ်းမွူး၊ ဖြောဝ်ꩻလဲ့ ဖြောဝ်ꩻခမ်းသျာမ ကမ္ဘောဇတွိုင်ႏ၊ ဝသီးလဲ့ ဝခမ်းနယ်ႏ၊ ရခဲင်ႏသီးလဲ့ ရခဲင်ႏခမ်း၊ သီကိဉ်ꩻစာꩻစဲင်းင်းထာꩻလှဲး၊ သီလိုꩻချင်ꩻင်ꩻ ကအောဝ်ႏနိစ္စက်ချာငါလွဝင်ꩻနောဝ်ꩻ သီဟောဝ်ဝင်ꩻသꩻဗဲင်း လိုꩻမျိုꩻလင်နော၊ သီပအိုဝ်ႏမျိုꩻယို တွမ်ႏကေဗိုန်လွဝင်ꩻ၊ အချင်ꩻင်ꩻရန်ႏသူႏချာ၊ ထာꩻဆငါမထီႏဗဲင်း၊ အယူႏမစဲင်း အတွေꩻမစွဉ်ႏ၊ အောဝ်ႏတဝဲဉ်ꩻသေႏစွဉ်ႏ နှဲးထွီႏမေး၊ ထာꩻတကေးလွဝင်ꩻတဲ့ကတန်၊ ထာꩻယူႏမာႏတဲ့ လင်ꩻတောဝ်းနမ်း၊ နေးသမ်းမ်းမဝန်ꩻထိုꩻ၊ အမျိုꩻစွိုးခွိုꩻ မိဉ်ꩻသေင်တရေႏကုဲ၊ ဂုဏ်ႏဟုဲလှဲ ထိုꩻမားခြူႏ၊ ဟောဝ်သေယူႏ သီလိုꩻချင်ꩻ၊ ဟောဝ်ရက်ဝင်ꩻပအိုဝ်ႏယာႏ၊ သီဘာႏသာႏ သီလိုꩻမျိုꩻ၊ သီစွိုးခွိုꩻ မွိုးဖါပီ၊ ဖူတွမ်ႏဖီ ပအိုဝ်ႏယာႏ၊ ဘာႏသာႏချင်ꩻ ပအူသား၊ အလားလား သီယိုလောင်ꩻ၊ သီလိုꩻပေါင်ꩻ သူသဲဉ်လွို၊ နွုတ်ꩻသဲဉ်ကို မပေါႏရိုꩻ၊ သီအမျိုꩻ ခမ်းထီပွိုင်၊ အစဲင်ႏမှဲꩻ အစောက်မှဲꩻ၊ အဖဲ့ꩻမှဲꩻ ယေးနယ်မွိုင်၊ တွမ်ႏစူနုံ ပျꩻဖေႏစံꩻ၊ နိဋ္ဌိတံ ထွူဆွူကောင်း၊ ငိမ်ꩻချံꩻရောင်း ထွာလဲဉ်းနဲ့၊ တကဲ့ပီ အဝင်ꩻဆူꩻ၊ စိက္ကူꩻလှဲး ပအိုဝ်ႏဖုံႏ၊ သီလိုꩻပြုံႏ အုပ်နက်ကို၊ ပအာယို စောက္ကာꩻသော့ꩻ၊ ပအိုဝ်ႏမော့ꩻ ထာꩻဆင်ꩻရယ်ꩻ၊ သီနယ်ႏကို ဝင်ꩻလောင်ႏတင်ႏ၊ သီခွင်ႏကို ထိုမ်ႏစီꩻပွာꩻ၊ ဆာသꩻကောင်း သီလိုꩻမျိုꩻ၊ သီအကျိုꩻ ထူႏမှဲꩻကို၊ တခီႏယို တရေင်နေး၊ တပွယ်ꩻဟွေး ခွုင်းမှဲꩻမွုန်ႏ၊ ဒေါ့ꩻအာဟွုန်ႏ ပအိုဝ်ႏရွဉ်၊ သီကွဉ်ကꩻ သီအွꩻအံႏ၊ လဲင်ꩻရံꩻကုဲ လဲင်ꩻလို့ဗွဉ်ႏ၊ သီဆွဉ်ႏပါ သီယာႏပါ၊ ထွာခန်းဝင်ꩻဗွူႏခြောဝ်ႏ၊ ယူႏတဖွောင်းမွုန်းတဝ်းထာꩻ၊ ကိဉ်ꩻစာꩻနော ပအိုဝ်ႏဖုံႏ၊ ဂုဏ်ႏယံထင်ႏ ဆင်းယံထို၊ ပအိုဝ်ႏပို နှဲးနှဲးဝင်ꩻ၊ ယံထီꩻသင်ꩻ ရက်ပဲင်ꩻမꩻ၊ နီသွꩻပေါင်ꩻ ပအိုဝ်ႏဟွေး။ ဖူးဝေးပအိုဝ်ႏဖုံႏဟွေး- သီအချင်ꩻင်ꩻ ကအောဝ်ႏနိစ္စက်လွဝင်ꩻနဝ်ꩻ အကျိုꩻငထောဝ်းနော၊ သီတွမ်ႏတခွန်ꩻမွုန်းလွဝင်ꩻထာꩻ၊ သီတွမ်ႏစိုန်မွုန်းလွဝင်ꩻ၊ အချင်ꩻင်ꩻဒွါႏ၊ ခရာႏလꩻတောဝ်း၊ မဲ့ꩻတဲင်သီပအိုဝ်ႏနံႏပါတ်ကုဲခြေင်၊ သီအချင်ꩻင်ꩻ တွမ်ႏရန်ႏသူႏမွုန်းလွဝင်ꩻ၊ သီအချင်ꩻင်ꩻ တွမ်ႏနိစ္စက်မွုန်းလွဝင်ꩻ၊ သီအချင်ꩻင်ꩻ ယံကရက်သွော့လွဝင်ꩻ နှဲးဖူးဝေးတဟို့ꩻချင်ꩻနော၊ သီမွိုးသီဖါလဲ့ ပအိုဝ်ႏနှဲးနှဲးဝင်ꩻ၊ ဘုရာꩻတရာꩻ သင်္ဃာႏ ရတနာႏမျတ်သွံပါꩻတကာႏနှဲးနှဲးဝင်ꩻ၊ သီကထင်ႏကျောင်ꩻတွင်ꩻ သီဆရာႏဗွေန် ကဖေႏသီသရဏဂုံႏ ၃-ပါꩻတွမ်ႏ သီႏလငတ်ꩻပါꩻနောဝ်ꩻ သီတနေးနာႏတောဝ်း၊ သီအီႏနာႏဒွုမ်ပါꩻမှဲꩻငေါဝ်း၊ လိုꩻတန်ကသွဉ်ဖေႏသီ ထာꩻညီႏညွတ်ရေꩻ ယေန်ႏကေႏမုꩻရေꩻ စီꩻပွာꩻရေꩻ လွောင်ႏဗူႏရေꩻ ငိမ်ꩻချံꩻရေꩻ သာႏယာႏရေꩻကစ အရေꩻအရာႏအမျိုꩻလဲ့ ဝင်ꩻကသွဉ်ဖေႏ၊ ဝင်ꩻကဟော်ꩻဖေႏသီ၊ သီသမ်းတနာႏတောဝ်း၊ သီအီႏနာႏဒွုမ်ပါꩻမှဲꩻငေါဝ်း၊ ပါꩻမှဲꩻအီႏလွဉ်ဟော်ꩻဖေႏသီ၊ သီတရက်တောဝ်းလွဝင်ꩻနောဝ်ꩻ ပါꩻမှဲꩻအီႏလွဉ်ရက်ဖေႏသီ၊ သီတွမ်ႏယူႏဖွိုꩻမွုန်းထာꩻ နှဲးလုဲꩻပေႏငွါနော၊ ရဟန်ꩻသင်္ဃာႏကဟော်ꩻဖေႏသီ အဟောဝ်မျိုꩻလွဉ်းဉ်း၊ သီတနေးနာႏလွဉ်ꩻတောဝ်း၊ သီစူꩻဒွါႏ သီသꩻမိစ္ဆာႏ၊ သီစူꩻဒွါႏ မာႏန၊ သီစူꩻဒွါႏ သီလောဘ ဒေါသ မောဟတရာꩻ၊ တွမ်ႏမာꩻမွုန်းတောဝ်း၊ ဒီဟောဝ်နေးထူႏသွော့ ဝင်ꩻကသွဉ်ဆုမ္မꩻ၊ ဝင်ꩻကဟော်ꩻတရာꩻ၊ အရပ်ပ်အဒုံဒုံ အလဲင်ႏင်အကိင်ꩻင်ꩻ၊ နီကဖေႏသတိသီယို နီတအံႏလွဉ်ꩻဗာႏတောဝ်းသီ၊ နီသညင်ꩻကရုဏာႏ မေတ္တာႏအွဉ်ႏထေ့ငါ ဖူးဝေးအာ ပအိုဝ်ႏပေါင်ꩻ၊ ယံမတ်တောင်ꩻ ယံထူႏနာႏ၊ ငေါဝ်းမေတ္တာႏ ဆုမ္မꩻသွဉ်၊ ယံတဒွဉ် မျောက်ထိုပင်ႏ၊ လောင်ꩻစောဝ်းသျင်ႏ ပအိုဝ်ႏဟွေး၊ သွတ်ꩻယိုကွေး ငေါဝ်းဆုမ္မꩻ၊ ယံထင်ႏဗꩻ အရန်းကီ၊ ရေꩻခမ်းထီ ငေါဝ်းမေတ္တာႏ၊ သဟာယ ပအူခွိုꩻ၊ သီလိုꩻစွိုꩻ ပအိုဝ်ႏနွယ်ႏ၊ ယံစယ်ႏပင်ႏ အုပ်နက်ကို၊ ပအိုဝ်ႏပို အာႏဏာႏတီႏ၊ ယံကထီႏ ဆငါခြောင်ꩻ၊ အကျောင်ꩻလံꩻ သေဗဲင်းနော၊ ယံကခေါ ပင်ႏထိုဖေႏ၊ ပအိုဝ်ႏပေႏ သင်္ဂဟ၊ ဝစန ငေါဝ်းသဲင်ခံꩻ၊ ငွါနုညံꩻ သတိပမ်း၊ ပအိုဝ်ႏခမ်း ယံတီႏကေႏ၊ တန်တွမ်ႏပေႏ ပအိုဝ်ႏဟွေး။[၁][၂][၃]