ထာꩻလူႏမျတ်တာႏအင်္ဂါႏသူပါꩻ
"ဆဠင်္ဂဒါနသုတ် (ထာꩻလူႏမျတ်တာႏ အင်္ဂါႏသူပါꩻ)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ သာဝတ္ထိခမ်း၊ ဇေႏတဝွန်ႏကျောင်ꩻကိုအတွင်ꩻ ဝေင်ꩻဝေဠုကဏ္ဍကီကို ကအဝ်ႏအုံဒါႏ နန္ဒမာႏတာႏ ဥပါႏသိကာႏမူႏတဖြာꩻနဝ်ꩻ နေးတွမ်ႏအင်္ဂါႏသူပါꩻ လူႏဗွေႏသာရိပုတ္တရာႏ၊ လူႏဗွေႏမောဂ္ဂလာန်ႏတွမ်ႏ လူႏဗွေႏသံဃာႏသီးနောဝ်ꩻသွူ။ နီဗွေႏဘုရာꩻ နေးတွမ်ႏဒိဗ္ဗစက္ခုဉာဏ်ႏ ထီႏလွေꩻတဲင် ဒေါ့ꩻနယ်ရဟန်ꩻသီးဖုံႏနုဲင်းယို- ရဟန်ꩻသီးဖုံႏဟွေး- နန္ဒမာႏတာႏ ဥပါႏသိကာႏမူႏနဝ်ꩻ နေးတွမ်ႏအင်္ဂါႏသူပါꩻ လူႏဗွေႏသာရိပုတ္တရာႏ၊ လူႏမောဂ္ဂလာန်ႏတွမ်ႏ လူႏဗွေႏသံဃာႏသီးနောဝ်ꩻသွူ။ အင်္ဂါႏသူပါꩻကိုနဝ်ꩻ အလူႏဒါႏယကာႏ အင်္ဂါႏအဝ်ႏဗာႏသွံပါꩻ၊ သွံပါꩻကရိုꩻနောဝ်ꩻ- ၁။ ဣဓ ဘိက္ခဝေ ဒါယကော ပုဗ္ဗေဝ သုမနော ဟောတိ- အလူႏဒါႏယကာႏနဝ်ꩻ ခါးလားကလူႏကာႏ သꩻရေꩻရီးဗာႏ။ ၂။ ဒဒံ စိတ္တံ ပသာဒယေ- အဝ်ႏလူႏတွင်ꩻတဲ့ သꩻရောင်းသꩻရေꩻထွာဗာႏ။ ၃။ ဒတွာ အတ္တမနော ဟောတိ- လူႏထွူခါ သꩻရောင်းသꩻရေꩻ ထွာဗာႏ။ ကောလူႏသား ဒါႏယကာႏဖဲ့ꩻနဝ်ꩻ အင်္ဂါႏအဝ်ႏဗာႏသွံပါꩻနုဲင်းနောဝ်ꩻသွူ။ ရဟန်ꩻသီးဖုံႏဟွေး- အလူႏပုဂ္ဂိုလ်ႏနဝ်ꩻတဲ့ အင်္ဂါႏအဝ်ႏဗာႏသွံပါꩻ၊ သွံပါꩻကရိုꩻနောဝ်ꩻ- ၁။ ပဋိဂ္ဂါကာ ဝီတရာဂါ ဝါ ဟောန္တိ၊ ရာဂဝိနယာယ ဝါ ပဋိပန္နာ- အလူႏခံႏပုဂ္ဂိုလ်ႏနဝ်ꩻ ရာႏဂ(လောႏဘꩻ)ကင်ꩻဗာႏ၊ မွေးတဝ်းတဲ့ ရာႏဂ(လောႏဘꩻ)ဖေႏနေးကကင်ꩻ အဝ်ႏကံကျင်ꩻဗာႏ။ ၂။ ဝီတဒေါသာ ဝါ ဟောန္တိ၊ ဒေါသဝိနယာယ ဝါ ပဋိပန္နာ- အလူႏခံႏပုဂ္ဂိုလ်ႏနဝ်ꩻ ဒေါႏသꩻကင်ꩻဗာႏ၊ မွေးတဝ်းတဲ့ ဒေါႏသꩻဖေႏနေးကကင်ꩻ အဝ်ႏကံကျင်ꩻဗာႏ။ ၃။ ဝီတမောဟာ ဝါ ဟောန္တိ၊ မောဟဝိနယာယ ဝါ ပဋိပန္နာ- အလူႏခံႏပုဂ္ဂိုလ်ႏနဝ်ꩻ မောႏဟꩻကင်ꩻဗာႏ၊ မွေးတဝ်းတဲ့ မောႏဟꩻဖေႏနေးကကင်ꩻ အဝ်ႏကံကျင်ꩻဗာႏ။ အလူႏခံႏပုဂ္ဂိုလ်ႏဖဲ့ꩻနဝ်ꩻ အင်္ဂါႏအဝ်ႏသွံပါꩻနုဲင်းနောဝ်ꩻနေနေသွူ။ ရဟန်ꩻသီးဖုံႏဟွေး- လောကကိုယို အလူႏဒါႏယကာႏနဝ်ꩻ နေးတွမ်ႏအင်္ဂါႏသွံပါꩻ (ခါးလားကလူႏသꩻရေꩻ၊ လူႏတွင်ꩻသꩻရေꩻ၊ လူႏထွူသꩻရေꩻ)နစ်နစ်သက်သက် လူႏတန်ꩻဗာႏ။ လောကကိုယို အလူႏခံႏပုဂ္ဂိုလ်ႏနဝ်ꩻ အင်္ဂါႏအဝ်ႏဗာႏသွံပါꩻ၊ နေးတွမ်ႏအင်္ဂါႏဖုံႏယိုသူပါꩻ မဉ်ႏလူႏမဉ်ႏတန်ꩻနဝ်ꩻ အကျိုꩻတန်ငါႏ၊ ဒေါ့ꩻဒါႏဒွုမ်၊ လꩻနွောင်ꩻစွဉ်ႏ လိုꩻချမ်ꩻသာႏ၊ လူꩻချမ်ꩻသာႏ၊ နိဗ္ဗာန်ႏချမ်ꩻသာႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ ဆဠင်္ဂဒါသုတ်)[၁][၂]