ထာꩻအံႏတွမ်ႏခြွိုင်ႏသန်ꩻ

"ထာꩻအံႏတွမ်ႏခြွိုင်ႏသန်ꩻရေꩻ" လိုꩻလုမ်ꩻတကာႏတဝ်း သꩻအဝ်ႏသတ္တဝါႏ လို့လို့စင်စင်၊ ပေႏပေႏတန်တန်နဝ်ꩻ တလွစ်ကင်ꩻတဝ်း တွမ်ႏအာဟာႏရ၊ နမ်းခန္ဓာႏ ပငါပရာꩻ တဉ်ႏခွေါင်ညဆွာꩻရေꩻအတာႏ အံႏသော့ꩻဖေႏဗာႏ အာဟာႏရလွဉ်းလွဉ်းသွူ။ ကအံႏသော့ꩻဖေႏဗာႏ အာဟာႏရယို သတ္တဝါႏ တမျိုꩻတွမ်ႏတမျိုꩻ တဗွိုန်တဝ်းလွဝင်ꩻ၊ ယဟန်ႏနဝ်ꩻ အံႏဒျာႏသေင်ႏလာႏဝါႏလာႏ၊ မီꩻဖုံႏ၊ ထာꩻအီႏဖုံႏခြေင်ခြေင်၊ ယဟန်ႏနဝ်ꩻ အံႏဒျာႏဝင်ꩻသွီႏဝင်ꩻယာႏခြေင်ခြေင်၊ ယဟန်ႏနဝ်ꩻ ရော့ꩻရာꩻသင်ꩻရာꩻ အစွိုးစွိုး အမျိုꩻမျိုꩻ အံႏလို့ဒျာႏသွူ။

တိရစ္ဆာန်ႏယဟန်ႏနဝ်ꩻ နွောင်ꩻရာꩻထိုမ်ႏအံႏစွဉ်ႏ ဝင်ꩻသွီႏဝင်ꩻယာႏတွော့ꩻ ထီႏထီႏဒျာႏ တိရစ္ဆာန်ႏအံႏနွောင်ꩻလွဝင်ꩻနုဲင်းယိုနဝ်ꩻ သံႏဝွေႏဂ လꩻခရာႏဟဝ်ငါႏသွူ။ လိုꩻနဝ်ꩻ ပါသော့ꩻရော့ꩻရာꩻအံႏ သတ္တဝါႏမျိုꩻကိုသွူ။ လိုꩻသီး အသွီႏဇာႏတိ အသꩻဇာႏတိနဝ်ꩻ အံႏဟန်ႏသဉ်ဟန်ႏလာႏခြေင်ခြေင် အဝ်ႏလꩻဒျာႏလဲ့ သံးမက်သံးကျွိုက်ငါႏ ဝင်ꩻသွီႏယာႏသွူ။ တိရစ္ဆာန်ႏချင်ꩻချင်ꩻ ကအံႏလွ ဝင်ꩻယာႏယိုနဝ်ꩻ တိရစ္ဆာန်ႏတဲင် သေဗော့ꩻ မဲဉ်အံႏတစွိုးလုမ်ꩻ၊ ကုသိုလ်ႏ အကုသိုလ်ႏ၊ အဟဝ်အကုဲင်၊ အကျိုꩻအကျောင်ꩻတရာꩻမျိုꩻယို ဝွေꩻသီးတသေတဝ်းတွော့ꩻ တိရစ္ဆာန်ႏကအံႏဝင်ꩻယာႏနဝ်ꩻ မွိုက်ငါႏရွိုင်ꩻငါႏ နုဲင်းနဝ်ꩻလဲ့ ရိုꩻတလꩻတဝ်းသွူ။ တိရစ္ဆာန်ႏကအံႏဝင်ꩻယာႏယို မီႏရိုꩻအမွိုက်အရွိုင်ꩻနဝ်ꩻ တမွိုက်ထွꩻ တရွိင်ꩻထွꩻတဝ်းဒွိုန်း လိုꩻသွူ။ ပွိုးနုဲင်းမုဲင်ꩻနဲးတဲင် လိုꩻကရိုꩻဒါႏ သတ္တဝါႏယိုနဝ်ꩻ အဟဝ်အကုဲင်၊ အကျိုꩻအကျောင်ꩻ၊ ကုသိုလ်ႏအကုသိုလ်ႏ-စတဲင် သဘာဝတရာꩻဖုံႏယို အဝ်ႏသေလို့လို့ဒျာႏလဲ့ သမ်းအဝ်ႏမွိုက်နုဲင်းဒျာႏ တိရစ္ဆာန်ႏတဲင် ရိုꩻဗာႏမွိုက်လဲဉ်း တိရစ္ဆာန်ႏနဝ်ꩻသွူ။ နုဲင်းမုဲင်ꩻခန်းတယဝ်းဟုဲင်း လိုꩻတွမ်ႏတိရစ္ဆာန်ႏယို ပါꩻမုဲင်ꩻမွိုက်လွိုခရာႏနဝ်ꩻ အွဉ်ႏထွူဒွိုန်း တခွိုင်းယို။ ယိုနဝ်ꩻ အီႏတဲမ်ႏသွုပ်လွေꩻယင်း သတ္တဝါႏသီး အံႏဗာႏအာဟာႏရ အကျောင်ꩻခရာႏသွူ။

သꩻအဝ်ႏသတ္တဝါႏသီး နမ်းခန္ဓာႏယို အဘိဓမ္မာႏနယ်ꩻအလꩻ မီႏခွယ်ꩻလွေꩻဗာႏ အအဲဉ်ႏသွတ်ꩻနဝ်ꩻ ပထဝီ၊ အာပေါ၊ တေဇော၊ ဝါယော အဝ်ႏမဟာဘုတ် ဓာတ်တန်လစ်ꩻပါꩻယိုလုမ်ꩻသွူ။ ကမ္ဘာႏအခဝ်တွို့ꩻ(အနောက်တိုင်း) တသီႏပညာႏနယ်ꩻအလꩻ သꩻအဝ်ႏသတ္တဝါႏသီး နမ်းခန္ဓာႏယိုနဝ်ꩻ ဗီတာမေန်ဓာတ် သတ္တုဓာတ်ဖုံႏ ပေါင်ꩻစပ်အဝ်ႏညီꩻ အဝ်ႏစုလွဝင်ꩻသွူ။ သꩻအဝ်ႏသတ္တဝါႏ နမ်းခန္ဓာႏယိုနဝ်ꩻ ဓာတ်အမျိုꩻမျိုꩻ (ကလပ်စည်း)ယို အဝ်ႏလို့ အဝ်ႏကုဲင်ထို့တသေႏသေႏအတွိုင်ꩻ ကလာပ်စည်းတသာလဲ့ အဝ်ႏပေါႏအဝ်ႏထွာသော့ꩻ တသေႏသေႏနေနေသွူ။ ကလာပ်စည်းတသာဖုံႏ ကအဝ်ႏပေါႏ ကအဝ်ႏထွာနွောင်ꩻယိုနဝ်ꩻ သꩻအဝ်ႏသတ္တဝါႏသီးဖုံႏ ကွပ်အဝ်ႏအံႏသော့ꩻ အာဟာႏရ ပငါပရာꩻနဝ်ꩻမꩻသွူ။ ကအံႏသော့ꩻ အာဟာႏရ ပငါပရာꩻယိုနဝ်ꩻ သတ္တဝါႏအမျိုꩻမုဲင်ꩻ အံႏဗာႏအာဟာရနုဲင်းမုဲင်ꩻကရိုꩻနဝ်ꩻ အဝ်ႏသေဒျာႏဖုံႏသွူ။ ထာꩻသောင်ꩻထာꩻသား ယူးဝါးတိရစ္ဆာန်ႏဖုံႏနဝ်ꩻ အာဟာႏရ လိုမ်းကိုမ်ႏတဝ်းတဲင် ခြွိုင်ႏသန်ꩻရေꩻကုဲင်ထိုꩻ၊ အာဟာရလိုမ်းကိုမ်ႏတဝ်းတဲင် ထွာရောႏဂါႏတစွိုးစွိုး တမျိုꩻမျိုꩻတွော့ꩻ သီတခြို သီတရတ်ထိုꩻနဝ်ꩻ အဝ်ႏကြွို့ꩻတဝ်း၊ ဆေ့ꩻခြေားလုမ်ꩻ ရိုꩻဗာႏနုဲင်းနဝ်ꩻသွူ။ သတ္တဝါႏအမျိုꩻမျိုꩻအကို ထာꩻသေတရာꩻ အအာသွတ်ꩻလိုꩻသီးယိုနဝ်ꩻ ဝင်ꩻသꩻဝင်ꩻသက်လဲ့နဝ်ꩻ၊ အဒီႏအရာႏ အလာႏအစော့ꩻမျိုꩻလဲ့နဝ်ꩻ အံႏလို့အံႏစင်တဲင် ပွိုင်းဝွို့တွမ်ႏ ထာꩻအံႏတစွိုးယိုလဲ့ ယပ်ꩻလွဉ်ဗာႏ၊ ဒုက္ခဆင်ꩻရယ်ꩻလွဉ်ꩻဗာႏတွော့ꩻ ဘုရာꩻဟောꩻခါꩻ ဒုက္ခသစ္စာႏတမျိုꩻနေနေသွူ။

လိုꩻသီး ကအံႏအွꩻဒါႏ အာဟာႏရ အနမ်းသား အထီသားဖုံႏယိုနဝ်ꩻ ယဟန်ႏလဲ့ လိုႏအပ်မွေးတွော့ꩻ နေးတွမ်ႏသတိပဋ္ဌာန်ႏ မတ်တရာꩻတဲင် အံႏသော့ꩻလဲ့ အဝ်ႏ၊ ယဟန်ႏနဝ်ꩻ စူꩻဖြေꩻအရသာႏ၊ စူꩻဖြောင်းတဏှာႏတဲင် တလိုႏအပ်ငါႏတဝ်းလဲ့ ပျောႏရာꩻအံႏဒျာႏနုဲင်းနဝ်ꩻလဲ့ အဝ်ႏသွူ။ အာဟာႏရယိုနဝ်ꩻ တလိုႏအပ်ငါႏတဝ်းလဲ့ စူꩻဖြောင်းစူꩻဖြေꩻ အရသာႏတွော့ꩻ အံႏသော့ꩻလဲ့နဝ်ꩻ၊ လိုႏအပ်မွေးတွော့ꩻ အံႏသော့ꩻလဲ့နဝ်ꩻ ပွိုင်းဝွို့တွမ်ႏအရသာႏယို လို့ရွဉ်လွဉ်းလွဉ်းတဲင် အဗွေႏယပ်ꩻလွဉ်ꩻဗာႏ၊ ဒုက္ခလွဉ်ꩻဗာႏလွဉ်းလွဉ်းသွူ။ နီနမ်းခန္ဓာႏအတာႏ ကလိုႏအပ်ဒါႏ အာဟာႏရမျိုꩻဖုံႏ၊ ဓာတ်အမျိုꩻမျိုꩻဖုံႏယို မီႏအံႏသော့ꩻဖေႏဗာႏနဝ်ꩻမꩻ ထွာလိုꩻခြွိုင်ႏသန်ꩻရေꩻဟဝ်၊ ထွာလိုꩻဓာတ်ဗွေ အာႏဗွေတဖြာꩻသွူ။ နဝ်ꩻတွော့ꩻ ပွိုင်းဝွို့တွမ်ႏ အာဟာႏရခရာႏယို နီလိုꩻသီး အဝ်ႏလိုႏသေနာႏဝင်ꩻ ပငါပရာꩻသွူ။ ဖေႏကသေနာႏနဝ်ꩻ လိုႏကျိုꩻစာꩻဝင်ꩻ ပငါပရာꩻသွူ။ မီႏသေနာႏသွူတဲ့ "ခွေယို လိုႏအပ် ဗီတာမေန်အမျိုꩻမုဲင်ꩻ၊ သတ္တုဓာတ်အမျိုꩻမုဲင်ꩻ"စဉ်ꩻစာꩻယူႏသွူတဲင် ကလိုႏအပ်ဒါႏဓာတ်မျိုꩻ၊ အာဟာႏရမျိုꩻယို အံႏသော့ꩻဖေႏဗာႏသွူ။ လိုꩻသီးယိုနဝ်ꩻ "အစာလည်းဆေး၊ ဆေးလည်းအစာ"ကရိုꩻဒါႏ မန်းငဝ်းအတွိုင်ꩻ နီကအံႏဒါႏ အာဟာႏရယို ဖေႏကထွာတသီႏ၊ ဖေႏကရဲးကာႏကွယ်ႏနွောင်ꩻအီ ရောႏဂါႏတမျိုꩻမျိုꩻတစွိုးစွိုး၊ နမ်းလောင်းရောႏဂါႏ မီႏအဝ်ႏထွာလဲဉ်းလဲ့ ဖေႏကဟဝ်၊ ဖေႏကရေꩻနွောင်ꩻအီနဝ်ꩻ အဝ်ႏလိုႏလွိုက်ဒါႏ၊ အဝ်ႏလိုႏအံႏဒါႏသွူ။ လိုꩻဆာထာꩻထွူဖုံႏ၊ လိုꩻဖြားဖုံႏယဟန်ႏနဝ်ꩻ အာဟာႏရခြေင်ခြေင်လုမ်ꩻနဝ်ꩻ ကလိုႏအပ်ဒါႏ ဓာတ်အမျိုꩻမျိုꩻယို တလိုမ်းကိုမ်ႏလꩻတဝ်းတဲင် အံႏဗာႏပါ၊ ဆဲ့ꩻဗာႏပါနေး တသီႏဖုံႏသွူ။

လိုꩻယဟန်ႏနဝ်ꩻ ရွဉ်လဲ့တအဲဉ်ထဝ်း၊ သေလဲ့ တသေတဝ်း အာဟာႏရခရာႏတဲင် အံႏဗာႏတဝ်းတွော့ꩻ ခြွိုင်ႏသန်ꩻရေꩻဟဝ်တဝ်း၊ လိုꩻယဟန်ႏနဝ်ꩻ အဝ်ႏသေဒျာႏ အာဟာႏရအကျောင်ꩻ၊ အဝ်ႏသေဒျာႏတသီႏလဲ့ ရွဉ်အဲဉ်ထဝ်း၊ အံႏနွောင်ꩻတဝ်းတွော့ꩻ ခြွိုင်ႏသန်ꩻရေꩻဟဝ်တဝ်း၊ လိုꩻယဟန်ႏနဝ်ꩻ ရွဉ်အဝ်ႏဒျာႏ၊ အံႏနွောင်ꩻဒျာႏလဲ့ သေတဝ်း အာဟာႏရအကျောင်ꩻ၊ သေတဝ်းတသီႏတွော့ꩻ အံႏဗာႏတဝ်းတဲင် ခြွိုင်ႏသန်ꩻရေꩻဟဝ်တဝ်း၊ လိုꩻယဟန်ႏနဝ်ꩻ အာဟာႏရအကျောင်ꩻလဲ့သေ၊ တသီႏလဲ့သေ၊ ရွဉ်လဲ့အဝ်ႏ၊ ဖြေꩻအံႏလဲ့နွောင်ꩻ၊ အံႏဗာႏသေႏသေႏ၊ အံႏဗာႏပွုံႏမဲဉ်ႏ၊ အံႏဗာႏလိုမ်းလိုမ်းကိုမ်ႏကိုမ်ႏတွော့ꩻ ခြွိုင်ႏသန်ꩻရေꩻဟဝ်သွူ။ ကမ္ဘာႏလောင်းယိုခါ ခွန်ဟဝ်အုပ်ချွုတ် နေင်ႏပေါင်ꩻအာတွော့ꩻ ကခြွေခြာႏချံꩻသာႏဒါႏ ခမ်းထီဖုံႏနဝ်ꩻ သွဉ်ဗာႏဟဝ်ပညာႏတဲင် အာဟာႏရအကျောင်ꩻခရာႏလဲ့သေ၊ အံႏလဲ့အံႏနွောင်ꩻတွော့ꩻ ထွာစွဉ်ႏလိုꩻခြွိုင်ႏသန်ꩻဟဝ်၊ ထွာစွဉ်ႏလိုꩻသက်ဆွာꩻ၊ ထွာစွဉ်ႏလိုꩻယောင်ꩻရေꩻဖုံႏ ကဲဉ်းအာအာသွူ။ နီမန်းခမ်းနဝ်ꩻ ခွန်တဟဝ်တဝ်း အုပ်ချွုတ်နေင်ႏပေါင်ꩻအာတဲင် ထွာခမ်းခြေားခမ်းကေန်ꩻ၊ သွဉ်ဗာႏဟဝ်တဝ်းပညာႏ၊ ကွပ်ပညာႏဆေ့ꩻတွော့ꩻ သေတဝ်းအာဟာႏရအကျောင်ꩻ၊ အံႏဗာႏဟဝ်တဝ်း အာဟာႏရ၊ အံႏဗာႏဟဝ်တဝ်းတသီႏတွော့ꩻ ထွာစွဉ်ႏလိုꩻတကုဲင်၊ လိုꩻသက်ဒွေါင်ႏ ကဲဉ်းအာအာသွူ။ အာဟာႏရကရိုꩻယိုနဝ်ꩻ အံႏတဝ်းလဲ့ တလꩻတဝ်း၊ တတဲ့ꩻတဝ်းအမျိုꩻယို အံႏသော့ꩻလဲ့ တလꩻတဝ်း၊ အဝ်ႏတဲ့ꩻဒျာႏလဲ့ လွိုအခန်ꩻတွိုင်ꩻ အံႏလွဉ်ꩻအံႏအာလွဉ်ꩻငါႏလဲ့ တလꩻတဝ်း၊ အံႏဗာႏအမျိုꩻတဲ့ꩻတဲ့ꩻခဝ်းခဝ်း၊ အံႏဗာႏအခန်ꩻတွိုင်ꩻမဲဉ်ႏမဲဉ်ႏသွူ။

နီမန်းခမ်းယိုနဝ်ꩻ ကွပ်ပွိုးအာဟာႏရ ဗဟုသုတထာꩻသေဆေ့ꩻတဲင် တတဲ့ꩻတဝ်းအမျိုꩻယို သမ်းအံႏ၊ အဝ်ႏတဲ့ꩻဒျာႏလဲ့ သမ်းအံႏလွဉ်ꩻ သမ်းအံႏအာငါႏတဲင် ထွာဝွေႏဒနာႏရောႏဂါႏ တစွိုးစွိုး တမျိုꩻမျိုꩻတွော့ꩻ ဒုက္ခလွဉ်ꩻဗာႏ၊ ရွဉ်လို့လွဉ်ꩻဗာႏ၊ သီလွဉ်ꩻဗာႏနဝ်ꩻ ခေတ်ယိုခါ အဝ်ႏအာတန်သွူ။ ဥပမာႏ- တတဲ့ꩻတဝ်း အာဟာႏရမျိုꩻယို ကွပ်အံႏတဲင် သွီႏတိုꩻထင်ႏလွဉ်ꩻ လေဖျတ်တွော့ꩻ သီတကွို့ꩻ သီတခဝ် သီနမ်းတဗာႏလုမ်းထာꩻနဝ်ꩻ ဟွိုန်အာငါႏသွူ။ တတဲ့ꩻတဝ်း နီနမ်းခန္ဓာႏ၊ တခဝ်းနွောင်ꩻတဝ်းဒဝ်ဖုံႏ၊ ဘီယာဖုံႏယိုလဲ့ အွꩻအာအွꩻလွဉ်ꩻ တလꩻတဝ်း၊ ထွာဝွေႏဒနာႏ သက်ဒွေါင်ႏအီ အကျောင်ꩻတရာꩻနေနေသွူ။ ကွပ်နဝ်ꩻမꩻ ခေတ်ယိုခါ ကခြွေခြာႏချံꩻသာႏဒါႏ ခမ်းထီ၊ ပညာႏထာꩻသေကအာ ကတန်ဒါႏ ခမ်းထီလိုꩻမျိုꩻနဝ်ꩻ ဝင်ꩻအုံအဝ်ႏဒါႏ၊ ဝင်ꩻအံႏအွꩻဒါႏတဲင် ဝင်ꩻလိုꩻမျိုꩻ တိုꩻတက်ထွန်ꩻကာꩻ ယိန်းခြွေခြွေခြာႏခြာႏ၊ ယိန်းချံꩻသာႏမွေးစွဉ်ႏထာꩻသွူ။ နီမန်းခမ်းယိုခါနဝ်ꩻ ပွိုင်းဝွို့တွမ်ႏ ခြွိုင်ႏသန်ꩻရေꩻယို ကမ္ဘာႏတကီနဝ်ꩻ လဲဉ်းဝင်ꩻဆꩻချာ၊ ထဲ့ဖွိုႏလဲဉ်းဝင်ꩻအာတန်လဲ့ ကသေနာႏဒါႏ အာဟာႏရအကျောင်ꩻသား၊ ကသေနာႏဒါႏ တသီႏသား၊ အံႏလဲ့နွောင်ꩻသားဖုံႏနဝ်ꩻ အဝ်ႏလိုႏလွောက်ꩻနာႏကျင်ꩻသုံꩻ၊ အဝ်ႏလိုႏအံႏအွꩻလွဉ်ꩻငါႏအကျောင်ꩻ။ နီစွိုးခွိုꩻပအိုဝ်ႏ ခြွိုင်ႏသန်ꩻရေꩻတာႏ တဲမ်းနယ်ခြုဲင်းနယ်ဗာႏ "ထာꩻအံႏတွမ်ႏခြွိုင်ႏသန်ꩻရေꩻ"အကျောင်ꩻအခရာႏနုဲင်းယိုသွူ။ ကွပ်ပွိုးဟောꩻဗာႏလိတ်ယိုတဲင် ခြွေခြာႏချံꩻသာႏလွသွော့ဝင်ꩻနေား။