ထိန်ꩻတဝ်းသꩻကွိုꩻလꩻတဝ်း
"အရက္ခိတသုတ် (ပေါႏထိန်ꩻတောဝ်းသꩻ အာႏကွိုꩻလꩻတောဝ်း)"
အွိုးခꩻတလဲင်ႏ- ကျောင်ꩻတကာႏ အနာႏထပိဏ်ႏသဌေꩻ ထင်ႏထေ့ဗွေႏဘုရာꩻ၊ ဗွေႏဘုရာꩻဟော်ꩻဖေႏတရာꩻနုဲင်းယို- "ကျောင်ꩻတကာႏ- ပေါႏတထိန်ꩻလꩻလꩻတဝ်းသꩻနဝ်ꩻ တွမ်ႏတထိန်ꩻတဝ်းနမ်း (တွမ်ႏတထိန်ꩻတဝ်း ကာယကံႏ)နဝ်ꩻ ဗွန်ဝင်ꩻ၊ ပေါႏတထိန်ꩻလꩻလꩻတဝ်းသꩻနဝ်ꩻ တွမ်ႏတထိန်ꩻတဝ်းဖြောင်း (တွမ်ႏတထိန်ꩻတဝ်း ဝစီꩻကံႏ)နဝ်ꩻ ပီဝင်ꩻ၊ ပေါႏတထိန်ꩻလꩻလꩻတဝ်းသꩻနဝ်ꩻ (တွမ်ႏတထိန်ꩻတဝ်း မနော်ꩻကံႏ)နဝ်ꩻ ဗွန်ပီဝင်ꩻ။ ပေါႏတထိန်ꩻတဝ်း နမ်း(ကာယကံႏ)၊ ဖြောင်း (ဝစီꩻကံႏ)၊ သꩻ(မနော်ꩻကံႏ)နဝ်ꩻ ထွာဒျာႏအကုသိုလ်ႏ ကာယကံႏ၊ ထွာဒျာႏအကုသိုလ်ႏ ဝစီꩻကံႏ၊ ထွာဒျာႏအကုသိုလ်ႏ မနော်ꩻကံႏ၊ အကုသိုလ်ႏကံႏ ကအဝ်ႏဒါႏလိုꩻနဝ်ꩻ မဉ်ႏသီတနီꩻခါ တထွာတဝ်း ထာꩻသီဟောဝ်၊ တတွိုႏနွောင်ꩻတဝ်း ဘဝဟောဝ်၊ တွိုႏလွေꩻတော ဘွုံႏဘဝကုဲင်နောဝ်ꩻသွူ။ ဥပမာႏ- လမ်းတဗာႏနဝ်ꩻ ပေါႏတသꩻခါꩻဟောဝ်ဟောဝ်တဝ်း၊ ပေါႏအသꩻတထွူꩻတဝ်းနဝ်ꩻ ခမ်းရီႏလꩻ၊ ပေါႏခမ်းရီႏလꩻတဲ့ ထာꩻဆေင်ႏတဲ့စောဝ်ႏ၊ အဒါတဲ့စောဝ်ႏ၊ တခြိုꩻတဲ့စောဝ်ႏ၊ ပေါႏအွဉ်ႏစောဝ်ႏစွူစွူဗော့ꩻနုဲင်းနဝ်ꩻနဝ်ꩻ ကွဲညညတွော့ꩻ ထာꩻဆေင်ႏဖြင်း၊ အဒါဖြင်း၊ တခြိုꩻဖြင်း၊ ပေါႏအဖြင်းသွူတဲ့ တထွာတောဝ်းဒွုမ်အဟောဝ်၊ ထွာထိုꩻတော အကုဲင်နောဝ်ꩻသွူ။ ကျောင်ꩻတကာႏ အနာႏထပိဏ်ႏသဌေꩻဟွေး- ပေါႏထိန်ꩻလꩻလꩻသꩻနဝ်ꩻ တွမ်ႏကထိန်ꩻဟောဝ်ဟောဝ်နမ်း (တွမ်ႏကထိန်ꩻဒါႏဒါႏ ကာယကံႏ)နဝ်ꩻ ဗွန်ဝင်ꩻ၊ ပေါႏထိန်ꩻလꩻလꩻသꩻနဝ်ꩻ တွမ်ႏကထိန်ꩻဟောဝ်ဟောဝ်ဖြောင်း (တွမ်ႏကထိန်ꩻဒါႏဒါႏ ဝစီꩻကံႏ)နဝ်ꩻ ပီဝင်ꩻ၊ ပေါႏထိန်ꩻလꩻလꩻသꩻနဝ်ꩻ တွမ်ႏကထိန်ꩻဟောဝ်ဟောဝ်သꩻ (တွမ်ႏကထိန်ꩻဒါႏဒါႏ မနော်ꩻကံႏ)နဝ်ꩻ ဗွန်ပီဝင်ꩻ။ ပေါႏထိန်ꩻဟောဝ်ဟောဝ်နမ်း (ပေါႏထိန်ꩻဒါႏဒါႏ ကာယကံႏ)၊ ပေါႏထိန်ꩻဟောဝ်ဟောဝ်ဖြောင်း (ပေါႏထိန်ꩻဒါႏဒါႏ ဝစီꩻကံႏ)၊ ပေါႏထိန်ꩻဟောဝ်ဟောဝ်သꩻ (ပေါႏထိန်ꩻဒါႏဒါႏ မနော်ꩻကံႏ)နဝ်ꩻ ထွာဒျာႏကုသိုလ်ႏကာယကံႏ၊ ထွာဒျာႏကုသိုလ်ႏ ဝစီꩻကံႏ၊ ထွာဒျာႏကုသိုလ်ႏမနော်ꩻကံႏ၊ ကုသိုလ်ႏကံႏ ကအဝ်ႏဒါႏလိုꩻနောဝ်ꩻ မဉ်ႏသီတနီꩻခါ ထွာဒျာႏထာꩻသီဟောဝ်၊ တွိုႏလွေꩻဒျာႏ ဘွုံႏဘဝဟောဝ်၊ တတွိုႏနွောင်ꩻတောဝ်း ဘွုံႏဘဝကုဲင်နောဝ်ꩻသွူ။ ဥပမာႏ- လမ်းတဗာႏနဝ်ꩻ သꩻခါꩻဟောဝ်ဟောဝ်တဲင် အသꩻထွူꩻထွူꩻတွော့ꩻ ခမ်းရီႏလꩻတဝ်း၊ ပေါႏခမ်းရီႏလꩻတဝ်းနဝ်ꩻ အဆေင်ႏစောဝ်ႏတဝ်း၊ အဒါစောဝ်ႏတဝ်း၊ တခြိုꩻစောဝ်ႏတဝ်း၊ ပေါႏအဆေင်ႏစောဝ်ႏတဝ်းတဲ့ အဆေင်ႏဖြင်းတဝ်း၊ ပေါႏအဒါစောဝ်ႏတဝ်းတဲ့ အဒါဖြင်းတဝ်း၊ ပေါႏတခြိုꩻစောဝ်းတဝ်းတဲ့ တခြိုꩻဖြင်းတဝ်း၊ ထွာဒျာႏ အဆေင်ႏဟောဝ်၊ ထွာဒျာႏအဒါဟောဝ်၊ ထွာဒျာႏတခြိုꩻဟောဝ်၊ ထွာတဝ်းအကုဲင်ဖုံႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ အရက္ခိတသုတ်)[၁][၂]