ထိန်ꩻသိမ်ꩻသွော့နီအမွီႏဟဝ်လီꩻ

ခေတ်ကာႏလအပြောင်ꩻလုဲင်ႏခါႏကို နီနာꩻခမ်းရင်ꩻသား စီꩻပွာꩻရေꩻ၊ လိုꩻမုရေꩻ၊ ပညာႏရေꩻ၊ ခြိုင်ႏသန်ꩻရေꩻ၊ ခမ်းထီရေꩻ စတဲင်အရေꩻမျိုꩻစွုမ်ႏဖုံႏလဲ့ ဆေꩻ့တွမ်ႏအာ ပြောင်ꩻလုဲင်ႏမုတခူႏတခဝ် အဝ်ႏနေနေသွူ။ နဝ်ꩻအကို ပြောင်ꩻလုဲင်ႏမုအဟဝ်လဲ့ပါ၊ အကုဲင်လဲ့ရော်ꩻနေနေသွူ။ ခေတ်ယိုတဗာႏနဝ်ꩻ မိဉ်ႏလွောက်ꩻလွဉ်ꩻအုံဒါႏတဲꩻ တိုꩻတက်မွိုင်၊ မိဉ်ႏလွောက်ꩻလွဉ်ꩻငါႏလဲꩻ ထဲ့ပြင်ꩻထိုꩻမားဒါႏသွူꩻ။ အပြောင်ꩻလုဲင်ႏခါႏကို အကာယားဒါႏနီထွုံꩻစံႏ နီယိုꩻယာႏဖုံႏလဲ့ အဝ်ႏအာတန်သနယ်ဩ။ ယိုခါနဝ်ꩻ လိုꩻပေႏဒုံႏဒါႏတဝ်း တိန်ႏ နဝ်ꩻကဲဉ်းဆေ့ꩻဆေ့ꩻ လိုꩻပေႏ ဒုံႏဒါႏတဝ်း ထုံမောင်းနဝ်ꩻကဲဉ်းအာအာ သနယ်ဩ။ သဲစ်ကလွေꩻဒါႏစထာꩻတဲင် ပွစ်ဒါႏလဲဉ်း ဖုံး (phone )ဖုံႏသွူ။  ရဲဉ်ꩻသွမ်ꩻတောႏဖုံႏလဲ့ ငဝ်းကဲငဝ်း ဖေ့ယေန် ထွားစွဉ်ႏဒျာႏ ဖုံး ဖုံႏခြေင်ခြေင်သွူ။ ဖုံး ယိုလဲꩻ ခေတ်ယိုတဗာႏအလꩻ အုံအဝ်ႏရေꩻ၊ သွုပ်သံႏရေꩻ၊ စီꩻပွာꩻရေꩻ စတဲင်အရေꩻမျိုꩻအာဖုံႏတာႏ အဝ်ႏလိုႏနေနေသွူ။ ကွဲးတွော့ꩻတဲင် ယဟန်ႏသားနဝ်ꩻ သွုံꩻဒါႏတဝ်း လမ်းပါႏအရေꩻကုဲင်၊ သွꩻသဟာႏလဲ့သွုမ်ꩻ၊ တမာဝါꩻအွဉ်ႏကုဲင်အီဝင်ꩻတဲꩻအဝ်ႏဗော်ႏထာꩻသနယ်ဩ။

ကွပ်နဝ်ꩻမတဲင် တွမ်ႏသတိꩻတရာꩻတဲင် နီနာꩻသီးဖုံႏ အဝ်ႏလိုႏကျင်ꩻသွုံꩻလွဉ်ꩻနဝ်ꩻသွူ။ ခေတ်အလꩻလဲ့ အဝ်ႏလိုႏထူႏသွုံꩻ တခဝ်နဝ်ꩻ ဖေႏကခွိုင်းမွုန်း နီထွုံꩻစံႏယိုꩻယာႏလဲ့ အဝ်ႏလိုႏထိန်ꩻသိမ်ꩻသနယ်ဩ။ ထဲင်းတမျိုꩻနဝ်ꩻ နီသွဉ်းသီးထာꩻယူႏလီꩻအကိုလဲ့ အဝ်ႏလိုႏပယ်ႏခွါႏ အဝ်ႏလိုႏထူႏသွုံꩻတဝ်းဒွုမ်ဖုံႏသွူ။ ဥပမာႏ လိုꩻသီဒုံထန်ႏဟဝ်အီနွို့တဝ်းဒုံကိုဖုံႏ(ဖိုး ပနားသီ သမ်းအဝ်ႏယားသဲင်ꩻ)၊ ပါတွမ်ႏ ထွာတစွိုးတမျိုꩻတဲꩻ ယွူးပါꩻယိုပါꩻနဝ်ꩻမာꩻစတဲင်နဝ်ꩻစားဖုံႏနဝ်ꩻသနယ်ဩ။ နဝ်ꩻမꩻတဲင် ခေတ်ယိုတဲꩻဖေႏကခြေင်းနွောင်ꩻ နီယေန်ႏငဲထွုံꩻစံႏတဲ့ အဝ်ႏလိုႏထွို့ꩻစွီႏ လွေꩻလွဉ်ꩻပါနေနေသနယ်ဩ။ တဒုံတွမ်ႏတဒုံ တရပ်တွမ်ႏတရပ် လွောင်ႏဗူႏမုအွဉ်ႏအထျꩻတဲင် နေႏတွမ်ႏအဖျင်တရာꩻ အဝ်ႏလိုႏ တွိုင်ႏပင်ႏအုံကွံခွိုꩻခွိုꩻငါႏဝင်ꩻသနယ်ဩ။ နီနာꩻလိုꩻမျန်မာခမ်းသားနဝ်ꩻ ကိဉ်းအာ ခံႏနွောင်ꩻတဝ်း ဝင်ꩻဝွေႏဖန်ႏသနယ်။

  တဒုံတွမ်ႏတဒုံ တဖြာꩻတွမ်ႏတဖြာꩻ မိဉ်ႏသေသွဉ်ဖေႏလွဝင်ꩻနဝ်ꩻ ဟဝ်ငါႏအမဲဉ်ႏဩ။ လိုꩻပေႏပိုလီအစွုပ်ဆုဲင်ꩻယို လိုꩻဖြားစခါသီး မိဉ်ႏဒေါ့ꩻသွဉ် ရိုꩻဒျာႏလိုꩻဖြားဗော့ဗဲ့၊ လိုꩻဖြားမိဉ်ႏဖေႏအနယ်ꩻ ရိုꩻဒျာႏ လိုꩻဖြားဒါႏတဝ်းလိတ် နဝ်ꩻစားဖုံႏသွူ။ ယိုနဝ်ꩻဟဝ်ထွာတဝ်းဩ။ နီသွဉ်းသီးနဝ်ꩻ ထီႏသေလိတ်ကိုကဲဉ်းအာ လိုꩻဖြားစခါနဝ်ꩻ နမ်းခွဲးကျုံႏ အာနဝ်ꩻသွူ။ နီလိတ်ကိုထာꩻထီႏတွမ်ႏ လိုꩻဖြားသီးနမ်းကျုံႏမိဉ်ႏပေါင်ꩻဆွုက်လွဝင်ꩻနဝ်ꩻ အီႏထွာအီ ထင်ႏထိုမုꩻအတန်တဗာႏအကျောင်ꩻ ဒင်ႏဆွိုက်ထွူတဲင် ထိန်ꩻသိမ်ꩻသွော့ဝင်ꩻ နီသွဉ်းသီးအမွီႏဟဝ်လီꩻတွမ်ႏ နီဘာႏသာႏ သာႏသနာႏအကျောင်ꩻ လောဝ်းဟွိုန်လွေꩻဗာႏ မူႏခို စွုမ်ႏဖြာꩻဩ။