နန္ဒဇာတ်

"နန္ဒဇာတ်" ထွားသွဉ်ဟော်ꩻကျပ် နန္ဒဇာတ်ယိုတဲင် ကလꩻအီသတိꩻ၊ ကလꩻအီပညာႏ၊ ကလꩻဒါႏ ထာꩻသေတရာꩻဖုံႏနဝ်ꩻ-

၁။ လိုꩻခိုဖြား ပေါႏထူႏလိုꩻမူႏဆား သက်ပေႏပေႏနဝ်ꩻ နန်းလွဉ်ꩻဗာႏ၊ သꩻချမ်ꩻသာႏတောဝ်းအကျောင်ꩻ၊

၂။ ဥစ္စာႏတခြိုꩻ မာꩻထိုဒါႏလိုꩻသဖြုံႏ-မာꩻထွိုင်ႏဒါႏ လိုꩻမာႏနအကျောင်ꩻ၊

၃။ ကေꩻဇူꩻဗွေႏအလောင်းနောဝ်ꩻ သစ္စာႏအဝ်ႏဗာႏ နုဲင်းနန္ဒနဝ်ꩻအကျောင်ꩻ (နန္ဒ သစ္စာႏမဉ်ႏဖေါက်နဝ်ꩻ တခြိုꩻပျောက်လို့လဲဉ်းသွူ။)

၄။ ဝင်ꩻမဉ်ခွန်းခွန်း-ဝင်ꩻမဉ်ရိုꩻရိုꩻ ပေါႏအကျိုꩻရအောဝ်ႏနောဝ်ꩻ သယ်ꩻခံႏတေ့ꩻတေ့ꩻဗာႏ နုဲင်းပါꩻလိုꩻခြွေပိုနဝ်ꩻ။ (ဝွေꩻသမဉ်ႏအောက်ꩻ မဉ်ႏပေါက်ꩻသီထိုꩻနန္ဒနောဝ်ꩻ အဖါတခြိုꩻသွုမ်ꩻထိုꩻ၊ လို့ꩻအရပ်မုဲင်ꩻသေဒွုမ်။)

၅။ မဉ်ႏမော့ꩻလွဉ် အယပ်ꩻအခုဲင်ႏနဝ်ꩻ လွေꩻတွိုင်ႏပင်ႏ၊ လွေꩻကွီဗာႏ၊ လွေꩻရီဗာႏ အကျံႏဉာဏ်ႏ ပညာႏသျိ လိုꩻဟဝ်လိုꩻဒါႏထျꩻအကျောင်ꩻ-စတဲင်နုဲင်းနဝ်ꩻဖုံႏသွူ။

"ခဒိရင်္ဂါရဇာတ်" ထွားသွဉ်ဟော်ꩻကျပ် ခဒိရင်္ဂါရဇာတ်ယိုတဲင် ကလꩻအီသတိꩻ၊ ကလꩻအီပညာႏ၊ ကလꩻဒါႏ ထာꩻသေတရာꩻဖုံႏနဝ်ꩻ-

၁။ ပေါႏမာꩻထာꩻမာꩻဟဝ်နဝ်ꩻ အယားသားအဝ်ႏဒါႏအကျောင်ꩻ၊

၂။ ပေါႏမာꩻဒျာႏ အဟဝ်အဒါႏနဝ်ꩻ ပါꩻမဉ်ယားယား ငမ်းမွုန်း၊ မာꩻရုဲင်းရုဲင်းဗာႏ၊ မာꩻအောင်ႏအောင်ႏဗာႏအကျောင်ꩻ၊

၃။ လူꩻအမျိုꩻမုဲင်ꩻတဲ့ယဝ်း ငမ်းဗာႏလိုꩻသီႏလသား၊ ငမ်းဗာႏ လိုꩻတရာꩻသားအကျောင်ꩻ၊

၄။ ကေန်ꩻခြောဒုက္ခတဲ့ယဝ်း အွဉ်ႏကုဲင်မွုန်းတောဝ်း ကုသိုလ်ႏအကျောင်ꩻ၊

၅။ ထာꩻလူႏဆေ့ꩻညမ်းတဲ့ယဝ်း သꩻစေႏတနာႏ သဒ္ဓါႏမဉ်ႏတလာနဝ်ꩻ အကျိုꩻလꩻအာဒျာႏအကျောင်ꩻ၊

၆။ မေႏခန်းတဲ့ယဝ်း တနွောင်ꩻတဝ်းသစ္စာႏ၊ တနွောင်ꩻတောဝ်း ဂုဏ်ႏတောႏ၊ တနွောင်ꩻတောဝ်း စေႏတနာႏ သဒ္ဓါႏတရာꩻအကျောင်ꩻ-စတဲင်နောဝ်ꩻဖုံႏသွူ။