နမော တဿ-ငဝ်းဝုဲႏဖရာꩻခရာႏ

နမော တဿ ဘဂဝတော အရဟတော သမ္မာသမ္ဗုဒ္ဓဿ ငဝ်းဝုဲႏဖရာꩻ

နီယိုနဝ်ꩻ ထွာဗုဒ္ဓဘာႏသာႏရိုꩻနုဲးနဝ်ꩻတဲင်ꩻ "တနီꩻနီလဲင်ႏ ခိင်ႏမဲန်ႏမဲန်ႏ" အဝ်ႏလိုႏဝုဲႏကုဲးကုဲးငါႏဖရာꩻသွူ။

ယဟန်ႏသားနဝ်ꩻ အီႏဗေင်ႏထာꩻခီင်ႏတလဲင်ႏ။ ဗေင်ႏထွိုင်ႏတလဲင်ႏ။ ဝုဲႏမဲန်ႏမဲန်ႏဒါႏဖရာꩻသားတဲ့အဝ်ႏ။

ယဟန်ႏသားနဝ်ꩻ အိုင်ဖွီအဝ်ႏသွီထာꩻ ဖရာꩻသေဝုဲႏတဝ်း ဗေင်ႏထံ၊ ထွိုင်ႏထံသားတဲ့ အဝ်ႏ။

ယိုခါ ကအဝ်ႏဟောꩻလိတ်ယိုတွင်ꩻ "ခွေဝုဲႏဗာႏတဝ်းဖရာꩻ ညလဲန်းမွော့နဲး။ ခွေအံႏဖေင်ꩻဝုဲႏဖရာꩻညပသာႏလဲန်းမွော့နဲ့း"။ "ခွေအိုင်ဖွီအဝ်ႏသွီထာꩻ ညပသာႏလဲန်းမွော့နဲး" ကရိုꩻဒါႏ ထာꩻသေ မီဉ်ႏနွို့လွောန်နဝ်ꩻ ဟောꩻသုတ်ꩻသုတ်ꩻသွော့ ရွောမ်ဖြုဲꩻယိုတပုဒ်နေား။

ယဟန်ႏသားနဝ်ꩻ ဖေႏနေးအခီင်ႏ တနာႏရီႏ၊ တခွဲယ်ꩻရပ်တဲင် ဝုဲႏဖရာꩻနုဲးနဝ်ꩻတဲ့ အဝ်ႏ။

နဝ်ꩻတွော့ꩻ နမ်းမီဉ်ႏတဖေႏနွောင်ꩻတဝ်း အခီင်ႏ။ တဝ်းလဲ့ နမ်းမီဉ်ႏတလꩻဝုဲႏကျင်ꩻတဝ်းဒွိုန်းဖရာꩻနဝ်ꩻ ဟောꩻသုတ်ꩻသုတ်ꩻရီး သာဓကငါယိုဖိုင်ႏနေား။ ဟောꩻမီဉ်ႏထွူနဝ်ꩻ လꩻလွောန်သေလွောန်စွောန်ႏ ငဝ်းဝုဲႏဖရာꩻနယ်ꩻ။ ချꩻသꩻဝုဲႏထွာစွောန်ႏဖရာꩻနဝ်ꩻသွူ။

ဝုဲႏဖရာꩻအနယ်ꩻနဝ်ꩻနဝ်ꩻ ဗေင်ႏထွိုင်ႏရီယဝ်း အွောန်ႏဖေင်ꩻတဝ်း။ ဗုဒ္ဓဘာႏသာႏ ဒါႏကေႏစူမ်ႏဖြာꩻ။ နဝ်ꩻနဝ်ꩻ ထွာဒျာႏ ❝ နမော တဿ ဘဂဝတော အရဟတော သမ္မာသမ္ဗုဒ္ဓဿ ❞ ကရိုꩻဒါႏ ပါဠိယို တပုဒ်သွူ။

နေးတောမ်ႏငဝ်းဝုဲႏဖရာꩻပါဠိယိုတဲင် ကေားကဝုဲႏဖရာꩻသားနဝ်ꩻ မုဲꩻခိꩻဟောင်း?

၁။ ခူန်တန်မဟိန္ဒ။ ၂။ ခူန်သိကျာꩻ။ ၃။ ခူန်တန်ကောသလ။ ၄။ အာရာမဒဏ္ဍပုဏ္ဏာꩻတန်။ ၅။ ကာရဏပါလီပုဏ္ဏာꩻ။ ၆။ ဇာဏုဿောဏိပုဏ္ဏာꩻ။ ၇။ ဓနဉ္ဇာနီပုဏ္ဏာꩻမူႏ။ ၈။ ဗြဟ္မာယုပုဏ္ဏာꩻ ယိုသူဖြာꩻသွူ။

၁ ။ ခူန်တန်မဟိန္ဒ။

      အဝ်ႏကမ္ဘာႏယို စူနပ်ဗျာႏသဲင်ꩻချာ အွိုး(၉၂)ကမ္ဘာႏကိုသူꩻနဝ်ꩻ ဖရာꩻဖုဿ ပွင်ꩻလွောန်။ မဟိန္ဒခူန်တန်နဝ်ꩻ ဆဲယ်ꩻကပ်ဖရာꩻဖုဿထျꩻထွူ "ခွေပိုအတန်တဖြာꩻနဝ်ꩻ ထွာဖရာꩻ။ အဖြာꩻပေႏနဝ်ꩻ ထွာ ပထမအဂ္ဂသာဝက။ ခွေပုရောဟိတ်ပုဏ္ဏာꩻပညာႏသျိ ပိုနဝ်ꩻ ထွာဒုတိယအဂ္ဂသာဝက။ နဝ်ꩻမꩻ ခွေဖရာꩻ၊ ခွေတရာꩻ၊ ခွေသံႏဃာႏလွောန်းလွောန်းနဝ်ꩻသွူ"ရိုꩻနုဲးနဝ်ꩻထွူ ထာꩻသꩻရေꩻယို သီမ်ꩻအွောန်ႏသꩻကိုဒါႏဒူမ်။ ဖြော့ꩻထန်ႏလွောန်တဲင် ဗိုန်ပီနမ်းမန်ꩻကလူန်းထန်ႏဖွိုင်ꩻနဝ်ꩻအတွိုင်ꩻ ဝုဲႏထင်ႏစွောန်ႏ ပိုဗွေႏဖရာꩻ၊ ပိုအဂ္ဂသာဝကသီး "နမောတဿ ဘဂဝတော အရဟတော သမ္မာသမ္ဗုဒ္ဓဿ "သိုမ်လဲင်ႏဗွေဗွေနဝ်ꩻသွူ။

( ဓမ္မပဒအဋ္ဌကထာ ပထမအုပ်၊ ယမကဝဂ်၊ သာရိပုတ္တမောဂ္ဂလာနထေရဝတ္ထု )

၂ ။ ခူန်သိကျာꩻ

ခူန်သိကျာꩻနဝ်ꩻ သꩻသွိုꩻသွင်ႏငါႏနဝ်ꩻမꩻ သက်သေႏအနေႏ တောမ်ႏစူတဗꩻလင်ꩻဟံႏတန်ပထဝီႏထွူ ခြီခြဝ်ထင်ႏစွောန်ႏ "နမောတဿ ဘဂဝတော အရဟတော သမ္မာသမ္ဗုဒ္ဓဿ " ပါဠိငဝ်းယို သိုမ်ခြွိုက်ဗွေဗွေသွူ။

(သုတ်မဟာဝါပါဠိတော၊ သက္ကပဉှသုတ်)

၃ ။ ခူန်တန်ကောသလ

ခူန်တန်ကောသလနဝ်ꩻ ထာꩻယူႏပီတဝ်း တောမ်ႏ ဖရာꩻကဟောꩻ "ထာꩻခိုးလျားမုꩻ၊ ထာꩻငွိုးထာꩻတလွိုးမုꩻ၊ နမ်းသꩻပင်ꩻပန်ႏမုꩻ ကားကအဝ်ႏနဝ်ꩻ ကောပ်ထာꩻရက်မာꩻထွာသွူ"နုဲးနဝ်ꩻသွူ။

ခူန်တန်ကောသလ ထာꩻယူႏဖေႏနေးကမဲန်ႏ မလ္လိကာမိဖရာꩻနင်ꩻနဝ်ꩻ နေးတောမ်ႏနီဗွေႏဖရာꩻတရာꩻအလꩻ အွောန်ႏနယ်နေးဥပမာႏ ဥပမေယျ အမျိုꩻမျိုꩻ စေသျင်ꩻနယ်ဖေႏတဲင် ခူန်တန်ကောသလ ကထွိုင်ႏဟွုန်ဗာႏ မလ္လိကာမိဖရာꩻ ကစေသျင်ꩻနယ်ထွူနဝ်ꩻ သꩻကိုသွိုꩻသွင်ႏ သꩻရေꩻငါႏတဲင် စူဝုဲႏမိုးလွေꩻ ဗွေႏဖရာꩻကအဝ်ႏရာꩻဖဲ့ꩻထွူ ရွောတ်ပူႏဇောႏပါ "နမောတဿ ဘဂဝတော အရဟတော သမ္မာသမ္ဗုဒ္ဓဿ "ပါဠိငဝ်းယို သိုမ်လဲင်ႏဗွေဗွေသွူ။ (မဇ္စျိမပဏ္ဏာသပါဠိတော်၊ ရာဇဝဂ်၊ ပိယဇာတိကသုတ်)

၄ ။ အာရာမဒဏ္ဍပုဏ္ဏာꩻတန်

အာရာမဒဏ္ဍပုဏ္ဏာꩻတန်နဝ်ꩻ လွေꩻထေ့ဆဲယ်ꩻကပ် ဗွေႏမျတ်မဟာကစ္စာယနထျꩻထွူခါ လဝ်းငါထင်ႏကီ "ဩဗွေႏ... လောကကိုယို လိုꩻကလွောစ်ထန်ႏထိုꩻ ရာဂ ဒေါသ မောဟ ဒိဋ္ဌိစတဲင်အကုသိုလ်ႏတရာꩻသားဖိုင်ႏနဝ်ꩻ အဝ်ႏနေဟောင်း"နုဲးနဝ်ꩻသွူ။ ဗွေႏမဟာကစ္စာယန စေနယ်ချာ "ပုဏ္ဏာꩻတန်ဟွေး... ယိုခါ ကအဝ်ႏသတင်ꩻသုံꩻသော့ꩻဒါႏကျောင်ꩻဇေႏတဝန်ႏကို နီဗွေႏဖရာꩻသူꩻနဝ်ꩻ လွောစ်ထန်ႏထိုꩻလဲန်း ရာဂ ဒေါသ မောဟ ဒိဋ္ဌိစတဲင် အကုသိုလ်ႏတရာꩻဖိုင်ႏ"နုဲးနဝ်ꩻတဲင် ပုဏ္ဏာꩻတန်နဝ်ꩻ မဲ့ငါခွဲယ်ႏထေ့လွေꩻ ကျောင်ꩻဇေႏတဝိုန်ႏ ကအဝ်ႏရာꩻဖဲ့ꩻထွူ စူလဲ့ဝုဲႏ ဖြောင်းလဲ့ရွောစ်ပူႏဇောႏစွောန်ႏ "နမောတဿ ဘဂဝတော အရဟတော သမ္မာသမ္ဗုဒ္ဓဿ " သိုမ်လဲင်ႏဗွေဗွေနဝ်ꩻသွူ။

( အင်္ဂုတ္တိုရ်ပါဠိတောႏ၊ ဒုကနိပါတ် ၊ သမစိတ္တဝဂ် ၊ ၆၈)

၅ ။ ကာရဏပါလီပုဏ္ဏာꩻတန်

အွိုးခတလဲင်ႏ နီဗွေႏဖရာꩻ အဝ်ႏသတင်ꩻသုံꩻအိုင် ဝေင်ꩻဝေသာလီ၊ မဟာဝုန်ႏတခြာတန်၊ ကူဋာဂါရသာလာကျောင်ꩻကိုတွင်ꩻ ကာရဏပါလီပုဏ္ဏာꩻတန်နဝ်ꩻ အဝ်ႏခူမ်မာꩻလွေꩻဖေႏ ခူန်လိစ္ဆဝီႏသီး ထာꩻမာꩻကိစ္စပေႏတန်သွူ။

နဝ်ꩻအတွင်ꩻနဝ်ꩻ ပိင်္ဂိယာနီပုဏ္ဏာꩻ အဝ်ႏနီဗွေႏဖရာꩻထျꩻသဲင်ꩻလွောန်။ ကာရဏပါလီပုဏ္ဏာꩻတန်နဝ်ꩻ ဟွူန်ထွꩻဗာႏသတင်ꩻ နီဗွေႏဖရာꩻ ကဟောꩻဖေႏဒါႏတရာꩻဖိုင်ႏ ပိင်္ဂိယာနီပုဏ္ဏာꩻထျꩻနဝ်ꩻထွူတဲင် သꩻကိုအာႏတက် ဟွူနါနိစ်သက်ငါႏနဝ်ꩻမꩻ နီဗွေႏဖရာꩻ ကအဝ်ႏရာꩻဖဲ့ꩻသူꩻ စူဝုဲႏပီနုဲးဗိုမိုမ်ꩻထွူ ဖြောင်းလဲ့ ရွောတ်ပူႏဇောႏပါစွောန်ႏဒျာႏ "နမောတဿ ဘဂဝတော အရဟတော သမ္မာသမ္ဗုဒ္ဓဿ "ယို သိုမ်လဲင်ႏဗွေဗွေနဝ်ꩻသွူ။

( အင်္ဂုတ္တိုရ်ပါဠိတောႏ၊ ပဉ္စကနိပါတ် ၊ ကာရဏပါလီသုတ် ၊ ၂ဝ၈)

၆။ ဇာဏုသောဏိ ပုဏ္ဏာꩻ

အွိုးခတလဲင်ႏ နီဗွေႏဖရာꩻ အဝ်ႏအိုင် ဝေင်ꩻသာဝတ္ထိ၊ ကျောင်ꩻဇေႏတဝိုန်ႏကို။ မွူးယာခိုႏတီင်ႏတီင်ႏ (၁၂)နားရီႏအခီင်ႏရပ်တွင်ꩻ ဇာဏုဿောဏိပုဏ္ဏာꩻတန်နဝ်ꩻ ဟဲ့ꩻတောမ်ႏအဆွေႏအရံႏဖိုင်ႏနဝ်ꩻ အဝ်ႏဝေင်ꩻသာဝတ္ထိကို ထန်ႏလွောန်။ ပိလောတိကပရိဗိုဇ်နဝ်ꩻ အဝ်ႏဖရာꩻထျꩻ သဲင်ꩻလွောန်တဲင် ခွဲးခန်းဝင်ꩻတဖူꩻလောင်းဖိုင်ႏသွူ။

နဝ်ꩻတွော့ꩻ ဇာဏုသောဏိပုဏ္ဏာꩻတန်နဝ်ꩻ စွော့ꩻတက်ရီဆူမ်ႏခန်း ပိလောတိကပုဏ္ဏာꩻ နုဲးယို "ယို ဝစ္ဆာယန မွူးယာခိုႏတီင်ႏတီင်ႏ အခီင်ႏယိုနဝ်ꩻ နာꩻအဝ်ႏမုဲꩻကို သဲင်ꩻဟောင်း" "အဝ်ႏဒျာႏ ဖရာꩻထျꩻသူꩻ သဲင်ꩻလွောန်"အကျောင်ꩻ ပိလောတိကပုဏ္ဏာꩻ ဖြေႏချာနုဲးနဝ်ꩻသွူ။

နဝ်ꩻထွူ ဇာဏုဿောဏိပုဏ္ဏာꩻတန်နဝ်ꩻ ရီထဲင်းယင်းခန်း နီဗွေႏဖရာꩻပညာႏအစိုန်ꩻ။ ပိလောတိကပုဏ္ဏာꩻလဲ့ ဒေါ့ꩻခြုဲးနယ်ချာဖေႏ နီဗွေႏဖရာꩻ ဉာဏ်ႏပညာႏတန်မွေးငါႏခရာႏ၊ ကေႏညိုႏခရာႏ၊ အံႏဖြာႏဟဝ်မွေးငါႏခရာႏ လဲင်ꩻတလို့ဒါႏဒူမ်ဖိုင်ႏထွိုင်ႏထွူနဝ်ꩻ ဇာဏုဿောဏိပုဏ္ဏာꩻတန်နဝ်ꩻ စူဝုဲႏမိုးလွေꩻ နီဗွေႏဖရာꩻကအဝ်ႏရာꩻဖဲ့ꩻထွူ " နမောတဿ ဘဂဝတော အရဟတော သမ္မာသမ္ဗုဒ္ဓဿ " ဖြောင်းရွောစ်ပူႏဇောႏထင်ႏပါစွောန်ႏ နုဲးနဝ်ꩻ သိုမ်လဲင်ႏဗွေဗွေသွူ။

( မူလပဏ္ဏာသပါဠိ ၊ ဩပမ္မဝဂ် ၊ စူဠဟတ္ထိပဒေါပမသုတ် ၊ ၂၃၅)

၇ ။ ဓနဉ္ဇာနီပုဏ္ဏာꩻမူႏ

သဂါထာ၀ဂ္ဂသံယုတ်ပါဠိတောႏ၊ ဗြဟ္မဏသံယုတ် အရဟန္တ၀ဂ်ကို လွောန် ဓနဉ္ဇာနီပုဏ္ဏာꩻမူႏနဝ်ꩻ ကေႏညိုႏမွေးစွောန်ႏ ရတနာႏသိုမ်ပါꩻ။ ဖြောင်းလဲ့အဝ်ႏရွောစ်ဝုဲႏပူႏဇောႏသေႏသေႏပါ "နမောတဿ ဘဂဝတော အရဟတော သမ္မာသမ္ဗုဒ္ဓဿ " နုဲးနဝ်ꩻသွူ။ နဝ်ꩻတွော့ꩻ အဝါꩻပုဏ္ဏာꩻဖြားတန် "ပေါႏရွောစ်ပူႏဇောႏထဲင်းယင်းနဝ်ꩻ ခွေမာꩻသီစွောန်ႏနာꩻကွေး" အဝ်ႏလောက်ꩻအဝ်ႏဒိုႏကီနုဲးနဝ်ꩻလဲ့ ဝွေꩻမူႏသက်ယိုအွောန်ႏတဝ်းအရေꩻ ကလိုႏမာꩻထာꩻမာꩻလမ်းကိုယိုလဲ့အဝ်ႏမာꩻလွေꩻ ဖြောင်းလဲ့အဝ်ႏရွောစ်ပူႏဇောႏသေႏသေႏပါဒျာႏ "နမော တဿ ဘဂဝတော အရဟတော သမ္မာသမ္ဗုဒ္ဓဿ"နုဲးနဝ်ꩻသွူ။

( သံ ၊ ၁ ၊ ၁၆၂ - မဇ္စျိမပဏ္ဏာသ ၊ သင်္ဂါရဝသုတ် ၊ ၄၂၄)

---

၈ ။ ဗြဟ္မာယုပုဏ္ဏာꩻ

အွိုးခတလဲင်ႏ နီဗွေႏဖရာꩻပါတောမ်ႏ တပဲ့ꩻတပန်ꩻ ရဟန်ꩻငတ်ꩻရျာꩻ ကျွꩻလွေꩻ ဒေသစာရီႏ ဝိဒေဟခမ်းသွူ။

နဝ်ꩻအတွင်ꩻနဝ်ꩻ ဗြဟ္မာယုပုဏ္ဏာꩻတန်နဝ်ꩻ ထွောန်ႏအတပဲ့ꩻ ခိုဗင်ႏပေႏဥတ္တရ လွေꩻထေ့နီဗွေႏဖရာꩻထျꩻထွူ ထွောန်ႏခတ်ကယ်ꩻသဲင်ꩻပါ လိစ်ꩻဖဲ့ꩻ သွောတ်နား ကီလခိုႏဒေါမ် မီဉ်ꩻကျောႏဟိုင်ဒါႏ နီဗွေႏဖရာꩻဂုဏ်ႏတောႏဖိုင်ႏ ကမီဉ်ꩻကျောႏဟိုင်ဒါႏအတွိုင်ꩻ မဲန်ႏနဲ့၊ မဲန်ႏတဝ်းနဲ့ နုဲးနဝ်ꩻသွူ။

ခိုဗင်ႏပေႏဥတ္တရလဲ့ ထွေလွောန်ꩻနီဗွေႏဖရာꩻ ညနုတ်ꩻလာထွူ နမ်းကထီႏဒါႏအချက်ဖိုင်ႏယို သဲင်ꩻဒေါ့ꩻနယ်ချာခန်း ဗြဟ္မာယုပုဏ္ဏာꩻတန်နဝ်ꩻသွူ။

ခီႏယောꩻအံႏဖြာႏလို့ဒါႏတဝ်းထာꩻ ဂုဏ်ႏဗွေစူမ်ႏဟဝ်ငါႏအကျောင်ꩻ ထွိုင်ႏသေထွꩻထွူ ဗြဟ္မာယုပုဏ္ဏာꩻတန်နဝ်ꩻ အဝ်ႏအိုင်လင်ꩻထွိုင်ႏကီ မဲ့ငါခွဲယ်ႏလွေꩻ နီဗွေႏဖရာꩻ ကအဝ်ႏရာꩻဖဲ့ꩻသူꩻ စူလဲ့ အဝ်ႏဝုဲႏ ဖြောင်းလဲ့ ရွောစ်ပူႏဇောႏပါ "နမောတဿ ဘဂဝတော အရဟတော သမ္မာသမ္ဗုဒ္ဓဿ " သိုမ်လဲင်ႏဗွေဗွေနုဲးနဝ်ꩻသွူ။

စူမ်ႏနီꩻနီꩻ ရိုꩻထာꩻမာꩻအာ ဖုဲႏခိꩻတဝ်းတဲ့နဝ်ꩻ၊ မာꩻထာꩻမာꩻရွိုးလွားငါႏတွော့ꩻ လွꩻဝုဲႏထိုꩻတေားဖရာꩻတဲ့နဝ်ꩻ၊ ဝုဲႏဖရာꩻဆင်ႏဆင်ႏကုဲထာꩻတဲ့နဝ်ꩻ ထာꩻမာꩻတဲ့ ဖေႏကကုဲမွူန်း၊ အခီင်ႏတဲ့ဖေႏကလို့ဆေ့ꩻ၊ ကုသိုလ်ႏတဲ့ဖေႏကလꩻ နဝ်ꩻမꩻ စူမ်ႏဖြာꩻဖြာꩻ ခါးလားကဗေင်ႏထာꩻခီင်ႏတဲ့နဝ်ꩻ၊ ကအဝ်ႏမာꩻထာꩻမာꩻခီင်ႏတရိုꩻတဲ့နဝ်ꩻ၊ ကအီႏလွေꩻ၊ ကအဝ်ႏလွေꩻတဖူꩻခီင်ႏတဲ့နဝ်ꩻ၊ ရွောစ်သꩻကိုနေးတဲ့သင်၊ ရွောစ်ငဝ်းသင်ႏနေးတဲ့သင် ဖုဲႏခီင်ႏတွိုင်ꩻ ယူႏလꩻတွိုင်ꩻ ဟဝ်ပူႏဇောႏသေႏသေႏငါႏဝင်ꩻ "နမော တဿ ဘဂဝတော အရဟတော သမ္မာသမ္ဗုဒ္ဓဿ "တောမ်ႏငဝ်းဝုဲႏဖရာꩻ ပါဠိယိုသွူ။

ကောပ်ဟောꩻဗာႏ (ငဝ်းဝုဲႏဖရာꩻခရာႏ) ရွောမ်ဖြုဲꩻယိုတပုဒ်ထွူ အီႏဝုဲႏလွေꩻထွာထွာဒျာႏဖရာꩻ၊ အီႏပူႏဇောႏလွေꩻသေႏသေႏဒျာႏဝင်ꩻကရိုꩻနဝ်ꩻ အဝ်ႏယူမ်းအံႏဒျာႏ ဟောꩻလိတ်သားသီးအကျောင်ꩻ။<rfe>ဗွေႏသာသနသိရီလင်္ကာရ </rfe>