နိုꩻဆော်ႏလောဝ်းဟွိုန်ဗာႏ
လိတ်ထွားသား ပရိတ်သာတ်အပေါင်ꩻဖုံႏဩ။ နီသွဉ်းသီး ပအိုဝ်ႏလိတ်လုဲင်ꩻတွမ်ႏယဉ်ႏငဲရေꩻအစွိုꩻ တက္ကသိုလ်ႏဖုံႏ ဝိန်ꩻမန္တလေꩻ ကထွုတ်ထေဗာႏ ပအိုဝ်ႏမဂ္ဂဇင်း လိတ်စောင်ႏယိုနောဝ်ꩻ အစပထမလင်ႏ(လဲင်ႏ)တဲ့ မွေးမွေးသွူဩ။ အရီးနောဝ်ꩻ ပအိုဝ်ႏလိတ်လုဲင်ꩻတွမ်ႏယဉ်ႏငဲရေꩻတက္ကသိုလ်ႏဖုံႏ ဝိန်ꩻမန္တလေꩻနောဝ်ꩻ လꩻထေဗာႏဖိုတောဝ်းဒွိုန်း တလင်ႏလင်ႏ(လဲင်ႏလဲင်ႏ)သွူဩ။ ကထေရီဗာႏ ပအိုဝ်ႏမဂ္ဂဇင်း လိတ်စောင်ႏနောဝ်ꩻ အောဝ်ႏဒျာႏပအိုဝ်ႏလိတ်လုဲင်ꩻတွမ်ႏယဉ်ႏငဲရေꩻအစွိုꩻ တက္ကသိုလ်ႏဖုံႏ ဝိန်ꩻရန်ႏကွုန်ႏလွုမ်ꩻသွူဩ။ နီသွဉ်းသီး ကထွုတ်ထေဗာႏ ပအိုဝ်ႏမဂ္ဂဇင်း လိတ်စောင်ႏယိုနောဝ်ꩻ သာမ်းထွာအစပထမ လင်ႏ(လဲင်ႏ)တင်(တဲင်)တွော့ꩻ ကျောင်ꩻသားဖုံႏ နာမ်းကိုႏတင်ႏ(တဲင်ႏ)လဲ့ ပအိုဝ်ႏယဉ်ႏရေꩻခရာႏ၊ လိတ်လုဲင်ꩻခရာႏ၊ ငေါဝ်းဒေါ့ꩻဖြောဝ်ႏရေꩻခရာႏယို တပေါ်ႏလွူꩻကျာင်ꩻတောဝ်းတင်(တဲင်) အယပ်ꩻအခုဲင်ႏနောဝ်ꩻ မော့ꩻဗာႏအာငါႏသွူဩ။ နီသွဉ်းသီး ပအိုဝ်ႏမဂ္ဂဇင်းယို ယမ်ဖေႏကထွာလꩻ ၁၃၄၆-ဗာႏနိန်ႏ၊ ဒဲဉ်သီႏလာဗွေ အစနောဝ်ꩻရေႏနေးနောဝ်ꩻလဲ့ ပွိုးတွမ်ႏအကျောင်ꩻအမျိုꩻမျိုꩻ အယာပ်ꩻအခုဲင်ႏအမျိုꩻမျိုꩻ သာမ်းအောဝ်ႏနောဝ်ꩻမꩻ တထွꩻလꩻနွောင်ꩻတောဝ်း ဒဲဉ်သီႏလာဗွေနောဝ်ꩻသွူဩ။ ပွိုးနောဝ်ꩻမꩻ လိတ်ထွားသားဖုံႏ ကအောဝ်ႏရီရွောင် ကော့ꩻမောင်ꩻဒါႏ နီသွဉ်းသီး ပအိုဝ်ႏမဂ္ဂဇင်းဖုံႏနောဝ်ꩻလဲ့ အွဉ်ႏစွꩻခွါင်ꩻဗင်း(ဗဲင်း)နီသွဉ်းသီးကရိုꩻနောဝ်ꩻ တောင်ꩻပြန်ႏလောဝ်းဟွိုန်ရီးရီးဗာႏ လိတ်ထွားပရိတ်သာတ်အပေါင်ꩻဖုံႏနောဝ်ꩻသွူဩ။ နီသွဉ်းသီး ပအိုဝ်ႏလိတ်လုဲင်ꩻတွမ်ႏယဉ်ႏငဲရေꩻအစွိုꩻ ကထွုတ်ထေဗာႏ ပအိုဝ်ႏမဂ္ဂဇင်းယို အာင်းမိုးရေႏရွယ်ႏချာက်နောဝ်ꩻ + နီပအိုဝ်ႏလိတ်လုဲင်ꩻတွမ်ႏယဉ်ႏငဲရေꩻ ယမ်ကထာင်ႏထို၊ ယံကတိဉ်ႏခွေါင်တသေႏသေႏ။ + သꩻရာက်ချာနီစွိုးခွိုꩻ၊ နီဘာႏသာႏ၊ နီသာႏသနာႏ၊ နီခမ်းနီထီယို ယမ်ဖေႏကအောဝ်ႏဒါင်ႏဗာႏတသေႏသေႏ။ + လိုꩻကဖျန်ႏလော်လယ်ဒါႏဝါႏဒ၊ ငေါဝ်းမွေးတမွေးတောဝ်း ဒေါ့ꩻအမွေး၊ ကထွို့ꩻသင်ꩻ(သဲင်ꩻ)ချာဒါႏခေတ်(ခေတ်နောက်ပြန်ဆွဲဝါဒ) ကမာꩻကွာင်အီဒါႏ နီလိုꩻမျိုꩻသွိုန်ႏသꩻဖုံႏနေးနောဝ်ꩻ ယမ်ထိုꩻမားဗာႏ။ + တွိုႏတနီꩻခါ ဝါင်ꩻလိုꩻမျိုꩻလာင်ဖုံႏ မိဉ်ႏထွံႏရွမ်လွဒါႏ ပအိုဝ်ႏလိတ်လုဲင်ꩻယဉ်ႏငဲရေꩻအတွာက် ယမ်ကထွာအီဗာႏ သာက်သေႏသာက်ကန်ႏ။ + ဖေႏနေးဖူးဝေး ခမ်းရာင်ꩻသားလိုꩻမျိုꩻပေါင်ꩻစွုမ်ႏ ယမ်ကသေစင်း(စဲင်း)လွဉ်ဗာႏ ပအိုဝ်ႏလိုꩻမျိုꩻအကျောင်ꩻခရာႏ စစွဉ်ႏနေးယိုဖုံႏသွူဩ။ လိတ်ဟော်ꩻသားဖုံႏဩ။ နီသွဉ်းသီး ကအီႏထေဗာႏ ပအိုဝ်ႏမဂ္ဂဇင်းလိတ်စောင်ႏယို ပအိုဝ်ႏအခန်ꩻကဏ္ဍနောဝ်ꩻ မော့ꩻဗာႏအာငါႏ အယပ်ꩻအခုဲင်ႏသွူဩ။ အယပ်ꩻအခုဲင်ႏနေးမုဲင်ꩻကရိုꩻနောဝ်ꩻ နီသွဉ်းသီး ပအိုဝ်ႏလိုꩻမျိုꩻယို အောဝ်ႏကွို့ꩻတမျိုꩻလွုမ်ꩻ၊ ကွယ်ꩻတဲင်တွော့ꩻ စိန်ႏတွိုႏလိတ်နောဝ်ꩻ သာမ်းခွယ်ꩻချာꩻထိုꩻ အမျိုꩻမျိုꩻတင်(တဲင်) အီႏထေဗာႏ နီစွိုးခွိုꩻတာႏ ပအိုဝ်ႏမဂ္ဂဇင်းလိတ်စောင်ႏယိုနောဝ်ꩻ ထွာအီငါႏ အယပ်ꩻအခုဲင်ႏသွူဩ။ နီသွဉ်းသီး ကထေဒါႏ ပအိုဝ်ႏမဂ္ဂဇင်းလိတ်စောင်ႏယိုနောဝ်ꩻ အုံဒျာႏဖဲ့ꩻယိုဖဲ့ꩻနောဝ်ꩻတရိုꩻတောဝ်း၊ အဆာင်ႏကပြေႏရာꩻ ကသာင်ꩻရာꩻဖဲ့ꩻနောဝ်ꩻ နီသွဉ်းသီး ခွုမ်မာꩻလွေꩻဒျာႏနောဝ်ꩻသွူဩ။ ပွိုးနောဝ်ꩻမꩻ နီပအိုဝ်ႏလိတ်ကွယ်ꩻဝါင်ꩻပျဿနာႏယိုနောဝ်ꩻ ခွိုင်းကားနီပအိုဝ်ႏလိုꩻမျိုꩻဖုံႏ ကဆင်ႏ(ဆဲင်ႏ)ရာꩻဒါႏ ပုဂ္ဂိုလ်ႏလိုꩻတန်၊ ဗွေႏသာင်ႏဃာႏသီးတွမ်ႏ လိုꩻလာမ်း၊ ကျောင်ꩻသားစွိုꩻဖုံႏနောဝ်ꩻ ယူႏဒျာႏနီပအိုဝ်ႏလိုꩻမျိုꩻ လွောင်ႏဗူႏရေꩻ၊ အနာႏဂတ်ဆꩻငါတာႏထာင်ႏထိုရေꩻတင်(တဲင်)နီလိတ်အကွယ်ꩻဝါင်ꩻယို ဖေႏနေးကအောဝ်ႏညီꩻငါဝါင်ꩻ တမျိုꩻချာင်ႏနောဝ်ꩻ ယိုခါခဲ့ꩻခဲ့ꩻ မေတ္တာႏတရာꩻ အွဉ်ႏလွဝါင်ꩻဆꩻငါထွူတင်(တဲင်) အောဝ်ႏလိုႏတွိုင်ႏပါင်ႏ ကျိုꩻစာꩻပေါင်ꩻလွေꩻမွိုင်မွိုင်ငါႏလဲဉ်းသွူဝါင်ꩻကရိုꩻနောဝ်ꩻ နီသွဉ်းသီးပအိုဝ်ႏလိတ်လုဲင်ꩻတွမ်ႏယဉ်ႏငဲရေꩻအစွိုꩻ တက္ကသိုလ်ႏဖုံႏ ဝိန်ꩻမန္တလေꩻယိုလဲ့ တက်(တဲက်)တွန်ꩻနိုꩻဆော်ႏဗာႏခြိန်းခြိန်း(ခြေင်းခြေင်း)တဖဲ့ꩻတခေါဝ်နုဲင်းယိုသွူဩ။ ယိုလင်ႏ(လဲင်ႏ)ခါ လိတ်တဲ့မီႏပေါင်ꩻ၊ လိုꩻတဲ့ မီႏပေါင်ꩻနောဝ်ꩻ လိတ်လဲ့အောဝ်ႏတမျိုꩻလွုမ်ꩻတင်(တဲင်) သꩻတဲ့ အောဝ်ႏလို့လဲဉ်းဒျာႏ တလီးချာင်ႏနုဲင်းနုဲင်းဝါင်ꩻတင်(တဲင်) နီတမျိုꩻသာꩻလွုမ်း မာꩻစွဉ်ႏထာꩻမာꩻအမျိုမုဲင်ꩻတရိုꩻတောဝ်း အာႏယိန်းတလာလာစွဉ်ႏနောဝ်ꩻသွူဩ။ လိတ်ဟော်ꩻသားဖုံႏဩ။ နီသွဉ်းသီး ကထေဒါႏ ပအိုဝ်ႏမဂ္ဂဇင်းလိတ်စောင်ႏယို ထာꩻသေထာꩻဒါႏပညာႏ ဗဟုသုတ ဆေ့ꩻငါႏဒွိုန်းတကာႏတောဝ်း လိတ်ယိုနောဝ်ꩻ တွယ်ႏနျꩻဗာႏဒျာႏ ဝိန်ꩻရန်ႏကွုန်ႏကိုတင်(တဲင်) လိတ်ဖြုံႏပအိုဝ်ႏဖုံႏလဲ့ တစွုမ်ႏတောဝ်း၊ လိတ်ခြပ်သားတဲ့ သမ်းထွာဒျာႏမန်း၊ လိတ်ပအိုဝ်ႏခန်ꩻနောဝ်ꩻ တွယ်ႏဒျာႏတထွောင်း၊ လိတ်မန်းနောဝ်ꩻ တွယ်ႏဒျာႏတထွောင်းတွော့ꩻ အမာႏတစွို့ꩻတောဝ်း တစွိုးစွိုးဖုံႏနောဝ်ꩻ ပေါ်ႏရူးရူး ပါဒျႏရာင်ꩻသနဲ့ဩ။ နောဝ်ꩻမꩻ နီသွဉ်းသီး ပအိုဝ်ႏမဂ္ဂဇင်းလိတ်စောင်ႏယို ယမ်ဖေႏကထန်ႏနွောင်ꩻလွေꩻယာင်း တနိန်ႏတလင်ႏ(လဲင်ႏ)နောဝ်ꩻ နီသွဉ်းသီး ပအိုဝ်ႏကျောင်ꩻသားဖုံႏ အီႏယောင်းတငါငါလွေꩻယာင်းဝါင်ꩻစူတင်(တဲင်) ဖူးဝေးလိုꩻအမျာꩻ လိတ်ထွားသား ဗွေႏသီးဖုံႏ လိုꩻအာႏတရိုꩻတောဝ်း၊ ရွဉ်အာႏတရိုꩻတောဝ်း၊ ပညာႏအာႏတရိုꩻတောဝ်း စွဲကိုဖေႏအာႏကိုဗင်း(ဗဲင်း)သွော့ နီသွဉ်းသီးကရိုꩻနောဝ်ꩻ မေတ္တာႏရပ်ခမ်ႏ လောဝ်းဟွိုန်လွေꩻဗာႏနောဝ်ꩻသွူဩ။ လိတ်ထွားသားဖုံႏဩ၊ နီသွဉ်းသီး ပအိုဝ်ႏမဂ္ဂဇင်းလိတ်စောင်ႏယိုနောဝ်ꩻ ခမ်ႏကျိုꩻစာꩻလွေꩻဒျာႏ အဟောဝ်သွတ်ꩻရိုꩻကီလဲ့ အမာႏအတရွို့ꩻ တစွို့ꩻတောဝ်း စတင်(တဲင်)အဆာင်ႏတပြေႏတောဝ်း အမျိုꩻမျိုꩻဖုံႏနောဝ်ꩻ ပေါႏရူးရူးပါဒျာႏရာင်ꩻတင်(တဲင်) လိတ်ဟော်ꩻထွားသား ဗွေႏသီးယမ်ကအွဉ်ႏစွꩻခွါင်ꩻဗင်း(ဗဲင်း)ဒျာႏ နီသွဉ်းသီး၊ ဖျာင်ထွားလွေꩻပါ၊ ဖေႏသတိꩻဖေႏကျံႏဉာဏ်ႏလွေꩻပါဗင်း(ဗဲင်း)ဒျာႏ တောင်ꩻပြန်ႏလောဝ်းဟွိုန်လွေꩻဗာႏ ဖူးဝေးလိုꩻအမျာꩻ လိတ်ထွားသား ဗွေႏသီးဖုံႏနောဝ်ꩻသွူဩ။ ပအိုဝ်ႏမဂ္ဂဇင်းယမ်ထွာရေꩻ ကော်ႏမီႏတီႏ တက္ကသိုလ်ႏဖုံႏ၊ ဝိန်ꩻမန္တလေꩻ [၁][၂]