နီကျောင်ꩻဗွောင်သွူ

နီကျောင်ꩻဗွောင်သွူ ဟန်ႏနီꩻယိုနောဝ်ꩻ နီကျောင်ꩻဗွောင်နီꩻ၊ နီအီႏလွေꩻဗာႏသွူကျောင်ꩻတဲင် အုံထာꩻပျောႏမွေးစွဉ်ႏထာꩻ၊ နီယိုနောဝ်ꩻ ပအိုဝ်ႏဖုံႏဒျာႏတွော့ꩻ လွေꩻစွဉ်ႏကျောင်ꩻတဲ့ယောဝ်း ကွဉ်ကꩻပအိုဝ်ႏနေးဒျာႏ စွုမ်ႏဖြာꩻဖြာꩻသွူ။ လိုꩻပေႏသက်ကလꩻ ငတ်ꩻနေင်ႏသူနေင်ႏ၊ ကအီႏအုံစကျောင်ꩻ ဟန်ႏနီꩻဖုံႏနောဝ်ꩻ အမဲဉ်လွေꩻသန်ငါႏကျောင်ꩻတဲင် အောဝ်ႏဆဲင်တသေႏစွဉ်ႏ အတောင်းပွိုတွော့ꩻ "လွေꩻတွမ်ကျောင်ꩻဟောင်း-လွေꩻတွမ်ကျောင်ꩻဟောင်း"ဆင်ႏဆင်ႏအောဝ်ႏဒေါ့ꩻခန်းနုဲင်းနောဝ်ꩻဖုံႏသွူ။ အချိန်ႏလွေꩻကျောင်ꩻ ကထင်ႏတွိုႏတဲင် ခိုခိုမူႏမူႏ ထူႏဆဲင်တောင်းပွို လွေꩻသွိုဝင်ꩻကျောင်ꩻ ပဉ်စွိုꩻစွိုꩻတွော့ꩻ မွန်းသွိုꩻပျောႏသွင်ႏငါႏ မရေႏမရာႏသွူ။ ကျောင်ꩻချိန်ႏကထင်ႏတွိုႏနောဝ်ꩻ နီအောဝ်ႏသော့ꩻကျောင်ꩻကို၊ အုံဒင်ႏလွ ကလာထဲင် ပငါပရာꩻ၊ ဆရာႏနောဝ်ꩻ ဖျော်ဆုဲင်ꩻနီတစိꩻ၊ ဆရာႏထင်ႏဖျော်လွဉ်တခါꩻငွါတဲင် နီကားကအောဝ်ႏနောဝ်ꩻ အုံထွိုင်ႏရပ်ကျိုႏဆွုမ်ႏဆရာႏ၊ ဆရာႏရိုꩻ- "မင်္ဂလာႏဒျာႏ တပဲ့ꩻဖုံႏ"ရိုꩻနုဲင်းနောဝ်ꩻတဲင် နီတဲ့ "မင်္ဂလာႏဒျာႏ ဆရာႏဗွေႏဩ" လောဝ်းချာနုဲင်းနောဝ်ꩻဖုံႏသွူ။ ဆရာႏထွိုင်ႏအုံလင်ꩻထွူတဲင် နီတဲ့ အုံလင်ꩻခန်းနုဲင်းနုဲင်း၊ အောဝ်ႏနောဝ်ꩻမꩻ နီဆရာႏ ဒေါ့ꩻဖေႏနီနုဲင်းယို- "တပဲ့ꩻဖုံႏဟွေး - ဟန်ႏနီꩻယိုနောဝ်ꩻ ကျောင်ꩻဗွောင်သွူ။ တယ်ႏဟန်ႏနီꩻမာꩻငါ အီႏသွဉ်လွေꩻဗာႏသွူလိတ်၊ ကွပ်နောဝ်ꩻမꩻ တွမ်ႏလွꩻလွမွိုန်း၊ လွေꩻသွော့ကျောင်ꩻ စွုမ်ႏနီꩻနီꩻ၊ ဆရာႏကသွဉ်နယ်အတွိုင်ꩻ၊ ဆရာႏကဒေါ့ꩻနယ်တွင်ꩻနောဝ်ꩻ ထွားသွော့ဒါႏဒါႏ၊ နာႏသွော့စဲင်းစဲင်း၊ ထွားလီးလွော်မွိုန်းထာꩻ၊ ဒေါ့ꩻရီမွိုန်းလို့ဝင်ꩻ၊ စွပ်ꩻမွိုန်းလို့ဝင်ꩻ၊ ရွို့ꩻမွိုန်းလို့ဝင်ꩻ၊ အံႏနွောင်ꩻမွိုန်းလို့ဝင်ꩻ၊ ရက်ပဲင်ꩻသွော့လို့ဝင်ꩻ၊ လွောင်ႏဗူႏသွော့လို့ဝင်ꩻ၊ မီႏတန်လဲဉ်းနီတဲ့ မတ်ဝေး၊ မီႏပေႏလဲဉ်းနီတဲ့ မတ်ဖူး၊ ဒေါ့ꩻရီလို့ဝင်ꩻတဲ့ ဒေါ့ꩻသွော့ငေါဝ်းအွီႏအွီႏ၊ မီႏမော့ꩻအယပ်ꩻအခုဲင်ႏတဲ့ စွဲးထဲမ်ကူႏညီႏကိုသွော့လို့ဝင်ꩻ။ တခွန်ꩻမွိုန်းဝင်ꩻထာꩻ၊ ယားကုဲင်မွိုန်းဝင်ꩻထာꩻ၊ မီႏထူႏလꩻဝင်ꩻထာꩻတဲ့ ကွီသွော့အခွင်ꩻ၊ အုံတင်းမွိုန်းယာခိုး၊ အုံတင်းမွိုန်းခမ်း၊ ထာꩻလျားတိန်ႏတိန်ႏအချိန်ႏနောဝ်ꩻ လူးမွိုန်းထီ၊ ယားတငါတငီမွိုန်းထီ၊ အံႏတငါတငီမွိုန်းထာꩻ၊ ထင်ႏတမွိုꩻတမာꩻမွိုန်းတောဝ်းသေင်ႏ၊ နွို့တငါတငီမွိုန်းထာꩻလုဲင်း။ ကျောင်ꩻထျꩻကျောင်ꩻသောင်တဲ့နောဝ်ꩻ၊ ကျောင်ꩻကိုတဲ့နောဝ်ꩻ မာꩻတအီႏမွိုန်းထာꩻ၊ ထာꩻအီႏထာꩻစျꩻဖုံႏနောဝ်ꩻ သော့ꩻဒျာႏသွော့ ထာꩻအီႏဗွုံꩻကို၊ ထာꩻဆေင်ႏလောင်း၊ ထာꩻထွန်ႏလောင်း၊ တခါꩻလောင်း၊ ခွုံႏလောင်းဖုံႏနောဝ်ꩻ တဲမ်းတဗော့ꩻလီးတဗော့ꩻလဲ့ꩻမွိုန်းထာꩻ၊ ကျောင်ꩻကိုတဲ့နောဝ်ꩻ၊ ကျောင်ꩻထန်ႏတဲ့နောဝ်ꩻ မီႏထီႏထာꩻအီႏထာꩻစျꩻယို တွမ်ႏသော့ꩻသွော့ ထာꩻအီႏဗွုံꩻကို။ အုံကြောင်းကြောင်းထာꩻ၊ အုံသို့မွိုန်းဟံႏဖွန်ႏ၊ နိနိုꩻနောဝ်ꩻ ဒွိုတ်ꩻမွိုန်းတွမ်ႏခွမ်ꩻလာꩻ၊ ဒွိုတ်ꩻမွိုန်းတွမ်ႏစူခိုႏ၊ အွဉ်ႏတသွိုက်ꩻမွိုန်းကတူႏ၊ အွဉ်ႏဆွာꩻမွိုန်းစူမီႏခင်ႏမီႏ၊ မီႏအံႏဒဲဉ်နောဝ်ꩻ ဟွာႏစင်စင်ရီးစူ၊ အံႏဒဲဉ်ထွူနောဝ်ꩻ ဟွာႏစင်စင်ချာသွော့စူ၊ ပွစ်သွော့တငါ၊ ပေါက်ꩻဖြူစင်စင်သွော့ဖြောင်း၊ လူးကုဲင်းကုဲင်းထီနေား"။ ဆရာႏကဒေါ့ꩻဖေႏနီ ငေါဝ်းဟောဝ်ငွါဒါႏနုဲင်းနောဝ်ꩻတဲင် သꩻရေꩻငါႏ၊ နီကေႏညိုႏမွေး၊ ရိုႏသေႏမွေးစွဉ်ႏဆရာႏ၊ ဆရာႏကျေꩻဇူꩻတဲ့ နီတအွဉ်ႏဖိန်ꩻတောဝ်း၊ ဆရာႏငေါဝ်းတဲ့ နီလွောက်ꩻနာႏလွဉ်ꩻဒျာႏနောဝ်ꩻသွူ။