နီနမ်းလောကတရာꩻသွံပါꩻ
"အာဓိပတေယျ (နီနမ်း၊ လောက၊ တရာꩻ သွံပါꩻအွဉ်ႏရေꩻ မာꩻလွေꩻကုသိုလ်ႏ)"
နီဗွေႏဘုရာꩻဟော်ꩻဖေႏ ဗွေႏရဟန်ꩻသီးဖုံႏ တရာꩻနုဲင်းယို- ရဟန်ꩻသီးဖုံႏဟွေး လောကကိုယို အွဉ်ႏရေꩻခရာႏ အဝ်ႏသွံဗာႏ၊ သွံဗာႏကရိုꩻနဝ်ꩻ- ၁။ အတ္တာဓိပတေယျ-အွဉ်ႏရေꩻချာနမ်း ၂။ လောကာဓိပတေယျ- အွဉ်ႏရေꩻလောက ၃။ ဓမ္မာဓိပတေယျ-အွဉ်ႏရေꩻတရာꩻ-အဝ်ႏသွံပါꩻနုဲင်းနောဝ်ꩻသွူ။ ရဟန်ꩻသီးဖုံႏဟွေး- ရဟန်ꩻတပါꩻနဝ်ꩻ အုံတခြာကိုတရိုꩻတဝ်း၊ အုံသေင်ႏဆလတရိုꩻတဝ်း၊ အုံထာꩻယေန်ယေန်ကိုတရိုꩻတဝ်း၊ ယူႏနုဲင်းယို- ခွေကဗုဲင်ရဟန်ꩻယို မဉ်ဗုဲင်သင်္ကန်ꩻဟောဝ်မွေးတဝ်း၊ မဉ်အံႏအွီႏထာꩻမွေးတဝ်း၊ မဉ်အုံကျောင်ꩻဟောဝ်မွေးတဝ်း၊ မဉ်အံႏတသီႏဟောဝ်မွေးတဝ်း၊ မဉ်အုံသာႏထာꩻမွေးတဝ်း။ ခွေယို ဖေႏကလွစ်လꩻထာꩻဖြား၊ ထာꩻဆာ၊ ထာꩻသီတဲင် ရေႏဖေႏကလꩻနိဗ္ဗာန်ႏဒျာႏ၊ ခွေနေးတွမ်ႏသတိပဋ္ဌာန်ꩻနယ်ꩻ မာꩻဝီရိယဟောဝ်ဟောဝ်၊ အွဉ်ႏသတိꩻဟောဝ်ဟောဝ် အားထွုတ်မွေးမွေးက တရာꩻမꩻ၊ အွဉ်ႏသꩻနုဲင်းနဝ်ꩻတဲင် အကုသိုလ်ႏနဝ်ꩻ ပယ်ႏညာꩻ၊ အားထွုတ်ဒျာႏတရာꩻ၊ နဝ်ꩻနဝ်ꩻ ဟဲ့ꩻဗာႏ'အွဉ်ႏရေꩻချာနမ်း'အားထွုတ်တရာꩻ၊ မာꩻကုသိုလ်ႏနောဝ်ꩻသွူ။ ရဟန်ꩻသီးဖုံႏဟွေး- ရဟန်ꩻတပါꩻနဝ်ꩻ အုံတခြာကိုတရိုꩻတဝ်း၊ အုံသေင်ႏဆလတရိုꩻတဝ်း၊ အုံထာꩻယေန်ယေန်ကိုတရိုꩻတဝ်း၊ ယူႏနုဲင်းယို- ခွေယိုနဝ်ꩻ မဉ်ဗုဲင်သင်္ကန်ꩻဟောဝ်၊ မဉ်အံႏဒဲဉ်ဟောဝ်ဟန်ႏအွီႏ၊ မဉ်အုံကျောင်ꩻဟောဝ်၊ မဉ်အံႏတသီႏဟောဝ်တဲင် ထင်ႏဗုဲင်ရဟန်ꩻမွေးတဝ်း။ ဖြားဗာႏထာꩻအာလဲဉ်း၊ ဆာဗာႏထာꩻအာလဲဉ်း၊ သီဗာႏထာꩻအာလဲဉ်း၊ ငွိုးဗာႏထာꩻ၊ ရွိုးဗာႏထာꩻ၊ ဒုက္ခဗာႏထာꩻ အာငါႏလဲဉ်း၊ ဖေႏကလွစ်လꩻခန်း ထာꩻဖြား၊ ထာꩻဆာ၊ ထာꩻသီ ရေႏဒျာႏနုဲင်းနဝ်ꩻ၊ လောကကိုယို လိုꩻထီႏတဝ်းတဲ့ လူꩻသီးအဝ်ႏထီႏ၊ ပေါႏခွေမာꩻထာꩻ မွေးတဝ်း၊ ပေါႏခွေမာꩻအကုသိုလ်ႏနဝ်ꩻ မဲ့ꩻလူꩻသီးကဲ့ꩻရဲ့ꩻသဲ့ꩻသွမ်ꩻခွေ။ ခွေနေးတွမ်ႏ သတိပဋ္ဌာန်ႏနယ်ꩻ မာꩻဝီရိယဟောဝ်ဟောဝ်၊ အွဉ်ႏသတိꩻဟောဝ်ဟောဝ်၊ အားထွုတ်မွေးမွေးက တရာꩻမꩻ-အွဉ်ႏသꩻနုဲင်းနဝ်ꩻတဲင် အကုသိုလ်ႏနဝ်ꩻ ပယ်ႏညာꩻ၊ အားထွုတ်ဒျာႏတရာꩻ၊ နဝ်ꩻနဝ်ꩻ 'အွဉ်ႏရေꩻလောက'အားထွုတ်တရာꩻ မာꩻကုသိုလ်ႏနောဝ်ꩻသွူ။ ရဟန်ꩻသီးဖုံႏဟွေး- ရဟန်ꩻတပါꩻနဝ်ꩻ ယူႏစဉ်ꩻစာꩻနုဲင်းယို- ခွေကဗုဲင်ရဟန်ꩻယိုနဝ်ꩻ မဉ်လꩻအာပစ္စေꩻလစ်ꩻပါꩻ၊ (သင်္ကန်ꩻ၊ သွမ်ꩻ၊ ကျောင်ꩻ၊ တသီႏ)မွေးတဝ်း၊ မဉ်အုံသာႏထာꩻမွေးတဝ်း၊ ဗွိုႏငါႏထာꩻဖြား၊ အန်ꩻငါႏထာꩻဆာ၊ စန်းငါႏထာꩻသီ၊ ပူလီသောက၊ ဒုက္ခဖေႏကကင်ꩻတဲင် ခွေဗုဲင်စင်ꩻနုဲင်းနဝ်ꩻဒျာႏ။ ဝင်ꩻကအားထွုတ်မွေးတရာꩻ ဝင်ꩻကထွာလꩻရဟန္တာႏဖုံႏနဝ်ꩻ အဝ်ႏဗောႏဗာႏထာꩻ၊ ပေါႏခွေအဝ်ႏယူႏ လော်ယ်ထာꩻနဝ်ꩻ မဲ့ꩻဗွေႏရဟန္တာႏသီး သေခွေသꩻ၊ မဲ့ꩻအထီႏဖွီခွေ၊ ခွေမာꩻဝီရိယဟဝ်ဟဝ်၊ အွဉ်ႏသတိꩻဟောဝ်ဟောဝ်၊ အားထွုတ်မွေးမွေးကတရာꩻမꩻ၊ အွဉ်ႏသꩻနုဲင်းနဝ်ꩻတဲင် အကုသိုလ်ႏနဝ်ꩻ ပယ်ႏညာꩻ၊ အားထွုတ်ုဒျာႏတရာꩻ၊ နဝ်ꩻနဝ်ꩻ 'အွဉ်ႏရေꩻတရာꩻ'အားထွုတ်တရာꩻ၊ မာꩻကုသိုလ်ႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ အာဓိပတေယျသုတ်)[၁][၂]