ပရိဝါသ်ခရာႏ ဟောဝ်သေငါႏ

ဆို့ꩻတဲယ်ႏပရိဝါသ်ကရိုꩻနဝ်ꩻ အရုဏ်ႏထန်ႏထွူခါ မွူးယာခိုႏ ကချꩻခါꩻဒါႏ နိက္ခိတ္တဝတ်တောမ်ႏ ချꩻထိုꩻနေးတဝ်း မွူးဟာခိုႏမွူးဟာခိုႏ ကဆို့ꩻတဲယ်ႏသေႏသေႏ ကကျင်ꩻသုံꩻဗာႏဒါႏ အနိက္ခိတ္တဝတ် အအဲဉ်ႏအဝ်ႏယိုနီပါꩻသွူ။ မီန်ႏဆို့ꩻတဲယ်ႏနိက္ခိတ္တဝတ်နဝ်ꩻ (၁) အပ္ပဋိစ္ဆန္နပရိဝါသ်၊ (၂) ပဋိစ္ဆန္နပရိဝါသ်၊ (၃) ဩဓာနသမောဓာနပရိဝါသ်၊ (၄) သုဒ္ဓန္တပရိဝါသ် ဖြယ်ထန်ႏယင်း ယိုသူပါꩻသွူ။ စူဠသုဒ္ဓန္တ, မဟာသုဒ္ဓန္တ ပရိဝါသ် ယိုနီပါꩻနဝ်ꩻ ကမ္မဝါႏစာႏ၊ လဝ်းဟွုန်ပုံႏ၊ ဆို့ꩻတဲယ်ႏပုံႏဖုံႏ ဗိုန်ပီလို့ဝင်ꩻထွူ မုဲခါꩻငါ သုဒ္ဓန္တပရိဝါသ်တမျိုꩻငါနေား။ အန္တရာပတ် သင်ꩻ မီဉ်ႏတဒို့ꩻခါꩻတဝ်း(မွူးနီꩻ) အဟာနဝ်ꩻ မာꩻဗာႏ မူလာယပဋိကဿနကံႏသွူ။ မီဉ်ႏဒို့ꩻခါꩻ (မွူးနီꩻ)အဟာနဝ်ꩻ တဲယ်ႏဗာႏယင်းအထျꩻ မူလာယပဋိကဿနလူမ်ꩻတကာႏတဝ်း ဖေႏပါဗာႏ ဩဓာနသမောဓာနပရိဝါသ်သွူ။

လွိုက်ကအီႏဆို့ꩻတဲယ်ႏဗာႏဒါႏဝတ်

ဝတ်ကရိုꩻနဝ်ꩻ (၁) နိက္ခိတ္တဝတ်၊ (၂) အနိက္ခိတ္တဝတ် အဝ်ႏယိုနီမျိုꩻသွူ။ ယိုနီမျိုꩻအကို ကားဒျာႏ ကအီႏဆို့ꩻတဲယ်ႏသား သꩻကမဲဉ်ဆို့ꩻတဲယ်ႏရာꩻ လွိုက်ရာꩻသွူ။

• ၁။ အပ္ပဋိစ္ဆန္နဝတ်-အာပတ်သင်ꩻနီꩻ ခါးလားအရုဏ်ႏကထန်ႏ ကလဝ်းဟွုန်ဒါႏဒေႏသနာႏရဟန်ꩻနဝ်ꩻ ကောပ်တဒို့ꩻခါꩻတဝ်းတဲင် ဖေႏဗာႏ အပ္ပဋိစ္ဆန္နမာနတ်ဝတ်သွူ။ ဆို့ꩻတဲယ်ႏဗာႏ ပရိဝါသ်ခရာႏ တလိုႏတဝ်း၊ ကျင်ꩻမာနတ်ထွူ သွင်ꩻဗာႏအဗ္ဘာန်လူမ်ꩻသွူ။
• ၂။ ပဋိစ္ဆန္နပရိဝါသ်-နမ်းကသင်ꩻခါꩻဒါႏ သံဃာဒိသေသ်အာပတ်ယို ဖေႏဗာႏ ကသေတဲးတဲးဝါးဝါး ကဒေါ့ꩻချာနွောင်ꩻဒါႏ ဒို့ꩻတနီꩻ (တဝ်းလဲ့) ဒို့ꩻနီနီꩻ၊ (တဝ်းလဲ့) ဒို့ꩻသိုမ်နီꩻ၊ (တဝ်းလဲ့) ဒို့ꩻလိစ်ꩻနီꩻ သား စတဲင်သွူ။ ဖေႏဗာႏ ကဒို့ꩻခါꩻဒါႏမွူးနီꩻအတွိုင်ꩻသွူ။
• ၃။ အဂ္ဃသမောဓာနပရိဝါသ်- ဒို့ꩻတနီꩻ၊ ဒို့ꩻနီနီꩻ၊ ဒို့ꩻသိုမ်နီꩻ၊ ဒို့ꩻလိစ်ꩻနီꩻ၊ ဒို့ꩻတလာ၊ ဒို့ꩻနီလာ၊ ဒို့ꩻသိုမ်လာစတဲင် ကအဝ်ႏသင်ꩻဒါႏအာပတ်ဖုံႏအကို ဒို့ꩻခါꩻမွူးနီꩻကဆေ့ꩻအာပတ်ဖုံႏယို ခြွဉ်းသော့ꩻငီꩻဗာႏ ဒို့ꩻခါꩻမွူးနီꩻကအာဒါႏအာပတ်ဖုံႏနဝ်ꩻမꩻ အာပတ်ဖုံႏအာတဲင် လဝ်းဟွုန်ဒေႏသနာႏနီꩻတမဲဉ်ႏတဝ်းသား၊ မွူးနီꩻပေါင်ꩻ၊ လာပေါင်ꩻညမꩻ လဝ်းဟွုန်ဒေႏသနာႏယဟန်ႏသားမꩻ ဖေႏသင်ꩻသွူ။
• ၄။ မိဿကသမောဓာနပရိဝါသ်-သုက္ကဝိဿဋ္ဌိ, ကာယသံသဂ္ဂစတဲင် နာနာဝတ္ထုဖုံႏ ကပါဒါႏ သမ္ဗဟုလာအာပတ်ကသင်ꩻဒါႏ ရဟန်ꩻအတာႏ ဖေႏရောꩻဗာႏ မိဿကသမောဓာနပရိဝါသ်သွူ။ မီဉ်ႏဆို့ꩻတဲယ်ႏ အဂ္ဃသမောဓာနပရိဝါသ်နဝ်ꩻ မိဿကသမောဓာနပရိဝါသ်လဲ့ ထွူပါစွဉ်ႏသွူ။
• ၅။ ဩဓာနသမောဓာနပိဝါသ်-ကအဝ်ႏဆို့ꩻတဲယ်ႏပရိဝါသ်တွင်ꩻ အခါႏကို အန္တရာပတ်သံဃာဒိသေသ်သင်ꩻသမ်းယင်းတဲင် ကဒို့ꩻခါꩻရဟန်ꩻနဝ်ꩻ ကကျင်ꩻထွူဒါႏမွူးနီꩻဖုံႏယို မာꩻဖေ့ꩻထိုꩻထွူ ကဒို့ꩻခါꩻမွူးနီꩻ မူလ ကလဲဉ်းအာပတ်ဖုံႏယို ခြွဉ်းလွေꩻငီꩻဗာႏကသင်ꩻဆုဲင်ꩻဒါႏအာပတ်အကိုတဲင် ဖေႏခြွဉ်းငီꩻဗာႏဩဓာနသမောဓာနပရိဝါသ်သွူ။
• ၆။ သုဒ္ဓန္တပရိဝါသ်-မဟာသုဒ္ဓန္တ, စူဠသုဒ္ဓန္တ အဝ်ႏနီမျိုꩻရိုꩻကီလဲ့ ကထွိုင်ႏဆို့ꩻတဲယ်ႏဗာႏနဝ်ꩻ အဗိုန်ပီယင်းဒျာႏဝင်ꩻသွူ။ ကြောင်းစင်ခီင်ႏတပီတဝ်းဝင်ꩻနဝ်ꩻမꩻ ဖြယ်ခေါ်ဗာႏတေားသွူ။ ပရိဝါသ်ယိုနဝ်ꩻဖေႏဗာႏ ရဟန်ꩻတသေတဝ်း တောင်ꩻတဝ်း အာပတ်အပဲင်ႏအချာꩻ၊ မွူးဟာအပဲင်ႏအချာꩻ။ သေဒျာႏကွို့ꩻကကြောင်းစင်ဒါႏကာလသားလူမ်ꩻသွူ။ ကြောင်းစင်ခီင်ႏမီဉ်ႏတအဲဉ်ထဝ်းနဝ်ꩻ ကလꩻခါꩻဒါႏရဟန်ꩻဝါႏလို့လို့စင် ကျင်ꩻဗာႏ မဟာသုဒ္ဓန္တပရိဝါသ်သွူ။
• ၇။ မူလာယပဋိကဿန-အန္တရာပတ်သင်ꩻထွူ မီဉ်ႏတဒို့ꩻခါꩻတဝ်းမွူးဟာနဝ်ꩻ ထွို့ꩻအထျꩻ တဲယ်ႏယင်းအစ မာꩻဗာႏ မူလာယပဋိကဿနလူမ်ꩻသွူ။

လွိုက်ရွေꩻဗာႏယိုသွစ်ꩻချက်သွူ။ အဝ်ႏရဟန်ꩻဘဝ ထွက်သဲင်ꩻထွူ မီဉ်ႏဗုဲချာယင်းနဝ်ꩻ ကရီးခါကအဝ်ႏထွာရဟန်ꩻတွင်ꩻ သံဃာဒိသေသ်အာပတ်မီဉ်ႏသင်ꩻခါꩻဗာႏ(လောမ်ꩻလာꩻဗာႏတဝ်း ဒွိုန်းအာပတ် မီဉ်ႏထွက်ထိုꩻ)နဝ်ꩻ မီဉ်ႏထင်ႏဗုဲချာယင်းနဝ်ꩻ ဆို့ꩻတဲယ်ႏချာဗာႏယင်းဒျာႏ ဆဲင်ႏရာꩻပရိဝါသ်သွူ။