ပသေကြောင်းစင် သံဃာႏကုဋီႏအကျိုꩻ
"ဖွစ်ဖျိုးကြောင်းစင် အကျိုꩻတန်"ကရိုꩻဒါႏ ငဝ်းနဝ်ꩻအတွိုင်ꩻ ပသေကြောင်းစင် သံႏဃာႏကုဋီႏ (တရေႏအိန်ႏ)အကျိုꩻနဝ်ꩻ အဝ်ႏ( ၁၁ )ပါꩻသွူ။ (၁၁)ပါꩻကရိုꩻနဝ်ꩻ
- ၁။ နမ်းလဲ့သꩻစွူအီ ဝင်ꩻသꩻစွူအီ။
- ၂။ လိုꩻဟဝ်လိုꩻဒါႏ(သူႏတောႏကောင်ꩻ)သီး အံႏဖြာႏ။
- ၃။ ဘဝစူမ်ႏပန် သွီႏယာႏစင်ဗွာ ချောꩻပြေ။
- ၄။ နမ်းခန္ဓာႏလွီး နူမ်ꩻဟောမ် ဗိုန်နုဲးကဝ်ႏ။
- ၅။ မဲ့ငါလွိုးဗန် တရေꩻယံ။
- ၆။ သꩻသျုက်တရေင်ကင်ꩻ အိုင်ဗာႏသျင်ꩻထာꩻ။
- ၇။ နမ်းလဲ့ခြွိုင်ႏသန်ꩻ သꩻလဲ့ချံꩻသာႏဗာႏ။
- ၈။ ဉာဏ်ႏပညာႏတန် ထာꩻသေထင်။
- ၉။ သက်ထိုစိုးဆွာꩻ။
- ၁၀။ သီလိင်းလူမ်ꩻဗာႏတဝ်းထာꩻ။
- ၁၁။မိဉ်ႏသီလွေꩻငါ တွိုႏထွာဗာႏလူꩻခမ်း ယိုဆီပုဲတပါꩻသွူ။
ရောႏဂါႏကင်ꩻဗာႏ ကျောင်ꩻခရာႏ မွဉ်းဖျင်
နီဗွေႏဖရာꩻသာႏသနာႏတောႏကိုယိုနဝ်ꩻ ခြွိုင်ႏသန်ꩻရေꩻဟဝ်မွေးထာꩻ မထေရ်ႏမျတ် အဝ်ႏတပါꩻ။ ဝွေꩻဗွေႏနဝ်ꩻ ခြွိုင်ႏသန်ꩻရေဟဝ်ထာꩻတခွိုင်းမုဲꩻကရိုꩻနဝ်ꩻ အီႏတဆျငါထာꩻတဲ့ တအဝ်ႏဖိုတဝ်းသွူ။
လောကကိုယို ထာꩻရာꩻမုဲꩻခန်းတဲ့ယဝ်း အကျောင်ꩻတရာꩻကကင်ꩻဒါး အကျိုꩻတရာꩻကရိုꩻနဝ်ꩻ တအဲန်ထဝ်း။ နဝ်ꩻမꩻ ထင်ႏတွိုႏလွေ့ꩻဗွေႏဖရာꩻကဿပစိုးနဝ်ꩻ အွဉ်ႏကုဲသွိုးသဝ်ꩻဆောင်းနမ်းထာꩻမာꩻကိစ္စထွူ ထင်ႏဖွစ်ꩻဖျိုးကြောင်းစင်ဖေႏ ဗွေႏသံဃာႏသီး ကျောင်ꩻဆောင်ဖိုင်ႏထွူ ပသေကြောင်းစင်ပါ သံဃာႏကုဋီႏ(တရေႏအိင်ႏ)ဖိုင်ႏနဝ်ꩻသွူ။ ကောပ်ပွိုးကုသိုလ်ႏကမ်းနဝ်ꩻဖိုင်ႏတဲင် တွိုႏသဲင်ꩻဘဝယို သဲင်ꩻခြွိုင်ႏသန်ꩻရေꩻဟဝ် ထာꩻဆာရောႏဂါႏကင်ꩻဗာႏထာꩻနဝ်ꩻသွူ။ နဝ်ꩻမꩻ ထာꩻဆာရောႏဂါႏမိဉ်ႏမဲဉ်ကင်ꩻ ခြွိုင်ႏသန်ꩻရေꩻမိဉ်ႏမဲဉ်ဟဝ်ထာꩻနဝ်ꩻ ဖွစ်ဖျိုးသျင်ꩻဗာႏ ကျောင်ꩻဝဲင်ꩻ၊ ဖရာꩻဝဲင်ꩻကိုကအဝ်ႏဒါႏ ထာꩻအီႏထာꩻစျꩻဖိုင်ႏ၊ ပသေကြောင်းစင်ဗာႏ ဗွေႏသံဃာႏကုဋီႏ(တရေႏအိင်ႏ)စတဲင် ကုသိုလ်ႏဖိုင်ႏနဝ်ꩻသွူ။ [၁] [၂]