ပသွစ်ꩻပေႏဖြွမ်းဝင်ꩻ

ပသွစ်ꩻပေႏနဝ်ꩻ အမွိုးတွာရွုမ်ꩻဟူ၊ အုံဗူႏဖြွမ်းဝင်ꩻ ပိဉ်စွိုꩻစွိုꩻ၊ ညီႏဝင်ꩻသꩻသွိုꩻ သွꩻဖုံႏအာ၊ သွꩻချင်ꩻလဲ့ခါ ရန်ႏသူႏတောဝ်း၊ ခေ့ꩻယာတွမ်ႏစောဝ်း သꩻညီႏမျ၊ အချင်ꩻရက်လွ မေတ္တာႏရောက်၊ ရန်ႏသူႏစောင်ꩻသျောက် ယံချမ်ꩻသာႏ၊ သွꩻခွအတာႏ ရဲးဆီꩻကို၊ ထာꩻသားလင်ယို မညိဉ်ꩻဆယ်ꩻ၊ အုံဒွါႏတီႏမယ်ꩻ တွမ်ႏသွꩻဖက်၊ ဝင်ꩻမီႏနိစ္စက် ဖြွမ်းဝင်ꩻတဲစ်ꩻ၊ ဖြွမ်းဝင်ꩻတလဲစ်ꩻ ရန်ႏသူႏအောင်ႏ၊ လမ်းပါႏတယ်ႏထောင်ႏ နေးသေင်ႏစီႏ၊ မာꩻရီးတောဝ်းဝင်ꩻ အုံဒွါႏရင်ꩻ၊ အဝင်ꩻရန်ႏလဲ့ ငမ်းတောဝ်းတဲ့၊ နီယိုခါလဲ့ ဥပမာႏ၊ နေးထွာဆရာႏ ပသွစ်ꩻမျိုꩻ၊ နမ်းတာႏအကျိုꩻ ယံကထွာ၊ ပသွစ်ꩻနဝ်ꩻခါ မီႏစိမ်ဗူႏ၊ တွာရွုမ်ꩻစူတူႏ တဖူႏလွုမ်း၊ နီလိုꩻအောဝ်ႏငမ်း လွင်းထိုꩻဗာႏ၊ ယံထွာဆရာႏ ကိဉ်ꩻစာꩻဗဲင်း၊ နေးဉာဏ်ႏထဲမ်ထဲင်း လွောင်ႏဗူႏရေꩻ၊ တဖူꩻကလွေꩻ ယံသွတ်ꩻအီ၊ ပေႏတန်နာꩻနီ ပအိုဝ်ႏဖုံႏ၊ အုံညီꩻအောဝ်ႏပြုံႏ ယံညီႏဝင်ꩻ၊ နီယိုချင်ꩻင်ꩻ မေတ္တာႏရောက်၊ နောဝ်ထင်ꩻတသျောက် တွို့ꩻတွမ်ႏကွဉ်ႏ၊ ယံဖေႏထောင်စွဉ်ႏ တဖူꩻမꩻ၊ တဖူꩻဖြယ်ဖ ယံလွေꩻပုဲင်ႏ၊ ယောက်ျားကိုန်ႏစုဲင်ႏ ပအိုဝ်ႏအာ၊ နီယိုလဲင်ႏခါ ဝင်ꩻသွင်ꩻပေါ်ꩻ၊ တရာꩻသဖော်ꩻ မအွဉ်ႏဝင်ႏ၊ အွဉ်ႏဒွါႏအထန်ႏ သွင်ꩻသော့ꩻတောဝ်း၊ ယံသွင်ꩻညီꩻရောဝ်း လိုႏကျိုꩻစာꩻ၊ နီယိုစွုမ်ႏဖြာꩻ သတိဆောင်ႏ၊ ယံဖေႏကအောင်ႏ တွိုႏရန်းထို၊ ပအိုဝ်ႏမျိုꩻယို အဆင်းယံကထင်ႏ၊ ကျိုꩻစာꩻထိုမ်ႏဉာဏ်ႏ သိပ္ပသွဉ်၊ ယံဖေႏကဒွဉ် ခေါဝ်းဝင်ꩻဖုံႏ၊ အုံညီꩻအုံပြုံႏ တွိုင်ႏပင်ႏဖက်၊ အထိန်ꩻအမတ် ရန်းယံဗိုန်၊ ယံဖေႏတွာသွုန် စီꩻဝွေꩻညီꩻ၊ ရန်ႏကုန်ႏတောင်ႏကီꩻ ခုံႏရန်းထို၊ ထင်ႏတွိုႏနီယို အချင်ꩻင်ꩻ၊ မရက်လွဝင်ꩻ နှဲးပသွစ်ꩻ၊ လီလာလယ်ႏစွစ်ꩻ နိစ္စက်ထဲင်း၊ သꩻလဲင်ꩻကနဲင်း စွေးကိဉ်ꩻစာꩻ၊ နီယိုနောဝ်ꩻရာꩻ ယံထွားနှဲး၊ လိတ်ယိုကခြုဲး ပသွစ်ꩻပေႏ၊ ဉပမာႏဖေႏ တင်ꩻလှဲဟွေး။