ပအိုဝ်ႏစွိုးခွိုꩻညီႏလာႏခံႏနဲ့

"ပအိုဝ်ႏစွိုးခွိုꩻညီႏလာႏခံႏနဲ့ ပါတီညီႏလာႏခံႏနဲ့" အခိန်ႏနုဲင်းယိုခါ ၂၀၁၄-နဝ်ꩻ အဝ်ႏကုဲင်ချာ၊ ၂၀၁၅-ကို ကွဲးနွို့ငါ ခမ်းထီတဗာႏ အခေႏနေႏတသာ ကအီႏဖန်ဆင်နွောင်ꩻအီဒါႏ မဲပွယ်ꩻယိုလဲ့ ကွဲးဗော့ꩻလွဉ်လဲဉ်းသွူ၊ ခွုင်းကားတဲင် မန်းခမ်းကိုကအဝ်ႏ ခမ်းရင်ꩻသား လိုꩻမျိုꩻတွိုင်ꩻဖုံႏနဝ်ꩻ အဝ်ႏရဲဉ်ꩻအဝ်ႏဖျင်၊ ကထွာဒါႏ ခမ်းထီအစိုႏရလဲ့ ခမ်းထီအခေႏနေႏယို အီႏခွုမ်စံႏလွေꩻဗာႏနုဲင်းမုဲင်ꩻနဝ်ꩻ အဝ်ႏဆင်လွေꩻလဲဉ်း အပွိုင်အခြုံဖုံႏနဝ်ꩻသွူ။ အခေႏနေႏ အဝ်ႏနုဲင်းယိုအကို ကထွာဒါႏ ခွန်ပအိုဝ်ႏလိုꩻမျိုꩻယိုလဲ့ မန်းခမ်းကို ခွုင်းကားတဲင် ခမ်းရင်ꩻသားအခါႏ ခမ်းရင်ꩻသားလိုꩻမျိုꩻတမျိုꩻ အဝ်ႏပါအဝ်ႏထွာနေနေနဝ်ꩻသွူ၊ ခမ်းရင်ꩻသားလိုꩻမျိုꩻလင်သီး ခွုမ်လက်နက်စဲ့ꩻတပ်မတောႏစွိုꩻ အဝ်ႏအတွိုင်ꩻ ခွန်ပအိုဝ်ႏသီးလိုꩻမျိုꩻယိုတဲ့ ခွုမ်လက်နက် စဲ့ꩻတပ်မတောႏစွိုꩻ အဝ်ႏနုဲင်းနုဲင်းသွူ၊ ခမ်းရင်ꩻသားလိုꩻမျိုꩻလင် လိုꩻမျိုꩻဖြောꩻပေါင်ꩻယို အဝ်ႏတွမ်ႏရဲင်ꩻတွမ်ႏအာႏအတွိုင်ꩻ ခွန်ပအိုဝ်ႏလိုꩻမျိုꩻယိုတဲ့ အဝ်ႏတွမ်ႏရဲင်ꩻတွမ်ႏအာႏနေနေသွူ။ ခမ်းရင်ꩻသား လိုꩻမျိုꩻလင်သီးတဲ့နဝ်ꩻ၊ နဲင်ႏငံႏရေꩻပါတီတန်သီး (နဲင်ႏငံႏရေꩻသားသီး)တဲ့နဝ်ꩻ အခိန်ႏခါႏအခေႏအနေႏအလꩻ မာꩻထွာတဲင် တဖြာꩻတွမ်ႏတဖြာꩻယို မဉ်ႏအဝ်ႏပြုဲင်တဲ့ ထွို့ꩻဖြွမ်း၊ မဉ်ႏအဝ်ႏသောမ်းတဲ့ ကွီးထွိုင်ႏ၊ မဉ်ႏအဝ်ႏဖြယ်တဲ့ ပက်ဗူႏ၊ မဉ်ႏအဝ်ႏဟူႏတဲ့ ပင်ႏကီ၊ ထာꩻစင်ꩻအွဉ်ႏတဝ်းအသီ၊ အဖေႏအထူႏနဲင်ငံႏရေꩻတဖူꩻရဲဉ်ႏယို အွဉ်ႏဒျာႏအမွန်နဝ်ꩻ ထီႏဗာႏနဝ်ꩻသွူ။ ခမ်းရင်ꩻသားလိုꩻမျိုꩻတွိုင်ꩻ၊ နဲင်ႏငံႏရေꩻပါတီလင်တွိုင်ꩻသီး ကွပ်မဲပွယ်ꩻဗော့ꩻလွဉ်တဲင် အဝ်ႏရဲဉ်ꩻအဝ်ႏဖျင် အဝ်ႏဆင်အဝ်ႏမာꩻ လိုꩻမျိုꩻညီႏလာႏခံႏ၊ ပါတီညီႏလာႏခံႏအတွိုင်ꩻ ခွန်ပအိုဝ်ႏလိုꩻမျိုꩻသီးလဲ့ ထွိုင်ႏရဲဉ်ꩻထွိုင်ႏဖျင် ထွိုင်ႏဆင်ထွိုင်ႏမာꩻလဲဉ်း ပအိုဝ်ႏစွိုးခွိုꩻညီႏလာႏခံႏ၊ ပအိုဝ်ႏပါတီညီႏလာႏခံႏနဝ်ꩻသွူ။ ယိုနဝ်ꩻ ထွာလွေꩻအီငါႏ ၂၀၁၅-မဲးပွယ်ꩻတာႏ နေးအာႏရွမ်အာႏ ဖျင်ဆင်မုတဗာႏနဝ်ꩻသွူ၊ ကွဲးတွော့ꩻ မာꩻလွေꩻပအိုဝ်ႏစွိုးခွိုꩻညီႏလာႏခံႏ ကနေးလွေꩻအာႏကရွမ်လွေꩻအာႏ ကဖျင်ဆင်လွေꩻဒါႏ အာႏရဲင်ꩻယို မဉ်ႏထွာလွေꩻဒျာႏ တစွိုးခွိုꩻလုမ်းအတာႏအာႏရဲင်ꩻနဝ်ꩻ ဟဝ်ငါႏသွူ။ ခမ်းရင်ꩻသား လိုꩻမျိုꩻလောင်ႏလင်သီးဖုံႏနဝ်ꩻ ပါတီမဉ်ႏအဝ်ႏနီသိုမ်ဗာႏလဲ့ လိုꩻမျိုꩻအတာႏ ငမ်းငါႏအဆာသုမ်ꩻတဲ့နဝ်ꩻ၊ အာတလာမုဲင်ꩻရာꩻ ပါတီတန်ဖုံႏ မဲပွယ်ꩻအောင်ႏနွောင်ꩻရေꩻ ဖေႏကသေႏချာႏတဲ့နဝ်ꩻ ဝင်ꩻထူႏလွေꩻအာႏ မာꩻလွေꩻစွဉ်ႏဒျာႏ လိုꩻမျိုꩻတမျိုꩻလုမ်းအနေႏနဝ်ꩻသွူ။ ၂၀၁၅-ဗာႏ၊ တယ်ႏမတ်လာ ၂၃-နီꩻ ဗꩻလွေꩻမတ်လာ ၂၅-နီꩻ ဒဲဉ်သီႏဗွေကွင်ꩻ ဝေင်ꩻတောင်ႏကီꩻကို ကမာꩻလွေꩻဒါႏ ညီႏလာႏခံႏနဝ်ꩻ ထွာဆဋ္ဌမအလဲင်ႏ ပအိုဝ်ႏစွိုးခွိုꩻညီႏလာႏခံႏ သေထွꩻလွေꩻနုဲင်းနဝ်ꩻသွူ။ နုဲင်းယိုခါ ပအိုဝ်ႏလိုꩻမျိုꩻကိုနဝ်ꩻ ထွားလွေꩻဒျာႏ ကဏ္ဍမုဲင်ꩻတယဝ်း အဝ်ႏစွဉ်ႏအလွိုတဗာႏ၊ အလွိုတဗူႏ၊ အလွိုတစွိုꩻလွဉ်းလွဉ်းသွူ၊ ကဏ္ဍလောင်ႏလင်ကို မဉ်ႏလွိုတဗူႏနဝ်ꩻ စွိုးခွိုꩻလိုꩻမျိုꩻ တဟူႏလီနွောင်ꩻအီတဝ်းလဲ့ နဲင်ႏငံႏရေꩻအခန်ꩻကဏ္ဍကို ဒဲ့ꩻထူႏအီ လိုꩻမျိုꩻအခွင်ꩻအရေꩻတာႏ ပါတီယို မဉ်ႏအဝ်ႏသွူ နီသိုမ်ပါတီတွော့ꩻ အချင်ꩻချင်ꩻဒျာႏ တဖြာꩻတွမ်ႏတဖြာꩻယို မဉ်ႏအဝ်ႏပြုဲင်တဲ့ ထွို့ꩻဖြွမ်း၊ မဉ်ႏအဝ်ႏသောမ်းတဲ့ ကွီးထွိုင်ႏ၊ မဉ်ႏအဝ်ႏဖြယ်တဲ့ ပက်ဗူႏ၊ မဉ်ႏအဝ်ႏဟူႏတဲ့ ပင်ႏကီ၊ ထာꩻစင်ꩻအွဉ်ႏတဝ်းအသီ၊ အဖေႏအထူႏနဲင်ႏငံႏရေꩻ တဖူꩻရဲဉ်ႏမျိုꩻ မဉ်ႏထောင်၊ မဉ်ႏယောင်းတဝ်းနဝ်ꩻ လိုꩻမျိုꩻအခွင်ꩻအရေꩻ လွစ်ထန်ႏတရွို့ꩻညာꩻဒါႏသွူ။ ကမာꩻလွေꩻ ပအိုဝ်ႏစွိုးခွိုꩻ ညီႏလာႏခံႏသဘင်ႏပွယ်ꩻယို ခွုင်းကားတဲင် ကအဝ်ႏရုဲင်ꩻတသွိုး ပအိုဝ်ႏနဲင်ႏငံႏရေꩻအစွိုꩻအကို မဉ်ႏတွိုႏလွဉ် ၂၀၁၅-မဲပွယ်ꩻတွမ်ႏ အနာႏဂတ်ပအိုဝ်ႏနဲင်ႏငံႏရေꩻယို အီႏထောင်လွေꩻဗာႏနုဲင်းမုဲင်ꩻကရိုꩻနဝ်ꩻ ဖြွမ်းပါဝင်ႏတခြိꩻလွေꩻလို့ အဝ်ႏနေဟောင်း။ မဉ်ႏတမွေးတဝ်းလဲ့ မာꩻသွူစွဉ်ႏ ပအိုဝ်ႏစွိုးခွိုꩻညီႏလာႏခံႏတဲင် အနာႏဂတ်ပအိုဝ်ႏအရေꩻယိုလဲ့ အီႏမာꩻလွေꩻယင်းဒျာႏ တွမ်ႏတခူႏတခဝ် ယဟူးယဟန်ႏတွိုင်ꩻတွိုင်ꩻဟောင်း၊ ပအိုဝ်ႏစွိုးခွိုꩻညီႏလာႏခံႏသဘင်ႏ အမဉ်ꩻဆꩻလကို ပအိုဝ်ႏနဲင်ႏငံႏရေꩻသား၊ ပအိုဝ်ႏနဲင်ႏငံႏရေꩻအစွိုꩻ၊ ပအိုဝ်ႏအမျိုꩻသာꩻရေꩻသꩻဓာတ်သား ပါဝင်ႏလွဉ်တခွုင်းမုဲင်ꩻ။ ပအိုဝ်ႏတစွိုးခွိုꩻလွုမ်း အခွင်ꩻအရေꩻတွမ်ႏ အနာႏဂတ်ယို ယံကတရေꩻလွဉ်နဝ်ꩻ ကအီႏခွဲးကျုံႏလွဉ်ဗာႏဒါႏ လိုꩻမျိုꩻလင်၊ ပါတီတန်သား အပွိုင်အဆင်အခါႏ အီႏလဲ့ꩻအီႏဖုဲင်း အီႏတရွို့ꩻဗာႏနုဲင်းမုဲင်ꩻနဝ်ꩻ အချင်ꩻချင်ꩻဒျာႏ တဖြာꩻတွမ်ႏတဖြာꩻယို အဖေႏအထူႏ ထာꩻသေနာႏမုဖုံႏ မဉ်ႏမာꩻခါꩻဒျာႏမꩻသွူ။ အချင်ꩻချင်ꩻဒျာႏ လိုႏထွာတဝ်း ခေးပြဲင်ႏပွယ်ꩻ၊ ကအီႏကျုံႏတလူႏလွဉ်ဗာႏ ပါတီတန်လိုꩻမျိုꩻလင်သီး ထာꩻခေးပြဲင်ႏယို ဖြွမ်းဝင်ꩻတွော့ꩻ အီႏခေးပြဲင်ႏဗာႏနုဲင်းမုဲင်ꩻ၊ မာꩻအလွိုအယွမ်ꩻတွော့ꩻ အီႏတွူႏကာႏဗာႏနုဲင်းမုဲင်ꩻယို အရေꩻတန်ငါႏ တခြိꩻခရာႏ၊ အရေꩻသန်ငါႏ အခိန်ႏခါႏ ခမ်းသားငဝ်း လိတ်သေသင်ꩻ ခြွူႏမွဉ်းသားစွိုꩻအနေႏ ထီႏလွေꩻနုဲင်းနဝ်ꩻတဲင် ဒင်ႏနယ်လွေꩻဗာႏသွူ။