ပအိုဝ်ႏစွိုးခွိုꩻလွောင်ႏဗူႏ

"ပအိုဝ်ႏစွိုးခွိုꩻ လွောင်ႏဗူႏရေꩻတာႏ အငဝ်းသင်ႏလွဉ်လဲဉ်း" ကအဝ်ႏကွဉ်ကꩻ ခွမ်ꩻလာꩻဖြေင်း၊ ကအဝ်ႏဒေါ့ꩻဖြဝ်ႏဒါႏ ပအိုဝ်ႏငဝ်းငွါ၊ ကအဝ်ႏခွုမ်စံႏထေင်းထမ်ႏမာꩻဒါႏ ပအိုဝ်ႏအတာႏ စွိုးခွိုꩻတာႏဝွန်ႏယို ထွာဒျာႏပအိုဝ်ႏသွီႏ ပအိုဝ်ႏလိုꩻမျိုꩻဒျာႏလွဉ်းလွဉ်းမꩻ ခြွိုင်းကွဉ်ကꩻ၊ ဒေါ့ꩻဖြဝ်ႏ၊ ခွုမ်စံႏထေင်းထမ်ႏ မာꩻနွောင်ꩻနဝ်ꩻသွူ၊ ပအိုဝ်ႏပို ပအိုဝ်ႏလိုꩻမျိုꩻတွော့ꩻ ခွုမ်စံႏထေင်းထံႏ မာꩻပအိုဝ်ႏစွိုးခွိုꩻအကျိုꩻနုဲင်းနုဲင်းဝင်ꩻနဝ်ꩻ ကွပ်တမုဲင်ꩻ မွော့ထီႏဗာႏတွိုႏ ပါꩻအစွိုꩻနီအစွိုꩻဟောင်း။ "တနျာႏ၊ သွမ်ႏ၊ ချို၊ တနျာႏကို ဆာႏဗွာအဝ်ႏတဖြုံႏ"ကရိုꩻဒါႏ ပအိုဝ်ႏစွိုးခွိုꩻအလံႏတောႏယိုဆꩻလကို အဝ်ႏခံႏထူႏဒျာႏနုဲင်းနုဲင်းဝင်ꩻ၊ အဝ်ႏခွုမ်မာꩻဒျာႏ အလံႏတောႏယို အဂွုဏ်ႏတနွောင်း တသွောင်းထင်ႏထိုရေꩻနုဲင်းနုဲင်းဝင်ꩻနဝ်ꩻ အချင်ꩻချင်ꩻ အဝ်ႏလိုႏထွားဒျာႏလွဝင်ꩻ တွမ်ႏပအိုဝ်ႏမဲ့ဖြုံႏသွူ။ ပအိုဝ်ႏစွိုးခွိုꩻအစွိုꩻလဲ့ ခွုမ်မာꩻထေင်းထမ်ႏဒျာႏ ပအိုဝ်ႏလိုꩻမျိုꩻတာႏ၊ အဝ်ႏခံႏထူႏဒျာႏ ပအိုဝ်ႏအလံႏတောႏ အဟေ့ꩻဆꩻလ၊ ပအိုဝ်ႏအမျိုꩻသာꩻလွစ်ထန်ႏရေꩻအစွိုꩻလဲ့ ခွုမ်မာꩻထေင်းထမ်ႏဒျာႏ ပအိုဝ်ႏလိုꩻမျိုꩻတာႏ၊ အဝ်ႏခံႏထူႏဒျာႏ ပအိုဝ်ႏအလံႏတောႏအဟေ့ꩻဆꩻလ၊ ဗွိုန်နုဲင်းနဝ်ꩻနေနေ ရလလဖဒျာႏလဲ့နဝ်ꩻ၊ ပအိုဝ်ႏလိတ်ယေန်ႏစွိုꩻဒျာႏလဲ့နဝ်ꩻ၊ ပအမဖ အစွိုꩻဒျာႏလဲ့နဝ်ꩻ၊ ပအိုဝ်ႏလိုꩻယွဲးစွိုꩻအစွိုꩻမုဲင်ꩻမုဲင်ꩻတဲ့နဝ်ꩻ အဝ်ႏခွုမ်မာꩻဒျာႏ ပအိုဝ်ႏခမ်းသားအကျိုꩻတာႏ၊ အဝ်ႏဒျာႏပအိုဝ်ႏအလံႏတောႏ အဟေ့ꩻဆလနုဲင်းနုဲင်းဝင်ꩻနဝ်ꩻ ကွပ်တမုဲင်ꩻ မွော့ထွားဗာႏတွိုႏလွဝင်ꩻ တွမ်ႏရန်ႏသူႏမဲ့ဖြုံႏဟောင်း။ မဉ်ႏယူႏဒျာႏ ကအဝ်ႏခွုမ်မာꩻတွော့ꩻ ကအီႏထွာလွဉ်ဒါႏ အကျိုꩻယိုနဝ်ꩻ ထွာဒျာႏတခြောင်ꩻချင်ႏ၊ တဟို့ꩻချင်ႏ၊ တသွီႏချင်ႏ၊ တဖူꩻတလီးချင်ႏကရိုꩻယို မဉ်ႏထီႏဒါႏနဝ်ꩻ အဝ်ႏသေဒျာႏလဲ့ အဝ်ႏသေငါႏနဝ်ꩻ ကွပ်တမုဲင်ꩻ မွော့အဝ်ႏခါႏဗာႏဟောင်း။ မဉ်ႏယူႏစဲင်းစဲင်း ပအိုဝ်ႏသီး တစွိုꩻတွမ်ႏတစွိုꩻ ကအဝ်ႏခွုမ်မာꩻ ပအိုဝ်ႏစွိုးခွိုꩻထာꩻမာꩻယို ရက်လိုꩻစွိုꩻတွော့ꩻ ခွုမ်မာꩻနဲ့၊ ရက်လိုꩻမျိုꩻတွော့ꩻ ခွုမ်မာꩻနဲ့၊ မဉ်ႏထွာရက်လိုꩻစွိုꩻတွော့ꩻ ခွုမ်မာꩻနဝ်ꩻ လိုꩻမျိုꩻရေꩻယို သွုံꩻမာꩻလိုꩻစွိုꩻမဲ့ငါဒို့ꩻနဝ်ꩻ ဗွိုန်ပီဝင်ꩻသွူ။ မဉ်ႏရိုꩻရက်လိုꩻမျိုꩻတွော့ꩻ ခွုမ်မာꩻကရိုꩻလဲ့ ဝွေꩻသီးတဲ့ပအိုဝ်ႏ၊ နီတဲ့ ပအိုဝ်ႏဒျာႏနေနေ၊ ဖေႏကထွာတခြောင်ꩻချင်ႏ၊ ဖေႏကထွာ တပအိုဝ်ႏချင်ႏနဝ်ꩻ ထွို့ꩻဗူႏနွောင်ꩻအထီအသွီႏ အဝ်ႏတဝ်းဒျာႏနဲ့၊ သွုံꩻတဝ်းဒျာႏနဲ့၊ ခံႏဆွတ်တဝ်းဒျာႏ မာႏနနဲ့၊ ခံႏယွမ်ꩻတဝ်းဒျာႏ အတ္တနဲ့။ ပအိုဝ်ႏစွိုးခွိုꩻ လွောင်ႏဗူႏရေꩻယို ကွပ်ခံႏဆွတ်တဝ်းမာႏန၊ ကွပ်ခံႏယွမ်ꩻနွောင်ꩻတဝ်း အတ္တတွော့ꩻ မဉ်လီလီတဲင် အစွိုꩻနဝ်ꩻ မာꩻလိုꩻမျိုꩻတာႏထာꩻမာꩻနဝ်ꩻ ထွာခမ်းသားသီး စဉ်ꩻစာꩻခရာႏသွူ။ ပအိုဝ်ႏသီးအစွိုꩻစွိုꩻ အဒဝ်ႏဒဝ်ႏကို ကအဝ်ႏမာꩻဒါႏ ထာꩻမာꩻဖုံႏနဝ်ꩻ တစွိုꩻတွမ်ႏတစွိုꩻ ကွာႏညာꩻတဝ်းဝင်ꩻ၊ အတပုဲင်ႏပွိုင်းတဝ်းလို့ဝင်ꩻ ထီႏဗာႏနုဲင်းနဝ်ꩻသွူ၊ ကွပ်စွဉ်ႏဒျာႏ တစွိုꩻသဖောꩻ တွမ်ႏတစွိုꩻသဖော်ꩻယို တသေဖြောင်ချာငါဝ်းလွဝင်ꩻတဲင် အဝ်ႏထီႏအဝ်ႏထင်းတေားဒျာႏ မာꩻကုဲင်ပအိုဝ်ႏဂွုဏ်ႏ၊ ယားလီစွိုးခွိုꩻအာႏရဲင်ꩻနဝ်ꩻသွူ။ ကွပ်တမုဲင်ꩻ မွော့ဒေါ့ꩻပဲင်ႏနွောင်ꩻတွိုႏ အထာꩻမာꩻ ထာꩻအင်းရွယ်ႏယို ဗွိုန်ဒျာႏဟောင်းနဝ်ꩻ အွိုးမေလာ ၁-နီꩻကို မာꩻလွေꩻမီဒီယာသွဉ်တန်ꩻအောင်ႏပွယ်ꩻတဲင် ဖစ်ဟွုန်ဖျော်လွဉ်ဖေႏအာႏဒါႏ အစွိုꩻစွုမ်ႏအွဉ်ငါသီး ကထင်ႏဒေါ့ꩻထန်ႏငဝ်းအရသာႏနဝ်ꩻ သေထွꩻဗာႏသွူ။ ပအိုဝ်ႏစွိုးခွိုꩻ ခမ်းသားစဲ့ꩻအွဉ်ငါပိုႏကယ်ႏတန် ခွန်လာကဒေါ့ꩻလွေꩻဒါႏ တစွိုးခွိုꩻလွုမ်းအတာႏ ကမဉ်ထွာတွမ်ႏ ကထွာသင်ꩻဒါႏငဝ်းငွါဒျာႏလဲ့နဝ်ꩻ၊ ပအိုဝ်ႏလိတ်ယေန်ႏဥက္ကဋ္ဌ ကဒေါ့ꩻဒါႏ စွိုးခွိုꩻအလောင်း ကမဉ်ထွာတွမ်ႏ ကထွာသင်ꩻဒါႏ ငဝ်းအရသာႏလဲ့နဝ်ꩻ၊ ပအိုဝ်ႏအမျိုꩻသာꩻလွစ်ထန်ႏရေꩻအစွိုꩻ ဥက္ကဋ္ဌအနေႏ ပအိုဝ်ႏလွစ်ထန်ႏရေꩻအစွိုꩻ ပအိုဝ်ႏစွိုးခွိုꩻအလောင်း ထာꩻမဉ်ထွာတဲ့နဝ်ꩻ၊ ဖြားချစ်မောင်အနေႏ ကဖေႏလွေꩻဒါႏ စွိုးခွိုꩻအတာႏ လိုꩻအဝ်ႏငါႏ အခန်ꩻကဏ္ဍကိုလဲ့နဝ်ꩻ အကွာႏတဝ်းဝင်ꩻ၊ အဗွိုန်ဒျာႏလွဝင်ꩻနဝ်ꩻသွူ။ အဝ်ႏဗွိုန်ဒျာႏဝင်ꩻမွော့ ထွာတမုဲင်ꩻ မာꩻညီꩻတဝင်ꩻတလꩻတဝ်းတွိုးဟောင်း၊ ယင်းတဗာႏ ဝါႏဒမဉ်ႏဗွိုန်တဝ်းခန်းလဲ့ ဝွေꩻနဝ်ꩻ ထီႏထွားရိုꩻစွဉ်ႏ ပအိုဝ်ႏမွေးတဝ်းဟောင်း၊ နုဲင်းခြွူႏမွဉ်းသားစွိုꩻထာꩻထီႏနဝ်ꩻ အဝ်ႏလိုႏငဝ်းခွဲးခွိုꩻခွိုꩻငါႏဝင်ꩻသွူ။ မဉ်ႏမော့ꩻခွဲးသွူ အလဲင်ႏတွိုင်ꩻလဲ့ သꩻလျားသꩻဆာနဝ်ꩻ အွဉ်ႏဖုဲင်းတရွို့ꩻတဲင် အဝ်ႏလိုႏအုံကွ့အာအာ၊ ဆွေꩻနွေꩻဆာဆာဗာႏအရန်းနဝ်ꩻ ပအိုဝ်ႏကို အဝ်ႏလိုႏအာငါႏဒွိုန်းက ထီႏနုဲင်းနဝ်ꩻသွူ။ အစွိုꩻစွုမ်ႏအွဉ်ငါသီး စွုမ်ႏဖြာꩻဖြာꩻသꩻကို ထာꩻခံႏစာꩻတွမ်ႏ ဆန္ဒကမဉ်ထွာယို ဗွိုန်ပီငါႏတွော့ꩻ ဒေါ့ꩻထန်ႏငဝ်းလဲ့ ဗွိုန်ပီဝင်ꩻနဝ်ꩻ "မာꩻထမုဲင်ꩻမုဲင်ꩻတယဝ်း အဝ်ႏလိုႏထွာငါႏပအိုဝ်ႏတာႏ"ကရိုꩻဒါႏငဝ်းယို အဝ်ႏပါသော့ꩻနဝ်ꩻသွူ၊ ခမ်းသားငဝ်းအစွိုꩻ ကဗွောင်မီဒီယာသဉ်တန်ꩻယို ထွာပအိုဝ်ႏအစွိုꩻစွုမ်ႏ အွဉ်ငါသီးမော့ꩻခွဲးဒေါ့ꩻတွိုႏသꩻ ဖြော့ထန်ႏအီငဝ်းအခွင်ꩻ အရီးသွတ်ꩻလဲင်ႏလဲ့ အနာႏဂတ်ကိုမွူးရဝ်ꩻ မော့ꩻခွဲးထဲင်းအဝ်ႏလိုႏငါႏ ထီႏဗာႏနုဲင်းနဝ်ꩻသွူ။ ပအိုဝ်ႏကို အစွိုꩻစွုမ်ႏယို ထာꩻမဉ်ထွာအဝ်ႏဗွိုန်ပီဒျာႏလွဝင်ꩻအခါႏ မဉ်ႏဒေါ့ꩻရီယွဲးယွဲး၊ မဉ်ႏခံႏမော့ꩻခွဲးခွိုꩻခွိုꩻအချင်ꩻနဝ်ꩻ တညတဝ်းအခိန်ႏခါႏ အစွိုꩻအာခန်းလဲ့ ကကျိုꩻစာꩻဒါႏ ထာꩻမာꩻအာႏယို အီႏသဲင်ꩻအဝ်ႏဖြွမ်းလို့ဒျာႏ ပအိုဝ်ႏခမ်းသားမွိုးဖါအလောင်းနဝ်ꩻ အဆွုမ်ႏအဝ်ႏအွဉ်ႏနယ်လဲဉ်း မီဒီယာသွဉ်တန်ꩻအောင်ႏပွယ်ꩻ တဖူꩻဆွုမ်ႏနဝ်ꩻ ထီႏဗာႏနဝ်ꩻသွူ။