ပအိုဝ်ႏတစွိုးခွိုꩻလွုမ်း
"ပအိုဝ်ႏတစွိုးခွိုꩻလွုမ်းအရေꩻယို ပါꩻမုဲင်ꩻအီႏထွိုင်ႏမာꩻ" တယ်ႏနေင်ႏ ၂၀၁၀-မာꩻလွဉ်ယို နီမန်းခမ်းကိုယို မာꩻလွဉ်စခမ်းထီ အပြောင်ꩻအလုဲင်ႏနဝ်ꩻ အသန်တဗာႏ တပြောင်ꩻလုဲင်ႏတဝ်းစွဉ်ႏလဲ့ သင်ꩻရာꩻအခေႏနေႏ ယွယွသာႏသာႏ အဝ်ႏပြောင်ꩻလုဲင်ႏလွဉ်နဝ်ꩻ အဝ်ႏထီႏလွဗာႏသွူ၊ ယိုနဝ်ꩻ နဲင်ႏငံႏတောႏ အစိုးရ အဝ်ႏလက်ခံႏလွဉ်လဲဉ်းသွူ ခမ်းသားလွိုက်ရွေꩻဒင်ႏ အုပ်ချုတ်ရေꩻစနစ်သွူ။ အဝ်ႏနဝ်ꩻတဲင် မန်းတခမ်းလွုမ်းကို ကအဝ်ႏဒါႏခမ်းရင်ꩻသားယို ထွို့ꩻဗူႏလွေꩻလွ ပါတီဖုံႏတွော့ꩻ အုပ်ချုတ်ရေꩻခင်ႏလမ်းတထွောင်းယို ပါတီအစွိုꩻမုဲင်ꩻ၊ နမ်းခြောင်ꩻတင်ပါꩻမုဲင်ꩻ အုပ်ချုတ်နဝ်ꩻ တွမ်ႏခမ်းသား ထာꩻထောက်ခံႏ၊ ခမ်းသားဖေႏအာႏမဲတဲင် ထူႏလွေꩻခန်း အဆွုံꩻအဖျတ်သွူ။ နဝ်ꩻအကို နီပအိုဝ်ႏခမ်းရင်ꩻသားလဲ့ ထွို့ꩻဗူႏပွုံႏအထျꩻခံႏဥဒေႏကို အခန်ꩻ(၂)ပုဒ်မ(၅၆)(ဂ)အလꩻ ကအဝ်ႏထွို့ꩻခါꩻလဲဉ်းဒါႏ နီပအိုဝ်ႏခမ်းရင်ꩻသား နမ်းပဲင်ႏအုပ်ချုတ်ခွင်ꩻလꩻ သွံဝေင်ꩻနယ်ႏနဝ်ꩻအတွိုင်ꩻ ပအိုဝ်ႏစွိုးခွိုꩻအစွိုꩻ နွို့ခေးလွေꩻခန်းသွူ၊ ကလꩻလွဉ်ဒါႏ နမ်းပဲင်ႏအုပ်ချုတ်ခွင်ꩻ သွံဝေင်ꩻနယ်ႏနုဲင်းယိုနဝ်ꩻ ကထွာဒါႏ နုဲင်းပအိုဝ်ႏစွိုးခွိုꩻပါတီ အစွိုꩻအနေႏခြေင်ခြေင်လဲ့ အီႏထွာနွောင်ꩻဗာႏနဝ်ꩻ အယပ်ꩻပသာႏတန်ဒျာႏသွူ။ မဉ်ႏဒေါ့ꩻဗာႏ နီပအိုဝ်ႏခမ်းသား ထောက်ခံႏအာႏယို ထွာအထျꩻကရိုꩻနဝ်ꩻ နီပအိုဝ်ႏခမ်းသားလဲ့နဝ်ꩻ၊ ခမ်းသားလွိုက်ရွေꩻဒင်ႏ နမ်းခြောင်ꩻတင် အုပ်ချုတ်ရေꩻသားလဲ့နဝ်ꩻ အဝ်ႏလိုႏအွဉ်ႏတဖေင်ꩻတဝ်းသွူ။ နုဲင်းယိုခါ နီခမ်းသားဖုံႏ ထာꩻထင်းလဲ့နဝ်ꩻ၊ နမ်းခြောင်ꩻတင် အုပ်ချုတ်ရေꩻသား ထာꩻဒေါ့ꩻလဲ့နဝ်ꩻ နီနမ်းပဲင်ႏအုပ်ချုတ်ခွင်ꩻကလꩻယို နုဲင်းစွဉ်ႏ ကွပ်ဒျာႏစွိုးခွိုꩻပါတီစွိုꩻတွော့ꩻ လꩻလွဉ်လွိုႏလွိုႏ အရသာႏအဝ်ႏဖျော်တေားနုဲင်းနဝ်ꩻသွူ၊ တွိုႏနီခမ်းသားသီး ကသော့ꩻဖေႏရောင်လွ နဂါꩻမဲနဝ်ꩻ အွဉ်ႏတဖေင်ꩻထိုꩻလဲဉ်းဟောင်း၊ ကွပ်နီခမ်းသားသီး အာႏနဝ်ꩻတအာႏတဲင် နီပအိုဝ်ႏနမ်းပဲင်ႏ အုပ်ချုတ်ခွင်ꩻတာႏ ထွာအာႏအစဲစ်အမဲဉ်ႏသွူ။ ထွာနုဲင်းမုဲင်ꩻတယဝ်း ကလဲဉ်း ၂၀၁၀-ဗာႏကိုနဝ်ꩻ ပါတီနဲင်ႏငံႏရေꩻ ပေါႏလွဉ်စတဲင် နီပအိုဝ်ႏခမ်းသားတာႏ သွီႏဗော့ꩻသꩻဗော့ꩻ သော့ꩻခရာႏမဲနဝ်ꩻ အဝ်ႏဒျာႏပအိုဝ်ႏစွိုးခွိုꩻပါတီစွိုꩻလွုမ်ꩻတဲင် ပအိုဝ်ႏခမ်းသားတွမ်ႏ အုပ်ချုတ်ရေꩻသား ဖြွမ်းဖြွမ်းဗူႏဗူႏဝင်ꩻတွော့ꩻ မန်းခမ်းအရီးသွတ်ꩻ မဲခေးပွယ်ꩻကိုယို ပအိုဝ်ႏနမ်းပဲင်ႏအုပ်ချုတ်ခွင်ꩻနယ်ႏတာႏ အောင်ႏအောင်ႏမျင်ႏမျင်ႏ ဖျတ်ကာႏထူႏလွဉ်လꩻလဲဉ်းသွူ။ ကွဲးတွော့ꩻ မဲပွယ်ꩻထွူ တညတဝ်း နီနေင်ႏသွံနေင်ႏ အခိန်ႏခါႏတွင်ꩻကို ပါတီနဲင်ႏငံႏရေꩻယို အုံထွိုင်ႏဒျာႏတွမ်ႏ ခမ်းသားအာႏရဲင်ꩻနဝ်ꩻ ကသေနာႏသားနဝ်ꩻ အဝ်ႏသေနာႏဒျာႏလဲ့ အွိုးတသေနာႏတဝ်းသားနဝ်ꩻ တအွဉ်ႏရေꩻတဝ်းဒျာႏ နီခမ်းသားတွိုင်ꩻတွိုင်ꩻသွူ၊ အွဉ်ႏတန်ႏဖိုꩻတဝ်းဒျာႏ ခမ်းသားအာႏရဲင်ꩻလီꩻလီꩻသွူ။ နမ်းပဲင်ႏအုပ်ချုတ်ခွင်ꩻနယ်ႏကို နမ်းခြောင်ꩻတင်ပုဂ္ဂိုလ်ႏဖုံႏနဝ်ꩻ မဉ်ႏတွိုႏ နေင်ႏငါ ၂၀၁၅-တွမ်ႏဆုဲင်ꩻဆုဲင်ꩻသူꩻ ပအိုဝ်ႏခမ်းသား ဖေႏကပါ၊ ဖေႏကသေဖေႏအာႏချာဒျာႏ နီပအိုဝ်ႏစွိုးခွိုꩻပါတီနဝ်ꩻ နီပအိုဝ်ႏရပ်ရာႏ လွိုင်ႏကွိုန်ꩻရေꩻ၊ နီခမ်းသားထာꩻလိုႏဖုံႏ ဖေႏထဲမ်နွောင်ꩻရေꩻတာႏ အတတ်နွိုင်ႏသွတ်ꩻ အဝ်ႏကျိုꩻစာꩻမာꩻလွေꩻဒျာႏလဲ့ တွိုႏယင်းတဖဲ့ꩻ ပါတီအလောင်း နီခမ်းသား ထာꩻထီႏတစဲင်းသျင်ꩻအီတဝ်းဒါႏ စဲ့ꩻတွမ်ႏအာႏဏာႏတွော့ꩻ လောက်ꩻခမ်းသား၊ မာꩻနွောင်ꩻခမ်းသား၊ သိမ်ꩻခမ်းသား ဟံႏယာႏစတဲင်ယိုဖုံႏနဝ်ꩻ စွိုးခွိုꩻပါတီတွမ်ႏ ပအိုဝ်ႏခမ်းသားအခါႏ လဲဉ်းညာꩻထိုꩻအီနွောင်ꩻဒါႏအချက် တချက်နေနေကရိုꩻနဝ်ꩻလဲ့ အဝ်ႏလိုႏအွဉ်ႏသတိꩻဗာႏငါႏသွူ။ အွိုးပါတီဖဲ့ꩻနဝ်ꩻ အဝ်ႏထွားအဝ်ႏမာꩻဒျာႏ ခမ်းသားအကျိုꩻ၊ တွိုႏတဖဲ့ꩻနဝ်ꩻ ခမ်းသားအာႏယို နမ်းပဲင်ႏအုပ်ချုတ်ခွင်ꩻနယ်ႏ လꩻနွောင်ꩻရေꩻတာႏ ထွာအရေꩻတန်ငါႏအကျောင်ꩻ မဉ်ႏတသေနာႏတဝ်း၊ မဉ်ႏအဝ်ႏလွေꩻစွူစွူဗော့ꩻနုဲင်းယိုခါနဝ်ꩻ အဝ်ႏစွဉ်ႏစွိုးခွိုꩻပါတီလဲ့ ပအိုဝ်ႏခမ်းသား ဖေႏအာႏမဲ မဉ်ႏတအဲဉ်ထဝ်းနဝ်ꩻ အီႏထိန်ꩻသိမ်ꩻလွေꩻ ပအိုဝ်ႏနမ်းပဲင်ႏအုပ်ချုတ်ခွင်ꩻနယ်ႏနုဲင်းမုဲင်ꩻ။ နုဲင်းယိုခါ ပအိုဝ်ႏလိုꩻမျိုꩻခြာကို အဝ်ႏစွိုးခွိုꩻပါတီလွုမ်ꩻ တကာႏတဝ်းဒွုမ်၊ အဲန်အယ်လ်ဒီပါတီ၊ ကြံ့ခိုင်ရေးပါတီ၊ တစညပါတီ စတဲင်ပါတီယိုဖုံႏ အဝ်ႏဖျော်လွဉ်သော့ꩻအာလဲဉ်းသွူ၊ ပအိုဝ်ႏကအဝ်ႏသော့ꩻဒါႏ အဲန်အယ်လ်ဒီကိုသားလဲ့ ဝွေꩻပါတီတာႏ ဝွေꩻထုမ်ႏထွို့ꩻဗူႏဒျာႏတဖဲ့ꩻ၊ ပအိုဝ်ႏကအဝ်ႏသော့ꩻဒါႏ ကြံ့ခိုင်ရေးကိုသားလဲ့ ဝွေꩻပါတီတာႏ ဝွေꩻထုမ်ႏထွို့ꩻဗူႏဒျာႏခေါ်ခေါ် အမဉ်ႏလီထိုꩻလို့နုဲင်းယိုနဝ်ꩻ ပီအဲန်အိုပါတီတာႏ ပအိုဝ်ႏခမ်းသား အီႏအဝ်ႏကုဲင်နွောင်ꩻခွုင်းမုဲင်ꩻရျာꩻခေါင်ꩻနဝ်ꩻ ထွာယူႏခရာႏမွေးတဝ်းဟောင်း။ နဝ်ꩻမꩻ ယိုခါ ကထွာဒျာႏစဲ့ꩻလဲ့နဝ်ꩻ၊ နမ်းခြောင်ꩻအုပ်ချုတ်ရေꩻသားလဲ့နဝ်ꩻ ဖေႏနေးပအိုဝ်ႏခမ်းသား ကဆဲစ်ꩻထန်ႏဗာႏမွိုန်းတဝ်း ပါတီလောင်ႏလင်ကိုနဝ်ꩻ အဝ်ႏလိုႏမာꩻခိုးလျားတဝ်း ပအိုဝ်ႏခမ်းသားသွူ။ နုဲင်းယိုခါ အုပ်ချုတ်ခွင်ꩻ သွံဝေင်ꩻနယ်ႏအကို ဖေႏကလꩻလွိုထဲင်းနဝ်ꩻ အဝ်ႏလိုႏဖြွမ်းဝင်ꩻ ကျိုꩻစာꩻခိန်ႏဒျာႏသွူ။ ပီအဲန်အိုပါတီလဲ့ အဝ်ႏဒျာႏနမ်းပဲင်ႏအုပ်ချုတ်ခွင်ꩻ သွံဝေင်ꩻနယ်ႏအကို လွိုယို သွံဝေင်ꩻနယ်ႏအကို အဝ်ႏကုဲင်ဝင်ꩻနယ်ႏအလင် ဖြဝ်ꩻခမ်းကိုအစွစ်ꩻ၊ စောက်ꩻ၊ စောက်ꩻတနျာႏ၊ မဲင်ꩻ၊ ပဂိုꩻစတဲင်နယ်ႏကို ပအိုဝ်ႏလိုꩻမျိုꩻဖုံႏနမ်းခြောင်ꩻနဝ်ꩻ ပါꩻမုဲင်ꩻအီႏထွာဖေႏ၊ မဉ်ႏတမွေးတဝ်းလဲ့ ပအိုဝ်ႏတစွိုးခွိုꩻလွုမ်း နမ်းခြောင်ꩻယို ပါꩻမုဲင်ꩻအီႏမာꩻဖေႏ။ အဝ်ႏလိုႏဖြွမ်းဝင်ꩻကျိုꩻစာꩻ ခိန်ႏနုဲင်းယိုခါနဝ်ꩻ ပအမဖပါတီ သမ်းအဝ်ႏလွဉ်ထဲင်း၊ ပအိုဝ်ႏပါတီ နဲင်ႏငံႏရေꩻပုဂ္ဂိုလ်ႏသီးလဲ့နဝ်ꩻ၊ ခွုမ်မာꩻစွိုးခွိုꩻထာꩻမာꩻ အဖဲ့ꩻမုဲင်ꩻမုဲင်ꩻလဲ့နဝ်ꩻ ကအဝ်ႏမာꩻဒါႏ ပအိုဝ်ႏခမ်းထီရေꩻ၊ ပအိုဝ်ႏနဲင်ႏငံႏရေꩻယို အင်းမိုးလွေꩻ ပအိုဝ်ႏတခွိုꩻလွုမ်းပꩻပြုဲင်ရေꩻနဲ့၊ ပအိုဝ်ႏတခွိုꩻလွုမ်းလွောင်ႏဗူႏရေꩻနဲ့ အဝ်ႏလိုႏယူႏစဲင်းစဲင်းငါႏ၊ မဉ်ႏဗာႏလိုꩻလင်နဲင်ႏငံႏရေꩻ ပယောဂမဲ့ꩻ ယားချာပအိုဝ်ႏအာႏနဝ်ꩻ လိုႏထွာသင်ꩻတဝ်းသွူ။[၁][၂]