ပအိုဝ်ႏဒေႏသအွိုင်ႏ
"ပအိုဝ်ႏဒေႏသ အွိုင်ႏ၊ ဝေင်ꩻနယ်ႏꩻ ခမ်းနယ်ႏအုပ်ချွုတ်ရေꩻသားဖုံႏယို အဝ်ႏလိုႏမာꩻဖေႏ အုပ်ချွုတ်ရေꩻပညာႏသွဉ်တန်ꩻ" ခမ်းထီတဖြုံႏအကိုယို တယ်ႏခမ်းထီရေꩻ အထိုသွတ်ꩻအရန်း ဗꩻလင်ꩻဒုံဆောင်ႏရေꩻ လမ်းနားဟွိုန်ꩻရေꩻ အခင်ႏထျꩻအရန်း အဝ်ႏလွေꩻနေး အိုပ်ချွုတ်ရေꩻ အရန်းရန်းနဝ်ꩻသွူ၊ မြန်မာခမ်းထီကိုယိုလဲ့ တယ်ႏစွဉ်ႏခေတ်အသွုပ်သွုပ်ကိုကာႏ အိုပ်ချွုတ်ရေꩻအရန်းရန်းယို အဝ်ႏတဲမ်းထွို့ꩻခါꩻထွူနေးလဲဉ်း ခမ်းထီထွို့ꩻဗူႏပုံႏ အခေႏခံႏဥပဒေႏကိုနဝ်ꩻသွူ။ နုဲင်းမြန်ခမ်းထီယို အထိုသွတ်ꩻနဝ်ꩻ အိုပ်ချွုတ်ခမ်းထီအရန်း ခမ်ႏထီသမ္မတတောမ်ႏ ခမ်းထီအစိုႏရစွိုꩻ၊ လင်ꩻယင်းအိုပ်ချွုတ်ခမ်းနယ်ႏ/တွိုင်ႏဒေႏသတန်အရန်း ခမ်းနယ်ႏ/တွိုင်ႏဒေႏသတန် ဝွန်ႏတန်ချွုတ်တောမ်ႏ ခမ်းနယ်ႏ/တွိုင်ႏဒေႏသတန် အစိုႏရစွိုꩻ၊ အိုပ်ချွုတ်ခရဲင်ႏအရန်း ခရဲင်ႏအိုပ်ချွုတ်ရေꩻအတန်အကယ်ႏ၊ အိုပ်ချွုတ်ဝေင်ꩻနယ်ႏတာႏ ဝေင်ꩻနယ်ႏအိုပ်ချွုတ်ရေꩻအတန်အကယ်ႏ၊ အိုပ်ချွုတ်ရပ်ကွက်တောမ်ႏရပ်ဒုံ(ကျေးရွာအုပ်စု)တာႏ ရပ်ကွက်အိုပ်ချွုတ်ရေꩻမှူꩻတောမ်ႏ ရပ်ဒုံ(ကျေးရွာအုပ်စု)အိုပ်ချုပ်ရေꩻမှူꩻ၊ အိုပ်ထန်ꩻလမ်းနားဟွိုန်ꩻတာႏ အိုပ်ထိန်ꩻလမ်းနားဟွိုန်ꩻ (အိမ်ထောင်ဦးစီး)စတဲင် ခမ်းထီစုဗူႏပုင်ႏပွိုင် အရန်းရန်းနဝ်ꩻ အဝ်ႏလွေꩻနုဲင်းနဝ်ꩻသွူ။ နဝ်ꩻအကို ဟန်ႏသနီꩻ မြန်မာခမ်းထီနဝ်ꩻ တောမ်ႏခမ်းသားအမျိုꩻကျွိုက်၊ တောမ်ႏရပ်သားအမျာꩻလွိုက်ယို စအဝ်ႏဒျာႏလုမ်ꩻ အခေႏခံႏ အခင်ႏထျꩻသွတ်ꩻ အိုပ်ချွုတ်ရေꩻကထွာဒါႏ ရပ်ကွက်/ရပ်ဒုံအိုပ်ချွုတ်ရေꩻ အရန်းလုမ်ꩻနဝ်ꩻသွူ၊ ဒီမိုကရေစီစနစ် မိဉ်းထွာလွဉ်ထွန်ꩻကာꩻမွေးနဝ်ꩻ ရပ်ကွက်/ရပ်ဒုံအိုပ်ချွုတ်ရေꩻတဲ့နဝ်ꩻ၊ ဝေင်ꩻနယ်ႏအိုပ်ချွုတ်ရေꩻတဲ့နဝ်ꩻ၊ ခရဲင်ႏအိုပ်ချွုတ်ရေꩻတဲ့နဝ်ꩻ၊ ခမ်းနယ်ႏအိုပ်ချွုတ်ရေꩻတဲ့နဝ်ꩻ၊ ခမ်းထီအိုပ်ချွုတ်ရေꩻတဲ့နဝ်ꩻ အဝ်ႏဗာႏဒျာႏ ခမ်းသားသီးလွိုက်ရွေꩻစွဉ်ႏဗာႏလွဉ်းလွဉ်းနဝ်ꩻသွူ။ ကွဲးတွော့ꩻ မြန်မာခမ်းထီ ဟန်ႏသနီꩻနဝ်ꩻ နုဲင်းနဝ်ꩻတလꩻမွေးတဝ်းဒွုန်းနဝ်ꩻသွူ၊ ဥပဒေႏကိုလဲ့ တဲမ်းထွို့ꩻခါꩻ တလꩻအဝ်ႏတဝ်းဒွုန်းနဝ်ꩻသွူ။ မြန်မာခမ်းထီ အိုပ်ချွုတ်ရေꩻအရန်းရန်းကို ကထေင်းထမ်ႏဒါႏ တာႏဝွန်ႏသားဖုံႏနဝ်ꩻ ဥပဒေႏအလꩻ ယံအိုပ်ချွုတ်လွေꩻ၊ စီꩻကန်ꩻအဝ်ႏအဝ်ႏ ယံအိုပ်ချွုတ်လွေꩻ၊ ခုမ်မာꩻချွုတ်ဖေႏ တငီႏတငါဗာႏတဝ်းလိတ်၊ ကေပ်ꩻကောက်ꩻတငီႏတငါဗာႏတဝ်းရွဉ်၊ ပျဿနာႏမိဉ်းထွာလွဉ်နဝ်ꩻ ဆုင်ꩻဖျတ်ဖြေႏသျင်ꩻ အုံဗာႏတဝ်းပဉ်ဖဲ့ꩻဖဲ့ꩻ-စတဲင်စတဲင် ဆဲင်ႏရာꩻဖုံႏယို ထင်ႏသွဉ်ထူႏလွေꩻဗာႏရီးနေး သွဉ်တန်ꩻဖုံႏနဝ်ꩻသွူ၊ ထွာလဲဉ်းရပ်ကွက် အိုပ်ချွုတ်ရေꩻမှူꩻတဲ့နဝ်ꩻ၊ ဝေင်ꩻနယ်ႏအိုပ်ချွုတ်ရေꩻ အတန်အကယ်ႏတဲ့နဝ်ꩻ ဆဲင်ႏတောမ်ႏအိုပ်ချွုတ်ရေꩻခရာႏဖုံႏယို သွဉ်ထူႏဗာႏသေႏသေႏ သွဉ်တန်ꩻနဝ်ꩻသွူ။ နဝ်ꩻမꩻတဲင် ရပ်ကွက်အိုပ်ချွုတ်ရေꩻသား တဖြာꩻအနေႏ ကအီႏမာꩻတငီႏတငါဒါႏထာꩻ၊ ကအီႏတွဲႏတံႏ တငီႏတငါဒါႏဝင်ꩻ၊ ကအီႏကေပ်ꩻကောက်ꩻ တငီႏတငါဒါႏရွဉ်ဖုံႏယို မာꩻခွင်ꩻတအဝ်ႏတဝ်းနဝ်ꩻသွူ၊ ဝေင်ꩻနယ်ႏအိုပ်ချွုတ်ရေꩻ အတန်အကယ်ႏလဲ့ မာꩻခွင်ꩻအဝ်ႏတဝ်းသွူ။ ကွဲးတွော့ꩻ ဟန်ႏသနီꩻ ပအိုဝ်ႏလိုꩻမျိုꩻကို ပအိုဝ်ႏဒေႏသကို ကအဝ်ႏဒါႏ ပအိုဝ်ႏအိုပ်ချွုတ်ရေꩻ ယန္တရားယိုလဲ့ တယ်ႏစွဉ်ႏအွိုးစခေါင်ႏစခါကာႏ အဝ်ႏလွဉ်ထွူလဲဉ်းနဝ်ꩻသွူ၊ ဟန်ႏသနီꩻ ပအိုဝ်ႏအိုပ်ချွုတ်ရေꩻယိုနဝ်ꩻ အဝ်ႏလွေꩻအရန်းရန်းနေနေနဝ်ꩻသွူ၊ အထိုသွတ်ꩻနဝ်ꩻ ခမ်း၊ လင်ꩻယင်း ဝေင်ꩻနယ်ႏ၊ လင်ꩻယင်း အွိုင်ႏ၊ လင်ꩻယင်းဒုံ အဝ်ႏလွေꩻနုဲင်းယိုဖုံႏနဝ်ꩻသွူ။ ပအိုဝ်ႏအိုပ်ချွုတ်ရေꩻအရန်းရန်းကိုနဝ်ꩻ အီႏဒင်ႏဗာႏနုဲင်းမုဲင်ꩻ၊ အီႏလွိုက်ဗာႏနုဲင်းမုဲင်ꩻကရိုꩻယို စိမ်စွဉ်ႏဥပဒေႏအလꩻတဲ့သင်၊ မူဝါဒအလꩻတဲ့သင် ပအိုဝ်ႏခမ်းသားအမျိာꩻသီး အီႏသေထွꩻရိုမ်းဗာႏ တဲမ်းထွို့ꩻခါꩻ တအဝ်ႏတဝ်းနဝ်ꩻသွူ။ ဟန်ႏသနီꩻ ပအိုဝ်ႏအိုပ်ချွုတ်ရေꩻ အရန်းရန်းကို ထေင်းထမ်ႏတာႏဝွန်ႏတာႏ လွိုက်ရွေꩻဗာႏနုဲင်းမုဲင်ꩻ၊ ပါꩻမုဲင်ꩻဒင်ႏခွင်ꩻအဝ်ႏ၊ မိဉ်းခုမ်မာꩻနဝ်ꩻ ခုမ်မာꩻခွင်ꩻသက်တန်ꩻ အဝ်ႏလꩻခွုင်းမုဲင်ꩻနေင်ႏ၊ လိုꩻနုဲင်းမုဲင်ꩻစားနဝ်ꩻ ခုမ်မာꩻခွင်ꩻအဝ်ႏ-စတဲင် အွဉ်ႏထွော့ချက်ဖုံႏ ဖေႏခမ်းသားအမျာꩻကသေနဝ်ꩻ တဲမ်းဖြောင်ဖြောင်ဒေါင်ဒေါင် တအဝ်ႏတဝ်းနဝ်ꩻသွူ။ ခမ်းသားထွိုင်ႏတသေထွꩻရိုမ်းတဝ်း အခရောင်ꩻအခရာႏတဲင် ခမ်းသားပါဝင်ႏမုဖုံႏ တအဝ်ႏတဝ်းနဝ်ꩻသွူ၊ သꩻဝင်ႏစာꩻမုဖုံႏတဲ့ တထွာအီတဝ်းနဝ်ꩻသွူ၊ ခမ်းသားအမျာꩻသီး၊ လိုꩻကမိဉ်မာꩻဖေႏဒါႏ ဝင်ꩻအကျိုꩻ၊ ခမ်းသားအကျိုꩻ လိုꩻစေႏတနာႏအဝ်ႏ၊ လိုꩻသေလိုꩻဒါႏဖုံႏ ထွိုင်ႏသꩻတပါတဝ်း၊ လွိုက်ဗာႏနုဲင်းမုဲင်ꩻ ထွိုင်ႏတသေတဝ်းတဲင် လိုꩻနုဲင်းမုဲင်ꩻ ခုမ်မာꩻဖေႏ၊ လိုꩻအထီအသွီႏအဝ်ႏနုဲင်းမုဲင်ꩻခုမ်မာꩻဖေႏ၊ လိုꩻအကျင်ꩻတရာꩻ အဝ်ႏနုဲင်းမုဲင်ꩻခုမ်မာꩻဖေႏနဝ်ꩻ တသေထွꩻရိုမ်းတဝ်းဒုမ်နဝ်ꩻသွူ။ ယင်ဟန်ႏသားနဝ်ꩻ အထီအသွီႏအဝ်ႏနုဲင်းမုဲင်ꩻတဲ့ တသေတဝ်း၊ အကျင်ꩻတရာꩻ အဝ်ႏနုဲင်းမုဲင်ꩻတဲ့ တသေတဝ်း၊ အစေႏတနာႏ အဝ်ႏနုဲင်းမုဲင်ꩻတဲ့ တသေတဝ်း၊ ကထွာဒါႏ ဝွေꩻရပ်ဝွေꩻဒုံလိုꩻအမျာꩻတဲ့ တလွိုက်ဒင်ႏဗာႏတဝ်းနဝ်ꩻ အဝ်ႏထွာအဝ်ႏမာꩻလွေꩻလဲဉ်းနဝ်ꩻသွူ။ ဟန်ႏသနီꩻ ပအိုဝ်ႏသီးအိုပ်ချွုတ်ရေꩻ ယန္တရားယို အဝ်ႏဒျာႏခမ်းသားသီးအခါႏ ထွာထင်ႏတမွေးတဝ်း၊ ထွာဒျာႏလိုꩻတစွိုꩻ ခုမ်သဲဉ်ꩻခါꩻ၊ လွောက်ꩻဒျာႏမဲ့ငါ၊ ဗော့ꩻပါꩻမုဲင်ꩻ၊ သွီႏတဲ့ꩻခေါဝ်းပါꩻမုဲင်ꩻ၊ ပါꩻမုဲင်ꩻရွဉ်အာတဲ့ လွောက်ꩻဒျာႏရွဉ်မဲ့ငါ၊ ထွားဒျာႏ ထာꩻထွဉ်ႏအံႏဟဝ်ဖုံႏ၊ လိုꩻထာꩻအိုပ်ꩻအံႏပဲမ်ႏဝင်ꩻဒါႏဖုံႏနဝ်ꩻသွူ၊ လိုꩻစွို့ꩻစွဉ်ႏ၊ ခုမ်မာꩻယံ၊ ခုမ်မာꩻရုဲင်း၊ ခုမ်မာꩻမဲဉ်ႏ၊ ဒေါ့ꩻငေါဝ်းမဲဉ်ႏဖုံႏနဝ်ꩻ တလဲဉ်ႏထန်ႏထိုꩻလို့ဒျာႏနဝ်ꩻသွူ။ ပအိုဝ်ႏအိုပ်ချွုတ်ရေꩻယန္တရားကို ထေင်းထမ်ႏဒါႏတာႏဝွန်ႏတာႏ စီꩻကန်ꩻ၊ ဥပဒေႏ၊ မူဝါဒဖုံႏယို အဝ်ႏလိုႏတဲမ်းထွို့ꩻနေး သေႏချောင်းသေႏချာႏနဝ်ꩻသွူ၊ မိဉ်းမာꩻသွူ အိုပ်ချွုတ်ရေꩻအရန်းမုဲင်ꩻတရိုꩻတဝ်း ထာꩻမာꩻနုဲင်းမုဲင်ꩻဖုံႏနဝ်ꩻ မာꩻခွင်ꩻလꩻ၊ ထာꩻမာꩻနုဲင်းမုဲင်ꩻဖုံႏနဝ်ꩻ မာꩻခွင်ꩻလꩻတဝ်း-ပီအဲန်အို အစွိုꩻသီး တဲမ်းထွို့ꩻနေးမွေးတဝ်းတဲင် တောမ်ႏပအိုဝ်ႏခမ်းသားအမျာꩻသီး သꩻဆန္ဒတဲင် အဝ်ႏလိုႏတဲမ်းထွို့ꩻနဝ်ꩻသွူ။ ပအိုဝ်ႏလိုꩻမျိုꩻသီးနဝ်ꩻ နမ်းပဲင်ႏအိုပ်ချွုတ်ရေꩻ ယန္တရားအဝ်ႏနဝ်ꩻ မွေးဟဝ်ဒျာႏသွူ၊ ကွဲးတွော့ꩻ အိုပ်ချွုတ်ရေꩻယန္တရားကို ကထေင်းထမ်ႏဒါႏ တာႏဝွန်ႏလိုꩻဖုံႏယို ထွိုင်ႏတယံတဝ်း၊ အထီအသွီႏ ထွိုင်ႏအဝ်ႏတဝ်းတဲင် ပအိုဝ်ႏလိုꩻမျိုꩻ အိုပ်ချွုတ်ရေꩻတဲ့ မိဉ်ꩻတကုဲင်အီခြေင်၊ အိုပ်ချွုတ်ခံႏ ပအိုဝ်ႏခမ်းသား ပအိုဝ်ႏရပ်ဒုံသားဖုံႏတဲ့ သꩻဆင်ꩻရယ်ꩻဗာႏခြေင်၊ မော့ꩻဗာႏအီခြေင် ထာꩻဒုက္ခဖုံႏနဝ်ꩻသွူ၊ ကောပ်အထီအသွီႏဖုံႏယို လိုႏအပ်ချက်အဝ်ႏတဲင် မိဉ်ကေပ်ꩻကောက်ꩻရွဉ်မုဲင်ꩻခါတဲ့ ကေပ်ꩻဒျာႏ၊ မိဉ်တွဲႏတံႏတငီႏတငါဒုံသားတဲ့ တွဲႏတံႏဒျာႏ၊ မိဉ်ယွူးတငီႏတငါဒုံသားတဲ့ ယွူးဒျာႏ-စတဲင်ဖုံႏနဝ်ꩻ အဝ်ႏထီႏဗာႏခွိုꩻခွိုꩻနဝ်ꩻသွူ။ နဝ်ꩻမꩻ မိဉ်ႏပြောင်ꩻလုဲင်ႏတန်ꩻတဝ်းဒွုန်းလို့ꩻလဲ့ ပအိုဝ်ႏအိုပ်ချွုတ်ရေꩻယို ကထေင်းထမ်ႏဒါႏ တာႏဝွန်ႏလိုꩻပုဂ္ဂိုလ်ႏဖုံႏယို အစုပ်ယိုခါခါတဲ့နဝ်ꩻ၊ မိဉ်းတွိုႏဆုဲင်ꩻဆုဲင်ꩻအစုပ်ဖုံႏတဲ့နဝ်ꩻ အဝ်ႏလိုႏမာꩻလွေꩻဖေႏနေး အိုပ်ချွုတ်ရေꩻသွဉ်တန်ꩻနဝ်ꩻသွူ။[၁][၂]