ပအိုဝ်ႏနမ်းပဲင်ႏအုတ်ချွုတ်ခွင်ꩻလဒေႏသ
ပအိုဝ်ႏနမ်းပဲင်ႏအုတ်ချွုတ်ခွင်ꩻလꩻဒေႏသ ဟိုပုံꩻ၊ ပင်လောင်ꩻ၊ သီႏသဲင်ႏ ကပေါႏထန်ႏလွဉ်နောဝ်ꩻ ဗွိုန်ပီနုဲင်းခမ်းရင်ꩻသား အလင်ဖုံႏ နေင်ႏ၁၉၉၃ဗာႏ - ဗꩻတွိုႏလွေꩻ နေင်ႏ ၂၀၀၇ဗာႏ လာစက်တင်ဘာ(၃)နီꩻ ခမ်းပေါင်ꩻဗူႏ နုဲင်ႏငံႏတောႏငိမ်ꩻချံꩻသာႏယာႏရေꩻတွမ်ႏ ပြွူႏဖြိုရေꩻကောင်စီအစိုႏရစူꩻကိုခိန်ႏနောဝ်ꩻ နုဲင်ႏငံႏထွို့ꩻဗူႏပွုံႏ အခေႏခံႏဥပဒေႏတဗာႏ ဖေႏနေးကထွို့ꩻနွောင်ꩻနောဝ်ꩻ အမျိုꩻသာꩻညီႏလာႏခံႏအကို ဝေင်ꩻရန်ႏကွုန်ႏ ကျိုက္ကဆံကွင်ꩻတွမ်ႏ ညောင်နှစ်ပင်ကွင်ꩻအကိုနောဝ်ꩻ ဆွေꩻနွေꩻပွယ်ꩻပေါႏထန်ႏလွဉ် နောဝ်ꩻသွူ၊၊
နေင်ႏ ၁၉၉၅-ဗာႏ လာဧပြီ(၇)နီꩻနောဝ်ꩻ ကျိုက္ကဆံကွင်ꩻကို ကမာꩻလွေꩻဒါႏ စွိုးခွိုꩻညီႏလာႏခံႏ အကိုနောဝ်ꩻ နမ်းပဲင်ႏအုတ်ချွုတ်ခွင်ꩻလꩻခမ်းနယ်ႏ (မဉ်ႏတမွေးတောဝ်း) နမ်းပဲင်ႏအုတ်ချွုတ်ခွင်ꩻလꩻဒေႏသ အခန်ꩻကဏ္ဍယို ဖေႏကအွဉ်ႏထွော့ဖေႏနောဝ်ꩻ ပအိုဝ်ႏစွိုးခွိုꩻအွဉ်ငါကထွာဒါႏ ဖြားတန်အောင်ခမ်းထီနောဝ်ꩻ ခမ်းနယ်ႏ၊ဟံႏနယ်ႏ တအောဝ်ႏတောဝ်းဒွိုန်းခမ်းရင်ꩻသားဖုံႏ ကလꩻထွိုက်ကလꩻသင်ꩻဒါႏ အခွင်ꩻအရေꩻဖုံႏ နောဝ်ꩻလဲ့ ဖေႏကအွဉ်ႏထွော့သော့ꩻဖေႏပါနောဝ်ꩻ ကွီလꩻလွဉ်ဖေႏခန်းဒျာႏနောဝ်ꩻသွူ၊၊
နမ်းပဲင်ႏအုတ်ချွုတ် ခွင်ꩻလꩻဟံႏနယ်ႏ(မဉ်ႏတမွေးတောဝ်းလဲ့) နမ်းပဲင်ႏအုတ်ချွုတ်ခွင်ꩻလꩻဒေႏသ(၆)ဗာႏနောဝ်ꩻ -
၁၊၊ ဝ နမ်းပဲင်ႏအုတ်ချွုတ်ခွင်ꩻလꩻခမ်းနယ်ႏ (ဟိုပန်၊မိုင်းမော၊ပန်ဝိုင်၊နားဖန်း၊မက်မန်း၊ပန်ဆန်း(ခ)ပန်းခမ်း) ဝေင်ꩻနယ်ႏ ၆ ဗာႏ
၂၊၊ ပအိုဝ်ႏနမ်းပဲင်ႏအုတ်ချွုတ်ခွင်ꩻလꩻဒေႏသ (ဟိုပုံႏ၊ပင်လောင်ꩻ၊သီႏသဲင်ႏ) ဝေင်ꩻနယ်ႏ ၃ ဗာႏ
၃၊၊ ဓနုနမ်းပဲင်ႏအုတ်ချွုတ်ခွင်ꩻလဒေႏသ (ယေႏငံႏ၊ပင်ႏတရား) ဝေင်ꩻနယ်ႏ ၂ဗာႏ
၄၊၊ ပလောင်နမ်းပဲင်ႏအုတ်ချွုတ်ခွင်ꩻလꩻဒေႏသ (နမ့်ဆန်၊မန်တုံ) ဝေင်ꩻနယ်ႏ ၂ ဗာႏ
၅၊၊ ကိုးကန့်နမ်းပဲင်ႏအုတ်ချွုတ်ခွင်ꩻလꩻဒေႏသ (ကုန်ကြမ်း၊လောက်ကိုင်) ဝေင်ꩻနယ်ႏ ၂ ဗာႏ
၆၊၊ နာဂနမ်းပဲင်ႏအုတ်ချွုတ်ခွင်ꩻလꩻဒေႏသ (လေရှီး၊လဟယ်၊နန်းယွန်း) ဝေင်ꩻနယ်ႏ ၃ ဗာႏ
၂၀၀၈ ထွို့ꩻဗူႏပွုံႏအခေႏခံႏဥပဒေႏယို မွူႏနီꩻ-၁၀-၅-၂၀၀၈နီꩻနောဝ်ꩻ တပ်မတောႏ ကာႏကွယ်ႏရေꩻ အွဉ်ငါချွုတ်ပိုလ်ႏကယ်ႏတန်သန်းရွှေ တဲမ်ႏထိုးစူမုဲင်တဲင် ၂၀၀၈ ထွို့ꩻဗူႏပွုံႏအခေႏခံႏဥပဒေႏယို အွဉ်ႏထွော့ꩻ လွေꩻ ဖေႏမွေးအကျောင်ꩻ နေးတွမ်ႏကေႏညာႏအမုဲင် ၇/၂၀၀၈ တွော့ꩻ ကေႏညာႏလွေꩻဖေႏထွူနောဝ်ꩻမꩻ ပအိုဝ်ႏခမ်ႏရင်ꩻသားဖုံႏတဲ့ နမ်းပဲင်ႏအုတ်ချွုတ်ခွင်ꩻလꩻဒေႏသပေါႏ ထန်ႏလွဉ်ခန်းဒျာႏနောဝ်ꩻသွူ၊၊
အာႏကွိုꩻ
မွဉ်းဖျင်၂၀၀၈ ထွို့ꩻဗူႏပွုံႏအခေႏခံႏဥပဒေႏ လိတ်စောင်ꩻ