ပအိုဝ်ႏနဲင်ႏငံႏရေꩻပါတီသီး

"ပအိုဝ်ႏနဲင်ႏငံႏရေꩻပါတီသီး လွိုက်ရွေꩻပွယ်ꩻ မဲးအောင်ႏနွောင်ꩻခင်ႏလမ်းဖုံႏ ဖေႏကလꩻလွိုထဲင်းယို အဝ်ႏလိုႏမာꩻနုဲင်းမုဲင်ꩻ" မြန်မာခမ်းထီ ပါတီစွုမ်ႏလွိုက်ရွေꩻပွယ်ꩻတဲ့ မာꩻလွေꩻထွူလဲန်း ၂၀၂၀-ဗာႏ၊ နိုဝဲန်ဘာလာ ၈-နီꩻ၊ လွိုက်ရွေꩻပွယ်ꩻကို ကနွို့ခေးပြဲင်ႏဒါႏ နဲင်ႏငံႏရေꩻပါတီ ၉၁-ဗာႏအကို မဲးအောင်ႏနွောင်ꩻနဝ်ꩻ အဝ်ႏလွေꩻ ၁၉-ပါတီ သေထွေꩻလွေꩻဗာႏ ကောမသိဉ်ထေထန်ႏချက်အလꩻနဝ်ꩻသွူ၊ အခေႏခံႏတောမ်ႏ မန်းခမ်းကို ပါတီတန်နဝ်ꩻ နွောင်ꩻ(၂)ပါတီ၊ ခမ်းရင်ꩻသားပါတီနဝ်ꩻ နွောင်ꩻ(၁၇)ပါတီနဝ်ꩻသွူ၊ ခမ်းရင်ꩻသားပါတီ (၁၇)ဗာႏအကို ကနွို့ထင်ႏနွောင်ꩻ ခမ်းခြွောန်းဗူႏလွတ်တောႏကိုနဝ်ꩻ အဝ်ႏလွေꩻ(၁၁)ပါတီနဝ်ꩻသွူ။ ခမ်းခြွောန်းဗူႏလွတ်တောႏကို အီႏအဝ်ႏလွေꩻ (၁၃)ပါတီ၊ ခမ်းရင်ꩻသားပါတီ(၁၁)ပါတီအကို ရုဲင်ꩻတသွိုးပအိုဝ်ႏဒေႏသ နဲင်ႏငံႏရေꩻအတာႏတဲ့မွေးမွေး၊ ဟိုပုံꩻ၊ သီႏသဲင်ႏ၊ ပင်လောင်ꩻ ခမ်းသားနမ်းခြောင်ꩻတင်တဲ့မွေးမွေး၊ ပအိုဝ်ႏစွိုးခွိုꩻအစွိုꩻချုက် PNO ပါတီတဲ့ အဝ်ႏပါသော့ꩻလွေꩻ လွတ်တောႏခင်ႏလမ်း လစ်ꩻထွောင်းတာႏ လစ်ꩻဖြာꩻနဝ်ꩻသွူ။ မိဉ်းတဲက်ထွားဗာႏ ကနွို့နွောင်ꩻခမ်းခြွောန်းဗူႏ လွတ်တောႏကိုယို အအာသွတ်ꩻနဝ်ꩻ မန်းပါတီနီဗာႏ ကထွာ NLD ပါတီ ၃၉၆-ဖြာꩻတောမ်ႏ USDP ပါတီ ၃၃-ဖြာꩻသွူ၊ ကနွို့နွောင်ꩻ ခမ်းခြွောန်းဗူႏလွတ်တောႏကို ဖြာꩻပေါင်ꩻအအာသွတ်ꩻ ခမ်းရင်ꩻသားပါတီနဝ်ꩻ ရှမ်းတိုင်းရင်းများဒီမိုကရေသီအဖွဲ့ချုပ် SNLD ပါတီ ၁၅-ဖြာꩻ၊ နဝ်ꩻထွူ ရခိုင်အမျိုးသားပါတီ ၈-ဖြာꩻ၊ တအာင်း(ပလောင်)အမျိုးသားပါတီ ၅-ဖြာꩻ၊ မွန်ညီညွတ်ရေးပါတီ ၅-ဖြာꩻ၊ ပအိုဝ်ႏစွိုးခွိုꩻအစွိုꩻချုက်ပါတီ ၄-ဖြာꩻ စတဲင်အဝ်ႏလွေꩻနုဲင်းနဝ်ꩻဖုံႏသွူ။ ပအိုဝ်ႏစွိုးခွိုꩻအစွိုꩻချုက်ပါတီ ကလꩻခမ်းခြွောန်းဗူႏလွတ်တောႏ နမ်းခြောင်ꩻလစ်ꩻဖြာꩻနဝ်ꩻ ဟိုပုံꩻဝေင်ꩻနယ်ႏ ခမ်းသားလွတ်တောႏ၊ သီႏသဲင်ႏဝေင်ꩻနယ်ႏ ခမ်းသားလွတ်တောႏ၊ ပင်လောင်ꩻဝေင်ꩻနယ်ႏ ခမ်းသားလွတ်တောႏတောမ်ႏ ပအိုဝ်ႏနမ်းပဲင်ႏအိုပ်ချုက်ခွင်ꩻလꩻဒေႏသ (ဟိုပုံꩻ၊ သီႏသဲင်ႏ၊ ပင်လောင်ꩻ)အမျိုꩻသာꩻလွတ်တောႏ စစွောန်ႏခင်ႏလမ်း ယိုလစ်ꩻထွောင်းတာႏ လစ်ꩻဖြာꩻနဝ်ꩻသွူ။ ပအိုဝ်ႏနမ်းပဲင်ႏအိုပ်ချုက်ခွင်ꩻလꩻဒေႏသကို မဲးဆန္ဒနယ်ႏခင်ႏလမ်း (၁၀)ထွောင်းယို ပအိုဝ်ႏစွိုးခွိုꩻအစွိုꩻချုက်ပါတီနဝ်ꩻ ၂၀၁၀၊ ၂၀၁၅၊ ၂၀၂၀-လွိုက်ရွေꩻပါယ်ꩻသိုမ်လဲင်ႏယို နွောင်ꩻတရျꩻလွေꩻလဲန်းနဝ်ꩻသွူ၊ ကွဲးတွော့ꩻတဲင် ပအိုဝ်ႏလိုꩻမျိုꩻတဲ့ ကအဝ်ႏအုံသော့ꩻအာဒျာႏ တောင်ႏကီꩻဝေင်ꩻနယ်ႏယို တယ်ႏ ၂၀၁၀-မာꩻလွောန်ယို ပအိုဝ်ႏစွိုးခွိုꩻအစွိုꩻချုက်တဲ့နဝ်ꩻ၊ ပအိုဝ်ႏနဲင်ႏငံႏရေꩻသားတဲ့နဝ်ꩻ အီႏနွောင်ꩻလꩻနဝ်ꩻ တအဝ်ႏတဝ်းဒွုန်းနဝ်ꩻသွူ။ မိဉ်းယူႏထွားဒျာႏ ပအိုဝ်ႏလိုꩻမျိုꩻဖြာꩻပေါင်ꩻ အဆေ့ꩻအအာတဲ့နဝ်ꩻ၊ မိဉ်းထွားဒျာႏ ပအိုဝ်ႏနမ်းပဲင်ႏအိုပ်ချုက်ခွင်ꩻလꩻဒေႏသ သိုမ်ဝေင်ꩻနယ်ႏတဲ့နဝ်ꩻ မိဉ်းတသေထွꩻတဝ်း ဖူးဝေးခမ်းရင်ꩻသားလောင်ႏလင်သီး နဲင်ႏငံႏရေꩻအခေႏအနေႏနဝ်ꩻ ပအိုဝ်ႏလိုꩻမျိုꩻတောမ်ႏ ပအိုဝ်ႏနဲင်ႏငံႏရေꩻယို နုဲင်းစွောန်ႏအဝ်ႏမွေးဒျာႏလွိုႏလွိုႏသွူ။ မိဉ်းထွားလွေꩻဒျာႏ ဖူးဝေးပလောင်း (တအာင်း)လိုꩻမျိုꩻသီး နဲင်ႏငံႏရေꩻနဝ်ꩻ လွတ်တောႏအထန်ႏနဲင်ႏငံႏရေꩻနဝ်ꩻ ဒေါ့ꩻတဝ်းဒုမ်၊ လွတ်တောႏကို နဲင်ႏငံႏရေꩻငါ လွတ်တောႏသက်တန်ꩻသိုမ်လဲင်ႏလဲန်း နမ်းပဲင်ႏအိုပ်ချုက်ခွင်ꩻလꩻဒေႏသ အဝ်ႏနီဝေင်ꩻနယ်ႏလုမ်ꩻနဝ်ꩻ လွတ်တောႏအမတ် နွောင်အာလꩻလွိုထဲင်း ပအိုဝ်ႏနမ်းပဲင်ႏအိုပ်ချုက်ခွင်ꩻလꩻဒေႏသ ကအဝ်ႏသိုမ်ဝေင်ꩻနယ်ႏနဝ်ꩻသွူ၊ ၂၀၁၀-တဲ့နဝ်ꩻ၊ ၂၀၁၅-တဲ့နဝ်ꩻ နမ်းပဲင်ႏအိုပ်ချုက်ခွင်ꩻလꩻဒေႏသ ကအဝ်ႏသိုမ်ဝေင်ꩻနယ်ႏ ပအိုဝ်ႏယို လွတ်တောႏခင်ႏလမ်းကားလို့ကို အနွောင်ꩻအဝ်ႏ(၁၀)ဖြာꩻ၊ နမ်းပဲင်ႏအိုပ်ချုက်ခွင်ꩻလꩻဒေႏသ ကအဝ်ႏနီဝေင်ꩻနယ်ႏပလောင်နဝ်ꩻ လွတ်တောႏခင်ႏလမ်းကားလို့ကို အနွောင်ꩻအဝ်ႏလွေꩻ(၁၁)နဝ်ꩻသွူ၊ ထွိုင်ႏတွိုႏ ၂၀၂၀-လွိုက်ရွေꩻပွယ်ꩻထွူယို လိုꩻမျိုꩻလိုꩻဖြာꩻပေါင်ꩻတဲ့ကအာလွို၊ နမ်းပဲင်ႏအိုပ်ချုက်ခွင်ꩻလꩻဒေႏသ ဝေင်ꩻနယ်ႏတဲ့ ကပိုႏလွိုဒါႏ ပအိုဝ်ႏလိုꩻမျိုꩻ၊ ပအိုဝ်ႏဒေႏသကို လွတ်တောႏနမ်းခြောင်ꩻအမတ် ထွိုင်ႏလွိုက်ဒင်ႏ အဝ်ႏလွောန်(၁၁)ဖြာꩻနဝ်ꩻ ကထွာဒါႏပလောင်လိုꩻမျိုꩻ၊ ပလောင်ဒေႏသကိုအတာႏ နမ်းခြောင်ꩻတင် အမတ်အဝ်ႏထင်ႏလဲန်း (၁၂)ဖြာꩻနဝ်ꩻသွူ။ နဝ်ꩻမꩻ မိဉ်းထွားချာဒျာႏ ပအိုဝ်ႏလိုꩻမျိုꩻကအဝ်ႏအုံအာဒါႏ ပအိုဝ်ႏလိုꩻမျိုꩻဒေႏသ၊ ပအိုဝ်ႏခြာကိုယို ပအိုဝ်ႏနဲင်ႏငံႏရေꩻနဝ်ꩻ သုမ်ꩻခန်ꩻဖဲ့ꩻနဝ်ꩻ တအဝ်ႏဖိုတဝ်းလဲ့ မိဉ်းတွက်ထွားတောမ်ႏ ပအိုဝ်ႏလိုꩻမျိုꩻအဖြာꩻပေါင်ꩻတောမ်ႏ ပအိုဝ်ႏဒေႏသဧရိယာႏနဝ်ꩻ ကလꩻထွိုက်ကလꩻသင်ꩻဒါႏ အခေႏအနေႏယို တထူႏလꩻလို့တဝ်း၊ တနွောင်ꩻလꩻလို့တဝ်းနဝ်ꩻ ထီႏဗာႏနဝ်ꩻသွူ၊ ဟိုပုံꩻ၊ သီႏသဲင်ႏ၊ ပင်လောင်ꩻနယ်ႏကိုယို ပအိုဝ်ႏလိုꩻမျိုꩻအဝ်ႏအာတဲင် ပအိုဝ်ႏနဲင်ႏငံႏရေꩻပါတီ နွောင်ꩻသော့ꩻချာနဝ်ꩻ အထွာသင်ꩻဒျာႏရင်ꩻသွူ၊ ကအဝ်ႏကုဲင်ဒါႏ ဝေင်ꩻနယ်ႏအလောင်ႏအလင်ကထွာ လွယ်လဲမ်၊ နမ့်စန်၊ မောက်ꩻမုဲင်ႏ၊ ညောင်ႏရွီႏ၊ တောင်ႏကီꩻ၊ ရောက်ꩻစောက်ꩻ၊ ကလောꩻ၊ လွယ်ကောႏဖုံႏကိုယို ပအိုဝ်ႏလိုꩻမျိုꩻနမ်းခြောင်ꩻ ပအိုဝ်ႏနဲင်ႏငံႏရေꩻပါတီနွောင်ꩻသော့ꩻသင်ꩻ၊ တနွောင်ꩻသော့ꩻသင်ꩻတဝ်းယို အဝ်ႏလိုႏသုင်ꩻသပ်လွေꩻငါႏဟဝ်ဟဝ်သွူ။ ပအိုဝ်ႏနဲင်ႏငံႏရေꩻပါတီ ကအဝ်ႏနီဗာႏယိုအလောင်း နေင်ႏတန်ႏတန်ꩻ အဝ်ႏလိုႏတွိုင်ႏပင်ႏဝင်ꩻ၊ အဝ်ႏလိုႏဆွန်ꩻစူဝင်ꩻလဲ့ ယိုနဝ်ꩻ တစွိုꩻတောမ်ႏတစွိုꩻ ဒေါ့ꩻခတ်ꩻဒျာႏဝင်ꩻ၊ ဒေါ့ꩻတေက်ꩻနျꩻချာဒျာႏဝင်ꩻနဝ်ꩻသွူ၊ ပအိုဝ်ႏနဲင်ႏငံႏရေꩻပါတီ ကအဝ်ႏနီဗာႏယို နဲင်ႏငံႏရေꩻအခါႏ သုင်ꩻလွေꩻအီဒျာႏ နဲင်ႏငံႏရေꩻပရိယာယ်ႏဖုံႏ၊ နဲင်ႏငံႏရေꩻလဲန်ကွက်ဖုံႏလꩻလဲ့ တစွိုꩻတောမ်ႏတစါိုꩻယို ယူႏထင်ႏတေား ခေးဖက်တဲင် ခွေစွိုꩻတဲ့မိဉ်လꩻ၊ နာꩻစွိုꩻတဲ့မိဉ်လꩻ တရိမ်ချာဒျာႏဝင်ꩻ၊ ခြေင်ႏချာဒျာႏဝင်ꩻ။ ပအိုဝ်ႏနမ်းပဲင်ႏ အိုပ်ချုက်ခွင်ꩻလꩻဒေႏသအထန်ႏဖဲ့ꩻ ဝေင်ꩻနယ်ႏအလင်ကို ပအိုဝ်ႏဒေႏသနမ်းခြောင်ꩻ ပအိုဝ်ႏနဲင်ႏငံႏရေꩻပါတီ ဖေႏကနွောင်ꩻနဝ်ꩻ ပအိုဝ်ႏနဲင်ႏငံႏရေꩻပါတီသီးဖုံႏ အဝ်ႏလိုႏမာꩻဗာႏနုဲင်းမုဲင်ꩻယို အဝ်ႏလိုႏထိုမ်ႏလဲန်းအနယ်ꩻသွူ။ တောင်ႏကီꩻဝေင်ꩻနယ်ႏ ပအိုဝ်ႏလိုꩻမျိုꩻအဝ်ႏသော့ꩻအာဒျာႏ၊ ပအိုဝ်ႏနဲင်ႏငံႏရေꩻပါတီ တနွောင်ꩻသော့ꩻတဝ်းနဝ်ꩻ နီသိုမ်လဲင်ႏလဲန်းသွူ။ ပအိုဝ်ႏနဲင်ႏငံႏရေꩻပါတီသီးဖုံႏ နေးတောမ်ႏထာꩻမိဉ်ထွာ တစွိုးလုမ်ꩻတွော့ꩻ ပအိုဝ်ႏလိုꩻမျိုꩻ အဝ်ႏသော့ꩻအာတွိုင်ꩻလဲ့ နွို့ခေးပြဲင်ႏသော့ꩻတွိုင်ꩻယို တထွာနွောင်ꩻတဝ်းနဝ်ꩻ အဝ်ႏလိုႏထူႏလဲန်းသွောန်ခန်ꩻအခြွိုက်ခြွိုက်ထွူ ကအဝ်ႏလိုႏထွာထွိုက်ဒါႏ နဲင်ႏငံႏရေꩻဖျင်ဆင်မုဖုံႏ၊ ပအိုဝ်ႏနဲင်ႏငံႏရေꩻပါတီ အဗာႏမုဲင်ꩻနွောင်ꩻသော့ꩻတယဝ်း ပအိုဝ်ႏပါတီချင်ꩻပေါင်ꩻဝင်ꩻ ထွို့ꩻနဲင်ႏငံႏရေꩻပရိယာယ်ႏဖုံႏ၊ တောမ်ထူႏနေး ဒေႏသတဗာႏအချက်ဖုံႏထွူ အခေႏခံႏတောမ်ႏအချက်နဝ်ꩻတဲင် ဆောမ်ꩻအငုဲင်ꩻ ယူႏကဝ်းရိတ်ခေႏနွောင်ꩻမုဖုံႏ၊ ကနွို့ခေးဒါႏ နမ်းခြောင်ꩻလောင်ꩻ အထီအသွီႏယို ဖေႏကလဲန်းတကတ်ꩻလွိုထဲင်း တဖဲ့ꩻခေးဖက်သားနဝ်ꩻ ပအိုဝ်ႏပါတီချင်ꩻ "ခွေအစွိုꩻလိုꩻမꩻ၊ နာꩻအစွိုꩻလိုꩻမꩻ"အွောန်ႏတဝ်းထာꩻစွယ်ꩻလမ်ꩻတဲင် အဝ်ႏလိုႏလက်ခံႏလွိုက်လွေꩻငါႏအကျောင်ꩻ ခမ်းသားငေါဝ်း တဲမ်းဖြုဲင်ꩻလွေꩻနယ်ဗာႏသွူ။