ပအိုဝ်ႏသိုမ်မျိုꩻငဝ်းဒေါ့ꩻရိုꩻ

ပအိုဝ်ႏသိုမ်မျိုꩻငဝ်းဒေါ့ꩻရိုꩻယဟန်ႏ

စင်းသင်း	ကွန်လုံ	ခြုဲင်း
ရွဉ်ယွယ်း	ရွောန်ယွဲး	ရှောန်ယွဲး
တခွန်ꩻ	တခုန်ꩻ	တကွုန်ꩻ
ဒျန်အျန်	ဒဲန်အဲန်	ဒျဲန်အျဲန်
တဖွတ်ꩻ	တဖေါတ်ꩻ	တဖွောတ်ꩻ
သွတ်ꩻဖူး	သုတ်ꩻဖူး	သွေပူး
တျမ်းလိက်	တဲမ်းလေက်	တျဲမ်းလေက်
ထျမ်ႏခင်ႏ	ဆဲမ်ႏခင်ႏ	ဆျဲမ်ႏခင်ႏ
အမ်ႏဒျန်	အမ်ႏဒဲန်	အံႏဒျဲန်

ပအိုဝ်ႏသီးငဝ်းသဘာဝ ပွိုးတဗိုန်တဝ်းလို့ဝင်ꩻနဝ်ꩻမꩻ လေက်မွူးယို ပေါႏတထူႏသုင်ꩻတဝ်း လေက်လွောင်ႏဗူႏနဝ်ꩻ မော့ꩻမွေးစွဉ်ႏထာꩻယပ်ꩻ။ ပအိုဝ်ႏသီးငဝ်းသဘာဝ အဝ်ႏကတမျိုꩻနဝ်ꩻ-

• ဗွေႏဗိုန်ထွဉ်ႏဒျာႏ၊ ခုန်ယိုန်ꩻခုန်ထုဲင်ႏ၊ လွယ်ပွတ်ꩻ၊ ဗွဉ်အောက်ꩻ၊ ဗေင်ႏခုမ်းမွောန်၊ ငဝ်းစွဉ်ႏနာႏယပ်ꩻ၊ မောက်ꩻအုန်ꩻ၊ သုန်ꩻဒွိုႏ၊ ထင်ႏရုမ်ꩻ၊ လိုꩻသုမ်ꩻ-စတဲင် ဗော့ꩻရာꩻငဝ်းလွောက်ꩻသွူ။
• စွောန်ꩻကြယ်ꩻစာႏဂ၊ ဟွုန်ဟဝ်၊ ဆေꩻကွုန်ꩻ၊ လဝ်းဟွုန်၊ ဗွိုန်စွောန်ႏ၊ သွုမ်ꩻခြေင်၊ မွိုတ်ဝင်ꩻ၊ လဲႏစွောတ်ꩻ၊ ပွေါတ်စင်၊ ဒွုတ်ꩻစင်-စတဲင် အွု+အွူ၊ အွို့+အွို၊ အွော့+အွော်-အဝ်

လို့နီမျိုꩻနဝ်ꩻမꩻ လေက်အထျꩻတဲႏမန်းတဲင် ပအိုဝ်ႏငဝ်းတာႏ ထွားထွင်ႏသော့ꩻဗာႏနေးစားနဝ်ꩻ သုင်ꩻတဲ့တလꩻတဝ်း၊ ပအိုဝ်ႏလေက်ကိုႏပဲင်ႏအဝ်ႏဒျာႏနဝ်ꩻ တသုင်ꩻတဝ်းနဝ်ꩻ ဗိုန်ဝင်ꩻ။ မန်းလေက်နဝ်ꩻ ကွိုꩻသမုတ်နေး၊ ပညတ်နေးဗာႏဒျာႏရင်ꩻ၊ လေက်ပအိုဝ်ႏယို ကွိုꩻသမုတ်နေး တလꩻတဝ်း၊ ပအိုဝ်ႏယို ငဝ်းခွင်ႏလုဲင်းငါႏ၊ ပအိုဝ်ႏငဝ်းတာႏ ပေါႏတအုံချာတဝ်း ပအိုဝ်ႏလေက်မွူးဖဲ့ꩻတဲမ်းအီချာနဝ်ꩻ တထွူနွောင်ꩻတဝ်း။

မန်းလေက်နဝ်ꩻ အဝ်ႏမဲင်ꩻလေက်ကိုထွင်ႏ၊ မဲင်ꩻလေက်နဝ်ꩻ အဝ်ႏပအိုဝ်ႏလေက်ကိုထွင်ႏ၊ ပအိုဝ်ႏလေက်နဝ်ꩻ အဝ်ႏပါဠိလေက်ကိုထွင်ႏ၊ ပအိုဝ်ႏယိုခါ သမ်းလွေꩻအုံတေား မန်းလေက်ကိုထွင်ႏနဝ်ꩻ တရာꩻမဲန်ႏတဝ်း။ ပါဠိလေက်ကို "အေက်-အေင်၊ အေတ်-အေန်၊ အေပ်-အေမ်"ဖုံႏ မန်းငဝ်းကိုအဲန်ထဝ်း၊ "အောတ်-အောန်၊ အောအပ်-အောမ်"မန်းငဝ်းကိုသုင်ꩻတဝ်း၊ ပေါႏနီအဝ်ႏမန်းလေက်ကထွင်ႏနဝ်ꩻ ဗိုန်ထိုꩻဒျာႏ (ခွန်ဟော်ခံꩻ လွေꩻထွာဖေႏ ထာꩻကွီအမ်ႏသားသွောန်း)ဗိုန်ဝင်ꩻ၊ ခလꩻမော့ꩻတဝ်းဒွိုန်း ထာꩻမဲန်ႏခိင်ႏခါ အာႏကွိုꩻဗာႏဝင်ꩻဒျာႏရင်ꩻ၊ ဆရာႏရီးသား ခံႏယပ်ꩻနမ်း ထိုမ်ႏမော့ꩻလွဉ်လဲဉ်းသွူ ထာꩻမဲန်ႏနုဲင်းယိုခါ ပေါႏနီတထူႏသွုပ်ငါလွေꩻတဝ်းနဝ်ꩻ လောကကို နီယိုထွာဒျာႏ တပဲ့ꩻမွိုက်တဖြာꩻတဲင် မဲ့ꩻဝင်ꩻငဟိုမ်ဒါႏလိုꩻ။

ကမော့ꩻလွောန်ဒါႏ လေက်ပအိုဝ်ႏမဲန်ႏခရာႏ မီႏဒေါ့ꩻနယ်ဗာႏနဝ်ꩻ-

အွိုး ၁၉၇၀-ဗာႏနေင်ႏ၊ ၁၉၇၁-ဗာႏနေင်ႏ ဗိုလ်ချုပ်နေဝင်းစိုး ဝွေꩻမာꩻ"မြန်မာစာပေ ပြန်လည်စီစစ်ရေး"တဲင် လေက်တဲမ်းဆရာႏ (ဦးမာဃ၊ ဒဂုံဦးစန်းငွေ၊ နိုင်ပန်းလှ၊ ဦးဖေမောင်တင်၊ ဦးထွန်းဖေ၊ ဦးသောင်းလွင်၊ ဦးသိန်းဇံ၊ ပါမောက္ခဦးသန်းထွန်း)ကားစ မန်းလိုꩻဒါႏ ဆရာႏတန်သီးဖုံႏ ထွိုင်ႏဒင်ႏပျꩻနယ် ဝွေꩻသီးလေက်မန်းခရာႏ၊ တောမ်ႏနီပအိုဝ်ႏ အခြဲမ်တရျာꩻတောမ်ႏခမ်းကောင် ထွာဝင်ꩻပျဿနာႏတွင်ꩻ နီသွောန်းသီး ထီႏဗာႏသေဗာႏ လေက်မန်းဖဲ့ꩻ ပွိုးလေက်သမုတ်ပညတ် မော့ꩻအီအယပ်ꩻအခုဲင်ႏဖုံႏ၊ လေက်ဖေႏကအဝ်ႏ အီႏအဝ်ႏဗာႏနုဲင်းမုဲင်ꩻအကျောင်ꩻဖုံႏထွူ လိုꩻဒါႏဆရာႏတန်သီးဖုံႏ ကရိုꩻရောင်ဒါႏ လေက်ဖေႏကမဲန်ႏအီ အဝ်ႏဗာႏနုဲင်းမုဲင်ꩻ ဝွေꩻဗွေႏသီးမန်းတာႏ အဝ်ႏထီႏသွူထာꩻမဲဉ်ႏတဲ့ သုင်ꩻတလꩻတဝ်းဖုံႏ။ တွိုႏနဝ်ꩻခါ ကထင်ႏအွောန်ႏတဲက်ဆဲင်ႏဝင်ꩻ တောမ်ႏပအိုဝ်ႏသီးထာꩻလိုႏနဝ်ꩻ သေလွောန်အီဗာႏ ထီႏလွောန်အီဗာႏ ဝွေꩻသီးကရိုꩻဒါႏ ထာꩻမဲန်ႏနဝ်ꩻ အဲင်ႏကဲက်ဒျာႏ တောမ်ႏပအိုဝ်ႏငဝ်း ကထင်ႏထီႏထွူနဝ်ꩻမာꩻငါ (လုပ်သားပြည်သူ နေ့စဉ်သတင်းစာ-လေက်ဖဲ့ꩻဆဲင်ႏရာꩻဆောင်းပါး)ဖုံႏနဝ်ꩻ နီသွောန်းတဲမ်းထန်ႏ (ဤသို့လေ့လာ၍ ဤသို့တွေ့ပါသည်)လေက်စောင်ႏကို မီႏမဲန်လꩻတဲ့ ကျွꩻလွောန်ထူႏလꩻဒျာႏ။

ကထင်ႏမော့ꩻထွူ လေက်ထာꩻမဲန်ႏခါ ထင်ႏအော်ရီးခမ်းကောင်၊ ကျွိုက်သားတဲ့အဝ်ႏ၊ ကျွိုက်တဝ်းသားတဲ့အဝ်ႏ၊ တကျွိုက်တဝ်းသားနဝ်ꩻ အသဘော်ꩻတပေါက်တဝ်းဒျာႏ သေဗာႏနုဲင်းနဝ်ꩻတဲင် အသဖော်ꩻဖေႏကပေါက် အဝ်ႏကျိုꩻစာꩻအနေႏ လင်ꩻဒင်ႏပျꩻနယ်ပါ အခြဲမ်တရျာꩻ၊ အတွင်ꩻနဝ်ꩻ အဝ်ႏသုင်ꩻနေကဒျာႏ ဗိုန်ဖြားကျိုးဝဲင်းလေက်၊ ဗိုန်ဖြားကျိုးဝဲင်း တစူꩻတဝ်းတဲင် ဒင်ႏပျꩻနယ်တေား ဆရာႏခုန်ဝေးတန်၊ ဆရာႏခုန်ဝေးတန် သဘော်ꩻပေါက်တဲင် ဗိုန်ဖြားကျိုးဝဲင်းလေက်နဝ်ꩻ အွောန်ႏကုဲင် ထူႏသုင်ꩻတေားလေက်လွောင်ႏဗူႏ၊ ဝင်ꩻထင်ႏထူႏသုင်ꩻတဲင် ဟွုန်ဟဝ်ငါႏအနေႏ နီသွောန်းလင်ꩻထေကိုဗာႏလေက်ခမ်းဒေါမ်၊ သင်္ဃာႏခမ်းကောင်တဲ့ ရိုꩻတငါခန်းဒျာႏ နီသွောန်းထွာအခြဲမ်တရျာꩻသား။

နီပအိုဝ်ႏမီႏသုင်ꩻ လေက်လွောင်ႏဗူႏမူနဝ်ꩻ မန်းခမ်းကို ပအိုဝ်ႏယို အီႏထွာချာယင်း လိုꩻရာႏဇဝင်ႏတန်သားတဖြာꩻသွူတကာႏတဝ်း ပအိုဝ်ႏလေက်တဲ့ လွောင်ႏဗူႏပါ၊ ပအိုဝ်ႏမဲ့ငါတဲ့ အီႏတင်ႏလေလင်းလွောန်ထာꩻနဝ်ꩻ အဝ်ႏထီႏရီးစွောန်ႏ၊ ပွိုးနဝ်ꩻမꩻ တသျော့ꩻတဝ်း အဝ်ႏကျိုꩻစꩻလွေꩻဗာႏနုဲင်းယိုသွူ။