ပအိုဝ်ႏအမျိုꩻသာꩻရေꩻ

"ပအိုဝ်ႏအမျိုꩻသာꩻရေꩻသားဖုံႏ၊ ပအိုဝ်ႏနဲင်ႏငံႏရေꩻသားဖုံႏ အဝ်ႏမုဲင်ꩻဟောင်း? မာꩻတမုဲင်ꩻဟောင်း?" ပအိုဝ်ႏလိုꩻမျိုꩻသီးယို အုံအဝ်ႏသဲင်ꩻဒျာႏ မြန်မာခမ်းထီခင်ႏလမ်းစွစ်ꩻစဲစ်ꩻကိုနဝ်ꩻသွူ၊ နဝ်ꩻမꩻလဲ့ စွုမ်ႏထွောင်းစွုမ်ႏရပ်ရာႏကို ကအဝ်ႏအုံဒါႏ ပအိုဝ်ႏလိုꩻမျိုꩻ၊ ပအိုဝ်ႏစွိုးခွိုꩻသီးဖုံႏယို ပအိုဝ်ႏလိုꩻမျိုꩻ ဖေႏကထိုꩻမားဗာႏပုဲင်ႏမွုန်းနဝ်ꩻ အွဉ်လွဝင်ꩻထိန်ꩻသိမ်ꩻချာ ပအိုဝ်ႏလိုꩻမျိုꩻငေါဝ်းငွါ လိတ်လုဲင်ꩻတောမ်ႏ လိုꩻမျိုꩻအကွဉ်အကꩻယေန်ႏငဲးဖုံႏနဝ်ꩻသွူ။ ကထိန်ꩻသိမ်ꩻလွဉ် ယေန်ႏငဲးအကꩻအကွဉ်တောမ်ႏ ကသွဉ်ထူႏမာꩻစွစ်ꩻလီ လိတ်လုဲင်ꩻအရေꩻဖုံႏယို တောမ်ႏသံႏဃာႏအာႏရဲင်ꩻလဲ့ အဝ်ႏဒျာႏ၊ တောမ်ႏဝါႏသနာႏ လိုꩻမျိုꩻရေꩻအာႏရဲင်ꩻလဲ့ အဝ်ႏဒျာႏ၊ တောမ်ႏနဲင်ႏငံႏရေꩻသားအာႏရဲင်ꩻလဲ့ အဝ်ႏဒျာႏ၊ တောမ်ႏအာႏရဲင်ꩻအဖဲ့ꩻဖဲ့ꩻအခဝ်ခဝ်တဲင် အွဉ်လွဝင်ꩻထိန်ꩻသိမ်ꩻလွဉ်နဝ်ꩻ ဗꩻတွိုႏလွဉ်စွဉ်ႏ ဟန်ႏသနီꩻနဝ်ꩻသွူ။ ကထိန်ꩻသိမ်ꩻလွဉ် ပအိုဝ်ႏလိုꩻမျိုꩻ၊ ပအိုဝ်ႏငဝ်းငွါလိတ်လုဲင်ꩻတောမ်ႏ ပအိုဝ်ႏယေန်ႏငဲး ကွဉ်ကꩻယို ပအိုဝ်ႏလိုꩻမျိုꩻ အာႏကတလာဒါႏ အရပ်ဒေႏသ၊ ပအိုဝ်ႏလိုꩻမျိုꩻ ကအာဒါႏ ဒေႏသကိုဖုံႏနဝ်ꩻ ထိန်ꩻသိမ်ꩻမုꩻဖုံႏ၊ ဒေါ့ꩻဖြဝ်ႏမုဖုံႏ၊ ခြွိုင်းကွဉ်ကꩻမုဖုံႏယို အာႏအဝ်ႏဟဝ်ဒျာႏ၊ နုဲင်းစွဉ်ႏ အဝ်ႏမွေးဒျာႏနေနေနဝ်ꩻသွူ။ ကွဲးတွော့ꩻ ကထွာဒါႏ ပအိုဝ်ႏလိုꩻမျိုꩻခြေင်ခြေင် အုံအဝ်ႏလုမ်ꩻ တမွေးတဝ်းဒါႏ နုဲင်းပအိုဝ်ႏဒေႏသ အကူအနားကိုဖုံႏ၊ တောမ်ႏလိုꩻမျိုꩻလင် အုံအဝ်ႏညီꩻဗာႏဝင်ꩻဒေႏသကိုဖုံႏ၊ ခမ်းထီအခေႏနေႏ တခြင်တဝ်းဒါႏ အရပ်ကိုဖုံႏနဝ်ꩻ ယပ်ꩻယပ်ꩻခုဲင်ႏခုဲင်ႏ ထိန်ꩻသိမ်ꩻလွဉ်ဗာႏ လိုꩻမျိုꩻငေါဝ်းငွါလိတ်လုဲင်ꩻ တောမ်ႏယေန်ႏငဲးကွဉ်ကꩻနဝ်ꩻ အွိုးကအုံဒါႏ ပအိုဝ်ႏနယ်ႏကူနယ်ႏနားသားသူꩻ အသေသွတ်ꩻနဝ်ꩻသွူ။ အခဝ်တွို့ꩻထင်ꩻဖဲ့ꩻ ကထွာဒါႏ နုဲင်းပင်ႏတရားဝေင်ꩻနယ်ႏကို ကျုံးဒေႏသတရွေꩻ၊ တောမ်ႏတွို့ꩻထင်ꩻလွေꩻယင်း ပအိုဝ်ႏဒုံတရွေꩻဖုံႏနဝ်ꩻ ဒေါ့ꩻပအိုဝ်ႏငေါဝ်းငွါꩻ သွဉ်ထူႏဗာႏ လိတ်ပအိုဝ်ႏဖုံႏနဝ်ꩻ အာႏပေႏမု အဝ်ႏလွဉ်နေနေနဝ်ꩻသွူ၊ အာႏပေႏနေးမုဲင်ꩻဟောင်းနဝ်ꩻ ပအိုဝ်ႏအကွဉ်အကꩻဖုံႏယို ခြွိုင်းကွဉ်ကꩻကွဲးဆေ့ꩻသဲင်ꩻ၊ ကွဲးစꩻသဲင်ꩻ၊ ပအိုဝ်ႏလိတ်လုဲင်ꩻဖုံႏယိုလဲ့ တသွဉ်ဗာႏထွာငါႏတဝ်းဒွုမ်၊ ယရပ်ရပ်နဝ်ꩻ မဲဉ်သွဉ်ငါႏလိတ်ပအိုဝ်ႏလဲ့ ကအီႏသွဉ်ဖေႏ လိတ်ပအိုဝ်ႏဆရာႏအဲဉ်ထဝ်း၊ အီႏကွီကူႏညီႏဗာႏ အမျိုꩻသာꩻရေꩻသားနဲ့၊ အီႏကွီကူႏညီႏဗာႏ နဲင်ႏငံႏရေꩻသားနဲ့၊ အီႏကွီကူႏညီႏဗာႏ လိတ်လုဲင်ꩻတောမ်ႏယေန်ႏငဲးနဲ့ ထိုမ်ႏအဆုမ်ႏ တသူႏသေတဝ်းတဲ့ သေထွꩻဗာႏ ဒေႏသခံႏသားထျꩻနဝ်ꩻသွူ။ အခဝ်ထင်ꩻ ရောက်ꩻစောက်ꩻဝေင်ꩻနယ်ႏဖုံႏ၊ ပင်ႏတရားဝေင်ꩻနယ်ႏဖုံႏယို ဒုံကိုဖုံႏနဝ်ꩻ ပအိုဝ်ႏလိုꩻမျိုꩻတောမ်ႏ ဖြဝ်ꩻလိုꩻမျိုꩻ အုံအဝ်ႏညီꩻဝင်ꩻတဲ့ အဝ်ႏဒျာႏ၊ ပအိုဝ်ႏလိုꩻမျိုꩻတောမ်ႏ ဓနုလိုꩻမျိုꩻဖုံႏ အုံအဝ်ႏညီꩻဝင်ꩻတဲ့ အဝ်ႏဒျာႏ၊ ကွဲးတွော့ꩻ ကထွာဖူးဝေးဖြဝ်ꩻလိုꩻမျိုꩻ၊ ဖူးဝေးဓနုလိုꩻမျိုꩻဖုံႏနဝ်ꩻ ရပ်သားအထျꩻ၊ ဒုံသားအထျꩻ၊ ခမ်းသားအထျꩻယို နဲင်ႏငံႏရေꩻအလꩻတဲ့နဝ်ꩻ၊ အမျိုꩻသာꩻရေꩻအလꩻတဲ့နဝ်ꩻ နဲင်ႏငံႏရေꩻသား၊ အမျိုꩻသာꩻရေꩻသားဖုံႏယို ခွိုꩻခွိုꩻဝင်ꩻအဝ်ႏလင်ꩻမော့ꩻခွဲးဖေႏနဝ်ꩻသွူ။ ပအိုဝ်ႏလိုꩻမျိုꩻကို နုဲင်းကအဝ်ႏခုမ်မာꩻဒါႏ နဲင်ႏငံႏရေꩻသားဖုံႏ၊ ပအိုဝ်ႏအမျိုꩻသာꩻရေꩻသားဖုံႏ လွေꩻအဝ်ႏလို့အွိုးမုဲင်ꩻကိုဟောင်း၊ ကအဝ်ႏဒေါ့ꩻ ကအဝ်ႏခြောဝ် "မာꩻလိုꩻမျိုꩻရေꩻ၊ မာꩻစွိုးခွိုꩻရေꩻ၊ မာꩻအမျိုꩻသာꩻနဲင်ႏငံႏရေꩻဖုံႏ"ကရိုꩻဒါႏ ပအိုဝ်ႏလိတ်လုဲင်ꩻတောမ်ႏ ယေန်ႏငဲးရေꩻအစွိုꩻဖုံႏ၊ ပအမဖပါတီဖုံႏ၊ ပီအဲန်အိုပါတီဖုံႏ၊ အွိုးအကူအနားကို အမျိုꩻသာꩻရေꩻသꩻတလီး၊ စွိုးခွိုꩻရေꩻမောင်ꩻကော့ꩻချက် ဖေႏကမွန်ဗန်အီတာႏ ကအဝ်ႏလိုႏငါႏ စွဲးကမ်းလိုꩻမျိုꩻလိတ်လုဲင်ꩻရေꩻ၊ ဖေႏအာႏစွိုးခွိုꩻသꩻဓာတ်ရေꩻဖုံႏယို အမျိုꩻသာꩻရေꩻ မွေးတဝ်းဟောင်း။ ကောပ်စွဉ်ႏ အမျိုꩻသာꩻရေꩻဖဲ့ꩻဆဲင်ႏရာꩻ အကူႏအညီႏဖုံႏယိုတဲ့နဝ်ꩻ၊ စွိုးခွိုꩻရေꩻသꩻဓာတ်ဖဲ့ꩻဆဲင်ႏရာꩻ ဖေႏအာႏမုဖုံႏယိုတဲ့နဝ်ꩻ ထွိုင်ႏအာႏပေႏလွဉ်တဲင် ကထွာကီလဲဉ်း ပအိုဝ်ႏလိုꩻမျိုꩻလဲ့ ဗော့ꩻရာꩻယို ထွာထိုꩻဗာႏနဝ်ꩻ တဆေ့ꩻတဝ်းဒွုမ်နဝ်ꩻသွူ။ နုဲင်းယိုခါ ပအိုဝ်ႏလိုꩻမျိုꩻသီးဖုံႏယို မာꩻစွိုးခွိုꩻရေꩻတဲ့နဝ်ꩻ၊ မာꩻအမျိုꩻသာꩻရေꩻတဲ့နဝ်ꩻ အာႏဟဝ်အာႏတလာဗော့ꩻဒျာႏ ပအိုဝ်ႏလိုꩻမျိုꩻကအဝ်ႏအာခြာကိုလုမ်ꩻနဝ်ꩻသွူ၊ ပအိုဝ်ႏလိုꩻမျိုꩻအာခြာကိုမွုန်းတဲ့ ပွိုင်းဝွို့တောမ်ႏလိတ်လုဲင်ꩻရေꩻ၊ ယေန်ႏငဲးရေꩻဖုံႏယို ကကျိုꩻစာꩻသလောက်၊ ကခုမ်မာꩻသလောက်နဝ်ꩻ တဒါႏလꩻတဝ်းဏွုမ်ႏဖြာꩻယို၊ မောင်ꩻကော့ꩻအတွိုင်ꩻ တထွာလွဉ်တဝ်းဖုံႏယို အဝ်ႏအာဗောႏနေထာꩻကရိုꩻနဝ်ꩻ ခုမ်မာꩻသားစွုမ်ႏဖြာꩻ နမ်းအသေသွတ်ꩻသွူ။ နဝ်ꩻမꩻ ကအဝ်ႏညာꩻတောမ်ႏပအိုဝ်ႏခြာ အွိုးနယ်ႏကူနယ်ႏနား နုဲင်းဒါႏ ပင်ႏတရား၊ ရွာငံ၊ ရောက်ꩻစောက်ꩻ၊ နမ့်စန်၊ မွိုင်ꩻပန်ႏ၊ လင်ꩻခွိုꩻ၊ မောက်ꩻမုဲင်ꩻ၊ မွိုင်ꩻကွိုင်-စတဲင် နယ်ႏဖုံႏကို ကအဝ်ႏအုံဒါႏ ပအိုဝ်ႏလိုꩻမျိုꩻအတာႏ လိတ်လုဲင်ꩻတောမ်ႏယေန်ႏငဲးရေꩻ အစွဲးအကမ်းဖုံႏတဲ့နဝ်ꩻ၊ သꩻရက်စွိုးခွိုꩻ ဖေႏအာႏအစွဲးအကမ်းတဲ့နဝ်ꩻ၊ အမျိုꩻသာꩻရေꩻ အမျိုꩻသာꩻနဲင်ႏငံႏရေꩻ အစွဲးအကမ်းဖုံႏတဲ့နဝ်ꩻ သꩻဖေႏကဗွို့ꩻ သꩻဖေႏကဗော့ꩻဒျာႏ ပအိုဝ်ႏလိုꩻမျိုꩻယို နုဲင်းကထွာဒါႏ ပအိုဝ်ႏလိတ်လုဲင်ꩻတောမ်ႏ ယေန်ႏငဲးရေꩻအစွိုꩻဖုံႏ၊ ပအမဖပါတီဖုံႏ၊ ပီအဲန်အိုပါတီဖုံႏ အဝ်ႏလိုႏလယ်ႏထွားခူခူ ထွားစွစ်ꩻစွစ်ꩻတဲင် အဝ်ႏလိုႏအွဉ်ႏကုဲင်တဝ်း ပအိုဝ်ႏအမျိုꩻသာꩻရေꩻ၊ ပအိုဝ်ႏအမျိုꩻသာꩻနဲင်ႏငံႏရေꩻနဝ်ꩻသွူ။ မဉ်းထွားချာ အခိန်ႏခါႏ ကာႏလတဗာႏကို နဲင်ႏနေင်ႏ ၂၀၁၀-တဲနဝ်ꩻ၊ နေင်ႏ ၂၀၁၅-တဲ့နဝ်ꩻ အစွိုꩻကဲဉ်းအာအာနဝ်ꩻ မာꩻလွေꩻဒျာႏ အစွိုꩻနဲင်ႏငံႏရေꩻ၊ မဲဉ်လꩻလွေꩻဒျာႏအစွိုꩻတာႏ နဲင်ႏငံႏရေꩻခင်ႏလမ်းတဲင် ထူႏသုင်ꩻလွေꩻဒျာႏ ပအိုဝ်ႏလိုꩻမျိုꩻ ပအိုဝ်ႏခမ်းသားအာႏနဝ်ꩻသွူ။ ပအိုဝ်ႏခမ်းသားအတာႏ၊ ပအိုဝ်ႏအမျိုꩻသာꩻတာႏ ကအဝ်ႏလိုႏဒါႏနုဲင်းကီယိုဖုံႏ၊ "အစောက်အစဲင်ႏ အကူအနားကို ကအီႏတွိုႏဗာႏသွူ ပအိုဝ်ႏလိုꩻမျိုꩻ မွူးပြေ့ꩻဖဝဖုံႏယို အဝ်ႏလိုႏခမ်းသားမဲးကာႏလတဲ့နဝ်ꩻ၊ အဝ်ႏလိုႏတဝ်း ခမ်းသားမဲးကာႏလတဲ့နဝ်ꩻ ပါꩻအဖြာꩻမုဲင်ꩻမုဲင်ꩻလဲ့ တဖျော်တွိုႏလွဉ်တဝ်းတဲ့"အဝ်ႏခမ်းသားငေါဝ်းတရန်း တဲမ်းဖေႏသေတမာလွေꩻဗာႏ ပအိုဝ်ႏအမျိုꩻသာꩻရေꩻသားဖုံႏ၊ ပအိုဝ်ႏနဲင်ႏငံႏရေꩻသားဖုံႏနဝ်ꩻသွူ။