ပါရဂူခုန်ဝေးတန်

ဇာႏတိဒေႏသ မွိုးဖါနီပါꩻ

မဲင်ꩻခမ်းနယ်ႏ၊ သထုံႏဝေင်ꩻနယ်ႏ၊ နောင်ကလာꩻဒုံတန်ကို ကအဝ်ႏအုံဒါႏ ဦးထွန်းစိန်+ဒေါ်စောမေသီး ပို ၅-ဖြာꩻဖုံႏအကို ထွာပိုခိုရတနာႏ အဖြာꩻတလောင်ꩻနဝ်ꩻသွူ။

လွူးဖွါꩻနေင်ႏတွမ်ႏမဉ်ꩻပေႏခါ

လွူးဖွါꩻလင်ꩻ နေင်ႏ ၁၂၉၈-ဗာႏ၊ ဒဲဉ်ကံဆန်ꩻ(၄)နီꩻ၊ မွူးနီꩻ-အင်္ဂါႏ မွူးရဝ်ꩻခိုႏ (၈)နားရီႏခိန်ႏတဲင် မဉ်ꩻပေႏခါနဝ်ꩻ ဖန်ဖေႏ ခွန်စိုးမြင့်၊ လိုꩻဖုံႏကဟဲ့ꩻနဝ်ꩻတဲး ဟဲ့ꩻဒျာႏ "ခွန်တင်မောင်"နဝ်ꩻသွူ။

ဗုဲင်ႏသျင်ႏပထမလဲင်ႏ

နေင်ႏ ၁၃၁၂-ဗာႏနေင်ႏကိုနဝ်ꩻ မွိုးဖါနီပါꩻသီး ခံႏထွာဖေႏ ပစ္စေꩻလစ်ꩻပါꩻတကာႏ၊ သထုံႏဝေင်ꩻနယ်ႏ၊ နောင်ကလာꩻဒုံတန်၊ ဘုရားလေးကျောင်ꩻတွိုက်၊ တိုက်အုပ်ဆရာႏတောႏ ဘဒ္ဒန္တပညာဝံသနဝ်ꩻ ထွာဖေႏဥပဇ္ဈာယ်ႏဆရာႏတွော့ꩻ ဗုဲင်လွေꩻသျင်ႏထွူတဲင် ထွက်ထိုꩻချာသွူးစွဉ်ႏဒျာႏ အနေင်ႏနဝ်ꩻသွူ။

ဗုဲင်သျင်ႏဒုတိယလဲင်ႏ

၁၃၁၃-ဗာႏနေင်ႏကိုနဝ်ꩻ မွိုးဖါနီပါꩻသီး ခံႏထွာဖေႏယင်း ပစ္စေꩻလစ်ꩻပါꩻတကာႏ၊ သထုံႏဝေင်ꩻနယ်ႏ၊ နောင်ကလာꩻဒုံတန်၊ ဘုရားလေးကျောင်ꩻတွိုက်၊ တိုက်အုပ်ဆရာႏတောႏ ဘဒ္ဒန္တပညာဝံသနဝ်ꩻ ထွာဖေႏယင်းဥပဇ္ဈာယ်ႏဆရာႏ တလဲင်ႏတွော့ꩻ ဗုဲင်လွေꩻထဲင်ႏသျင်ႏဒုတိယလဲင်ႏနဝ်ꩻသွူ။

ဥပသမ္ပဒကံႏ ထွာထင်ႏရဟန်ꩻဘဝ

၁၃၁၈-ဗာႏနေင်ႏ၊ မွိုးဖါနီပါꩻသီး ခံႏထွာဖေႏယင်း ပစ္စေꩻလစ်ꩻပါꩻတကာႏ၊ သထုံႏဝေင်ꩻ၊ မြသပိတ်ကောင်ခင်ႏ၊ သဒ္ဓမ္မဇောတိကာရာမကျောင်ꩻတွိုက်ဆရာႏတောႏ ဘဒ္ဒန္တဦးမေဓာဝီနဝ်ꩻ ထွာဖေႏဥပဇ္ဈာယ်ႏဆရာႏတွော့ꩻ ထွာထင်ႏလွေꩻခန်း မျတ်ရဟန်ꩻဘဝနဝ်ꩻသွူ။

အောင်ႏမျင်ႏလွေꩻပွယ်ꩻရီလိတ်ဖုံႏ

၁၃၁၆-ဗာႏ၊ ဝေင်ꩻသထုံႏ၊ သုဝဏ္ဏဘူမိပရိယတ္တိသာသနဟိတအစွိုꩻတန် ပိဋကတ္တယပါရဂူ ပွယ်ꩻရီဖြေႏလိတ်အကိုနဝ်ꩻ တနေင်ႏချင်ႏ အောင်ႏလꩻလွေꩻ ပထမအရန်းတွမ်ႏ မဟာဝေယျာကရဏိကအတန်ꩻယင်၊ ပါဠိပထမပြန်ပွယ်ꩻရီလိတ်အကိုနဝ်ꩻ အောင်ႏလꩻလွေꩻ ပထမငယ်(အတန်ꩻပေႏ)ယင်နဝ်ꩻသွူ။ ၁၃၁၇-ဗာႏနေင်ႏ၊ အစိုႏရပါဠိပထမပြန်ပွယ်ꩻရီလိတ်နဝ်ꩻ ပထမလတ်(အတန်ꩻတလောင်ꩻ)တန်ꩻ၊ ဝေင်ꩻမောႏလမျင်ႏ၊ သုသမာစာရပွယ်ꩻရီလိတ်နဝ်ꩻ အောင်ႏပထမငယ်(အပေႏ)တန်ꩻတဲင် လꩻသကောလားဆိပ်ဆုꩻ၊ ဝေင်ꩻမောႏလမျင်ႏ၊ ပရိယတ္တိသဒ္ဓမ္မပါလပွယ်ꩻရီလိတ်ကိုနဝ်ꩻ ပထမရန်း အောင်ႏမျင်ႏလွေꩻလꩻနုဲင်းနဝ်ꩻသွူ။ ၁၃၁၈-ဗာႏနေင်ႏ ပိဋကတ္တယပါရဂူပွယ်ꩻရီလိတ်နဝ်ꩻ ဒုတိယရန်း ဝိနယဓရတန်ꩻယို လꩻပထမဆုꩻ၊ သုသမာစာရပွယ်ꩻရီလိတ်အကို ပထမလတ်(အတန်ꩻတလောင်ꩻ)တန်ꩻယို လꩻပါသကောလားဆိပ်ဆုꩻ၊ ၁၃၁၉-ဗာႏနေင်ႏ ပိဋကတ္တယပါရဂူပွယ်ꩻရီလိတ်အကို တတိယရန်း အာဘိဓမ္မိကအတန်ꩻယို အောင်ႏတနေင်ႏချင်ꩻ လꩻပထမဆုꩻ၊ အစိုႏရပါဠိပထမပြန်ပွယ်ꩻရီလိတ်ကိုနဝ်ꩻ အောင်ႏလꩻလွေꩻ ပထမကြီး(အတန်ꩻတန်)တန်ꩻနဝ်ꩻသွူ။ ၁၃၂၀-ဗွေနေင်ႏ ပိဋကတ္တယပါရဂူပွယ်ꩻရီလိတ်အကို စတုတ္ထရန်း ဒီဃဘာဏကတွမ်ႏ မဇ္ဈိမဘာဏကတန်ꩻယို တနေင်ႏချင်ꩻ လꩻပထမဆုꩻ၊ ၁၃၂၁-ဗာႏနေင် ပိဋကတ္တယပါရဂူပွယ်ꩻရီလိတ်အကို သတ္တမရန်း ခုဒ္ဒကဘာဏက(ဒုတိယကွို့ꩻ)တန်ꩻယို တနေင်ႏချင်ꩻ လꩻပထမဆုꩻ၊ နဲင်ႏငံႏတောႏအစိုႏရ ပါဠိတက္ကသိုလ်ႏ ဗဟိုႏစာချ(ချꩻလိတ်)တန်ꩻယို အောင်ႏလို့သွံကျမ်ꩻနဝ်ꩻသွူ။ ၁၃၂၂-ဗာႏနေင်ႏ ပိဋကတ္တယပါရဂူပွယ်ꩻရီလိတ်အကို ပဉ္စမရန်း အင်္ဂုတ္တရဘာဏကတွမ်ႏ သံယုတ္တဘာဏကတန်ꩻယို တနေင်ႏချင်ꩻ တွမ်ႏပါဠိဘာႏသာႏနေးတဲင် လꩻပထမဆုꩻ၊ ၁၃၂၃-ဗာႏနေင်ႏ ပိဋကတ္တယပါရဂူပွယ်ꩻရီလိတ်အကို ကအဝ်ႏကုဲင်ဒါႏ ဆဋ္ဌရန်း ခုဒ္ဒကဘာဏက(ပထမကွို့ꩻ)ယို တနေင်ႏချင်ꩻ တွမ်ႏပါဠိဘာႏသာႏနေးတဲင် လꩻပထမဆုꩻ၊ နဲင်ႏငံႏတောႏအစိုႏရ ဗဟိုႏစာချ(ချꩻလိတ်)တန်ꩻ သုတ်မဟာႏဝါႏ၊ သုတ်ပါထေယျပါဠိအဋ္ဌကထာႏဖုံႏယို အောင်ႏလွေꩻတွမ်ႏမျန်မာဘာႏသာႏဂုဏ်ႏထူꩻနုဲင်းနဝ်ꩻသွူ။

ကလꩻခါꩻဒါႏဗွဲ့တံꩻဆိက်ဖုံႏ

၁၃၁၉-ဗာႏနေင်ႏကို လꩻ ဝေင်ꩻသထုံႏ သုဝဏ္ဏဘူမိပရိယတ္တိသာသနဟိတအစွိုꩻတန်သီး "သာသနဇောတိပါလဓမ္မာစရိယဗွဲ့တံꩻဆိက်"။ ၁၃၂၁-ဗာႏနေင်ႏကိုနဝ်ꩻ လꩻ သုဝဏ္ဏဘူမိပရိယတ္တိသာသနဟိတအစွိုꩻတန်သီး "သာသနဟိတ ဂန္ထဝါစက အာစရိယဗွဲ့တံꩻဆိက်"တွမ်ႏ "နဲင်ႏငံႏတောႏအစိုႏရ ပါဠိတက္ကသိုလ်ႏ ဗဟိုႏစာချ(ချꩻလိတ်)တန်ꩻ "သာသနဓဇဓမ္မာစရိယဗွဲ့တံꩻဆိက်"။ ၁၃၂၃-ဗာႏနေင်ႏကိုနဝ်ꩻ ပိဋကတ်သွံဖုံႏ ပါဠိတောႏတန်ဖုံႏတွမ်ႏ နိကာယ်ငတ်ꩻပါꩻ ပါဠိတောႏတန်ဖုံႏလွုမ်ꩻတကာႏတဝ်း အဋ္ဌကထာႏ၊ ဋီႏကာႏ၊ ယောဇနာ၊ ဂဏ္ဌိ၊ အနု၊ မဓု၊ စူနယ်ႏ(လက်သန်း) ကားတဲင်ဗုဒ္ဓဒေႏသနာႏတောႏ ကျမ်ꩻကားကအဝ်ႏဖုံႏယို ကာႏပိုန်းလꩻထွူ သေဒါႏလဲဉ်းဒျာႏတဲင် လꩻပါသမ်းခန်း "ဝေင်ꩻသထုံႏ၊ သုဝဏ္ဏဘူမိပရိယတ္တိသာသနဟိတအစွိုꩻတန်"သီး "ပိဋကတ္တယပါရဂူဗွဲ့တံꩻဆိက်တောႏ"၊ နဝ်ꩻသွူတကာႏတဝ်း နဲင်ႏငံႏတောႏအစိုႏရ ပါဠိတက္ကသိုလ်ႏ ဗဟိုႏစာချ(ချꩻလိတ်)တန်ꩻကိုနဝ်ꩻ မဟာဝဂ္ဂါဒိပါဠိ၊ အဋ္ဌကထာႏ၊ ဋီကာႏဖုံႏယို ကွပ်ပွိုးအောင်ႏမျင်ႏလꩻလွေꩻ တွမ်ႏမျန်မာဂုဏ်ႏထူꩻနေးတဲင် လꩻပါသမ်းဖျင် "နဲင်ႏငံႏတောႏအစိုႏရ"သီး "သာသနဓဇသိရီပဝရဓမ္မာစရိယဗွဲ့တံꩻဆိက်"တောႏယင်နဝ်ꩻသွူ။ (သံႏဃာႏတက္ကသိုလ်ႏ)၊ ရန်ႏကုန်ႏ၊ သံဃာႏတက္ကသိုလ်ႏကိုနဝ်ꩻ လꩻ (ဗုဒ္ဓဒေသနာ ဒီပလိုမာဗွဲ့-ဒုတိယနေင်ႏ)နဝ်ꩻသွူ။

ကထင်ႏထေ့ꩻလိတ်ဝါႏ ဆရာႏတောႏဖုံႏ

သထုံႏဝေင်ꩻနယ်ႏ၊ နောင်ကလာꩻဒုံ ဘုရားလေးကျောင်ꩻ၊ တိုက်အုပ်ဆရာႏတောႏ ဦးပညာ၊ ဇရစ်ချောင်ကျောင်ꩻဆရာႏတောႏ ဦးသုနန္ဒ၊ ဓာတ်မီးကျောင်ꩻဆရာႏတောႏ ဦးကေသရ၊ သထုံႏဝေင်ꩻ မျသပိတ်ကောင်ခင်ႏ သဒ္ဓမ္မဇောတိကာရာမကျောင်ꩻတွိုက်ဆရာႏတောႏ ပိဋကတ္တယပါရဂူ ဦးမေဓာဝီ၊ ဝေင်ꩻမန္တလေꩻ မစိုးရိမ်ပါဠိတက္ကသိုလ်ႏကျောင်ꩻတွိုက် ဂန္ထဓူရနယူပဒေသကျောင်ꩻတွိုက်ဆရာႏတောႏ (အဂ္ဂမဟာပဏ္ဍိတ)ဦးကောသလ္လအွဉ်ငါ မစိုးရိမ်နွို့လိတ်ဝါႏမွူးယာခိုႏစွိုꩻ ဆရာႏတောႏဖုံႏ၊ ပါဠိနယူပဒေကျောင်ꩻဆရာႏတောႏ (အဂ္ဂမဟာပဏ္ဍိတ) ဦးဝိသုဒ္ဓါဘိဝံသ အွဉ်ငါ မစိုးရိမ်နွို့လိတ်ဝါႏမွူးဟာခိုႏစွိုꩻ ဆရာႏတောႏဖုံႏ၊ မန္တလေꩻ-မျတောင်တွိုက် ရွှေဝါဝင်းကျောင်ꩻဆရာႏတောႏ ဦးသာသနာပါလာဘိဝံသ၊ သကုဲင်းကောင်လောင်း ရေဦးတိုက်သစ် ဇေယျသိန်ပါဠိတက္ကသိုလ်ႏကျောင်ꩻ ကျောင်ꩻအုပ်ဆရာႏတောႏ ဦးပညိန္ဒာဘိဝံသ၊ တိုက်အုပ်ဆရာႏတောႏ အဂ္ဂဝံသာဘိဝံသ၊ သကုဲင်းကောင်လောင်း ရတနာပုံ လှိုင်းတက်ချောင်း ပဋ္ဌာန်းသိပ္ပံဆရာႏတောႏ ဦးဣန္ဒကထေရ၊ ဝေင်ꩻရန်ႏကုန်ႏ၊ ကမ္ဘာအေး သံဃာ့တက္ကသိုလ်ႏ ဆရာႏတောႏ ဦးပညာဒီပ-သီးဖုံႏအထျꩻ ထင်ႏဖိုဗာႏလိတ်ဝါႏနဝ်ꩻသွူ။

ကချꩻဖိုလိတ်ဝါႏကျောင်ꩻဖုံႏ

ဝေင်ꩻသထုံႏ၊ မျသပိတ်ကောင်ခင်ႏ သဒ္ဓမ္မဇောတိကာရာမကျောင်ꩻတွိုက်၊ ဝေင်ꩻသထုံႏ၊ ဘင်လှိုင်ရပ်ကွက်၊ အာစိဏ္ဏာရာမကျောင်ꩻတွိုက်ဖုံႏအကို ချꩻဗာႏဖိုလိတ်ဝါႏနဝ်ꩻသွူ။

တွိုႏလွေꩻအခြဲမ်တရျာꩻဖြဲးသာႏသနာႏဌာႏနခိန်ႏ

၁၃၂၈-ဗာႏနေင်ႏကို ယံဖေႏနေး ကခွူႏမွဉ်းကိုနွောင်ꩻဖေႏ ဗွေႏဗွန်တန်တဖြေရဲဉ်ႏ ဦးနန္ဒဝံသတဲမ်းထုံꩻ ပအိုဝ်ႏလိတ်လုဲင်ꩻအတာႏ ကေꩻဇူꩻဗွေႏအခြဲမ်တရျာꩻ ဗွေႏဆရာႏတောႏတန်ဩဝါဒအလꩻ ဗွေႏဇဋိလ(ယိုခါ-ဆရာႏတဉ်သိုး)တွမ်ႏ သျင်ႏတန် သျင်ႏစာရိန္ဒ(ယိုခါ-ဆရာႏဟန်)သီးနဝ်ꩻ လွေꩻပင်ꩻခန်း ချꩻလိတ်သား ဗွေႏစန္ဒောဘာသ(ဆရာႏခုန်ဝေးတန်) ကအဝ်ႏအုံ ဝေင်ꩻသထုံႏ၊ မျသပိတ်ကောင်ခင်ႏ၊ သဒ္ဓမ္မဇောတိကာရာမကျောင်ꩻတွိုက်ကို)နဝ်ꩻသွူ။ ၁၃၂၈-ဗာႏနေင်ႏကို ဗွေႏစန္ဒောဘာသ(ဆရာႏခုန်ဝေးတန်) ကတွိုႏလွေꩻ အခြဲမ်တရျာꩻ ဖြဲးသာႏသနာႏဌာႏနခိန်ႏနဝ်ꩻ အဝ်ႏရဟန်ꩻဘဝ ဆို့ꩻဒွိုန်းက(၁)ဝါႏ၊ တွိုႏနေင်ႏ ၁၃၂၉-ဗာႏကိုမꩻ အဝ်ႏရဟန်ꩻဘဝ ကွဲးပြောင်ꩻလုဲင်ႏထိုꩻဥပါသကာႏ(လိုꩻလမ်း)ဘဝထွူတဲင် တွမ်ႏဗွေႏဆရာႏတောႏတန် တဖြေရဲဉ်ႏဖြွမ်းဝင်ꩻတွော့ꩻ ပိဋကတ်လိတ်လုဲင်ꩻဖုံႏယို ခွုမ်မာꩻတဲမ်းချာႏလွေꩻနေး တွမ်ႏပအိုဝ်ႏဘာႏသာႏနဝ်ꩻသွူ။ တဲႏစွဉ်ႏ ဗွေႏဗွန်တန်တဖြေရဲဉ်ႏကလွဉ်ႏ နေင်ႏ ၁၃၃၇-ဗာႏမာꩻငါ ဗꩻစွဉ်ႏဒျာႏ ၁၃၇၇-ဗာႏကို အခြဲမ်တရျာꩻဗွေႏဆရာႏတောႏတန် ကဖေႏအပ်ခါꩻဒါႏ တာႏဝွန်ႏဖုံႏယို ထေင်းထံႏကေႏကေႏဖေႏထွူ တွိုႏသက်ထွိုင်ႏလꩻ (၇၉)နေင်ႏ၊ ၁၃၇၇-ဗာႏနေင်ႏကိုမꩻ ကွဲးအုံပဆားထိုꩻနဝ်ꩻသွူ။ တွမ်ႏပအိုဝ်ႏဘာႏသာႏ ကတဲမ်းချာႏသေꩻခါꩻဒါႏ ပိဋကတ်တောႏဖုံႏယို ဆရာႏတန်သွဉ်ဖေႏ၊ တွမ်ႏပအိုဝ်ႏဘာႏသာႏတဲင် တဲမ်းလွေꩻလိတ်ကျမ်ꩻဖုံႏ-စတဲင် စွိုးခွိုꩻဘာႏသာႏ သာႏသနာႏထာꩻမာꩻဖုံႏ ခွုမ်မာꩻလွေꩻနွောင်ꩻစွဉ်ႏ (၄၉)နေင်ႏဗွေဗွေနဝ်ꩻမꩻ ဆရာႏတန်စိုးတွင်ꩻ လꩻဓမ္မာစရိယဗွဲ့ ပအိုဝ်ႏဘာႏသာႏနေး (၆)ဖြာꩻ၊ ပထမနေင်ႏ၊ ဒုတိယနေင်ႏ၊ တတိယနေင်ႏ-စတဲင် ဓမ္မာစရိယပုဂ္ဂိုလ်ႏ ရဟန်ꩻ' သျင်ႏ' ရသေ့ꩻ' လိုꩻလမ်းဖုံႏ ပေါႏထန်ႏလွဉ်စွဉ်ႏ (၇၀)လွိုနဝ်ꩻသွူ။

ချာႏဘာႏသာႏ ကတဲမ်းသေꩻခါꩻလိတ်ကျမ်ꩻဖုံႏ

လိက်မှူးပအိုႏ လိက်ပစိုႏ (ဗွေႏဗွန်တန်တဖြေရဲဉ်ႏတဲမ်းထုံꩻယို ခွူးမွဉ်းဖျင်လွေꩻဖေႏ တွမ်ႏသဒ္ဒဗေဒနယ်ꩻနဝ်ꩻသွူ။ ဂဏန်ꩻသင်္ချာႏ (သေင်ႏတွက်နဲꩻပါ)၊ ငါ်းဝှဲႏဖရာꩻ၊ မင်္ဂလာႏကဗျာ၊ မင်္ဂလာႏလင်္ကာႏ၊ သိင်္ဂါလောဝါဒ(ပအိုဝ်း+မြန်မာ)၊ သေခိယ(သျင်ႏကျင်ꩻဝုတ်)၊ ဘိက္ခုပါတိမောက်၊ ပရိတ်တန် (မင်္ဂလသုတ်နဝ်ꩻ ဗွေႏဗွန်တန်တဖြေရဲဉ်ႏမူအတွိုင်ꩻ)၊ အောင်ႏရတနာႏ၊ နမက္ကာရ၊ ဓမ္မစက္ကျာႏ၊ အနတ္တလက္ခဏသုတ်၊ မဟာလက္ခဏသုတ်၊ သတိပဋ္ဌာန်ႏသုတ်၊ လောကနီတိ၊ အဘိဓမ္မဂါထာသင်္ခေပ်၊ ပဋ္ဌာန်းပစ္စယနိဒ္ဒေသ၊ သင်္ဂျိုဟ်ႏလှူꩻနယ်ꩻ၊ သဒ္ဒါႏသုက်နမ်း၊ နာမအာချာတ်ပဒမာလာ၊ ဂန္ထာဘရဏ၊ သံဝဏ္ဏနာဘောဂါဒိ၊ အဘိဓာန်ႏ၊ အလင်္ကာႏ၊ ဆန်း၊ လိက်သှုပ်၊ ဝိသုဒ္ဓိမဂ်ချာႏပအိုႏအအဲန်ႏနဲꩻ၊ ဗုဒ္ဓဝံသ၊ ဓမ္မပဒ၊ ထေရာထေရီအပါဒါန်၊ သံယုတ်၊ အင်္ဂုတ္တရ၊ ပါဠိ-ပအိုႏ-မန်းအဘိဓာန်ႏ၊ ဓမ္မာစရိယစူခုမ်၊ ဓမ္မပဒအဋ္ဌကထာနိဿယ(အထျꩻ ၄-ဝဂ်)၊ သီလက္ခန်အဋ္ဌကထာနိဿယ၊ ပါရာဇိကဏ်အဋ္ဌကထာနိဿယ၊ အဋ္ဌသာလိနီအဋ္ဌကထာနိဿယ-စတဲင်ကျမ်ꩻဖုံႏယို တဲမ်းချာႏသေꩻခါꩻနေး တွမ်ႏပအိုဝ်ႏဘာႏသာႏနဝ်ꩻသွူ။ ဟဝ်သေတောင်ꩻခရာႏ အခြဲမ်တရျာꩻ၊ ပါႏရမီႏကျင်ꩻစဲဉ်ႏ၊ မြိုင်ကြီးငူဗွေႏဆရာႏတောႏ ထေရုပ္ပတ္တိဖုံႏနဝ်ꩻ တဲမ်းသေꩻခါꩻနေး ပအိုဝ်ႏဘာႏသာႏနဝ်ꩻသွူ။

တဘဝတခန္ဓာႏချုပ်ထိုꩻဗာႏ

နေင်ႏ ၁၃၈၃-ဗာႏ၊ ဝါႏဆိုႏလောင်း(၆)နီꩻ၊ မွူးနီꩻ-ကျာႏသပတေꩻ (29-6-2021) သက်လꩻ(၈၅)နေင်ႏကို ဘဝတသာ ပြောင်ꩻငါခန်းဒျာႏနဝ်ꩻသွူ။ ထွားတဝ်းနမ်းကျိုꩻစီꩻပွါꩻတဲင် (၄၉)နေင်ႏဗွေဗွေ ဆရာႏတန် ကခွုမ်မာꩻလွေꩻဒါႏ စွိုးခွိုꩻဘာႏသာႏ သာႏသနာႏအတာႏနုဲင်းယိုနဝ်ꩻ ခံႏနောမ်ꩻထူႏဂုဏ်ႏသွူဩ။

တောင်ꩻသေꩻ- ဖေႏနေးကတဲမ်းနွောင်ꩻလꩻ ခုန်ဝေးတန်အတ္ထုပ္ပတ္တိ (ဘဝထွာစဲဉ်ႏအအဲဉ်ႏ)ယိုတဲင် ကဖေႏဒါႏတဲမ်းဒင်ႏခွင်ꩻ (တဲမ်းခြပ်စုဖေႏ ဆရာႏတန်အတ္ထုပ္ပတ္တိသား) ဆရာႏတန်တပဲ့ꩻ ဦးဉာဏိဿရ(တနံဒုံ)တွမ်ႏ ယံကတဲမ်းဒင်ႏနွောင်ꩻနုဲင်းယို ကစီႏခြပ်ကိုဖေႏဒါႏလိတ် ဖူးမူႏနင်ꩻခိုင်သခင်ဦး၊ သွူတကာႏတဝ်း စွုမ်ႏဟာဟာ ယံဖေႏနေးကဒင်ႏနွောင်ꩻ ပွယ်ꩻပူႏဇောႏကန်းတော့ꩻဆရာႏတန် မုဲင်တမ်ꩻဗီဒီယိုခွေႏဖုံႏတဲင် ကလူႏဖေႏဒါႏဖုန်းဗေလ်သား မွိုးနင်နင်ꩻခင်ရွှေသီးယို ကေꩻဇူꩻတန်အာငါႏအကျောင်ꩻ)

(စီႏခြပ်သော့ꩻဝီခီသားငဝ်းအွဉ်ႏသေ- ကတဲမ်းဒါႏ ဆရာႏခုန်ဝေးတန်နမ်းခြောင်ꩻအအဲဉ်ႏယိုနဝ်ꩻ တဲမ်းမန်းနေးဒျာႏတဲင် ယိုကိုနဝ်ꩻ သေန်ႏလျောႏရာꩻ တဲမ်းပအိုဝ်ႏချာဖေႏနေးတဲင် အမာႏမိဉ်ႏအဝ်ႏဒါႏလဲ့ စွꩻခွင်ꩻပါသွော့၊ ဆရာႏတန်ဖူးမူႏလဲ့ ရီထွူလဲဉ်းအခွင်ꩻနဝ်ꩻသွူ။)