ပါရသီဘာႏသာႏ
ပါရသီ ဘာႏသာႏ ကရိုꩻနဝ်ꩻ အီရန်(ပါဆျား) စခေါင်ႏစခါသီး ကအဝ်ႏကိုꩻကွယ်ႏဒါႏ ဘာႏသာႏတရာꩻတမျိုꩻဒျာႏသွူ။ ကောကတယ်ႏထောင်ႏစစဒါႏ ဘာႏသာႏတရာꩻယိုတမျိုꩻသားနဝ်ꩻ မွိုးဖန်နာႏမေႏ ဖါဖေႏနာႏမ အစစအမိဉ်ꩻရင်ꩻနဝ်ꩻ ဟဲ့ꩻလင်ꩻစွဉ်ႏဒျာႏ "ဇိုရိုအဲတ်သတား"တဲင် ဆုဲင်ꩻချာနဝ်ꩻ အမိဉ်ꩻတွင်ႏလꩻခန်း "ဇရသူစတြ"နုဲင်းနဝ်ꩻသွူ။ သိုရိုအဲတ်သတား ကလွူးဖွာꩻလင်ꩻလွဉ် ကလွူးဖြွဉ်လင်ꩻဒါႏ နေရာႏဒေႏသ ရပ်မလိုꩻအခမ်းကိုနဝ်ꩻ ခရိစ်တခုဲင်ႏလပေါႏတဝ်းဒွိုန်း အဝ်ႏလိုႏနေက နေင်ႏပေါင်ꩻ ၈၀၀ ရပ်သွူ။ ဝွေꩻကလွူးဖွာꩻလင်ꩻဒါႏ နေႏရာႏဒေႏသ ရပ်မအမိဉ်ꩻနဝ်ꩻ ဟဲ့ꩻတဝ်းအလောင်ႏတင် ဟဲ့ꩻတဝ်းအလင်တာႏ ဝင်ꩻရိုꩻဟဲ့ꩻဖန်စွဉ်ႏဒျာႏ ပါဆျားခမ်းတန်နုဲင်းနဝ်ꩻသွူ။
သိုရိုအဲတ်သတား ကဟော်ꩻကျာꩻသွဉ်သင်ဆွုံꩻမꩻသေꩻခါꩻ တရာꩻတောႏ အစုစုအဒဝ်ႏဒဝ်ႏဖုံႏနဝ်ꩻ ဝင်ꩻစုရွမ်တဲမ်းစန်ႏခါꩻနေး ကျမ်ꩻကန်ႏကိုတဲင် ကျမ်ꩻမိဉ်ꩻဟဲ့ꩻ သိဉ်းဒအဝဲတ်သတား သွူ။ ကျမ်ꩻယိုတစောင်ႏနဝ်ꩻ ပါရသီဘာႏသာႏခွိုꩻနွယ်ႏသီး အဓိကအခေႏခံႏ ကျမ်ꩻကန်ႏတန်တစောင်ႏဒျာႏသွူ။
ခိုရိုအဲတ်သတား အသက်ကအဝ်ႏမွန်ဗန်နေ အယံꩻတွင်ꩻကာႏလ သာႏမယနဝ်ꩻခါနဝ်ꩻ လိုꩻသီးဖုံႏ ကိုꩻကွယ်ႏရိုႏသေႏ ယွုမ်းအံႏမွေးစွဉ်ႏဒျာႏ ရုတ်တုဖုံႏသွူ။ အတွင်ꩻကာႏလနဝ်ꩻခါနဝ်ꩻ ပေါႏရိုꩻတဲင် ဟော်ꩻကျာꩻသွဉ်သင် ဆွုံꩻမꩻဖေႏဒါႏ ထာႏဝရ ဘုရာꩻ အယူႏဝါႏဒသား ကရိုꩻနဝ်ꩻ အဝ်ႏသိုရိုအဲတ်သတားလွုမ်ꩻသွူ။ သိုရိုအဲတ်သတား နဝ်ꩻ ကျံႏစယ်ႏကျိုꩻစာꩻယားကုဲင်မွေးစွဉ်ႏဒျာႏ ကကိုꩻကွယ်ႏရိုႏသေႏ ယွုမ်းအံႏဒါႏ တနာ၊ လူꩻ၊ မစ္ဆာႏတွမ်ႏ သဘာႏဝ ဓမ္မတရာꩻဖုံႏသွူ။
သိုရိုꩻအဲတ်သတား ကဟော်ꩻသေꩻခါꩻဒါႏ ဩဝါဒတရာꩻဖုံႏအကို မီႏထေခွယ်ꩻထန်ႏဗာႏ အရသာႏအကဲဉ်အနဲတ်ꩻနဝ်ꩻ အရေႏရွယ်ႏလွေꩻဒျာႏ ကမ္ဘာႏဟံႏတဖြုံႏလွုမ်းလွုမ်း ယံကတိုꩻတက်ရေꩻတာႏသွူ။ ကွပ်ပွိုးစွဉ်ႏဒျာႏ ဝွေꩻရေႏမိုးချက် အနက်အဓိပ္ပာယ်ႏယိုတဗာႏတဲင် လိုꩻယံလိုꩻဒါႏ ပညာသျိပညာႏသျင်ႏသီး ခေတ်ဟန်ႏသလဲင်ႏခါယိုနဝ်ꩻ အခီꩻယော်ꩻအံႏဖြာႏမွေးစွဉ်ႏဒျာႏ သိုရိုအဲတ်သတားသွူ။ ဆုဲင်ꩻဝုဲင်ꩻတနီꩻခါ ကအီႏပေါႏပေါက်လွဉ်ဒါႏ ပရောဖဲတ်ဖုံႏနဝ်ꩻ အအီႏကျိုꩻစာꩻဆောင်ႏရွက် ခွုမ်မာꩻလွေꩻဖေႏ ကမ္ဘာႏဟံႏအကျိုꩻစီꩻပွာꩻတာႏ အရိုꩻနုဲင်းနဝ်ꩻသွူ။
ပုဂ္ဂိုလ်ႏတန်ယိုတဖြာꩻနဝ်ꩻ အဟော်ꩻကျာꩻဖေႏ ကမ္ဘာႏဟံႏတိုꩻတက်ရေꩻလွုမ်ꩻတကာႏတဝ်း ဟော်ꩻဖေႏပါနေဒွိုန်းက တကမ္ဘာႏလွုမ်း ခွꩻငြိမ်ꩻရေꩻအကျောင်ꩻခရာႏဖုံႏသွူ။ တကမ္ဘာႏလွုမ်း ယံဖေႏနေးကငိမ်ꩻခွꩻရောင်းရေꩻအတာႏ ကမ္ဘာႏဟံႏကိုကအဝ်ႏဒါႏ ဘာႏသာႏတရာꩻအစွိုးစွိုး အဒဝ်ႏဒဝ်ႏဖုံႏနဝ်ꩻ ဟဝ်နေးထူႏလွောက်နာႏလွငါႏ အယူႏဝါႏဒယိုတစွိုးအကျောင်ꩻ ဝွေꩻတဲက်တွန်ꩻ နိုꩻဆောႏတမာသေႏသေႏနုဲင်းနဝ်ꩻသွူ။
ဓမ္မ အဓမ္မ၊ အဟဝ် အကုဲင်၊ တရာꩻ တရာꩻတဝ်း၊ တွိုက်ꩻနက်ရွို့ꩻရန်ႏတဝင်ꩻ စတဲင် အကျောင်ꩻခရာႏနုဲင်းယိုဖုံႏလဲ့ ဝွေꩻအဝ်ႏဟော်ꩻပါနေနေသွူ။ ဆုဲင်ꩻချာ ကပေါႏလွဉ်ထပ်ဒါႏ ပါႏရမီႏဗွေႏ ပညာႏသျင်ႏသီးနဝ်ꩻ အဟဝ်အကုဲင်ကရိုꩻဒါႏ ငေါဝ်ႏရာႏဩဝါဒယိုနီမျိုꩻ ယံကထိုꩻဖေ့ဝုဲင်ꩻထိုꩻဗာႏမွုန်း ရေႏနုဲင်းနဝ်ꩻတဲင် အွဉ်တဝင်ꩻတယ်ႏထုနေး ဘုရာꩻထွားအဟဝ်ဖဲ့ꩻရုပ်တုတွမ်ႏ ဘုရာꩻထွားအကုဲင်ဖဲ့ꩻရုပ်တုဖုံႏသွူ။ ပါရဇီသီး ကကိုꩻကွယ်ႏယွုမ်းအံႏဒါႏ ဘုရာꩻအမိဉ်ꩻနဝ်ꩻ အဟုရမဇဒနုဲင်းနဝ်ꩻသွူ။
ပါရဇီဘာႏသာႏသီး ကအဝ်ႏကိုꩻကွယ်ႏယွုမ်းအံႏဒါႏ သိဉ်းဒအဝဲတ်သတားကျမ်ꩻကန်ႏကိုꩻနဝ်ꩻ အွဉ်ႏနယ်ဖေႏ လောကီꩻကျင်ꩻဝွတ်ဖုံႏ၊ ငဝ်းပို့ꩻပသာမေတ္တာႏဖုံႏလွုမ်ꩻတကာႏတဝ်း နက္ခတ်ဗေဒတွမ်ႏ တသီႏပညာႏဖုံႏလဲ့ ပါသော့ꩻနေနေသွူ။
ပါရဇီသီးနဝ်ꩻ ကိုꩻကွယ်ႏယွုမ်းအံႏ ဝုဲင်ႏရိုႏသေႏမွေးစွဉ်ႏ မေႏသွူ။ ခရိစ်နေင်ႏ (၈)ရျာꩻဗူႏရပ် အတွင်ꩻကာႏလနဝ်ꩻခါနဝ်ꩻ ကလာꩻမူသလိဉ်ဖုံႏ နွို့လွဉ်အုံပြုံႏဒို့ꩻတခြို့ꩻထိုꩻ ပါဆျားခမ်းတဲင် ကောကကိုꩻကွယ်ႏယွုမ်းအံႏဒါႏ ပါရဇီဘာႏသာႏသားနဝ်ꩻ ထိုꩻလွေꩻထိုꩻအေင်ဒိယခမ်းထီကိုတဲင် လွေꩻအုံခမ်တငါထိုꩻခန်း အေင်ဒိယခမ်း အခဝ်တွို့ꩻကိုနဝ်ꩻသွူ။[၁]
အာႏကွိုꩻ
မွဉ်းဖျင်- ↑ ညိုသောင်း ဘာသာကြီးလေးခု အနှစ်သာရများ