ပိသုဏဝါစာ

ဗွောင်နယ် ပိသုဏဝါစာ-အံႏစာဝင်ꩻမဉ်ꩻခရာႏ

• ပိသုဏဝါစာ-အံႏစာဝင်ꩻမဉ်ꩻ"ကရိုꩻနောဝ်ꩻ- ဝင်ꩻအောဝ်ႏရက် အောဝ်ႏပဲင်ꩻလို့ဝင်ꩻ ဖေႏနေးကကုဲင်ထိုꩻတဲ့နဝ်ꩻ၊ ဝင်ꩻအောဝ်ႏလွောင်ႏဗူႏလို့ဝင်ꩻ ဖေႏနေးကပꩻလီထိုꩻတဲ့နဝ်ꩻ၊ လွꩻထီႏဝင်ꩻ၊ တကေးဝင်ꩻ၊ နာႏလိုႏတောဝ်းဝင်ꩻတဲင် အံႏစာဝင်ꩻ (ခြေထိုးဝင်ꩻ)တဲ့နဝ်ꩻ၊ ဖေႏကရက်တောဝွေꩻ သွေꩻကုဲင်အော်ကုဲင်ဝင်ꩻတဲ့နဝ်ꩻ စတဲင်နုဲင်းနောဝ်ꩻဖုံႏနောဝ်ꩻ ထွာ ပိသုဏဝါစာ အကုသိုလ်ႏကံႏလွဉ်းလွဉ်းနောဝ်ꩻသွူ။
• "ဝေရမဏိ-သျောင်ႏထိုꩻ (အံႏစာတဝ်းဝင်ꩻမဉ်ꩻ)"ကရိုꩻနဝ်ꩻ- နမ်း(ကိုႏတဲင်ႏ)တဲ့ အံႏစာတဝ်းဝင်ꩻမဉ်ꩻ၊ ဝင်ꩻတဲ့ ဝွေꩻတထွဉ်ႏအံႏစာတောဝ်း ဝင်ꩻမဉ်ꩻ၊ မဉ်ႏသေ မဉ်ႏဟွိုန် ဝင်ꩻအံႏစာꩻဝင်ꩻမဉ်ꩻတဲ့ ဆီꩻခါꩻရဲခါꩻ၊ ဖေႏအံႏစာတောဝ်းဝင်ꩻမဉ်ꩻ၊ အံႏစာဝင်ꩻမဉ်ာꩻနုဲင်းနဝ်ꩻနဝ်ꩻ သꩻရေꩻတဝ်း၊ သဖော်ꩻတူႏတဝ်း၊ နစ်သက်တဝ်း၊ ဟွိုန်ဟောဝ်တဝ်း၊ ကျွိုက်တဝ်း၊ ပေါႏအံႏစာဝင်ꩻမဉ်ꩻနောဝ်ꩻ ခံႏဗာႏအပဲစ်နုဲင်းယိုနုဲင်းယို သွဉ်သင်ဆွုံꩻမꩻ ချꩻနားဖေႏဝင်ꩻ စတဲင်နုဲင်းနောဝ်ꩻဖုံႏနောဝ်ꩻ ထွာသျောင်ႏထိုꩻ (ထွာအံႏစာတောဝ်းဝင်ꩻမဉ်ꩻ)နောဝ်ꩻသွူ။

အံႏစာဝင်ꩻမဉ်ꩻနဝ်ꩻ ဟောဝ်တဝ်း၊ ထွာပိသုဏဝါစာဒုစရဲက်၊ ထွာအကျင်ꩻဟဝ်တဝ်း၊ အံႏစာတောဝ်း ဝင်ꩻမဉ်ꩻနဝ်ꩻ ဟောဝ်၊ ထွာပိသုဏဝါစာ ဝေရမဏိသုစရဲက်၊ ထွာအကျင်ꩻဟဝ်နဝ်ꩻသွူ။ "ဟောဝ်တောဝ်းနုဲင်းမုဲင်ꩻ၊ ဟောဝ်နုဲင်းမုဲင်ꩻ"နဲတဲင်- လိုꩻကအံႏစာဒါႏဝင်ꩻမဉ်ꩻနဝ်ꩻ ဂုဏ်ႏသိက္ခာႏအဲဉ်ထဝ်း၊ ဝင်ꩻတရိုႏသေႏတဝ်း၊ ဝင်ꩻတကေႏညိုႏတဝ်း၊ ဝင်ꩻရိုꩻဒျာႏ လိုꩻဟောဝ်တဝ်း၊ ဝင်ꩻထင်းဖွီ၊ ဒေါ့ꩻထာꩻတဲ့ ဝင်ꩻတယွုမ်းတဝ်း၊ ဩဇာႏအာႏဏာႏအဲဉ်ထောဝ်း၊ ဝင်ꩻလွꩻထီႏအာ၊ အစွိုꩻကိုတဲ့ ဝင်ꩻမဉ်ဖေႏပါသော့ꩻတဝ်း၊ လိုꩻတန်တဖြာꩻ ထွာနွောင်ꩻတောဝ်း၊ ကွပ်ဝွေꩻအံႏစာဝင်ꩻမဉ်ꩻတဲင် ဝင်ꩻတတန်ႏမော့ꩻတောဝ်း ထာꩻဒုက္ခတဲ့ မော့ꩻထိုꩻဗာႏ ထာꩻဒုက္ခ၊ ဝင်ꩻတတန်ႏခိုးလျားတဝ်းတဲ့ ခိုးလျားဗာႏလို့၊ ဝင်ꩻတတန်ႏလွꩻထီႏတဝ်းလို့ဝင်ꩻတဲ့ လွꩻထီႏထိုꩻလို့လွဝင်ꩻ၊ ဝင်ꩻအစွိုꩻ တတန်ႏပꩻလီတောဝ်းတဲ့ ပꩻလီထိုꩻလို့။ လိုꩻအငိုꩻတန်၊ ဉာဏ်ႏပညာႏသားဖုံႏ တန်ႏတသီပျင်ႏတောဝ်းထာꩻတဲ့ သီပျင်ႏထိုꩻဗာႏ၊ ကွပ်ဝွေꩻ အကုသိုလ်ႏမုꩻယိုတဲင် ဝွေꩻတဲ့ မော့ꩻဗာႏနုဲင်းနုဲင်း ထာꩻဒုက္ခ၊ ဝွေꩻတဲ့ သီတခြိုထိုꩻနုဲင်းနုဲင်းဗာႏ။

ဝွေꩻပိုမာ၊ ဝွေꩻမွိုးဖါ၊ ဝွေꩻဖူးဝေးဖုံႏနောဝ်ꩻတဲ့ သꩻတရေင်ခိုးလျားလွဉ်ꩻအီဗာႏ၊ တွိုႏဘဝငါသူꩻတဲ့ လင်ꩻထဲ့ဗာႏငါးရုဲင်ꩻ၊ မော့ꩻဗာႏ ခံႏဗာႏစတဲင်နုဲင်းနောဝ်ꩻသွူ၊ ကွပ်နောဝ်ꩻမꩻ အံႏစာဝင်ꩻမဉ်ꩻနောဝ်ꩻ ဟောဝ်တောဝ်းနောဝ်ꩻသွူ။ မဉ်ႏအံႏစာတဝ်း ဝင်ꩻမဉ်ꩻနဝ်ꩻ ဂုဏ်ႏသိက္ခာႏတဲ့အဝ်ႏ၊ ဝင်ꩻရိုႏသေႏ၊ ဝင်ꩻကေႏညိုႏ၊ ဝင်ꩻရိုꩻဒျာႏ လိုꩻဟောဝ်၊ ဝင်ꩻထင်းဖွီတောဝ်း၊ ဒေါ့ꩻထာꩻတဲ့ ဝင်ꩻယွုမ်းအံႏ၊ ဩဇာႏအာႏဏာႏတဲ့အဝ်ႏ။ ဝင်ꩻလွꩻထီႏတောဝ်း (သွꩻခွလွိုင်ႏအာ)၊ အစွိုꩻကိုတဲ့ ဝင်ꩻမဉ်ဒင်ႏသော့ꩻ၊ ထွာနွောင်ꩻလိုꩻတန်တဖြာꩻ၊ ကွပ်ဝွေꩻအံႏစာတောဝ်းဝင်ꩻမဉ်ꩻတဲင် ဝင်ꩻမော့ꩻဗာႏတဝ်း ထာꩻဒုက္ခ၊ ဝင်ꩻမော့ꩻဗာႏတဝ်း ထာꩻခိုးလျား၊ ဝင်ꩻလွꩻထီႏဗာႏတောဝ်းလို့ဝင်ꩻ၊ ဝင်ꩻပꩻလီလာဗာႏတဝ်းလို့ဝင်ꩻ။ လိုꩻအငိုꩻတန်၊ ဉာဏ်ႏပညာႏသားဖုံႏ တသီပျင်ႏထိုꩻဗာႏတောဝ်းထာꩻ၊ ဝွေꩻတဲ့ မော့ꩻဗာႏတဝ်း ထာꩻဒုက္ခ၊ ဝွေꩻတဲ့ သီတခြိုဗာႏတဝ်းထာꩻ၊ ဝွေꩻပိုမာ၊ ဝွေꩻမွိုးဖါ၊ ဝွေꩻဖူးဝေးဖုံႏနောဝ်ꩻတဲ့ သꩻတရေင်ခိုးလျားလွဉ်ꩻဗာႏတဝ်း၊ တွိုႏဘဝငါသူꩻတဲ့ လင်ꩻထဲ့ဗာႏတဝ်းငါးရုဲင်ꩻ-စတဲင်နုဲင်းနောဝ်ꩻသွူ။

နောဝ်ꩻလွုမ်ꩻတကာႏတောဝ်း ကွပ်အံႏစာတဝ်းဝင်ꩻမဉ်ꩻတဲင် ကခံႏစာꩻဗာႏအကျိုꩻဖုံႏနောဝ်ꩻ-

1. တွိုႏထင်ႏဗာႏ လူꩻအခမ်း
2. ယံမျတ်လဲဉ်းက လူꩻလင်
3. တိန်ႏတွိုႏသဲင်ꩻယင်း လိုꩻခမ်းတဲ့ ထွာဗာႏခွန်စက်ျာႏ
4. တငါတွောင်းညီႏ (တငါ တရေꩻငါႏ)
5. အချွေႏအရံႏ ပရိသတ်ခွေါင်ခံႏ-

စတဲင်နုဲင်းနောဝ်ꩻဖုံႏသွူ။ ကွပ်နောဝ်ꩻမꩻ အံႏစာတောဝ်း ဝင်ꩻမဉ်ꩻနောဝ်ꩻ ဟောဝ်ငါႏမရေႏမရာႏနောဝ်ꩻသွူ။

ပိသုဏဝါစာ အင်္ဂါႏ ၄-ပါꩻ

(အံႏစာဝင်ꩻမဉ်ꩻ အချက် ၄-ချက်)

1. ဝင်ꩻအောဝ်ႏဟောဝ်လို့ဝင်ꩻ
2. သꩻမဉ်ယားကုဲင် (မဉ်မာꩻကွယ်ꩻ)ထိုꩻဝင်ꩻ
3. ကျိုꩻစာꩻယားကုဲင်ဝင်ꩻ
4. ဝင်ꩻသေ ဝွေꩻငေါဝ်းနောဝ်ꩻ အဓိပ္ပါယ်ႏ

အင်္ဂါႏယို ၄-ပါꩻ မဉ်ႏပြဲ့ꩻစွုံႏလို့မꩻ (အချက်ယို ၄-ချက်မဉ်ႏမဲဉ်ႏတနꩻသော့ꩻလို့မꩻ) ထွာပိသုဏဝါစာ အကုသိုလ်ႏကံႏနောဝ်ꩻသွူ။

ကဗျာလင်္ကာႏ

• ဝင်ꩻအောဝ်ႏရက်ခါ - အံႏစာလွဉ်ꩻမာႏ
• နုဲင်းနောဝ်ꩻမာꩻမွိုန်း - မဉ်ႏယွိုန်းနောဝ်ꩻရာꩻ
• အကျင်ꩻဟဝ်မျတ် - စွုမ်ႏဇာတ်ချမ်ꩻသာႏ
• သွꩻအာငါႏ - သေႏချာႏ ယံငါငါ။

ကဗျာယို မဉ်ႏပြန်ႏငေါဝ်းရိုꩻရိုꩻနောဝ်ꩻ- ဝင်ꩻအဝ်ႏရက်ရက်ပဲင်ꩻပဲင်ꩻဝင်ꩻနဝ်ꩻခါ (ဝင်ꩻဖေႏနေးကကုဲင်ထိုꩻလို့ဝင်ꩻ၊ ဖေႏနေးကလွꩻထီႏထိုꩻလို့ဝင်ꩻတဲင်) အံႏစာဝင်ꩻမဉ်ꩻ၊ ဖြောင်းလွဉ်ꩻမာႏနုဲင်းနောဝ်ꩻနောဝ်ꩻ တွမ်ႏမာꩻမွိုန်း၊ မဉ်ႏယွိုန်းထိုꩻနောဝ်ꩻ ထွာအကျင်ꩻဟောဝ်၊ ထွာအကျင်ꩻမျတ်၊ (ကွပ်အကျင်ꩻဟဝ်၊ အကျင်ꩻဟဝ်တဲင်) ချမ်ꩻသာႏဗာႏ စွုမ်ႏဇာတ်ဇာတ် စွုမ်ႏပန်ပန်၊ သွꩻပေႏတဲ့ အာငါႏ၊ သေႏချာႏ ယံလွေꩻတငါငါစွဉ်ႏနောဝ်ꩻသွူ။

ဗွောင်နယ်ထဲင်းအခရာႏ

နီသွဉ်းသီးကျောင်ꩻယိုနဝ်ꩻ နီဆရာႏ မာꩻဖေႏအစွိုꩻ အဝ်ႏနီစွိုꩻ၊ "သူရိယစန္တာႏစွိုꩻ"တွမ်ႏ"မနုဟာႏစွိုꩻ"နုဲင်းနဝ်ꩻသွူ။

• သူရိယစန္တာႏစွိုꩻ အကတူႏနဝ်ꩻ ခွန်စိန်ထွန်း
• မနုဟာႏ အကတူႏနဝ်ꩻ ခွန်ကျော်။

(ခွန်စိန်ထွန်းတွမ်ႏ ခွန်ကျော်နဝ်ꩻ ရက်မွေးစွဉ်ႏလို့ဝင်ꩻ၊ ဝွေꩻသီးဝင်ꩻနီနဝ်ꩻ သွုန်ႏစွဉ်ႏသꩻဗွာတဲင် သွꩻပေႏခွပေႏတဲ့ အာမွေးစွဉ်ႏထာꩻ၊ ဝွေꩻသီးအွဉ်မာꩻ အမျိုꩻမုဲင်ꩻတဲ့ယဝ်း ခိုခိုမူႏမူႏ ဖြွမ်းဗူလွဉ်ꩻမွေးစွဉ်ႏ၊ ကွပ်နဝ်ꩻမꩻ ရက်မွေးစွဉ်ႏဝွေꩻသီး၊ "ရက်တဖြာꩻ စင်ꩻတရျာꩻ"ငေါဝ်းအဝ်ႏနုဲင်းနဝ်ꩻတဲ့ ဝွေꩻသီးယိုနဝ်ꩻ "ရက်တရျာꩻ-စင်ꩻတဖြာꩻ" ထွာတောဒျာႏနုဲင်းနဝ်ꩻသွူ။

မောင်ႏကုဲင်သီးဖါနဝ်ꩻ ယမ်းဗာႏဗုံးတဲင် ခင်ႏတပွတ်ꩻထိုꩻတပင်၊ ဒင်ႏထင်ႏဗာႏ တသီႏယုံႏ၊ တရူꩻနီꩻသူꩻနဝ်ꩻ လိုꩻနီဒုံ အိႏလွေꩻပို့ꩻဖေႏအဗွူ၊ သူရိယစန္တာႏစွိုꩻနဝ်ꩻ အလွေꩻဖွိုင်ꩻဝန်ႏ၊ ထံႏလွေꩻပါထီ၊ မနုဟာႏစွိုꩻနဝ်ꩻ လွူးဒဲဉ်၊ အီသဲင်ꩻချာပါ ဖွိုင်ꩻဝန်ႏ၊ (ခန်ꩻခါꩻတာႏဝွန်ႏနုဲင်းနဝ်ꩻ။) "ဟန်ႏနီꩻယို ခွန်စိန်ထွန်းတွမ်ႏ ခွန်ကျော်သီး လွေꩻကေပ်ꩻဖေႏနော၊ ကေပ်ꩻထွူထွူဗာႏဟန်ႏနီꩻ၊ မွူးရဝ်ꩻယို မောင်ႏကုဲင်သီး ထင်ႏအဖါထျꩻ၊ အဝ်ႏလိုႏဖြေꩻအီ သွီႏဖုံႏတသီႏဖုံႏ၊ အဝ်ႏလိုႏသွင်ꩻမွိုင်လဲဉ်း" "ပေါႏစိန်ထွန်း ကေပ်ꩻတဲ့ ခွေသွဉ်းကေပ်ꩻတဝ်းဆရာႏ" "ပေါႏခွန်ကျော်ကေပ်ꩻတဲ့ ခွေသွဉ်းကေပ်ꩻတဝ်းဆရာႏ" "သီထာထမုဲင်ꩻခရာႏနဝ်ꩻ၊ သီကဟဝ်လို့ဝင်ꩻ မွေးတဝ်းနဲ့" "စိန်ထွန်းရိုꩻ- ခွေသွဉ်းဟဝ်တဝ်းတဲ့" "အကျော်တဲ့ရိုꩻ- ခွေသွဉ်းဟဝ်တဝ်းတဲ့ ဆရာႏ" "နာꩻရိုꩻဗာႏ ခွန်ကျော်နဲ့ စိန်ထွန်း" "ရိုꩻဗာႏတဝ်း တလဲင်ႏလဲင်ႏ ဗွေႏအော်" "နာꩻရိုꩻဗာႏ စိန်ထွန်းနဲ့ ကျော်" "လွစ်ရိုꩻစွဉ်ႏ ဗွေႏအော်" "နဝ်ꩻဟ သီဟဝ်တဝ်းကရိုꩻနဝ်ꩻ ပါꩻမုဲင်ꩻဒေါ့ꩻနယ်သီ" "မောင်ꩻကုဲင်ဒေါ့ꩻနယ် ဗွေႏအော်" "ယိုမောင်ꩻကုဲင်- ဝွေꩻသီးရိုꩻဗာႏမွေးလို့ဝင်ꩻနဲ့" "ရိုꩻဗာႏတဝ်း ဗွေႏအော်" "နဝ်ꩻဟ နာꩻသမ်းလွေꩻဒေါ့ꩻနယ်ဝင်ꩻနုဲင်းမုဲင်ꩻ၊ နာꩻယားဝင်ꩻထာꩻရက်၊ မာꩻကွယ်ꩻဝင်ꩻ၊ အံႏစာဝင်ꩻ မွေးနေဟောင်း" "မွေး ဆရာႏ" တွိုႏနဝ်ꩻတွော့ꩻ စိန်ထွန်းတွမ်ႏခွန်ကျော်တဲ့ အဲ့ꩻတနွာႏစွဉ်ႏအမဲ့တဲင် စိန်ထွန်းဒေါ့ꩻစွဉ်ႏနုဲင်းယို- "ယိုမောင်ႏကုဲင်- လိုꩻယားဒါႏဝင်ꩻ၊ လိုꩻအံႏစာဒါႏဝင်ꩻမဉ်ꩻ နုဲင်းနဝ်ꩻနဝ်ꩻ နီတကူႏညီႏနွောင်ꩻတဝ်း" "စိန်ထွန်းကေပ်ꩻဖေႏနွောင်ꩻတဝ်းတဲ့ အကျော်ကေပ်ꩻဖေႏနဲ့" "ခွေသွဉ်းတဲ့ ကေပ်ꩻဖေႏတဝ်း ဆရာႏ" "ယိုမောင်ႏကုဲင်- ကွပ်နာꩻအံႏစာဝင်ꩻမဉ်ꩻတဲင် ဝင်ꩻတဟွုန်ဟဝ်တဝ်းဒွုမ်နာꩻ၊ နာꩻလယ်ႏကေပ်ꩻဒျာႏဟုဲင်း" "ခွေသွဉ်း အံႏလဲဉ်ဖိုဗာႏဝင်ꩻတဲင် ဝင်ꩻအမျိုꩻအီႏသော့ꩻမွေးတောဝ်း ဆရာႏ" "သော့ꩻတဲ့နဝ်ꩻ၊ တသော့ꩻတဝ်းတဲ့နဝ်ꩻ နီတာႏဝွန်ႏမွေးတဝ်း၊ နာꩻထာꩻမာꩻတွမ်ႏ နာꩻထာꩻမာꩻဒျာႏ၊ နာꩻအကျင်ꩻတွမ်ႏနာꩻအကျင်ꩻဒျာႏ၊ ဆရာႏအနေႏတဲ့ ဒေါ့ꩻဖေႏနွောင်ꩻ တကားယိုလွုမ်ꩻ" မောင်ႏကုဲင်တဲ့ မဲ့ထီလင်ꩻဗာႏလဲဉ်းသွူ။ (ပေါႏအံႏစာဝင်ꩻ၊ ယားတရေႏဝင်ꩻ၊ ပေါႏမာꩻကွယ်ꩻဝင်ꩻ၊ ပေါႏတအွဉ်ႏတဝ်း မေတ္တာႏ ဝင်ꩻလောင်းနဝ်ꩻ မဲ့ငါပေႏ တရေႏလင်ꩻ၊ ခွေလွꩻထီႏ ဝင်ꩻလွꩻထွားတဲင် ခိုးလျားယပ်ꩻခုဲင်ႏဗာႏနုဲင်းယို ကရိုꩻနဝ်ꩻ မောင်ႏကုဲင်အတွက်တာႏ တသာႏဆိုမ်နာႏလဲဉ်းမတဝ်း။)

"ဟန်ႏနီꩻ ဆရာႏကအီႏသွဉ်ဖေႏယိုနဝ်ꩻ ဒုစရဲက်အမုဲင်ငတ်ꩻ၊ ပိသုဏဝါစာ- အံႏစာဝင်ꩻမဉ်ႏခရာႏ၊ ပိသုဏ- ကရိုꩻနဝ်ꩻ ယားကုဲင် ဝင်ꩻလွောင်ႏဗူႏရေꩻ၊ ဝါစာ- ကရိုꩻနဝ်ꩻ ငေါဝ်း။ ကွပ်နဝ်ꩻမꩻ (ပိသုဏဝါစာ-ကရိုꩻနဝ်ꩻ ဝင်ꩻအဝ်ႏလွောင်ႏဗူႏဝင်ꩻ ဖေႏနေးကကုဲင်၊ ဝင်ꩻအဝ်ႏရက်ဝင်ꩻ ဖေႏနေးကကုဲင် ကျမ်ႏဖေႏနေးကရက်တောဝွေꩻ၊ သွေꩻကုဲင်ဝင်ꩻ၊ အံႏစာဝင်ꩻ) အဓိပ္ပါယ်ႏလꩻနုဲင်းနဝ်ꩻ။ (ပေါႏမာꩻကွယ်ꩻဝင်ꩻ၊ မာꩻပꩻဒါႏဝင်ꩻ၊ ပေါႏလိုꩻယားဒါႏဝင်ꩻထာꩻရက်၊ ပေါႏလိုꩻမာꩻလွꩻထီႏဒါႏဝင်ꩻ၊ ပေါႏလိုꩻသွေꩻကုဲင်ဒါႏဝင်ꩻ၊ ပေါႏလိုꩻအံႏစာဒါႏဝင်ꩻမဉ်ꩻနဝ်ꩻ လိုꩻတကျတဝ်း။) (ဒေါ့ꩻထာꩻတဲ့ ပါꩻတယွုမ်းတဝ်း၊ ပါꩻတနာႏတဝ်း၊ ပါꩻမုဲင်ꩻတဲ့ တမဲဉ်မာꩻသွꩻတဝ်း၊ သွꩻခွခြေား၊ ခွေလွꩻထီႏ ပါꩻလွꩻထွား၊ ထွာဒျာႏလိုꩻအလကား၊ ထွာဒျာႏ လိုꩻခွဉ်ႏဆေ့ꩻတန်။) (ခန္ဓာႏကုဲင်လီ မဉ်ႏသီသူꩻတဲ့ လင်ꩻထဲ့ဗာႏငါးရုဲင်ꩻ၊ မဉ်ႏသဲင်ꩻကွုတ်ယင်းလိုꩻပိုတဲ့ သီတကုဲင်ဗာႏထာꩻ၊ သွꩻခွဆေ့ꩻခြေား၊ သငွꩻပေႏမဉ်ႏအဝ်ႏစိန်ႏစွော့ꩻတဲ့ ဆင်ႏဆင်ႏကုဲင်လီထိုꩻလို့၊ ခွေလွꩻထီႏပါꩻလွꩻထွား၊ အုံထာꩻ ခိုးလျားဗာႏသေႏသေႏ၊ ထွာဗာႏနုဲင်းနဝ်ꩻ။) ကွပ်နဝ်ꩻမꩻ "ပိသုဏဝါစာ- အံႏစာဝင်ꩻမဉ်ꩻဒါႏတဝ်း"ကရိုꩻနဝ်ꩻ နီဆရာႏဗွေႏစင်ꩻ တဲမ်းဖေႏနီ ကဗျာနုဲင်းယို- + ဝင်ꩻအဝ်ႏရက်ခါ - အံႏစာလွဉ်ꩻမာႏ ငါးရုဲင်ꩻထဲ့ဗာႏ - ချမ်ꩻသာႏကင်ꩻညာꩻ သဲင်ꩻကွုတ်လိုꩻပို - သွꩻယိုဆေ့ꩻငါႏ အံႏစာမွုန်း - မဉ်ႏယွုန်းကျင်ꩻဟဝ်ထွာ။

ကဗျာယိုတပွုတ် မဉ်ႏပြန်ႏငေါဝ်းရိုꩻရိုꩻနောဝ်ꩻ- (ဝင်ꩻအဝ်ႏရက်လို့ဝင်ꩻနဝ်ꩻခါ ဝင်ꩻဖေႏနေး ကကုဲင်လို့ဝင်ꩻ မဉ်ႏအံႏစာဝင်ꩻမဉ်ꩻ၊ ဖြောင်းမဉ်ꩻလွဉ်ꩻမာႏဗာႏနုဲင်းနဝ်ꩻနဝ်ꩻ လင်ꩻထဲ့ဗာႏငါးရုဲင်ꩻ၊ မဉ်ႏလင်ꩻခံႏဗာႏငါးရုဲင်ꩻသူꩻနဝ်ꩻ ထာꩻချမ်ꩻသာႏ အဲဉ်ထဝ်းတစိꩻစိꩻ၊ မဉ်ႏသဲင်ꩻကွုတ်ယင်း လိုꩻပိုတဲ့ ဝွေꩻယိုနဝ်ꩻ သွꩻပေႏဆေ့ꩻငါႏ၊ ကွပ်နဝ်ꩻမꩻ အံႏစာမွုန်းဝင်ꩻမဉ်ꩻ၊ မဉ်ႏယွုန်းထိုꩻနဝ်ꩻ ထွာအကျင်ꩻဟဝ်) ပြန်ႏဗာႏနုဲင်းနဝ်ꩻ။ "တပဲ့ꩻသီးဖုံႏဟွေး- တပဲ့ꩻသီး ဖေႏနေးကထွာ လိုꩻအကျင်ꩻဟဝ်၊ ဖေႏနေးကထွာလိုꩻယံ ပငါပရာꩻနဝ်ꩻ အံႏစာမွုန်းဝင်ꩻမဉ်ꩻနော" "မွေးဒျာႏ ဗွေႏအော်" "ယိုတလဲင်ႏတဲ့ အခိန်ႏလꩻလဲဉ်းသွူ၊ အုံပဆားဒွိုန်းက၊ မင်္ဂလာႏဒျာႏ တပဲ့ꩻဖုံႏ" "မင်္ဂလာႏဒျာႏ ဆရာႏဗွေႏဩ"။