ပိုခိုလစ်ꩻဖြာꩻ အမျာꩻသွမ်ꩻ
"မဟာသာလသုတ် (ပိုခိုလစ်ꩻဖြာꩻ အမျာꩻသွမ်ꩻသဲ့ꩻ ဟဲ့ꩻချာအဖါ)"
မော့ꩻနဝ်ꩻခါ ပုဏ္ဏာꩻဖြားတဖြာꩻနဝ်ꩻ ခွမ်ꩻလာꩻတဲ့ သဲ့သဲ့သသꩻ၊ ယယယိယိ၊ ပြောဝ်ႏပြောဝ်ႏပြီႏပြီႏ၊ ဝွေꩻထီႏ ဗွေႏဘုရာꩻတဲင် လွေꩻထေ့၊ ဝုဲင်ႏဘုရာꩻထွူခါ အုံလင်ꩻချာတထွောင်း၊ ဗွေႏဘုရာꩻရီနုဲင်းယို- "တကာႏပုဏ္ဏာꩻ- တကာႏနဝ်ꩻ ဖြားတဲ့ကဖြား၊ ခွမ်ꩻလာꩻတဲ့ သဲ့သဲ့သသ၊ မယငါႏနုဲင်းနဝ်ꩻ" "ဩဗွေႏ- ဘုရာꩻမျတ်ဗွေႏဩ- ခွေသွဉ်းနဝ်ꩻ ပိုခိုအဝ်ႏလစ်ꩻဖြာꩻ၊ ဝွေꩻသီးဖုံႏ တမာဝါꩻ တွိုင်ႏပင်ႏလို့ဝင်ꩻ ဝါးလင်ꩻထိုꩻခွေသွဉ်း ဗွေႏဩ" "ပေါႏနဝ်ꩻတဲ့- ခွေသွဉ်ဖေႏ တကာႏငေါဝ်းယို၊ လိုꩻအဝ်ႏဗူႏအာ မုဲင်ꩻကိုကိုတဲ့ ရွစ်နယ်ဝင်ꩻအမျာꩻနုဲင်းယိုနော- ၁။ ပိုခိုဖုံႏပေႏခါနဝ်ꩻ၊ ဖါယိုကရက်၊ သက်လꩻအုဲင်ႏမာ၊ ယိုခါ မာမာဝါꩻဝါꩻ၊ ကေꩻဇူꩻတရာꩻမယူႏ၊ အူႏချာခွေနုဲင်းထွီႏလွင်ꩻ၊ ဝါးလင်ꩻထိုꩻခွေ၊ ဖေႏအုံတဝ်းလမ်း။ ၂။ ပိုခိုတွမ်ႏပနံ၊ ယံတဝ်းဗွန်ဖီလူꩻ၊ ကေꩻဇူꩻမသေ၊ ဝါးလင်ꩻထိုꩻခွေ၊ ဖေႏအုံတဝ်းလမ်း။ ၃။ ထွဉ်ႏအံႏလꩻဒွုမ် သေဖြားတဗာႏ ပါꩻဗွူႏဒွုမ်အဆာႏ၊ ခွေယိုဗွန်ပီသေဖြား၊ ပိုဖုံႏထွားဒွုမ်၊ ခွုမ်တကောက်ꩻယ၊ ကော့ကော့ကက၊ လယ်ႏကွီအံႏဗာႏဝင်ꩻနုဲင်းယို။ ၄။ ခွဉ်းထောက်ဝါႏယို မွေးထဲင်းဗာႏ၊ အာႏကွိုꩻလꩻဒျာႏ၊ ရဲခါႏခါႏအီဖိုး၊ မိုးခါႏခါႏအီထွီႏ၊ ဖေႏအံႏအွီႏပေႏခါ၊ ကထွာပိုမွိုက်၊ ကျွိုက်တဝ်းဒွုမ်ခွေ၊ ဖေႏအုံတဝ်းဒွုမ်လမ်း။ ၅။ ခွဉ်းထောက်ဝါႏယို၊ ထာꩻခေ့ꩻကိုဝွေးလꩻ၊ တနꩻထာꩻအောင်၊ ဖုဲင်းသောင်လွေꩻငါ၊ ကာꩻတောလွေꩻထွိုက်၊ တွိုႏပိုမွိုက်လစ်ꩻဖြာꩻ၊ မာဝါꩻတွိုင်ႏပင်ႏ၊ ငင်ႏလင်ꩻထိုꩻခွေ၊ သေတဝ်းကေꩻဇူꩻ၊ ဘီလူꩻတန်ဖုံႏဒျာႏ၊ ခွဉ်းထောက်ဝါႏယို၊ မုဲင်ꩻကိုကိုအာႏကွိုꩻလꩻ၊ နဝ်ꩻမꩻယံလဲဉ်း၊ ကဲဉ်းကဲဉ်းရိုꩻထွိုက်၊ ပိုခိုမွိုက်လစ်ꩻဖြာꩻ၊ ဗွေႏဘုရာꩻသွဉ်ဖေႏနုဲင်းနဝ်ꩻတဲင် ပေါႏတွိုႏတွိုႏ၊ လိုꩻအာခြာနဝ်ꩻ ပုဏ္ဏာꩻဖြားရွစ်နယ်နုဲင်းနောဝ်ꩻ။ ပေါႏလိုꩻအာခြာ အဖါရွစ်နုဲင်းနဝ်ꩻ တထွောင်းထွူတထွောင်းတွော့ꩻ လိုꩻဖုံႏသွမ်ꩻသဲ့ꩻ ကဲ့ꩻရဲ့ꩻလွ အပိုခိုဖုံႏ၊ "ပိုခိုမယံ-ပနံကျတဝ်းမꩻ၊ ဖါဖြားတဖြာꩻ လယ်ႏကွီအံႏဗာႏပါꩻ"ထွိုင်ႏဒေါ့ꩻနုဲင်းနဝ်ꩻမꩻ အပိုခိုဖုံႏနဝ်ꩻ တွိုင်ႏပင်ႏလွဝင်ꩻ၊ လွေꩻပင်ꩻသဲင်ꩻယင်းအဖါ၊ ဖေႏအုံယင်းလမ်း။ အွဉ်ႏလူးဖေႏအဖါထီ၊ ပြွတ်ဖေႏအဖါခွမ်ꩻလာꩻ၊ တဲႏနဝ်ꩻမာꩻငါ အဖါသꩻချမ်ꩻသာႏ၊ ထင်ႏလူႏဗာႏစွဉ်ႏဗွေႏဘုရာꩻ၊ ထွာတငါစွဉ်ႏဒျာႏ ဗုဒ္ဓဘာႏသာႏ ဥပါသကာႏတဖြာꩻနောဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ မဟာသာလသုတ်)[၁][၂]