ပုညကြိယာႏဝတ္ထုငေါဝ်းတယ်ႏအွဉ်
"ငေါဝ်းတယ်ႏအွဉ်" နေင်ႏ ၁၃၅၀-ဗွေ၊ တထိန်ႏလောင်း(၁၅) (၈-၁၂-၈၈)နီꩻ ကမာꩻဒါႏ ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသင်္ဃာႏစွိုꩻ ပွယ်ꩻမော့ꩻခွဲး (တောင်ႏကီꩻ၊ ကျောင်ꩻတန်)ကို ဆွုံꩻဖျတ်ချက်အလꩻ "ယံကတဲမ်းဖေႏယင်းသွော့ ပုညကြိယာႏဝတ္ထုပါꩻဆီ"ဗွေႏသင်္ဃာႏသီး တဲက်တွန်ꩻဖေႏတာႏဝွန်ႏဖျင်နုဲင်းနဝ်ꩻတဲင် တဲမ်းဖေႏယင်း "ပုညကြိယာႏဝတ္ထုပါꩻဆီ"ယိုသွူ။ ပုညကြိယာႏပါꩻဆီကို ကသေထွိုက် ကသေသင်ꩻဒါႏ အကျောင်ꩻခရာႏဖုံႏယို မဉ်ႏအွဉ်ႏသꩻတဲမ်းလို့လို့နဝ်ꩻ ဒါႏနခရာႏတမျိုꩻခြေင်ခြေင်ငါမဉ်ႏတဲ့ အီႏအဝ်ႏလိတ်စောင်ႏ ကားမုဲင်ꩻစောင်ႏစောင်ႏနောဝ်ꩻသွူ။ ယိုနောဝ်ꩻ ပုညကြိယာႏဝတ္ထု အပါꩻတဆီလိုမ်းတဲ့ ဖေႏကသေဗာႏလို့တလဲင်ႏချင်ꩻ၊ တွမ်ႏသွဉ်တန်ꩻအခိန်ႏခါႏတဲ့ ဖေႏနေးကမဲဉ်ႏရာႏ ချင်းဖေႏဗာႏနုဲင်းနဝ်ꩻတဲင် ကတဲမ်းယိုနောဝ်ꩻ ထွားတဲမ်းထေထန်ႏ ယဟန်ႏဟန်ႏလွုမ်ꩻနောဝ်ꩻသွူ။ ကွဲႏတွော့ꩻ ပွိုင်းဝွို့တွမ်ႏပုညကြိယာႏပါꩻဆီနဝ်ꩻ သေသေꩻခါꩻ တကားယိုတဲ့ မနဲးပြဲ့ꩻစွုံႏလဲဉ်း၊ အုံအီ၊ အောဝ်ႏအီ၊ ခွုမ်မာꩻဒေါ့ꩻဖြောဝ်ႏအီ ထွာငါႏလဲဉ်း ကုသိုလ်ႏ၊ အကျိုꩻအာငါႏလဲဉ်း မရေႏမရာႏနောဝ်ꩻသွူ။ ကုသိုလ်ႏတရာꩻ ယံတိုꩻပွါꩻတငါငါ ယိုခါဆုဲင်ꩻတာႏ ဖေႏနေးကချမ်ꩻသာႏလွေꩻမပ်မပ်၊ ဝဋ်ဇာတ်ဒုက္ခ ယံကလွစ်လꩻခန်း ပငါပရာꩻနဝ်ꩻ ကျိုꩻစာꩻလွဉ်ꩻသွော့ ပုညကြိယာႏဝတ္ထုပါꩻဆီယို၊ ဟဝ်မုဲင်ꩻရာꩻ မာꩻလွေꩻမွေးမွေးသွော့ ယိုအတွိုင်ꩻ၊ ပေါႏမဉ်ႏမာꩻလွေꩻမွေးမွေး ပုညကြိယာႏပါꩻဆီယိုနဝ်ꩻ လောကသံႏသရာႏ ချမ်ꩻသာႏသုခ တိက်ချလꩻဗာႏအမန်ႏနောဝ်ꩻသွူ။ "မာꩻယံယံသွော့" - ပုညကြိယာႏ - ကုသိုလ်ႏတာႏယို အဗာႏတဆီ - ရွစ်ကသီသူꩻ နာꩻနီထူႏရေꩻ - မဉ်ႏမာꩻလွေꩻနောဝ်ꩻ ရန်ႏဘေꩻအာစား - ကင်ꩻထိုꩻမားတဲင် လွစ်လျားညိမ်ꩻခွꩻ - ချမ်ꩻသာႏသꩻတွော့ꩻ ရွစ်ဗꩻဗိုလ်ႏဉာဏ်ႏ - တွိုႏနိဗ္ဗာန်ႏသူꩻ ဓိဋ္ဌာန်ႏတန်တန် - မာꩻယံယံနော။[၁][၂]