ပူႏဇောႏယဇ်နောဝ်ꩻ

"ဒုတိယ အဂ္ဂိသုတ် (ပူႏဇောႏယဇ်နောဝ်ꩻ ထွာအကုသိုလ်ႏ)" အတွင်ꩻနဝ်ꩻခါ ဥဂ္ဂတသရီရပုဏ္ဏာꩻနဝ်ꩻ အီႏမာꩻပွယ်ꩻပူႏဇောႏယဇ်တဲင် ဝါးလွဉ်ဖိုးထီးတန် အဗာႏငတ်ꩻရျာꩻ၊ ဖိုးထီးပေႏ အဗာႏငတ်ꩻရျာꩻ၊ ဖိုးမွူးအဗာႏငတ်ꩻရျာꩻ၊ ဗဲအဗာႏငတ်ꩻရျာꩻ၊ သွိုꩻအဗာႏငတ်ꩻရျာꩻနောဝ်ꩻသွူ။ ဥဂ္ဂတသရီရပုဏ္ဏာꩻနဝ်ꩻ စဉ်ꩻစာꩻယူႏနုဲင်းယို- ဘုရာꩻဂေါတမသူꩻနဝ်ꩻ ပညာႏတန်၊ ခွေလွေꩻထေ့ကမꩻ၊ ခွေမာꩻပွယ်ꩻပူႏဇောႏယဇ်ယို အကျိုꩻမဉ်ႏအဝ်ႏတဲ့ အအီႏအံႏဖြာႏ၊ အကျိုꩻမဉ်ႏအဲဉ်ထဝ်းတဲ့ အအီႏကဲ့ꩻရဲ့ꩻသဲ့ꩻသွမ်ꩻ၊ အအီႏဟော်ꩻဖေႏခွေတရာꩻ၊ စဉ်ꩻစာꩻယူႏနုဲင်းနဝ်ꩻတဲင် ထင်ႏထေ့ဗွေႏဘုရာꩻ၊ လောဝ်းဗွေႏဘုရာꩻနုဲင်းယို- "ဩဗွေႏ ဂေါတမဗွေႏဩ- ခွေသွဉ်းမဉ်ထူႏငါႏ 'မေႏ' (မင်္ဂလာႏ)၊ မဉ်ဆို့ꩻငါႏယဇ်ထွန်ႏ ဗွေႏဩ၊ ညဆွာꩻချိန်ႏခါႏ ချမ်ꩻသာႏယံထွာ ငေါဝ်းငွါဩဝါဒ ဆွုံꩻမꩻသွဉ်သင်သွော့ ခွေသွဉ်းယို ဗွေႏဩ"လောဝ်းဗွေႏဘုရာꩻနုဲင်းနဝ်ꩻ၊ ဗွေႏဘုရာꩻရိုꩻ- "တကာႏပုဏ္ဏာꩻ- လိုꩻကမဉ်ထူႏဒါႏ 'မေႏ'မင်္ဂလာႏ၊ လိုꩻကမဉ်ဆို့ꩻဒါႏ ယဇ်ထွန်ႏနဝ်ꩻ ခါးလားကထူႏမေႏကာႏ၊ ခါးလားကဆို့ꩻယဇ်ထွန်ႏကာႏ အဆို့ꩻခါꩻရီးလဲဉ်း အကုသိုလ်ႏလက်နက်ထွန်ႏ သွံလီးနောဝ်ꩻသွူ။ လက်နက်ထွန်ႏ သွံလီးကရိုꩻနဝ်ꩻ- ၁။ အီႏပူႏဇောႏယဇ်တာႏ နမ်းယိုအွဉ်ငါ မာꩻဗာႏတဲင် ထွာလဲဉ်းသွူ 'ကာယကံႏအကုသိုလ်ႏ'လက်နက်ထွန်ႏတလီး၊ အီႏမာꩻသီဖိုးထီးတန် အဗာႏငတ်ꩻရျာꩻ နမ်းအွဉ်မာꩻဗာႏ၊ အီႏမာꩻသီဖိုးထီးပေႏ အဗာႏငတ်ꩻရျာꩻ နမ်းအွဉ်မာꩻဗာႏ၊ အီႏမာꩻသီဗဲ အဗာႏငတ်ꩻရျာꩻ နမ်းအွဉ်မာꩻဗာႏ၊ အီႏမာꩻသီသွိုꩻ အဗာႏငတ်ꩻရျာꩻ နမ်းအွဉ်မာꩻဗာႏ။ ဝွေꩻကရိုꩻနဝ်ꩻ မာꩻကုသိုလ်ႏတဲ့ ထွာတောဒျာႏ မာꩻအကုသိုလ်ႏ၊ ဝွေꩻရိုꩻ ဖေႏကတွိုႏလွေꩻ ဘွုံႏဘဝဟောဝ်တဲ့ အီႏတွိုႏလွေꩻတောဒျာႏ ဘွုံႏဘဝကုဲင်နောဝ်ꩻသွူ။ ၂။ အီႏပူႏဇောႏယဇ်တာႏ မာꩻသီဖိုးထီးတန် အဗာႏငတ်ꩻရျꩻနဝ်ꩻလုဲင်း၊ မာꩻသီဖိုးထီးပေႏ အဗာႏငတ်ꩻရျာꩻနဝ်ꩻဟုဲင်း၊ မာꩻသီဗဲ အဗာႏငတ်ꩻရျာꩻနဝ်ꩻလုဲင်း၊ မာꩻသီသွိုꩻ အဗာႏငတ်ꩻရျာꩻနဝ်ꩻဟုဲင်း၊ ဒေါ့ꩻဗာႏတွမ်ႏဖြောင်းတဲင် ထွာ'ဝစီꩻကံႏအကုသိုလ်ႏလက်နက် ထာꩻထွန်ႏတလီး'။ ဝွေꩻကရိုꩻနဝ်ꩻ မာꩻကုသိုလ်ႏတဲ့ ထွာတောဒျာႏ မာꩻအကုသိုလ်ႏ၊ ဝွေꩻရိုꩻ ဖေႏကတွိုႏလွေꩻ ဘွုံႏဘဝဟောဝ်တဲ့ အီႏတွိုႏလွေꩻတောဒျာႏ ဘွုံႏဘဝကုဲင်နောဝ်ꩻသွူ။ ၃။ အီႏပူႏဇောႏယဇ်တာႏ အီႏမာꩻသီက ဖိုးထီးတန် အဗာႏငတ်ꩻရျာꩻ၊ အီႏမာꩻသီက ဖိုးထီးပေႏ အဗာႏငတ်ꩻရျာꩻ၊ အီႏမာꩻသီက ဗဲအဗာႏငတ်ꩻရျာꩻ၊ အီႏမာꩻသီက သွိုꩻအဗာႏငတ်ꩻရျာꩻ၊ စဉ်ꩻစာꩻယူႏရီးဗာႏနုဲင်းနဝ်ꩻတဲင် ထွာ'မနော်ꩻကံႏအကုသိုလ်ႏလက်နက် ထာꩻထွန်ႏတလီး'။ ဝွေꩻကရိုꩻနဝ်ꩻ မာꩻကုသိုလ်ႏတဲ့ ထွာတောဒျာႏ မာꩻအကုသိုလ်ႏ၊ ဝွေꩻရိုꩻ ဖေႏကတွိုႏလွေꩻ ဘွုံႏဘဝဟောဝ်တဲ့ အီႏတွိုႏလွေꩻတောဒျာႏ ဘွုံႏဘဝကုဲင်နောဝ်ꩻသွူ။ "လိုႏပယ်ႏထိုꩻ မေႏသွံမျိုꩻ လိုႏပူႏဇောႏ မေႏသွံမျိုꩻ" တကာႏပုဏ္ဏာꩻဟွေး- 'မေႏ'သွံမျိုꩻယိုနဝ်ꩻ ပယ်ႏထိုꩻဗာႏ၊ သျောင်ႏဖုဲင်းထိုꩻဗာႏ၊ ဟဝ်ကျင်ꩻသွုံꩻတဝ်း၊ မေႏသွံမျိုꩻကရိုꩻနဝ်ꩻ ၁။ ထာꩻတထဲ့မေႏ'ရာဂ'၊ ပေါႏမေႏရာႏဂယို စွယ်ꩻခြꩻလꩻသွူ သꩻကိုနဝ်ꩻ ပေါႏဝွေꩻနိစ္စက်လꩻသွူ သꩻယိုနဝ်ꩻ ထာꩻတဟောဝ်တဝ်း ကာယဒုစရဲက်တဲ့မာꩻစွဉ်ႏ၊ ထာꩻတဟောဝ်တဝ်း ဝစီꩻဒုစရဲက်တဲ့ ဒေါ့ꩻစွဉ်ႏ၊ ထာꩻတဟောဝ်တောဝ်း မနော်ꩻဒုစရဲက်တဲ့ ယူႏစွဉ်ႏ၊ ဝွေꩻနောဝ်ꩻနောဝ်ꩻ ကွပ်မာꩻကာယဒုစရဲက်၊ ဝစီꩻဒုစရဲက်၊ မနော်ꩻ ဒုစရဲက်တဲင် ခန္ဓာႏကုဲင်လီ မဉ်ႏသီသူꩻနဝ်ꩻ ထဲ့ဗာႏငါးရုဲင်ꩻ၊ ကွပ်နဝ်ꩻမꩻ မေႏရာႏဂနဝ်ꩻ ပယ်ႏဗာႏ၊ သျောင်ႏဖုဲင်းဗာႏ၊ ဟောဝ်ကျင်ꩻသွုံꩻတဝ်းနဝ်ꩻသွူ။ ၂။ ထာꩻသꩻထန်ႏမေႏ 'ဒေါသ'၊ ပေါႏမေႏဒေါႏသꩻယို ဗွို့ꩻခြꩻလꩻသွူ သꩻကိုနဝ်ꩻ ပေါႏဝွေꩻနိစ္စက်လꩻသွူ သꩻယိုနဝ်ꩻ ထာꩻတဟောဝ်တဝ်း ကာယဒုစရဲက်တဲ့ မာꩻစွဉ်ႏ၊ ထာꩻတဟောဝ်တဝ်း ဝစီဒုစရဲက်တဲ့ ဒေါ့ꩻစွဉ်ႏ၊ ထာꩻတဟောဝ်တဝ်း မနော်ꩻဒုစရဲက်တဲ့ ယူႏစွဉ်ႏ။ ဝွေꩻနဝ်ꩻနဝ်ꩻ ပွိုးမာꩻကာယဒုစရဲက်၊ ဝစီꩻဒုစရဲက်၊ မနော်ꩻဒုစရဲက်တွော့ꩻ ခန္ဓာႏကုဲင်လီ မဉ်ႏသီသူꩻနဝ်ꩻ ထဲ့ဗာႏငါးရုဲင်ꩻ၊ ပွိုးနဝ်ꩻမꩻ မေႏဒေါသနဝ်ꩻ ပယ်ႏဗာႏ၊ ဟောဝ်ကျင်ꩻသွုံꩻတဝ်းနဝ်ꩻသွူ။ ၃။ ထာꩻလိန်းလွုမ်ႏမေႏ 'မောႏဟ'၊ ပေါႏမေႏမောႏဟꩻယို မာꩻတဒူအောက်ꩻအဲက်ꩻလꩻသွူ သꩻကိုနောဝ်ꩻ၊ ပေါႏဝွေႏနိစ္စက်လꩻသွူ သꩻယိုနဝ်ꩻ ထာꩻတဟောဝ်တဝ်း ကာယဒုစရဲက်တဲ့ မာꩻစွဉ်ႏ၊ ထာꩻတဟဝ်တဝ်း ဝစီဒုစရဲက်တဲ့ ဒေါ့ꩻစွဉ်ႏ၊ ထာꩻတဟောဝ်တဝ်း မနော်ꩻဒုစရဲက်တဲ့ ယူႏစွဉ်ႏ၊ ဝွေꩻနဝ်ꩻနဝ်ꩻ ကွပ်ပွိုးမာꩻကာယဒုစရဲက်၊ ဝစီꩻဒုစရဲက်၊ မနော်ꩻဒုစရဲက်တဲင်တွော့ꩻ ခန္ဓာႏကုဲင်လီ မဉ်ႏသီသူꩻနောဝ်ꩻ ထဲ့ဗာႏငါးရုဲင်ꩻ၊ ကွပ်ပွိုးနဝ်ꩻမꩻ 'မေႏမောႏဟꩻနဝ်ꩻ' ပယ်ႏဗာႏ၊ သျောင်ႏဖုဲင်းဗာႏ၊ ဟောဝ်ကျင်ꩻသွုံꩻတဝ်းနဝ်ꩻသွူ။ တကာႏပုဏ္ဏာꩻဟွေး- ၄။ ရိုႏရိုႏသေႏသေႏ ပူႏဇောႏဒျာႏသွော့ မေႏ'မွိုးဖါ"နဝ်ꩻလုဲင်း။ ၅။ ရိုႏရိုႏသေႏသေႏ ပူႏဇောႏဒျာႏသွော့ မေႏ'လမ်းဗွေႏ(ဝါꩻခို)နဝ်ꩻဟုဲင်း။ ၆။ ရိုႏရိုႏသေႏသေႏ ပူႏဇောႏဒျာႏသွော့ မေႏ'အလူႏခံႏ(ရဟန်ꩻပုဏ္ဏာꩻ)နဝ်ꩻနေား။ ပေါႏပူႏဇောႏမေႏယိုသွံမျိုꩻနဝ်ꩻ အကျိုꩻအာ၊ ထွာထာꩻချမ်ꩻသာႏ။ ၇။ အွိုးမေႏကဒွိုႏအီဒဲဉ် 'မေႏသိုႏ'နောဝ်ꩻတဲး ယလဲင်ႏလဲင်ႏနဝ်ꩻ အဝ်ႏလိုႏအူတင်ႏ၊ ယလဲင်ႏလဲင်ႏနောဝ်ꩻ အွဉ်ႏဗော့ꩻနုဲင်းနဝ်ꩻ၊ ယလဲင်ႏလဲင်ႏနဝ်ꩻ လိုႏမာꩻဖေ့၊ ယလဲင်ႏလဲင်ႏနဝ်ꩻ လိုႏမာꩻဖေ့တောဝ်းနဝ်ꩻသွူ"။ "ဩဗွေႏ ဘုရာꩻမျတ်ဗွေႏဩ- နီဗွေႏဟော်ꩻနယ်ဖေႏ တရာꩻမေႏခရာႏနဝ်ꩻ သꩻရေꩻငါႏ၊ နစ်သက်ငါႏဗွေႏဩ၊ ခွေသွဉ်းကရေႏမာꩻသီဒါႏ ဖိုးထီးဗဲသွိုꩻ 'အဗာႏနီရေင်'နဝ်ꩻတဲ့ ခွေသွဉ်းအွဉ်ႏစွꩻလို့လို့ယင်း၊ ဝွေꩻသီးလွစ်ယင်း ထာꩻသီ၊ အွꩻထီအံႏမီꩻ၊ တလီꩻထွာႏရျူႏ၊ ခွေသွဉ်းလူႏ ဝွေꩻသီးသက်ဗွေႏဩ"ပုဏ္ဏာꩻနဝ်ꩻထွာယင်းလိုꩻထာꩻထီႏမဲဉ်ႏ၊ ထွာယင်းဗုဒ္ဓဘာႏသာႏ ဥပါႏသကာႏ တဖြာꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ သတ္တကနိပါတ်၊ ဒုတိယအဂ္ဂိသုတ်)