ပေါႏခွုမ်ခါꩻအပရိဟာနိယ
"ဝဿကာရသုတ် (ပေါႏခွုမ်ခါꩻ အပရိဟာနိယ တရာꩻနွုတ်ꩻပါꩻနဝ်ꩻ ဝင်ꩻတွိုက်ꩻနွောင်ꩻတဝ်း)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ ရာႏဇဂျိုဟ်ႏခမ်း၊ ဂိဇ္ဈကုဋ်ကောင်လောင်းတွင်ꩻ 'နင်ꩻဝေဒေဟီ'ပိုခို မဂဓခမ်းဗွေႏ ခွန်အဇာတသတ်နဝ်ꩻ အီႏလွေꩻတွိုက်ꩻ ခွန်ဝဇ္ဇီႏဖုံႏတဲင် အဒေါ့ꩻနုဲင်းယို- "ခွန်ဝဇ္ဇီႏဖုံႏနဝ်ꩻ တံꩻခိုꩻတန်နာႏ၊ ခွေအီႏလွတ်ꩻလို့က ဝဇ္ဇီႏမျိုꩻခွန်ခွိုꩻ၊ ခွေအီႏယားကုဲင်က၊ အီႏမာꩻသွုမ်ꩻတေင်က"ခွန်အဇာတသတ် ဒေါ့ꩻပျတ်စွဉ်ႏနုဲင်းနောဝ်ꩻသွူ။ အရေꩻတန်ငါႏ အခိန်ႏခါႏတွင်ꩻ- ခွန်အဇာတသတ်နဝ်ꩻ ဟဲ့ꩻလွဉ်အမတ်တန် 'ဝဿကာရပုဏ္ဏာꩻ'ထွူခါ ဝွေꩻထွဉ်ႏနုဲင်းယို- "ယို ဝဿကာရပုဏ္ဏာꩻ အမတ်တန်ဟွေး- ထင်ႏထေ့ နီဗွေႏဘုရာꩻဟုဲင်း၊ ဝုဲင်ႏနီဗွေႏဘုရာꩻထွူခါ 'ထာꩻဆာကင်ꩻနေဟောင်း၊ ရောႏဂါႏကင်ꩻနေဟောင်း၊ အုံဟောဝ်နေဟောင်း၊ အောဝ်ႏဆွော့ꩻနေဟောင်း၊ အုံဗာႏချမ်ꩻချမ်ꩻသာႏသာႏဒျာႏဟောင်း'၊ 'ခွန်အဇာတသတ် ထွဉ်ႏရီနုဲင်းနဝ်ꩻ'လောဝ်းနုဲင်းနဝ်ꩻထွူတွော့ꩻ ဒေါ့ꩻနယ်ပါသွော့နုဲင်းယို ခွန်အဇာတသတ်ရိုꩻ- 'ခွန်ဝဇ္ဇီႏဖုံႏနဝ်ꩻ တံꩻခိုꩻတန်နာႏ၊ ခွေအီႏလွတ်ꩻလို့က ဝဇ္ဇီႏမျိုꩻခွန်ခွိုꩻ၊ ခွေအီႏယားကုဲင်က၊ အီႏမာꩻသွုမ်ꩻတေင်က'ခွန်အဇာတသတ် ဒေါ့ꩻနုဲင်းနဝ်ꩻ၊ လောဝ်းပါနုဲင်းနဝ်ꩻနော၊ ဗွေႏဘုရာꩻသီးအမျိုꩻနဝ်ꩻ အမျိုꩻဒေါ့ꩻလဲဉ်ထာꩻမွေးတဝ်း၊ ဗွေႏဘုရာꩻ အီႏရိုꩻနုဲင်းမုဲင်ꩻ တောင်ꩻခါꩻဟောဝ်ဟောဝ်သွော့၊ ဗွေႏဘုရာꩻကဒေါ့ꩻငေါဝ်းနောဝ်ꩻ သဲင်ꩻလောဝ်းလို့လို့ခွေနော"ထွဉ်ႏဝဿကာရပုဏ္ဏာꩻ နုဲင်းနောဝ်ꩻသွူ။ ခွန်အဇာတသတ် ကထွဉ်ႏအတွိုင်ꩻ အမတ်တန်ဝဿကာရပုဏ္ဏာꩻ ထင်ႏထေ့နီဗွေႏဘုရာꩻ၊ လောဝ်းနီဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- ဗွေႏဘုရာꩻနဝ်ꩻ 'ထာꩻဆာကင်ꩻနေဟောင်း၊ ရောႏဂါႏကင်ꩻနေဟောင်း၊ အုံဟောဝ်နေဟောင်း၊ အဝ်ႏဆွော့ꩻဒျာႏဟောင်း၊ အုံဗာႏချမ်ꩻချမ်ꩻသာႏသာႏဒျာႏဟောင်း' ခွန်အဇာတသတ်ထွဉ်ႏရီ နုဲင်းနောဝ်ꩻ ဗွေႏဩ" ခွန်အဇာတသတ် ထွဉ်ႏလောဝ်းပါနုဲင်းယို ဗွေႏဩ- 'ခွန်ဝဇ္ဇီႏဖုံႏနဝ်ꩻ တံꩻခိုꩻတန်နာႏ၊ ခွေအီႏလွတ်ꩻလို့က ဝဇ္ဇီႏမျိုꩻခွန်ခွိုꩻ၊ ခွေအီႏယားကုဲင်က၊ အီႏမာꩻသွုမ်ꩻတေင်က' 'ခွန်အဇာတသတ် ဒေါ့ꩻနုဲင်းနဝ်ꩻ'အကျောင်ꩻ ထွဉ်ႏလောဝ်းပါနုဲင်းနောဝ်ꩻယင်ကယ်ႏ ဗွေႏဩ" ဝဿကာရပုဏ္ဏာꩻ လောဝ်းနုဲင်းနောဝ်ꩻသွူ။ အတွင်ꩻနဝ်ꩻနဝ်ꩻ ဗွေႏအာႏနန္တာႏ အဝ်ႏဝင်းဖေႏ ဗွေႏဘုရာꩻဝီꩻတဲင် ဗွေႏဘုရာꩻရီနုဲင်းယို- "အာႏနန္တာႏ- ၁။ တကာႏခွန်ဝဇ္ဇီႏဖုံႏနောဝ်ꩻ အုံကွံ(စီꩻဝွေꩻ) သေႏသေႏနေလို့ဝင်ꩻဟောင်း၊ အလဲင်ႏပေါင်ꩻအာအာ၊ အုံကွံသေႏသေႏနေလို့ဝင်ꩻဟောင်း၊ နာꩻဟွူန်နုဲင်းမုဲင်ꩻ" "ဩဗွေႏ ဘုရာꩻမျတ်ဗွေႏဩ- 'ခွန်ဝဇ္ဇီႏဖုံႏနဝ်ꩻ အုံကွံ(စီꩻဝွေꩻ)သေႏသေႏဒျာႏလို့ဝင်ꩻ၊ အလဲင်ႏပေါင်ꩻအာအာ၊ အုံကွံသေႏသေႏဒျာႏလို့ဝင်ꩻ'ခွေသွဉ်းဟွူန်နုဲင်းနဝ်ꩻ ဗွေႏဩ" "အာႏနန္တာႏဟွေး- ခွန်ဝဇ္ဇီႏဖုံႏ ပေါႏအဝ်ႏအုံကွံ(စီꩻဝွေꩻ)သေႏသေႏဒျာႏလို့ဝင်ꩻ၊ အလဲင်ႏပေါင်ꩻအာအာ ပေါႏအဝ်ႏအုံကွံသေႏသေႏဒျာႏလို့ဝင်ꩻနဝ်ꩻ အဝ်ႏစီꩻပွါꩻတိုက်လွုမ်ꩻ၊ ဆွုတ်ယွုတ်ခရာႏအဲဉ်ထောဝ်း"။ ၂။ "ခွန်ဝဇ္ဇီႏဖုံႏနဝ်ꩻ လွောင်ႏလွောင်ႏဗူႏဗူႏ အုံကွံနေလို့ဝင်ꩻဟောင်း၊ လွောင်ႏလွောင်ႏဗူႏဗူႏ အုံကွံ(စီꩻဝွေꩻ-ဆွေꩻနွေꩻ၊ တွိုင်ႏပင်ႏ)လွနေဟောင်း၊ ဝွေꩻသီးခမ်းတွက်ထီတာႏ ပွယ်ꩻအုံကွံထွူမꩻ ထွိုင်ႏသဲင်ꩻ(သဲင်ꩻတရတ်တရစ်ထိုꩻတဝ်း)မွေးနေဟောင်း၊ နာꩻဟွူန်နုဲင်းမုဲင်ꩻ" "ဗွေႏဩ ဘုရာꩻမျတ်ဗွေႏဩ- ခွန်ဝဇ္ဇီႏဖုံႏနောဝ်ꩻ လွောင်ႏလွောင်ႏဗူႏဗူႏ အုံကွံဒျာႏ၊ လွောင်ႏလွောင်ႏဗူႏဗူႏ အုံကွံ(စီꩻဝွေꩻ-ဆွေꩻနွေꩻ၊ တွိုင်ႏပင်ႏ)ဒျာႏ ဝွေꩻသီးခမ်းတွက်ထီတာႏ ပွယ်ꩻအုံကွံထွူမꩻ ထွိုင်ႏသဲင်ꩻ (သဲင်ꩻတရတ်တရစ်ထိုꩻတဝ်း) ဗွေႏဩ" "အာႏနန္တာႏဟွေး- ပေါႏခွန်ဝဇ္ဇီႏသီး အဝ်ႏမာꩻနုဲင်းနဝ်ꩻအတွိုင်ꩻနဝ်ꩻ အဝ်ႏစီꩻပွါꩻတိုꩻတက်လွုမ်ꩻ၊ ဆွုတ်ယွုတ်ခရာႏအဲဉ်ထဝ်း။ ၃။ ခွန်ဝဇ္ဇီႏဖုံႏနဝ်ꩻ (အကျိုꩻအာအာ၊ အမျိုꩻကထွာထွာ)အထွုံꩻဟောဝ်စခါ (စီꩻကန်ꩻဟောဝ်စခါ)ဖုံႏနောဝ်ꩻ ပေါႏယားကုဲင်ထိုꩻတဝ်း ထွုံꩻဟောဝ်စခါ (စီꩻကန်ꩻဟောဝ်စခါ)ဖုံႏနဝ်ꩻ ပေါႏအဝ်ႏလွောက်ꩻနာႏလွနေနဝ်ꩻ အဝ်ႏစီꩻပွါꩻတိုꩻတက်ခရာႏလွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ၄။ ခွန်ဝဇ္ဇီႏဖုံႏနဝ်ꩻ ပေါႏအဝ်ႏရိုႏသေႏဒျာႏ ခွန်ဖြားခွန်တန်၊ လိုꩻဖြားလိုꩻတန်၊ ပေါႏအဝ်ႏနာႏဒျာႏ လိုꩻဖြားလိုꩻတန်ငေါဝ်းနဝ်ꩻ အဝ်ႏစီꩻပွါꩻတိုꩻတက်ခရာႏလွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ၅။ ခွန်ဝဇ္ဇီႏဖုံႏနဝ်ꩻ ပေါႏသီမ်ꩻနွိုင်ႏတဝ်း ဝင်ꩻပိုမူႏနဝ်ꩻ အဝ်ႏစီꩻပွါꩻတိုꩻတက်လွုမ်ꩻ၊ ဆွုတ်ယွုတ်ခရာႏအဲဉ်ထဝ်း။ ၆။ ခွန်ဝဇ္ဇီႏဖုံႏနဝ်ꩻ ပေါႏအဝ်ႏတင်ႏစွူစွူဒျာႏ သာႏသနာႏခြေင်ႏ၊ လူႏခြေင်ႏနုဲင်းစခါအတွိုင်ꩻ၊ ပေါႏဝွေꩻသီး လူႏတန်ꩻထာꩻနဝ်ꩻ အဝ်ႏစီꩻပွါꩻတိုꩻတက်လွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ အာႏနန္တာႏဟွေး- ၇။ ခွန်ဝဇ္ဇီႏဖုံႏနဝ်ꩻ တကျွꩻလွဉ်ဒွိုန်း ရဟန္တာႏ(ရဟန်ꩻသံဃာႏ)ဖုံႏနဝ်ꩻတဲ့ ဖေႏကကျွꩻလွဉ်၊ ကကျွꩻလွဉ်လဲဉ်း ရဟန္တာႏ(ရဟန်ꩻသံဃာႏ)ဖုံႏနဝ်ꩻတဲ့ ဖေႏကအုံဗာႏ ချမ်ꩻချမ်ꩻသာႏသာႏနဝ်ꩻ ပွေါးရဲပ်ကာႏကွယ်ႏဖေႏ၊ ဝွတ်ပတ်ဖေႏ၊ ပေါႏဝွေꩻသီး အဝ်ႏမာꩻနုဲင်းနဝ်ꩻနဝ်ꩻ အဝ်ႏစီꩻပွါꩻတိုꩻတက်လွုမ်ꩻ၊ ဆွုတ်ယွုတ်ခရာႏအဲဉ်ထောဝ်းနောဝ်ꩻသွူ"။ "ဩဗွေႏ ဘုရာꩻမျတ်ဗွေႏဩ- ခွန်ဝဇ္ဇီႏသီးဖုံႏနဝ်ꩻ နွုတ်ꩻပါꩻတွမ်ႏရိုꩻမွုန်း လွောက်ꩻနာႏလွဉ်ꩻ တရာꩻနောဝ်ꩻ တပါꩻငါတဲ့ အဝ်ႏစီꩻပွါꩻတိုꩻတက်လွုမ်ꩻ၊ ဆွုတ်ယွုတ်ခရာႏအဲဉ်ထဝ်း၊ ဝွေꩻသီးလွောက်ꩻနာႏလို့ထဲင်း နွုတ်ꩻပါꩻပဉ်ဟ ဒေါ့ꩻခရာႏအဲဉ်ထဝ်း ဗွေႏဩ" အမတ်ပုဏ္ဏာꩻ လောဝ်းချာဗွေႏဘုရာꩻနုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ သတ္တကနိပါတ်၊ ဝဿကာရသုတ်)[၁][၂]