ပွယ်ꩻမော့ꩻခွဲး
ပွယ်ꩻမော့ꩻခွဲး အစီꩻဝွေꩻယို သဘာပတိနောဝ်ꩻ အီႏဒင်ႏဗာႏပုဂ္ဂိုလ်ႏ အပါꩻ/အဖြာꩻမုဲင်ꩻကရိုꩻနဝ်ꩻ အဝ်ႏနုဲင်းယို- ကစပ်ဒါႏတွမ်ႏအမျာꩻတဲင် ကမာꩻဗာႏ ပွယ်ꩻမော့ꩻခွဲး အစီꩻဝွေꩻနဝ်ꩻ အောဝ်ႏနီမျိုꩻနဝ်ꩻသွူ။ နီမျိုꩻကရိုꩻနဝ်ꩻ- ၁။ မညမမွိုင် ဆင်ႏဆင်ႏကအောဝ်ႏမာꩻဗာႏဒါႏ ပွယ်ꩻမော့ꩻခွဲးနဝ်ꩻ မဉ်ႏထွာပွယ်ꩻမော့ꩻခွဲးစားယိုနဝ်ꩻ တခုဲင်ႏလꩻတယ်ႏတောဝ်းဒွိုန်း ပွယ်ꩻမော့ꩻခွဲးအစီꩻဝွေꩻအခါႏ သဘာပတိနဝ်ꩻ လွိုက်ရွေꩻသွူ သင်ꩻရာꩻပုဂ္ဂိုလ်ႏတပါꩻပါꩻ/ တဖြာꩻဖြာꩻတဲင် စလွေꩻဗာႏ ပွယ်ꩻမော့ꩻခွဲးနဝ်ꩻသွူ။ ၂။ ညညမꩻတလဲင်ႏ မဉ်ႏထွာပွယ်ꩻမော့ꩻခွဲးစားယိုနဝ်ꩻ သဘာပတိယို ကေားဟဲ့ꩻဖစ်ပွယ်ꩻမော့ꩻခွဲးသား ထွားလွိုက်ဒင်ႏဗာႏနဝ်ꩻသွူ။ "ပွယ်ꩻမော့ꩻခွဲးကို လွိုက်ဒင်ႏသဘာပတိ ဒင်ႏမျောက်ပွုံႏဒင်ႏမျောက်နယ်ꩻ" ပွယ်ꩻမော့ꩻခွဲးယို အီႏဒင်ႏမျောက်ထင်ႏဗာႏ သဘာပတိနောဝ်ꩻ ကဉ်းအာအာ ပုဂ္ဂိုလ်ႏတပါꩻပါꩻ/ တဖြာꩻဖြာꩻ အုံထွိုင်ႏထွူတဲင် "သဘာပတိနဝ်ꩻ ဒင်ႏမျောက်သွော့ ပုဂ္ဂိုလ်ႏယို ပုဂ္ဂိုလ်ႏနဝ်ꩻ" ပုဂ္ဂိုလ်ႏတပါꩻ/ တဖြာꩻဒင်ႏသွင်ꩻဖေႏလွဉ် အကျံႏဉာဏ်ႏနုဲင်းနဝ်ꩻလဲ့ အောဝ်ႏကုဲင်ဒါႏ ပုဂ္ဂိုလ်ႏလောင်ႏလင်ဖုံႏ ကေားထွိုင်ႏကန်ႏကွက်ရဲးခါꩻ မဉ်ႏအဲဉ်ထောဝ်းနောဝ်ꩻ ပုဂ္ဂိုလ်ႏအရီးတပါꩻ/ဖြာꩻ ကဒင်ႏသွင်ꩻအတွိုင်ꩻ စူꩻလွဉ်ꩻဗာႏနဝ်ꩻသွူ။ ပုဂ္ဂိုလ်ႏတပါꩻပါꩻ/ဖြာꩻဖြာꩻ ကဒင်ႏမျောက်ဒါႏ သဘာပတိယို ကေားကန်ႏကွက်ရဲးခါꩻသား မဉ်ႏအဝ်ႏလဲ့ ကအီႏဒင်ႏမျောက်ထွိုက်ဒါႏ သဘာပတိပုဂ္ဂိုလ်ႏ မဉ်ꩻစာႏရင်ꩻယို တဲမ်းဒင်ႏထွူစေးလာႏလောင်းတဲင် ကွီနေးဗာႏဆန္ဒမဲး စေးလာႏလောင်း၊ မဉ်ႏတမွေးတဝ်းလဲ့ ထွဉ်ႏအွဉ်ႏထွိုင်ႏနေးစူ၊ မဉ်ႏတမွေးတဝ်းလဲ့ ထွဉ်ႏအုံထွိုင်ႏနေးလဲ့ လꩻဒျာႏနဝ်ꩻသွူ။ ဆန္ဒမဲးစေးလာႏလောင်း တရိုꩻတဝ်း၊ အွဉ်ႏထွိုင်ႏနေးစူတရိုꩻတဝ်း၊ အုံထွိုင်ႏနေးတရိုꩻတဝ်း ယိုသွံစွိုး အစွိုးမုဲင်ꩻမရိုꩻ မဲးကလꩻအာဒါႏပုဂ္ဂိုလ်ႏအပါꩻ/ဖြာꩻနဝ်ꩻ ဒင်ႏမျောက်ဗာႏ သဘာပတိနဝ်ꩻသွူ။ တောင်ꩻသေꩻ/ ကအီႏဒင်ႏသဘာပတိယို မဉ်ႏမော့ꩻမွေး အယပ်ꩻအခုဲင်ႏနဝ်ꩻ ဆုဲင်ꩻသွတ်ꩻအနေႏ ဒင်ႏယို့ꩻဗာႏနေး ခေတ္တသဘာပတိနဝ်ꩻသွူ။ "သဘာပတိပုဂ္ဂိုလ်ႏ လꩻထွိုက်အခွင်ꩻအရေꩻတွမ်ႏ အာႏဏာႏဖုံႏနဝ်ꩻ" ၁။ ပရိဿတ်ကကျွꩻလွဉ်ဒါႏ ပွယ်ꩻမော့ꩻခွဲးတွမ်ႏ အစွိုꩻသားကကျွꩻလွဉ်ဒါႏ ပွယ်ꩻမော့ꩻခွဲးပုဂ္ဂိုလ်ႏဖုံႏအေလာင်းယို စီꩻကန်ꩻဥပဒေႏအတွိုင်ꩻ အုပ်ချုပ်ဒေါ့ꩻခွင်ꩻအောဝ်ႏ။ ၂။ ပွယ်ꩻမော့ꩻခွဲးကို ကကျွꩻလွဉ်ဒါႏ အမျာꩻပရိဿတ်ဖုံႏ နီနမ်းယို ပရိဿတ်ဖုံႏ ခံႏနွမ်ꩻရိုႏသေႏထွိုက်။ ၃။ ပွယ်ꩻမော့ꩻခွဲးကို အခိန်ႏမုဲင်ꩻမရိုꩻ ကပွိုင်းဝွို့စပ်ဆွိုင်ꩻဒါႏ တွမ်ႏနီထာꩻမာꩻတဖူꩻရဲဉ်ႏဖုံႏယို ဒေါ့ꩻခွင်ꩻအောဝ်ႏ။ (ကွယ်ႏတွော့ꩻ နီငေါဝ်းယို ဒေါ့ꩻလဲ့ ဖေႏကဒေါ့ꩻဗာႏဆေ့ꩻ၊ အဓိပ္ပါယ်ႏလဲ့ ဖေႏကအဝ်ႏနဝ်ꩻ ထွားဒေါ့ꩻဗာႏနဝ်ꩻသွူ။) ၄။ ကစပ်ဆွိုင်ႏဒါႏတွမ်ႏ ပွယ်ꩻမော့ꩻခွဲး အစီႏအစဲဉ်ႏဖုံႏနဝ်ꩻလဲ့ ဖျင်ခွင်ꩻအဝ်ႏ(ကွယ်ႏတဲင် ကမာꩻရီးသေꩻခါꩻအစီႏအစဲဉ်ႏအတွိုင်ꩻ မဉ်ႏထွားမာꩻလွဉ်ꩻနဝ်ꩻဟောဝ်ငါႏ၊ မဉ်ႏမဉ်ဖျင်လဲ့ ကွီသွော့ အစွိုꩻသားဆန္ဒသွူ။ ၅။ အဓိပ္ပါယ်ႏဆေ့ꩻ၊ အကျိုꩻတအဲဉ်ထောဝ်းငေါဝ်းမျိုꩻတွမ်ႏ တစပ်ဆွိုင်ႏတဝ်း နီထာꩻမာꩻတဖူꩻရဲဉ်ႏဖုံႏ ပါꩻမဉ်ႏဒေါ့ꩻလဲ့ ရဲးပေ့ꩻခါꩻခွင်ꩻအောဝ်ႏ (ရဲးပေ့ꩻခါꩻ မဉ်ႏတနွောင်ꩻတဝ်းခါ ကွီလွေꩻအစွိုꩻသား အကူႏအညီႏ)။ ၆။ ပုဂ္ဂိုလ်ႏအပါꩻ/အဖြာꩻမုဲင်ꩻတရိုꩻတဝ်း ကအီႏဖေႏကျံႏဉာဏ်ႏဒါႏနီ တွမ်ႏထာꩻမာꩻယံအောင်ႏမျင်ႏအတာႏ ကလိုႏဒင်ႏသွင်ꩻသား မဉ်ႏအောဝ်ႏလဲ့ ဖေႏခွင်ꩻလꩻနွောင်ꩻ။ ၇။ ထာꩻမာꩻအစွိုးမုဲင်ꩻ၊ အမျိုꩻမုဲင်ꩻတရိုꩻတဝ်း မဉ်ႏသျွုတ်တရိန်စိန်ႏစွော့ꩻဒါႏလဲ့ ထူႏဗာႏဆန္ဒမဲး၊ ဆန္ဒမဲး မဉ်ႏတခုဲင်ႏထွူတောဝ်းလဲ့ ဆွတ်ဗာႏလုဲင်ႏမွူးနီꩻ၊ ကအီႏဆွတ်ဒါႏ မွူးနီꩻနဝ်ꩻလဲ့ အနီꩻမုဲင်ꩻ လာမုဲင်ꩻ ဆွုန်ꩻဖျတ်ခွင်ꩻအဝ်ႏနဝ်ꩻသွူ။ "သဘာပတိ တာႏဝွန်ႏတွမ်ႏဝွတ္တရာꩻ" ဝင်ꩻကလွိုက်ဒင်ႏမျောက်ဒါႏ သဘာပတိယို ကထွာသဘာပတိပုဂ္ဂိုလ်ႏ အွဉ်ႏသတိꩻဗာႏအချက်နဝ်ꩻ- ၁။ ကခွုမ်မာꩻ ဆောင်ႏရွက်လွေꩻဖေႏဒါႏ ထာꩻမာꩻတဖူꩻရဲဉ်ႏဖုံႏယို သေနာႏဗာႏ။ ၂။ ထာꩻမာꩻအစွိုးမုဲင်ꩻ အမျိုꩻမုဲင်ꩻမရိုꩻ ထာꩻမာꩻမန်ႏသမျဖုံႏယို သꩻပါပါတဲင် သွိုꩻသွိုꩻသွင်ႏသွင်ႏဗာႏ။ ၃။ ပွယ်ꩻမော့ꩻခွဲး အခိန်ႏဖေႏကလို့ဆေ့သွူတကာႏတောဝ်း အခိန်ႏသွုမ်ꩻခြိန်ကရိုꩻနဝ်ꩻ ဖေႏကအဝ်ႏဗာႏမွိုန်းနောဝ်ꩻ ပါꩻကဒေါ့ꩻဒါႏငေါဝ်းဖုံႏယို နာႏစဲင်းစဲင်းထွူတဲင် ငေါဝ်းအမျိုꩻတမွေးတဝ်း၊ ငေါဝ်းကပွိုင်းခတ်ꩻအီဒါႏဝင်ꩻအမျိုꩻဖုံႏတွမ်ႏ ငဝ်းသျွုတ်ငေါဝ်းတရိန်ဖုံႏနောဝ်ꩻ ပေ့ꩻရဲးသေꩻခါꩻဗာႏ။ ၄။ ဖစ်ဟဲ့ꩻလွဉ်သွူ ပွယ်ꩻမော့ꩻခွဲးတဲင် ပွယ်ꩻမော့ꩻခွဲးအယံတွင်ꩻ အစွိုꩻစီꩻကန်ꩻဥပဒေႏဖုံႏယို သေနာႏစဲင်းစဲင်းထွူတဲင် အစွိုꩻသားအလောင်း အုပ်ချုပ်နွောင်ꩻနွောင်ꩻဗာႏ။ ၅။ အစွိုꩻသား ဖေႏနေးကရိုႏသေႏခံႏနွမ်ꩻထွိုက်နဝ်ꩻလဲ့ ချင်းခေႏအုံအဝ်ႏလွေꩻဗာႏ။ ၆။ ပွယ်ꩻမော့ꩻခွဲးကို ကကျွꩻလွဉ်ဒါႏ ပရိဿတ်ဖုံႏ ယံသေရီးဗာႏအခရာႏတဲင် ထာꩻမာꩻတဖူꩻရဲဉ်ႏတွမ်ႏ တဖူꩻရဲဉ်ႏအကို ခွုမ်မာꩻပွုံႏနယ်ꩻဖုံႏယို ရီးအွဉ်အစ ပထမအနေႏ ဒေါ့ꩻအွဉ်ဖေႏဗာႏ ငဝ်းပလ္လင်ႏခံႏ။ ၇။ ပွယ်ꩻမော့ꩻခွဲးကို ကကျွꩻထင်ႏလွဉ်ဒါႏ ပရိဿတ်တွမ်ႏအစွိုꩻသား သꩻဖေႏကချံꩻသာႏနဝ်ꩻ ဒေါ့ꩻဖေႏငေါဝ်းအွီႏငွါသာႏ။ ၈။ ပွယ်ꩻမော့ꩻခွဲးအယံတွင်ꩻ ပုဂ္ဂိုလ်ႏတပါꩻပါꩻ/ဖြာꩻဖြာꩻ ကထွိုင်ႏဒင်ႏသွင်ꩻဒါႏ ငဝ်းတခုဲင်ႏသွတ်ꩻတဝ်းဒွိုန်းတဲင် တဖြာꩻမဉ်ႏထွိုင်ႏယားနဝ်ꩻလဲ့ ရဲးသေꩻခါꩻဖေႏဗာႏ။ ၉။ လိုꩻကမာꩻတရိန် ယားကုဲင်ဒါႏ ပွယ်ꩻမော့ꩻခွဲးသား မဉ်ႏပေါႏလွဉ်လဲ့ ကအီႏဒေါ့ꩻနွောင်ꩻဒါႏဝွေꩻယို သတ္တိဗျတ္တိအဝ်ႏဗာႏ။ ၁၀။ ပွယ်ꩻမော့ꩻခွဲးစီꩻကန်ꩻအတွိုင်ꩻ ယံတရွို့ꩻထန်ႏဗာႏမွိုန်း ထာꩻမာꩻတဖူꩻရဲဉ်ႏဖုံႏနဝ်ꩻ ထွားဆောင်ႏရွက်လွေꩻဗာႏ။ ၁၁။ ပွယ်ꩻမော့ꩻခွဲးကို လိုꩻကထိန်ညင်ꩻဒါႏဝင်ꩻသား မဉ်ႏပေါႏလွဉ်ဒါႏနဝ်ꩻ လွောက်ꩻမွိုန်းမဲ့ငါပေႏမဲ့ငါတန်တဲင် နေးဒျာႏတွမ်ႏထာꩻမဲဉ်ႏတရာꩻအတွိုင်ꩻ ထွားဒေါ့ꩻလွေꩻဖေႏဗာႏ။ ၁၂။ စီꩻကန်ꩻကိုလဲ့ တပါတဝ်း၊ တွမ်ႏတမဲဉ်ႏတနꩻသော့ꩻတဝ်း စီꩻကန်ꩻကိုတဲင် ဝင်ꩻမဉ်ႏဒေါ့ꩻလဲ့သင်၊ ကထွဉ်ႏတေားဝင်ꩻဒေါ့ꩻလဲ့သင် မဉ်ႏသေမဉ်ႏဟွိုန် မဉ်ႏထီႏနဝ်ꩻလဲ့ တလဲင်ႏချင်ꩻ ဖေႏကဆွုန်ꩻဖျတ်နွောင်ꩻ ဉာဏ်ႏအဝ်ႏဗာႏ။ ၁၃။ ဩဇာႏအာႏဏာႏ ဂွုဏ်ႏကျက်သရေႏဖုံႏနဝ်ꩻလဲ့ ဖေႏနေးကအဝ်ႏဒင်ႏလွေꩻနွောင်ꩻဗာႏ အမျာꩻပရိဿတ်အလောင်း။ ၁၄။ အစွိုꩻသားဖုံႏ ကထင်းဒါႏအဟောဝ်တဲင် ကအီႏဒင်ႏသွင်ꩻဒါႏငေါဝ်းဖုံႏနဝ်ꩻ အွဉ်ႏစွꩻဖေႏဗာႏအခွင်ꩻ။ ၁၅။ အစွိုꩻသား ကဒင်ႏသွင်ꩻဒါႏငဝ်းဖုံႏ၊ ကဖျင်ထွိုက်ဒါႏ ဥပမာႏ-နုဲင်းစီꩻကန်ꩻချက်တရိုꩻတဝ်း၊ ထာꩻမာꩻတဖူꩻရဲဉ်ႏတရိုꩻတဝ်း စတဲင်စားယိုဖုံႏနဝ်ꩻ ကွီသွူဆန္ဒ အစွိုꩻသားလောင်းတဲင် ဆွုန်ꩻဖျတ်ဖေႏဗာႏနဝ်ꩻသွူ။ ၁၆။ ပွယ်ꩻမော့ꩻခွဲးမဉ်ႏထွူနဝ်ꩻ ထူႏသိမ်ꩻချာဖေႏဗာႏ အခန်ꩻ(အနာꩻ)နဝ်ꩻသွူ။[၁][၂][၃]